Daniyele 11:1-45
11 “Loko ku li mine, ka lembe dzra ku sungula dzra ku fuma ka Dariyosi, wa Mumedo, ni sekelekile akuva ni ya mu tiyisa ni ku mu sizrelela.*
2 Leswi ni taka ku byela swone swoswi i ntiyiso:
“Ka ha ta va ni tihosi tizrazru a Persiya, nakone leyi ya wumune yi ta hlengeleta wukosi bya byinyingi ku tlula letin’wana hinkwatu. Loko yi ta tiya hi kola ka wukosi bya yone, yi ta hlohlotela hinkwatu akuva ti lwa ni mfumu wa Grikiya.
3 “Ku ta va ni hosi ya ntamu, nakone yi ta fuma hi ntamu lowukulu swinene yi tlhela yi yentxa hinkwaswu leswi yi swi djulaka.
4 Nambitanu, loko yi va ni ntamu lowukulu, mfumu wa yone wu ta tsrhoviwa wu va wu yaviwa hi mune wa makhona ya misava* kambe a wu nge ti khalutisiwa ka vana va yone nakone a wu nge ti tama wu va ni ntamu ku fana ni nkama lowu a yi fuma ha wone, hikusa mfumu wa yone wu ta helisiwa* wu va wu nyikiwa van’wana.
5 “Kutani a hosi ya le nyingitimu, ku nga mun’we wa vazrangeli va yone, yi ta va ni ntamu. Kambe hosi yin’wana yi ta va ni ntamu ku yi tlula nakone yi ta fuma hi ntamu lowukulu ngopfu swinene ni wulawuli lebyikulu ku yi tlula.
6 “Ntsrhaku ka malembe ya kukazri va ta hamba xipfumelelanu, nakone a n’wana wa xisati wa hosi ya le nyingitimu a ta yela hosi ya le n’walungu akuva va ya hamba ntwananu. Kambe a n’wana wa xisati wa hosi ya le nyingitimu a ta heleliwa hi ntamu wake nakone a hosi ya le n’walungu yi ta heleliwa hi ntamu wa yone, a n’wana wa xisati a ta nyikeliwa, kun’we ni lava va buyiki na yene, papayi wake ni lweyi a mu tiyisiki a minkameni yoleyo.
7 Xizro xa kukazri xa ndangu wa n’wana wa xisati wa hosi ya le nyingitimu, xi ta teka xitsrhamu xa papayi wa xone nakone xi ta yela masotxha xi yela ni doropa ledzri tiyiki dzra hosi ya le n’walungu, xi ta lwa na vone xi va xi va hlula.
8 Nakone xi ta teka swikwembu swavu swa nsimbi, mintxhumu yavu ya lisima ya prata ni woru, ni swikazrawa xi famba na swone a Egipta. Ku dzringana malembe ya kukazri, xi ta fambela kule ni hosi ya le n’walungu.
9 A hosi ya le n’walungu yi ta hlasela mbangu wa hosi ya le nyingitimu kambe yi ta tlhelela a tikweni dzra yone.
10 “Loko ku li vana va yone,* va ta tilulamisela akuva va ya lwa nakone va ta hlengeleta masotxha ya manyingi ngopfu swinene. Nakunene mun’we wavu* a ta ya mahlweni a va a kukula hinkwaswu ku fana ni ndhambhi. Kambe a ta tlhelela na a lwa yimpi a za a ya tlhasa doropeni dzrake ledzri tiyiki.
11 “Kutani a hosi ya le nyingitimu yi ta hlundzruka yi va yi huma ku ya lwa na yene, leswi liki, ni hosi ya le n’walungu. Yone yi ta hlengeleta xitsrhungu lexikulu kambe a xitsrhungu xi ta nyikeliwa a mavokweni ya hosi yoleyo.
12 Kutani a xitsrhungu xi ta tekiwa. A mbilu ya yone yi ta tikulisa nakone yi ta wisa makume ya madzana; kambe a yi nge ti byi tizrisa a wukulu bya yone.
