Tinhlayu 15:1-41
-
Nawu mayelanu ni magandzrelo (1-21)
-
A nawu i wun’we ka Vaisrayele ni valuveli (15, 16)
-
-
Magandzrelo ya swidoho leswi yentxiwaka hi mphazamu (22-29)
-
Xikhatiso hi mhaka ya ku doha hi maxivomu (30, 31)
-
Ku honisa nawu wa Savata swi yentxa mhunu a dlayiwa (32-36)
-
Matxhakala a wugan’wini bya le hansi bya mpahla (37-41)
15 Yehovha a ya mahlweni a byela na Moxe a ku:
2 “Byela Vaisrayele u ku: ‘Loko hi wugamu mi nghena a tikweni ledzri ni mi nyikaka dzrone akuva mi tsrhama ka dzrone,
3 kutani mi nyikela gandzrelo ledzri hiseliwaka Yehovha hi ndzrilo hi ku tizrisa tihomu, tihamba kumbe timbuti, ku nga ha va gandzrelo dzra ku hisiwa, gandzrelo dzra ku hetisisa xihlambanyu xa ku hlawuleka, gandzrelo dzra ku tizrandzrela kumbe gandzrelo ledzri nyikeliwaka hi nguva ya minkhuvu yenu, akuva dzri va nun’hwelo lowu nyonxisaka Yehovha,
4 lweyi a dzri nyikelaka ka Yehovha a fanela ku nyikela ni gandzrelo dzra tinhleke, kolomu ka kilu dzrin’we dzra mapa lamanene,* lawa ma patsriwiki ni mafuzra ya kolomu ka litru dzrin’we.*
5 U fanela ku nyikela ni kolomu ka litru dzra vhinyu swanga gandzrelo dzra swa ku nwa kun’we ni gandzrelo dzra ku hisiwa kumbe gandzrelo dzra xihambana xin’wana ni xin’wana xa xinuna.
6 Loko u nyikela hi hamba, u fanela ku nyikela ni gandzrelo dzra tinhleke dzra makilu mabidzri ya mapa lamanene, lawa ma patsriwiki ni mafuzra lawa ma tlulaka litru.
7 Nakone u fanela ku nyikela vhinyu dzra mpimu lowu tlulaka litru, swanga gandzrelo dzra swa ku nwa, nun’hwelo lowu nyonxisaka Yehovha.
8 “‘Kambe loko u nyikela homu ya xinuna ka Yehovha akuva yi va gandzrelo dzra ku hisiwa, gandzrelo dzra ku hetisisa xihlambanyu xa ku hlawuleka, kumbe magandzrelo ya ku kombela ku zrula,
9 a homu leyo u fanela ku yi nyikela ni gandzrelo dzra tinhleke dzra makilu mazrazru ya mapa lamanene, lawa ma patsriwiki ni mafuzra ya kolomu ka malitru mabidzri.
10 U fanela ku nyikela ni vhinyu dzra kolomu ka malitru mabidzri swanga gandzrelo dzra swa ku nwa, akuva swi va gandzrelo dzra ku hisiwa, nun’hwelo lowu nyonxisaka Yehovha.
11 Leswi hi leswi mi fanelaka ku swi yentxa ka homu yin’wana ni yin’wana ya xinuna, hamba yin’wana ni yin’wana ya xinuna, xihambana xin’wana ni xin’wana xa xinuna kumbe timbuti.
12 Swi nge na mhaka leswaku mi nyikela swihazri swingani, leswi hi leswi mi fanelaka ku swi yentxa ka xihazri ha xin’we, hi ku ya hi nhlayu ya swone.
13 Leswi hi leswi Muisrayele mun’wana ni mun’wana lweyi a nga xipswaliwa xa le Israyele a fanelaka ku dzri nyikelisa xiswone gandzrelo dzra ku hisiwa, swanga nun’hwelo lowu nyonxisaka Yehovha.
14 “‘Loko mhunu wa kukazri lweyi a tsrhamaka na n’wine lweyi a kalaka a nga li Muisrayele, kumbe mhunu wa kukazri lweyi a nga ni malembe manyingi na a tsrhama na n’wine, a nyikela gandzrelo dzra ku hisiwa swanga nun’hwelo lowu nyonxisaka Yehovha, na yene a fanela ku yentxisa xileswi na n’wine mi yentxisaka xiswone.
15 N’wine mi nga Vaisrayele kun’we ni lava va tsrhamaka na n’wine lava va nga liki Vaisrayele, mi ta va ni nawu wun’we. Wu ta va nawu wa hi lani ku nga helikiki a tinxakeni tenu hinkwatu. N’wine ni valuveli mi fanela ku fana a mahlweni ka Yehovha.
16 Ku fanela ku va ni nawu wun’we ni xiboho xin’we xa wuyavanyisi kwenu ni ka lava va tsrhamaka na n’wine swanga valuveli.’”
17 Yehovha a byela Moxe a ku:
18 “Byela Vaisrayele u ku: ‘Loko mi nghena tikweni ledzri ni mi yisaka ka dzrone
19 mi va mi da swakuda swa le tikweni ledzro, mi fanela ku nyika Yehovha xihanano xa kukazri.
20 Mi fanela ku nyikela tinhleke leti kalaka ti nga kandzrekanga ha hombe ta ntsrhovelo wenu wa ku sungula, mi hamba mapawu lawa ma fanaka ni xitlan’wana, mi swi nyikela hi lani mi yentxaka ha kone ka swihanano swa le mbangwini wa ku hehezrela ka wone.
21 A tinxakeni tenu hinkwatu, mi fanela ku nyika Yehovha tinhleke leti kalaka ti nga kandzrekanga ha hombe ta ntsrhovelo wenu wa ku sungula.
