Levhitika 5:1-19
5 “‘Loko mhunu wa kukazri a vona* mhunu mun’wana na a doha kumbe ku tiva hi ta xidoho lexo, kutani a twa leswaku ku vitaniwa timboni akuva ti ya nyikela wumboni mayelanu ni xidoho lexo,* kambe a nga yi a ya byi nyikela a ta va ni nandzru nakone a ta tihlamulela hi kola ka xihoxo xake.
2 “‘Kumbe loko mhunu wa kukazri o khumba ntxhumu lowu kalaka wu nga basanga, ku nga ha va ntsrumbu wa xihazri xa nhova lexi kalaka xi nga basanga,* wa xifuyu lexi kalaka xi nga basanga, kumbe wa xin’we xa swihazrahazrana* leswi kalaka swi nga basanga, a ta va lweyi a nyamiki* nakone a ta va ni nandzru nambiloko e swi khumba na a nga swi xiyi.
3 Kumbe loko mhunu wa kukazri o txhuka a khumba mhunu lweyi a kalaka a nga basanga kumbe ntxhumu lowu kalaka wu nga basanga, na a nga swi xiyi, leswi nga mu yentxaka a va lweyi a nyamiki, a gama a swi tiva, a ta va ni nandzru.
4 “‘Loko mhunu wa kukazri, na a nga swi xiyi, a hamba xihlambanyu hi magugu xa leswaku a ta yentxa ntxhumu wa kukazri, ku nga ha va ntxhumu lowunene kumbe wa ku biha, swi nge na mhaka leswaku i yini ntxhumu wa kone, kambe a gama a swi xiya leswaku a gigisekele ku hlambanya, a ta va ni nandzru.*
5 “‘Loko a va ni nandzru hi wun’we wa mintxhumu leyi, a fanela ku ya hlaya leswaku he xini xidoho lexi a xi yentxiki.
6 Handle ka leswo, a ta buyisa gandzrelo dzrake dzra nandzru ka Yehovha hi kola ka xidoho lexi a xi yentxiki, ku nga xihazri xa pswele xa le ntlhambini wa tihamba kumbe wa timbuti; ku nga ha va xihambana xa pswele kumbe ximbutana xa pswele, akuva dzri va gandzrelo dzra xidoho. Kutani a muprista a ta mu kombelela ku dzrivaleliwa xidoho xake.
7 “‘Kambe loko a nga na makotela ya ku humesa hamba, a fanela ku buyisela Yehovha swivambalana swibidzri kumbe swituvana swibidzri swanga gandzrelo dzrake dzra nandzru hi kola ka xidoho lexi a xi yentxiki; xin’we xi va xa gandzrelo dzra xidoho, lexin’wana xi va xa gandzrelo dzra ku hisiwa.
8 A fanela ku swi heketa ka muprista lweyi ku sungula a taka teka xin’we xi va xa gandzrelo dzra xidoho, a va a xi tsrema nkolo hi n’wala kambe a nga khatluli nhloko.
9 A ta xwanya ngatinyana ya gandzrelo dzra xidoho a tlhelweni ka altari kambe leyi salaka yi ta txhululiwa tlhelweni ka khumbi dzra altari, hi le hansi. I gandzrelo dzra xidoho.
10 A ta teka lexin’wana xi va gandzrelo dzra ku hisiwa hi ku landzra mayentxela lama tolovelekiki, kutani a muprista a ta mu kombelela ku dzrivaleliwa hi kola ka xidoho lexi a xi yentxiki, kutani a ta dzrivaleliwa.
11 “‘Loko a nga na makotela ya ku humesa swivambalana swibidzri kumbe swituvana swibidzri akuva swi va gandzrelo dzra xidoho xake, a fanela ku humesa kolomu ka kilu* dzra mapa lamanene akuva ma va gandzrelo dzra xidoho. A nga fanelanga a txhela mafuzra kumbe olibanu ka mapa lawo hikusa i gandzrelo dzra xidoho.
