Madzrungula Lamanene Lama Tsraliwiki hi Luka 3:1-38
3 Hi lembe dzra wu 15 dzra ku fuma ka Tiberiyu Khezari, na Pontiyu Pilatu a li govhernadori wa Yudeya, Heroda* a li govhernadori* wa muganga wa Galileya, Filipi makwavu wa Heroda a li govhernadori wa miganga ya Ituriya ni Trakonita, nakone na Luzaniya a li govhernadori wa muganga wa Abilene,
2 a masikwini ya muprista lwenkulu Anasi na Kayafasi, Xikwembu Nkulukumba a khanele na Yohane n’wana wa Zakariya a mananga.
3 Xileswo Yohane a fambafambe a migangeni hinkwayu leyi nga matlhelweni ka Yordani, a zrezrela vhanu leswaku va babatisiwa va kombisa leswaku va tisolile akuva va ta dzrivaleliwa swidoho swavu,
4 hi lani swi tsraliwiki ha kone ka buku dzra muprofeta Ezaya lweyi a tiki: “Ku ni lweyi a huwelelaka a mananga a ku: ‘Lulamiselani ndlela ya Yehovha! Basisani tindlela take.
5 Seletelani minkova hinkwayu, mi hohlota tinhava hinkwatu ni maganga; wololoxani tindlela leti gombonyokiki, mi lunghisa ni tindlela leti nga ni swikhele;
6 kutani vhanu hinkwavu va ta vona ndlela leyi Xikwembu Nkulukumba a taka huluxa ha yone.’”
7 Xileswo a sungula ku byela switsrhungu leswi a swi buya akuva a ta swi babatisa, a ku: “N’wine vana va tinyoka leti nga ni mahlungu,* i mani a nga mi byela leswaku mi nga huluka mahlundzru lawa ma buyaka?
8 Yentxani mintizro leyi kombisaka leswaku ma tisola. Mi nga tibyeli mi ku: ‘Hi vana va Abrahamu.’ Hikusa na mi byela, Xikwembu Nkulukumba a nga swi kota ku hambela Abrahamu vana hi mazribye lawa.
9 Nakunene, a kawula* dzri lulameli ku tsrema timitsru ta minsinya. Kutani nsinya wun’wana ni wun’wana lowu kalaka wu nga pswali mihandzru leyinene wu ta tsremiwa wu txukumeteliwa ndzrilweni.”
10 Kutani a switsrhungu a swi mu vutisa swi ku: “Hi fanela ku yentxa yini?”
11 A va hlamula a ku: “Lweyi a nga ni swiyambalu swibidzri a a teki xin’we a nyika lweyi a xi pfumalaka, nakone lweyi a nga ni swakuda a a pumbelani ni lweyi a nga liki na swone.”
12 Nambi vahakelisi va tinemba va tile akuva va babatisiwa, kutani va mu vutisa va ku: “Mudondzrisi, hi fanela ku yentxa yini?”
13 A va hlamula a ku: “Mi nga hakelisi vhanu swa ku tlula leswi mi zrumiwiki swone.”
14 A masotxha na wone a ma mu vutisa ma ku: “Hi fanela ku yentxa yini?” Kutani a a ma hlamula a ku: “Mi nga tekeli vhanu mali hi nkanu kumbe ku lumbeta van’wana, kambe yanelisekani hi leswi mi holeliwaka swone.”*
15 Leswi vhanu a va yimeli Kriste, hinkwavu a va tivutisa mayelanu na Yohane va ku: “Xana a hi yene Kriste lweyi?”
16 Yohane a va hlamula hinkwavu a ku: “Mine, ni mi babatisa hi mati, kambe lweyi a nga ni ntamu ku ni tlula awa ta, nakone a swi ni faneli ku tlhantlha tingoti ta masandaliya yake. Yene a ta mi babatisa hi moya wa ku xwenga ni hi ndzrilo.
17 A tamele xitizro xa ku hehezra ha xone* akuva a hambanisa trigu ni mavivi a va a basisa mbangu wa ku hehezrela ka wone kutani a teka trigu a dzri txhela tsrhaleni kambe a mavivi a ma hisa hi ndzrilo lowu nga timekiki.”