13 “Kutani a hosi ya le n’walungu yi ta tlhela, yi va yi hlengeleta xitsrhungu lexikulu ku tlula lexa ku sungula nakone a ku heleni ka minkama, ntsrhaku ka malembe ya kukazri, yone nakunene yi ta tlhasa na yi ni masotxha ya manyingi ni mintxhumu ya yinyingi.
14 A minkameni yoleyo, vanyingi va ta sekeleka akuva va lwa ni hosi ya le nyingitimu.
“Nakone a vhanu va tihanyi* va tiko ledzri wene u lumbaka dzrone va ta sekeleka akuva va zama ku yentxa leswaku a xivoniso xa kukazri xi hetiseka, kambe a va nge ti swi kota.
15 “Kutani a hosi ya le n’walungu yi ta tlhasa yi tsrandzrela doropa ledzri tiyisiwiki yi va yi dzri teka. Nakone a masotxha ya hosi ya le nyingitimu a ma nge ti swi kota ku tama ma lwa, nambi ku li vavanuna va yone va ntamu; a va nge ti va ni ntamu wa ku hlula nala.
16 Lweyi a taka buya akuva a lwa na yone* a ta yentxa hinkwaswu leswi a swi djulaka nakone a nga kone lweyi a taka mu hlula. A ta yima Tikweni Dzra Ku Xonga, futsrhi a ta va ni ntamu wa ku helisa valala vake.
17 A ta tiyimisela ku ta ni masotxha hinkwawu ya mfumu wake, va ta yentxa ntwananu na yene; nakone yene a ta hetisisa leswi nga miyanakanywini. A ta pfumeleliwa ku helisa n’wana wa xisati. Kutani a n’wana wa xisati a ta hluleka, futsrhi a nge he ti tama a va wake.
18 A ta tlhela a ya lwa ni matiko lawa ma kumekaka kusuhi ni lwandle nakone a ta teka matiko ya manyingi. Kambe ku ta va ni muzrangeli wa kukazri lweyi a taka helisa tingana leti a vangeliwiki tone hi hosi yoleyo nakone tone ti ta hela. A ta yentxa leswaku ti tlhela hi yone.
19 Yi ta tlhelela ka madoropa lawa ma nga ni mimuru leyi tiyiki ya tiko dzra yone. Swi nge ti yi fambela ha hombe, yi ta wa yi va yi nga ha vi kone.
20 “A xikhundleni xa yone ku ta fuma lweyi a taka yentxa leswaku ku khaluta muhakelisi wa tinemba a mfun’wini lowukulu; nambitanu, ntsrhaku ka masiku ma nga li mangani a ta helisiwa, kambe ku nga li hi mahlundzru kumbe hi yimpi.
21 “A xikhundleni xake ku ta fuma lweyi a voneliwaka hansi, lweyi a nge tiki hloniphiwa a mfun’wini wake; a ta tlhasa hi nkama lowu ku nga ni nsizrelelo* nakone a ta teka mfumu hi wukanganyisi.
22 A ta hlula makhandzra lawa ma fanaka ni ndhambhi nakone ma ta helisiwa; futsrhi a Muzrangeli wa xipfumelelanu na yene a ta helisiwa.
23 Hi kola ka xipfumelelanu lexi va taka xi yentxa na yene, a ta tizrisa wukanganyisi, a ta kuma ntamu hi ku pfuniwa hi ntlawa wa wutsrongo wa vhanu.
24 Hi nkama wa nsizrelelo, a ta nghena a mimbangwini leyinene ngopfu ya xifundzra nakone a ta yentxa mintxhumu leyi vapapayi vake nambi vakokwana vake va kalaka va nga yi yentxanga. A ta yavela vhanu mintxhumu leyi phangiwiki ni ku hamba mazrengu akuva a hlasela mimbangu leyi tiyisiwiki, kambe a ta yentxa leswo ku dzringana nkamanyana.
