Vayavanyisi 5:1-31
5 Hi siku ledzro, Debora na Baraki n’wana wa Abinowamu, va yimbelela lisimu va ku:
2 “Dzrumisani Yehovha!Hi mhaka ya leswi vhanu va tinyikeliki hi ku swi zrandzra,Hi mhaka ya leswi masotxha ya Israyele ma kalaka ma nga tsrimbanga misisi.*
3 Yingelani n’wine tihosi! Zreyani ndleve n’wine vafumi!
Ni ta yimbelelela* Yehovha.
Ni ta yimbelela swidzrumiso ni yimbelelela Yehovha Xikwembu Nkulukumba wa Israyele.
4 Yehovha, nkama lowu u sukiki a Seyiri,Nkama lowu a u famba na u sukela tikweni dzra Edomu,A misava yi tsrekatsrekile, ni mpfula yi nile ku sukela a matilweni,A matlavi ma halate mati.
5 A tinhava ti n’qivilikile* a mahlweni ka Yehovha,Nambi nhava ya Sinayi yi n’qivilikile a mahlweni ka Yehovha Xikwembu Nkulukumba wa Israyele.
6 A masikwini ya Xamigari n’wana wa Anati,A masikwini ya Yayele, a switaratu leswikulu a swi nga ha tizrisiwi;A vayendzri a va tizrisa tindlela tin’wana.
7 A ku nga ha na vadzrimi a IsrayeleA va nga ha li kone* ku ya tlhasa loko mine, ina, mine Debora ni sekeleka,Ku ya tlhasa loko ni sekeleka swanga mamana akuva ni pfuna Vaisrayele.
8 Va gandzrele swikwembu swin’wana;Ku va ku pfuka yimpi a tinyangweni ta madoropa.
A ku nga ha voniwi xitlhangu, nambi tlhazriA makazri ka 40.000 wa vavanuna va Israyele.
9 A mbilu yanga yi le ka vazrangeli va masotxha ya Israyele,Lava vone kun’we ni xitsrhungu va tinyikeliki hi ku swi zrandzra akuva va ya ku lweni.
Dzrumisani Yehovha!
10 N’wine mi gadiki timbongolo ta kaxtanyu,N’wine mi tsrhamiki ka matapeti ya ku dula,Na n’wine mi fambaka hi xitaratu,Yanakanyisisani hi mhaka leyi!
11 A mazritu ya lava kelelaka mati ma twiwile na va li mimbangwini leyi ku kiwaka ka yone mati;Kolanu a va vulavula hi mintizro leyi lulamiki ya Yehovha,Ni hi mintizro leyi lulamiki ya vadzrimi va Israyele.
Kutani a vhanu va Yehovha va fulamelile va ya tinyangweni.
12 Sisimuka, sisimuka Wene Debora!
Pfuka, pfuka, yimbelela lisimu!
Sekeleka Baraki! Teka swikazrawa swaku u famba, wene n’wana wa Abinowamu!
13 Kutani lava va saliki va yele lava va ganyiki;A vhanu va Yehovha va ni telile akuva va ta lwa ni valala va Israyele.
14 A ku li Vaefrayimi lava a va li nkoveni,A va na wene, wene Benjamini, a va li kun’we ni masotxha yaku.
A vazrangeli va fulamelile na va sukela a Makhiri,Nakone lava khomaka mintxhumu leyi tizrisiwaka hi mutsrali a va sukela a Zebuloni.
15 A tihosana ta Yisakari a ti na Debora,Nakone leswi Yisakari a a na Debora, Baraki a yentxe leswi fanaka.
A zrumiwe ku ya a nkoveni na a famba hi milenge.
A vana va Rubeni a va ni ku ganaganeka lokukulu.
16 Ha yini u tsrhame makazri ka swidjumba swibidzri,U yingiseta vabyisi loko va txhayela mintlhambi xitiloti?*
A vana va Rubeni a va ni ku ganaganeka lokukulu.
