Tinhlayu 16:1-50
16 Kutani Kora n’wana wa Izihari, n’wana wa Kohati, n’wana wa Levhi, a tipatsra na Dathani na Abiramu vana va Eliyabi, na Oni n’wana wa Pelethi, lava a va li va lixaka dzra Rubeni.
2 Vone kun’we ni 250 wa vavanuna lava va nga Vaisrayele, vavanuna lava va hlawuliwiki makazri ka nhlengeletanu akuva va va vazrangeli va yone nakone va nga vavanuna va ndhuma, va sungula ku holovela Moxe.
3 Va hlengeletana va holovisa Moxe na Aroni va ku: “Hi kazralile ha n’wine! A nhlengeletanu hinkwayu yi xwengile, hinkwavu lava va nga ka yone, nakone Yehovha a na vone. Ha yini n’wine mi tikulisa a mahlweni ka nhlengeletanu ya Yehovha?”
4 Loko Moxe a twa leswo, a tekela ku khinsama a lavisa hansi.
5 A gama a byela Kora ni hinkwavu lava yimaka na yene a ku: “Mundzruku mixweni Yehovha a ta kombisa leswaku i mani lweyi a mu lumbaka, i mani lweyi a xwengiki nakone i mani lweyi a fanelaka ku tsrhindzrekela kwake, kutani lweyi a taka mu hlawula hi yene lweyi a taka tsrhindzrekela kwake.
6 Wene Kora ni hinkwavu lava yimaka na wene yentxani leswi: Tekani swa ku hisela ka swone muzri wa ku nun’hwela,
7 kutani mundzruku mi txhela ndzrilo* ni muzri wa ku nun’hwela mi ya yima mahlweni ka Yehovha; lweyi Yehovha a taka mu hlawula, hi yene lweyi a xwengiki. Mi tlulise mpimu n’wine vana va Levhi!”
8 Ntsrhaku ka leswo, Moxe a byela Kora a ku: “N’wine vana va Levhi, ni kombela mi yingiseta.
9 Xikwembu Nkulukumba wa Israyele a mi hlawulile a makazri ka nhlengeletanu ya Israyele a va a mi pfumelela kuva mi tsrhindzrekela kwake akuva mi hamba ntizro a tabernakeleni dzra Yehovha ni leswaku mi yima a mahlweni ka Vaisrayele akuva mi va tizrela, mi swi vona swi li switsrongo leswo?
10 Xikwembu Nkulukumba a yentxe leswaku u tsrhindzrekela kwake kun’we ni vamakwenu hinkwavu, ku nga vana va Levhi. Swoswi mi djula ni ku va vaprista?
11 Leswo swi kombisa leswaku, wene ni hinkwavu lava yimaka na wene, lava mi hlengeletaniki, mi lwisana na Yehovha. Loko ku li Aroni, e hona yini a ku za mi mu ngurangurela?”
12 Hi ku famba ka nkama Moxe a zrumela leswaku ku vitaniwa Dathani na Abiramu vana va Eliyabi, kambe va ku: “A hi nge ti ya!
13 U li i switsrongo ku va u hi suse tikweni ledzri taliki ngopfu swinene hi leiti ni wulombe akuva u hi tsrhika hi fa lani mananga, swoswi u djula ni ku hi fuma?
14 A mhaka hi leswaku, a wu hi buyisanga a tikweni ledzri taliki ngopfu swinene hi leiti ni wulombe, nambi ku hi nyika masimu kumbe minsinya ya mawuvha akuva swi va pfindla dzrezru. U djula leswaku vavanuna lava va landzrelela wene ingiki hi loko ve fa matihlo? A hi nge ti ya!”
15 Xileswo, Moxe a hlundzruka ngopfu swinene a va a byela Yehovha a ku: “U nga dzri yamukeli gandzrelo dzravu dzra tinhleke. A ni va tekelanga ntxhumu nambi ko va mbongolo yinene, nakone a ni zanga ni yentxela wubihi ni mun’we kwavu.”
16 Xileswo, Moxe a byela Kora a ku: “Mundzruku buyani mi ta yima mahlweni ka Yehovha, wene ni hinkwavu lava ku seketelaka, kun’we na Aroni.