22 “‘Loko mo yentxa xihoxo xa kukazri nakone mi tsrhika ku yingiseta swileleto leswi hinkwaswu, leswi Yehovha a swi byeliki Moxe,
23 leswi liki, milawu hinkwayu leyi Yehovha a mi nyikiki yone hi ku tizrisa Moxe, ku sukela hi siku ledzri Yehovha a mi leletiki ha dzrone ku ya tlhasa a tinxakeni tenu hinkwatu,
24 ni loko leswo swe yentxiwa hi mphazamu nakone a nhlengeletanu yi nga swi tivi, a nhlengeletanu hinkwayu yi fanela ku nyikela xihon’wana swanga gandzrelo dzra ku hisiwa akuva xi va nun’hwelo lowu nyonxisaka Yehovha, xi nyikeliwa kun’we ni magandzrelo lawa ma nyikeliwaka na xone, ku nga gandzrelo dzra tinhleke ni gandzrelo dzra swa ku nwa, hi lani swi tolovelaka ku yentxiwa ha kone, ku nyikeliwa ni ximbutana swanga gandzrelo dzra xidoho.
25 A muprista a ta kombelela nhlengeletanu hinkwayu ya Israyele ku dzrivaleliwa, kutani yi ta dzrivaleliwa, hikusa ku ve mphazamu, nakone va buyise xihanano xavu ka Yehovha hi kola ka mphazamu wavu, ku nga gandzrelo ledzri hiseliwaka Yehovha hi ndzrilo ni gandzrelo dzra xidoho.
26 A Vaisrayele hinkwavu kun’we ni valuveli lava tsrhamaka na vone va ta dzrivaleliwa hikusa hinkwavu va swi yentxe hi mphazamu.
27 “‘Loko mhunu wa kukazri o txhuka a doha hi mphazamu, a fanela ku nyikela mbuti ya pswele leyi yo ko va ni lembe dzrin’we akuva yi va gandzrelo dzra xidoho.
28 A muprista a ta kombelela mhunu lweyo ku dzrivaleliwa hi kola ka xidoho lexi a xi yentxeliki Yehovha hi mphazamu; a ta mu kombelela ku dzrivaleliwa, xileswo a ta dzrivaleliwa.
29 Mayelanu ni loko mhunu a txhuka a doha hi mphazamu, ku fanela ku va ni nawu wun’we ka Muisrayele wa mapswaliwa ni le ka mhunu lweyi a hanyaka na vone swanga muluveli.
30 “‘Kambe mhunu lweyi a dohaka hi maxivomu, ku nga ha va Muisrayele wa mapswaliwa kumbe mhunu lweyi a nga muluveli, a va na a zruka Yehovha nakone a fanela ku dlayiwa.
31 Leswi a yeyisiki zritu dzra Yehovha a va a honisa nawu wake, mhunu yelweyo nakunene a fanela ku dlayiwa. A fanela ku tihlamulela hi kola ka xihoxo xake.’”
32 Na Vaisrayele va ha li mananga, va ke va kuma wanuna wa kukazri na a zrolela tihunyi hi siku dzra Savata.
33 Lava va mu kumiki na a zrolela tihunyi va mu teke va mu yisa ka Moxe na Aroni ni le ka nhlengeletanu hinkwayu.
34 Kutani va mu pfalela, hikusa a va nge si na swi tiva leswaku a fanela ku yentxiwa yini.
35 Hiloko Yehovha a byela Moxe a ku: “Wanuna lweyo nakunene a fanela ku dlayiwa, a nhlengeletanu hinkwayu yi fanela ku mu khandla hi mazribye a handle ka mbangu lowu ku dzimiwiki ka wone mintxhatxha.”
36 Xileswo, a nhlengeletanu hinkwayu yi mu humesa handle ka mbangu lowu ku dzimiwiki ka wone mintxhatxha yi va yi mu khandla hi mazribye a fa, hi lani Yehovha a a lelete Moxe ha kone.
37 Yehovha a byela Moxe a ku:
38 “Byela Vaisrayele leswaku va fanela ku tihambela matxhakala a wugan’wini bya le hansi bya mpahla yavu a tinxakeni tavu hinkwatu, nakone va fanela ku zrungela ngoti ya nkuxe* a henhlanyana ka matxhakala wolawo.
39 ‘Mi fanela ku hamba matxhakala lawo akuva mi hamba mi ma vona mi va mi dzrimuka milawu hinkwayu ya Yehovha mi tlhela mi yi landzra. A mi fanelanga mi landzrela ku navela ka timbilu tenu ni ka matihlo yenu, loku ku mi yentxaka mi nga dumbeki kwanga.*
40 A nawu lowu wu ta mi pfuna ku dzrimuka milawu yanga hinkwayu, kutani mi va lava xwengiki ka Xikwembu Nkulukumba.
41 Hi mine Yehovha Xikwembu Nkulukumba wenu, lweyi a mi humesiki tikweni dzra Egipta, akuva ni tiyisekisa leswaku ni Xikwembu Nkulukumba wenu. Hi mine Yehovha, Xikwembu Nkulukumba wenu.’”
Tintlhamuxelo ta le hansi
^ Hi ku kongoma: “swa wukhume swa mpimu wa efa”. A swa wukhume swa mpimu wa efa swi dzringana 2,2 wa malitru. Yana ka: Dondzra Swin’wana B14.
^ Hi ku kongoma: “ya hamfu ya hamfu ya mpimu wa hin”. A hin dzri dzringana 3,67 wa malitru. Yana ka: Dondzra Swin’wana B14.
^ Kumbe: “azul”.
^ Hi ku kongoma: “mi mbuyeta hi tlhelo dzra moya”. Ku hlayiwa ku gandzrela swikwembu swin’wana.
