Hagayi 1:1-15
1 Hi lembe dzra wubidzri dzra ku fuma ka Hosi Dariyosi, hi siku dzra ku sungula ka hweti ya wu 6, Zerubabele govhernadori wa Yuda, n’wana wa Salatiyele na muprista lwenkulu Yoxuwa, n’wana wa Yehozadaki, hi ku tizrisa muprofeta Hagayi* va yamukeli mazritu lawa ya Yehovha:
2 “Yehovha wa makhandzra a li: ‘A vhanu lava va li: “A nkama wa kuva Yehovha a yakeliwa* yindlu* a wu si na tlhasa.”’”
3 Kutani hi ku tizrisa muprofeta Hagayi, Yehovha a tlhela a va byela a ku:
4 “Xana i nkama wa kuva mi tsrhama ka tiyindlu tenu, leti yakiwiki hi mapulangu ya ku xonga nakasi yindlu yanga yi hohlokelile?
5 Yehovha wa makhandzra a li: ‘Yanakanyisisani ha hombe hi leswi mi swi yentxaka.
6 Mi byala timbewu ta tinyingi kambe mi tsrhovela switsrongo. Ma da kambe a mi xuzri, ma nwa kambe a mi yaneliseki. Ma yambala kambe a mi kufumeli. Lweyi a tizraka a peta muholo wake ka paxta ledzri boxekeliki.’”
7 “Yehovha wa makhandzra a li: ‘Yanakanyisisani ha hombe hi leswi mi swi yentxaka.’
8 “‘Tlhantukani nhaveni mi buyisa mapulangu. Yakani yindlu akuva mi nyonxa ha yone ni va ni twalisiwa,’ ku hlaya Yehovha.”
9 “‘A mi yimele ku kuma mintxhumu ya yinyingi kambe mi kume yitsrongo; nakone loko mi buyise mintxhumu yoleyo ya yitsrongo a ndlwini, ni yi hangalasile hi moya wanga. Ha yini?’ Ku hlaya Yehovha wa makhandzra. ‘Hikusa yindlu yanga yi hohlokelile, na mun’wana ni mun’wana wenu a khomekile hi ku bekisa yindlu yake.
10 Hi kola ka leswo, a matilo lawa ma nga henhla kwenu a ma wisanga hunguva ya wone ni misava a yi humesanga ntsrhovelo wa yone.
11 Ni yentxe leswaku ku va ni dandzra a misaveni ni le tinhaveni, leswi yentxiki leswaku ku va ni ku pfumaleka ka tinhleke, vhinyu, mafuzra ni swimilana. Wene ni swihazri mo xaniseka nakone ku tikazrata kwaku hinkwaku i ka mahala.’”
12 Kutani Zerubabele n’wana wa Salatiyele na muprista lwenkulu Yoxuwa n’wana wa Yehozadaki ni xitsrhungu hinkwaxu, va yingiseta zritu dzra Yehovha Xikwembu Nkulukumba wavu ni mazritu ya muprofeta Hagayi, hikusa Yehovha Xikwembu Nkulukumba wavu a a mu zrumelile. Kutani xitsrhungu xi sungula ku txhava Yehovha.”
13 Hiloko Hagayi muzrumiwa wa Yehovha a byela xitsrhungu mazritu lawa, hi ku landzra leswi a zrumiwiki swone hi Yehovha, a ku: “‘Ni na n’wine’ ku hlaya Yehovha.”
14 Xileswo, Yehovha a susumetela Zerubabele n’wana wa Salatiyele govhernadori wa Yuda, na muprista lwenkulu Yoxuwa n’wana wa Yehozadaki ni xitsrhungu hinkwaxu; kutani va ta va sungula ku tizra a ndlwini ya Yehovha wa makhandzra, Xikwembu Nkulukumba wavu.
15 Leswo swi yentxeke hi lembe dzra wubidzri dzra ku fuma ka Hosi Dariyosi, hi siku dzra wu 24 ka hweti ya wu 6.
Tintlhamuxelo ta le hansi
^ Leswi tlhamuxelaka leswaku “lweyi a pswaliwiki nkhubyini”.
^ Kumbe: “a pfuxeteliwa”.
^ Kumbe: “tempele”.