17 Mun’wana ni mun’wana wenu a a titekeli xa ku txhela ka xone muzri wa ku nun’hwela a txhela muzri wa ku nun’hwela, a ya yima mahlweni ka Yehovha. Lava va ku seketelaka va fanela ku va ni 250 wa swa ku txhela ka swone muzri wa ku nun’hwela. Na wene kun’we na Aroni, mun’wana ni mun’wana wenu a fanela ku va ni xa ku txhela ka xone muzri wa ku nun’hwela.”
18 Xileswo mun’wana ni mun’wana wavu a teke xa ku txhela ka xone muzri wa ku nun’hwela, kutani va txhela ndzrilo va va va txhela muzri wa ku nun’hwela va ya yima a nyangweni wa tende dzra ntlhanganu na va li kun’we na Moxe na Aroni.
19 Loko Kora ni lava va yimaka na yene va hlengeletanile a nyangweni wa tende dzra ntlhanganu akuva va lwisana na Moxe na Aroni, a ku phatima ka Yehovha ku humelela henhla ka nhlengeletanu hinkwayu.
20 Hiloko Yehovha a byela Moxe na Aroni a ku:
21 “Titsravukanisani ni ntlawa lowu akuva ni wu helisa swoswi.”
22 Xileswo, va khinsama va lavisa hansi va ku: “Xikwembu Nkulukumba, Xikwembu Nkulukumba, wene u nyikaka wutomi vhanu hinkwavu,* xana u ta hlundzrukela nhlengeletanu hinkwayu hi mhaka ya xidoho xa mhunu mun’we?”
23 Yehovha a byela Moxe a ku:
24 “Byela nhlengeletanu hinkwayu u ku: ‘Tsrhindzrekani kule ni mintxhatxha ya Kora, Dathani na Abiramu!’”
25 Kutani Moxe a suka a yela Dathani na Abiramu na a li kun’we ni vakulukumba va Israyele.
26 Moxe a byela nhlengeletanu a ku: “Ni kombela mi tsrhindzreka kule ni mintxhatxha ya vavanuna lava va ku biha nakone mi nga khumbi ntxhumu ni wun’we lowu wu va lumbaka, akuva mi nga helisiwi hi kola ka xidoho xavu.”
27 Hiloko va tsrhindzreka va ya kule ni mintxhatxha ya Kora, Dathani na Abiramu. Kutani Dathani na Abiramu va huma va yima tinyangweni ta mintxhatxha yavu, na va li kun’we ni vasati vavu, vanavu kun’we ni swivanana swavu.
28 Hiloko Moxe a ku: “Hi ndlela leyi, mi ta swi tiva leswaku i Yehovha lweyi a ni zrumiki ku yentxa mintxhumu leyi hinkwayu ni leswaku a no yi yentxa hi ku tisungulela:
29 Loko vhanu lava vo fa hi ndlela leyi tolovelekiki hi lani vhanu van’wana hinkwavu va faka ha kone, ni loko vo khatisiwa hi ndlela leyi vhanu van’wana hinkwavu va khatisiwaka ha yone, a hi Yehovha a ni zrumeliki.
30 Kambe loko Yehovha o va yentxa ntxhumu wa ku hlamalisa, a misava yi pfuleka yi va minta vone kun’we ni mintxhumu hinkwayu leyi yi va lumbaka, kutani va fulamela Sizreni na va hanya, nakunene mi ta swi tiva leswaku vhanu lava va yeyise Yehovha.”
31 Na a ha ku gama ku hlaya mazritu lawo, lani a va yime kone a misava yi sungula ku pandzreka.
32 A misava yi pfuleka yi va minta kun’we ni mindangu yavu, hinkwavu lava yimiki na Kora ku patsra ni mintxhumu yake hinkwayu.
33 Hi ndlela leyo, hinkwavu lava a yimiki na vone va fulamele Sizreni na va ha hanya yi va misava yi va mbhonya va nyamalala a makazri ka nhlengeletanu.
34 Loko va va twa na va ba nyandha, a Vaisrayele hinkwavu lava a va li matlhelweni kwavu va tsrutsruma na va ku: “Hi txhava leswaku na hine hi nga mintiwa hi misava!”