25 “A ta tinyika ntamu ni xixixi akuva a hlasela hosi ya le nyingitimu na a ni khandzra ledzrikulu. Kutani a hosi ya le nyingitimu yi ta tilulamisela ku ya lwa yimpi na yi ni khandzra ledzrikulu ngopfu swinene ledzri nga ni ntamu. Nakone a nge ti tama a fuma hi mhaka ya mazrengu lawa va taka mu lukela wone.
26 Lava daka swakuda swake swa xiyimu xa le henhla va ta yentxa leswaku a wa.
“Loko ku li khandzra dzrake dzri ta kukuliwa* nakone vanyingi va ta fa.
27 “A tihosi leto tibidzri ti ta tsrhama menzeni wun’we, kambe ti ta va ni nkongometo wa ku biha; ti ta hembelana nakone a ti nge ti hetisisa ntxhumu, hikusa a wugamu byi ta tlhasa hi nkama lowu bekiwiki.
28 “A ta tlhelela* a tikweni dzrake na a ni mintxhumu ya yinyingi ngopfu swinene, nakone a ta tiyimisela ku lwa ni xipfumelelanu xa ku xwenga. A ta yentxa leswi nga miyanakanywini yake a gama a tlhelela a tikweni dzrake.
29 “Hi nkama lowu bekiwiki a ta tlhela a ya hlasela hosi ya le nyingitimu. Kambe ka khambi ledzro swi nge ti fana ni le ku sunguleni,
30 hikusa switimela swa mati swa le Kitimi swi ta mu hlasela, kutani a ta tsrongahatiwa.
“A ta tlhelela a va a txhulula mahlundzru yake a henhla ka xipfumelelanu xa ku xwenga, nakone a ta yentxa leswi nga miyanakanywini yake, a ta tlhelela a va a zron’wekela lava tsrhikaka xipfumelelanu xa ku xwenga.
31 A masotxha yake ma ta ntxhimisa mbangu wa ku xwenga, ku nga khokholo, nakone ma ta yentxa leswaku a gandzrelo dzra siku ni siku dzri nga ha yentxiwi.
“Nakone ma ta beka ntxhumu wa ku nyenyentsa lowu honetelaka.
32 “Hi ku tizrisa mazritu ya wukanganyisi, a ta yentxa leswaku lava tlulaka xipfumelelanu va xandzruka. Kambe vhanu lava tivaka Xikwembu Nkulukumba wavu va ta hlula nakone swi ta va fambela ha hombe.
33 Lava nga ni ku twisisa va ta dondzrisa vhanu vanyingi. Ku dzringana masiku ya kukazri va ta xanisiwa* hi ku hlaseliwa hi xipada, hi ndzrilo, va pfaleliwa djele ni ku tekeliwa mintxhumu.
34 Kambe loko va xanisiwa va ta yamukelanyana mpfunu; nambitanu, vanyingi va ta tipatsra na vone hi mazritu ya wukanganyisi.
35 Van’we ka lava nga ni ku twisisa va ta xanisiwa akuva ku ta yentxiwa ntizro wa wubasisi hi ku tizrisa vone ni leswaku ku yentxiwa wubasisi ku ya tlhasa a wugan’wini; hikusa leswo swa ha li swa nkama lowu bekiwiki.
36 “A hosi yi ta yentxa hinkwaswu leswi yi swi djulaka, nakone yi ta tikulisa ni ku tidzrumisa ka xikwembu xin’wana ni xin’wana; yi ta vulavula mintxhumu ya ku biha mayelanu na Xikwembu Nkulukumba lweyi a tlakukiki ngopfu swinene ku tlula swikwembu hinkwaswu. Swi ta yi fambela ha hombe ku ya tlhasa loko ku hela mahlundzru ya Xikwembu Nkulukumba; hikusa a xiboho lexi Xikwembu Nkulukumba a xi tekiki xi ta hetiseka.