18 A hlaye mintxhumu yin’wana ya yinyingi leyi tiyisiki vhanu, a tlhela a ya mahlweni a va zrezrela madzrungula lamanene.
19 Kambe leswi Heroda lweyi a a li govhernadori a kawukiwiki hi Yohane hi mhaka ya Herodiya nsati wa makwavu wa Heroda ni hi mhaka ya mintxhumu hinkwayu ya ku biha leyi Heroda a a yi yentxile,
20 Heroda a tlhele a yentxa swin’wana swa ku biha: A pfalele Yohane a djele.
21 Nkama lowu vhanu hinkwavu va babatisiwiki, Yesu na yene a babatisiwile. Loko a li ku khongoteni, a matilo ma pfuleka
22 a moya wa ku xwenga wu xikela henhla kwake na wu ni xivumbeko xa tuva, ku gama ku twala zritu ledzri humaka hi le tilweni dzri ku: “U N’wananga lweyi a zrandzrekaka; ni ku yamukelile.”
23 Loko Yesu a sungula ntizro wake, a a ni kolomu ka 30 wa malembe, nakone hi lani a a tiviwa ha kone, a a lin’wana wa Yosefa,n’wana wa Heli,
24 n’wana wa Matati,n’wana wa Levhi,n’wana wa Melki,n’wana wa Yanayi,n’wana wa Yosefa,
25 n’wana wa Matatiya,n’wana wa Amosi,n’wana wa Nahume,n’wana wa Exili,n’wana wa Nagayi,
26 n’wana wa Mahati,n’wana wa Matatiya,n’wana wa Semeyi,n’wana wa Yoseki,n’wana wa Yoda,
27 n’wana wa Yowanani,n’wana wa Resa,n’wana wa Zerubabele,n’wana wa Salatiyele,n’wana wa Neri,
28 n’wana wa Melki,n’wana wa Adi,n’wana wa Kosama,n’wana wa Elmadama,n’wana wa Heri,
29 n’wana wa Yesu,n’wana wa Eliyezere,n’wana wa Yorimi,n’wana wa Matati,n’wana wa Levhi,
30 n’wana wa Simeyoni,n’wana wa Yudasi,n’wana wa Yosefa,n’wana wa Yonama,n’wana wa Eliyakimi,
31 n’wana wa Meleya,n’wana wa Mena,n’wana wa Matata,n’wana wa Natani,n’wana wa Davhida,
32 n’wana wa Yese,n’wana wa Obede,n’wana wa Bowasi,n’wana wa Salmoni,n’wana wa Nasoni,
33 n’wana wa Aminadabi,n’wana wa Arni,n’wana wa Hezroni,n’wana wa Faresi,n’wana wa Yuda,
34 n’wana wa Yakobe,n’wana wa Izaki,n’wana wa Abrahamu,n’wana wa Tera,n’wana wa Nakori,
35 n’wana wa Seruki,n’wana wa Ragawu,n’wana wa Faleke,n’wana wa Ebere,n’wana wa Sala,
36 n’wana wa Kayinami,n’wana wa Arfaxade,n’wana wa Xeme,n’wana wa Nowa,n’wana wa Lameki,
37 n’wana wa Metusela,n’wana wa Enoki,n’wana wa Yarede,n’wana wa Mahalalele,n’wana wa Kayinami,
38 n’wana wa Enosi,n’wana wa Seta,n’wana wa Adamu,n’wana wa Xikwembu Nkulukumba.
Tintlhamuxelo ta le hansi
^ Heroda Atinpasi. Vona Ntlhamuxelo Wa Mazritu.
^ Hi ku kongoma: “mutetrarka”.
^ Kumbe: “vhenene”.
^ Kumbe: “txhati”.
^ Kumbe: “leswi mi swi kumaka”.
^ Lexi i xitizro xa ku tsrhama ingiki i garfu, xa mpimu wa fotxholo.