35 Hiloko ku humelela ndzrilo lowu pfaka hi ka Yehovha wu dlaya 250 wa vavanuna lava a va nyikela muzri wa ku nun’hwela.
36 Kutani Yehovha a byela Moxe a ku:
37 “Byela Eliyazari n’wana wa muprista Aroni leswaku a susa swa ku hisela ka swone muzri wa ku nun’hwela a ndzrilweni hikusa swi xwengile. Mu byeli ni leswaku a teka nkuma a ya wu hangalasa kule ni lahayani.
38 A swa ku hisela ka swone muzri wa ku nun’hwela swa vavanuna lava dohiki, lava hakeliki hi wutomi byavu, swi fanela ku hambiwa swixapana swi va swi namaketiwa a altarini, hikusa swi yisiwe mahlweni ka Yehovha kutani swi va leswi xwengiki. Swi ta tizra swanga xidzrimuxo ka Vaisrayele.”
39 Kutani muprista Eliyazari a teka swa ku hisela ka swone muzri wa ku nun’hwela swa kobri leswi nyikeliwiki hi lava hisiwiki, a hamba hi swone swixapana akuva swi namaketiwa ka altari,
40 hi lani Yehovha a a mu lelete ha kone hi ku tizrisa Moxe. A swixapana leswo a swi tizra swanga xidzrimuxo ka Vaisrayele xa leswaku a ku na mhunu lweyi a kalaka a nga pfumeleliwanga, lweyi a nga liki wa lixaka dzra Aroni, a fanelaka ku tsrhindzrekela akuva a hisa muzri wa ku nun’hwela a mahlweni ka Yehovha, ni leswaku a ku na mhunu lweyi a fanelaka ku fana na Kora ni lava a va yima na yene.
41 Hi mundzruku ka kone, a nhlengeletanu hinkwayu ya Israyele yi sungula ku ngurangurela Moxe na Aroni yi ku: “Hi n’wine vabidzri mi yentxiki leswaku vhanu va Yehovha va dlayiwa.”
42 Nkama lowu vhanu va ha hlengeletaniki akuva va holovisa Moxe na Aroni, va lavisa tende dzra ntlhanganu, va vona leswaku dzri funeketiwi hi tlavi, kutani ku sungula ku humelela ku phatima ka Yehovha.
43 Hiloko Moxe na Aroni va ya a mahlweni ka tende dzra ntlhanganu,
44 kutani Yehovha a byela Moxe a ku:
45 “Sukani makazri ka nhlengeletanu leyi akuva ni tekela ku yi helisa.” Loko va twa leswo, va khinsama va lavisa hansi.
46 Moxe a byela Aroni a ku: “Teka xa ku hisela ka xone muzri wa ku nun’hwela u va u txhela makhala ya ndzrilo lawa ma nga altarini, ni muzri wa ku nun’hwela, u kahlula u ya nhlengeletan’wini u ya yi kombelela ku dzrivaleliwa, hikusa Yehovha a yi kwatelile. Ku sungule ntungu!”
47 Aroni a tekela ku teka xa ku txhela muzri wa ku nun’hwela, hi lani Moxe a mu byeliki ha kone, a tsrutsruma a ya xikazri ka nhlengeletanu. Loko a tlhasa, a kuma leswaku ntungu kutani a wu sungulile. Xileswo, a txhela muzri wa ku nun’hwela ka xa ku hisela ka xone muzri wa ku nun’hwela a va a sungula ku kombelela vhanu ku dzrivaleliwa.
48 A tlhasa a yima makazri ka lava ku fa ni lava ku hanya, hi wugamu a ntungu wu yima.
49 Lava va fiki hi mhaka ya ntungu ku ve 14.700, na ku nga kontiwi lava va fiki hi mhaka ya Kora.
50 Nkama lowu Aroni a tlheleliki ka Moxe a mahlweni ka tende dzra ntlhanganu, a ntungu kutani a wu yimile.
Tintlhamuxelo ta le hansi
^ Swi tikomba na ku hlayiwa makhala ya ndzrilo.
^ Hi ku kongoma: “Xikwembu Nkulukumba wa mahika ya nyama hinkwayu”.