37 A yi nge ti va ni mhaka na Xikwembu Nkulukumba wa vapapayi va yone; nakone a yi nge ti va ni mhaka ni ku navela loku vavasati va nga na kone, nambi ku va ni mhaka ni xikwembu xin’wana ni xin’wana, kambe yi ta tibeka henhla ka hinkwavu.
38 A matsrhan’wini ya leswo, yi ta dzrumisa xikwembu xa makhokholo. Yi ta dzrumisa xikwembu lexi vapapayi va yone va kalaka va nga xi tivanga, hi ku xi nyika woru, prata, mazribye ya lisima ni mintxhumu ya lisima.*
39 Hi ku dumba xikwembu lexi leximpshwa, yi ta hlasela* makhokholo lawa ya ntamu ya kone. Yi ta va dzrumisa ngopfu swinene lava va yi seketelaka, nakone yi ta va yentxa va fuma vhanu vavanyingi. Yi ta yavela mbangu lava taka yi hakela.
40 “A nkameni wa wugamu, a hosi ya le nyingitimu yi ta susumetana ni hosi ya le n’walungu, nakone a hosi ya le n’walungu yi ta mu tela ku fana ni xidzedze, na yi ni tin’qolo ta yimpi, vakhandzriyi va makavhalu ni switimela swinyingi swa mati; yi ta nghena matikweni ya manyingi yi kukula hinkwaswu ku fana ni ndhambhi.
41 Futsrhi yi ta nghena Tikweni Dzra Ku Xonga, nakone matiko manyingi ma ta hluliwa. Kambe lava taka huluka vokweni dzra yone hi lava: Edomu, Mowabu ni xiyenge xa lisima ngopfu swinene xa Vaamoni.
42 Yi ta tama yi hlasela matiko; loko ku li tiko dzra Egipta a dzri nge ti huluka.
43 Yi ta lawula wukosi lebyi fihliwiki bya woru ni bya prata ku patsra ni mintxhumu hinkwayu ya lisima* ya le Egipta. Nakone a Valibiya ni Vaetiyopiya va ta yentxa leswi yi taka va byela swone.*
44 “Kambe ku ta va ni madzrungula lawa ma taka ta hi le wuxeni ni hi le n’walungu lawa ma taka yi kazrata, nakone yi ta huma na yi hlundzruke ngopfu swinene akuva yi helisa vanyingi.*
45 Yi ta dzima matende ya yone ya wuhosi a xikazri ka lwandle ledzrikulu ni nhava ya ku xwenga ya Tiko Dzra Ku Xonga; kambe yi ta helisiwa, futsrhi a ku nge ti va ni lweyi a taka yi pfuna.
Tintlhamuxelo ta le hansi
^ Kumbe: “ni ku va khokholo kwake”.
^ Hi ku kongoma: “mune wa mimoya ya matilo”.
^ Kumbe: “wu ta tsruvuliwa”.
^ Swi tikomba na ku hlayiwa hosi ya le n’walungu.
^ Hi ku kongoma: “yene”.
^ Kumbe: “vana lava vapswele vavu va nga vayivi”.
^ Swi tikomba na ku hlayiwa hosi ya le nyingitimu.
^ Kumbexana: “hi xitxhuketa”.
^ Kumbe: “dzri ta kukuliwa ingiki hiloko dzri kukuliwe hi ndhambhi”.
^ Swi tikomba na ku hlayiwa hosi ya le n’walungu.
^ Hi ku kongoma: “va ta wisiwa”.
^ Kumbe: “leyi navelekaka”.
^ Kumbe: “yi ta hetisisa leswi nga miyanakanywini mayelanu ni”.
^ Kumbe: “leyi navelekaka”.
^ Kumbe: “va ta yi landzrela”.
^ Kumbe: “yi nyikela vanyingi a ku helisiweni”. Vona Ntlhamuxelo Wa Mazritu.