12 A ta ma yisa ka muprista kutani a muprista a ta nunsa ya voko akuva ma yimela gandzrelo hinkwadzru,* a va a ma hisa ma mpukuka a altarini a henhla ka magandzrelo lama hiseliwiki Yehovha hi ndzrilo. I gandzrelo dzra xidoho.
13 Hi ndlela leyo, a muprista a ta kombelela mhunu lweyo ku dzrivaleliwa xidoho lexi a nga ha vaka a xi yentxile ka swidoho leswo, kutani a ta dzrivaleliwa. Leswi swi taka sala ka gandzrelo ledzro swi ta lumba muprista, hi lani swi yentxiwaka ha kone ka gandzrelo dzra tinhleke.’”
14 Yehovha a ya mahlweni a byela Moxe a ku:
15 “Loko mhunu wa kukazri o txhuka a nga dumbeki, a va hi mphazamu a tlula nawu mayelanu ni mintxhumu ya ku xwenga ya Yehovha, a fanela ku buyisela Yehovha hamba ya xinuna swanga gandzrelo dzra nandzru; a muprista a ta hlaya leswaku ku fanela ku va hamba leyi dzringanaka mali muni ya prata hi ku ya hi mpimu wa xekele* lowu a wu tizrisiwa mbangwini wa ku xwenga.*
16 Nakone leswi a doheliki mbangu wa ku xwenga a ta hakela xidoho lexo a tlhela a yengesela 20 wa mapursentu ka mali yoleyo, a ta swi nyikela ka muprista* akuva hi hamba ya xinuna ya gandzrelo dzra nandzru a muprista a mu kombelela ku dzrivaleliwa, kutani a ta dzrivaleliwa.
17 “Loko mhunu a txhuka a doha hi ku yentxa ntxhumu wa kukazri ka mintxhumu leyi Yehovha a hlayaka leswaku a yi fanelanga yi yentxiwa, nambiloko a nga swi xiyi a ta tama a va ni nandzru, futsrhi a ta tihlamulela hi kola ka xihoxo xake.
18 A fanela ku heketa hamba ya xinuna ka muprista hi ku ya hi ntsrengo lowu hlayiwaka* hi muprista swanga gandzrelo dzra nandzru. Kutani a muprista a ta mu kombelela ku dzrivaleliwa hi kola ka xihoxo lexi a xi yentxiki na a nga swi tivi, kutani a ta dzrivaleliwa.
19 I gandzrelo dzra nandzru. Nakunene a ve ni nandzru hi ku dohela Yehovha.”
Tintlhamuxelo ta le hansi
^ Kumbe: “Loko hika dzra kukazri dzri vona”.
^ Hi ku kongoma: “zritu dzra xizruku (xihlambanyu)”. Swi tikomba na ku hlayiwa ku twa swa kukazri mayelanu ni xidoho lexi patsraka xizruku lexi hlayiwiki mayelanu ni mudohi kumbe mayelanu ni mboni leyi yaliki ku nyikela wumboni byolebyo.
^ Kumbe: “lexi nyamiki”.
^ A swihazrahazrana leswi hlayiwaka lani, ku hlayiwa swihazrana swa switsrongo swa le misaveni, matini ni leswi swi hahaka.
^ Kumbe: “a ta va lweyi a kalaka a nga basanga”.
^ Swi tikomba na mhunu lweyi a nga xi hetisisi xihlambanyu xake.
^ Hi ku kongoma: “swa wukhume swa mpimu wa efa”. Yana ka: Dondzra Swin’wana B14.
^ Kumbe: “akuva ma va gandzrelo dzra xidzrimuxo”.
^ A xekele dzrin’we a dzri dzringana 11,4 wa magrama. Yana ka: Dondzra Swin’wana B14.
^ Kumbe: “hi ku ya hi xekele dzra ku xwenga”.
^ Ku hlayiwa hamba ni mali ya ku dzriha nandzru.
^ Kumbe: “wu koxiwaka”.