17 Giliyadi a tame a va ka tlhelo ledzrin’wana dzra Yordani;Kasi Dani ke, ha yini a tsrhame kusuhi ni switimela swa mati?*
Axere a tsrhame a nga yentxi ntxhumu a nkingeni wa lwandle,Nakone a tame a va ka mimpolwa yake.*
18 A vana va Zebuloni a va beka wutomi byavu a nghozini lakakuva va nga txhavi ni ku fa;Nambi Naftali a a nga txhavi a mimbangwini leyi tlakukiki.
19 A Tanaki, a kusuhi ni mati ya Megido,Ku te tihosi, ti va ti lwa,A tihosi ta Kanana ti lwile,
Kambe a ti dzri tekanga prata.
20 A tinyeleti ti lwile na ti le matilweni,Ti lwe na Sisera na ti le mimbangwini ya tone.
21 A nambu wa Kixoni wu va kukulile,Nambu wa khale, ku nga nambu wa Kixoni.
Wene hika dzranga,* u pswanyetele lava nga ni ntamu.
22 A masondzro ya makavhalu ma tsrekatsrekise misavaNkama lowu a makavhalu yake ya yimpi ma tsrutsrumaka hi ntamu swinene.
23 A ntsrumi ya Yehovha yi te: ‘zrukani muti wa Merozi,Ina, zrukani vayaki va wone,Hikusa a va tanga va ta ta seketela Yehovha,Va seketela Yehovha hi masotxha.’
24 Lweyi a tovokiki makazri ka vavasati hinkwavu i YayeleNsati wa Heberi, lwe wa Mukena;Hi yene lweyi a tovokiki makazri ka vavasati hinkwavu lava tsrhamaka a matendeni.
25 Sisera a kombele mati; yene a mu nyika leiti.
A mu nyike leiti dzra ku tiya na dzri le ka xibya xa lisima.
26 A nalavute voko a teka xikhokhwana xa tende,Hi voko dzra xinene a khoma hamela ya vatizri.
A gongondzrela a pfotlota nhloko ya Sisera,A yi boxa hi le makazri ka ndleve ni tihlo.
27 A te tundzru a milengeni yake; a wile a tsrhamisisa xiswoswo;A te tundzru, a wa milengeni yake;Lani a weliki kone a tekele ku fela kolanu.
28 A ku ni wansati lweyi a a hlomela hi janela,A mamana wa Sisera a a hlomela hi janela a ku:‘Kasi ha yini a n’qolo yake yi hlwela?
Ha yini a pongo dzra masondzro ya makavhalu yake dzri nga twali ku ta ta tlhasa swoswi?’
29 A vavasati va ku tlhazriha hintamu va le wuhosini va ta mu hlamula;Na yene ha wuswake a ta tihlamula a ku:
30 ‘Kumbexana vo ho yavelana leswi va swi phangiki,Musotxha mun’wana ni mun’wana a nyikiwa n’whanyana mun’we, van’whanyana vabidzri,Tipanu leti phangiwiki nakone ti pendiwiki, ti nyikiwa Sisera,Tipanu leti phangiwiki nakone ti pendiwiki, mpahla leyi xongiseliwiki, panu leyi pendiwiki, timpahla tibidzri leti ti xongiseliwikiAkuva ti bekiwa tinhan’wini ta vaphangi.’
31 Xileswo, ingiki a valala vaku hinkwavu We Yehovha va ngo fa,Kambe lava va ku zrandzraka a va fane ni ku phatima ka dambu loko dzri xa.”
Kutani a tiko dzri ve ni ku zrula* ku dzringana 40 wa malembe.
Tintlhamuxelo ta le hansi
^ Lexi swi tikomba ku li xikombiso xa xihlambanyu kumbe xa ku tinyiketela ka Xikwembu Nkulukumba.
^ Kumbe: “Ni ta hambela lisimu”.
^ Kumbexana: “ti tsrekatsrekile”.
^ Kumbe: “Va nyamalalile”.
^ Lexi vitaniwaka flauta hi Xiputukezi.
^ Kumbe: “maboti lamakulu?”
^ Kumbe: “lomu switimela swa mati swi xixelaka kone mintxhumu”; “Swititxhi swa switimela swa mati”.
^ Vona Ntlhamuxelo Wa Mazritu.
^ Kumbe: “ku wisa”.
