„Cana somas țâni, ci nachelas niciech ghies ca mânro phral te na marel man sau te na prasal man. Pala so gălem rromeste, mânri sasui phiradea-pe sa cadea de jiungales manța. Voi hai mânro sastro dichenas man sar lenghi sclava. Gândisardem man butivar te mudarav man.” (Madhu a, India)

 „O phiraimos nasul caring le jiuvlea arachel-pe peste sea andi lumea”, sicavel I Organizația Mondialo anda o Sastimos. Fal-pe că iech anda trin jiuvlea sili mardi sau sili oblighime te sovel varecasa bi te camel, iech data andi viața.

 Dacă vi tu nachlean prin cadal buchia nasul, daștil-pe că ci simțosares tut andi siguranța ande niciech than. Daras că oricana daștis te aves prasadi, mardi sau violime. Cana diches cado phiraimos jiungalo caring le jiuvlea, daștis te arăsăs te pachias că le jiuvlean nai-len niciech valoarea andel iacha le manușenghe. Tha sar dichel-len o Del?

 Verseto biblico: „[O Del] cărdea-len murș hai jiuvli”. (Geneza 1:27)

 So hachiaras: O Del cărdea le murșes hai vi la jiuvlea. Vo pachial că trebul te sicavel-pe pachiv vi le murșesche hai vi la jiuvleache. Mai but vo manghel le rromestar „te iubil pesca rromnia sar pes”, na te încărel-la tela pesco pânro prin dumes jiungale hai marimos. (Efeseni 5:33; Coloseni 3:19) Hachiaras că anda o Del si zurales importanto ca le jiuvlea te aven andi siguranța.

 „Cana somas țâni, chichiva anda mânre neamuri oblighisarde man te sovav lența. Cana sas man 17 bărșa, mânro șefo phenelas manghe că del man avri catar i buchi dacă ci sovav lesa. Nici pala so mai barilem, le buchia ci cărdile mai lașe. Mânro rrom, mânri dei, mânro dad hai le vecini ci sicavenas manghe pachiv hai phiravenas-pe jiungales manța. Tha, pala iech timpo, astardem te sichioav anda amaro lașio Del, Iehova b. Vo del pachiv le jiuvleanghe. Cadaia cărdea man te pachiav că o Iehova iubil man hai că som cuci ande lesche iacha.” (Maria, Argentina)

 Verseto biblico: „Si iech amal mai pașardo sar iech phral”. (Proverbe 18:24)

 So hachiaras: Iech ciacio amal daștil te ajutil tut but. De duma andal buchia prin save naches varecasa ande caste pachias tut, cana simțos că daștis te cheres cadaia.

 „Biș bărșa ci phendem chanicasche că somas violime. Arăslem te avav nefericime, daradi hai le ilesa phagărdo. Tha, cana astardem te dav duma varecasa cai camlea te așunel prin so nachlem, iech baro barr lea-pe pa mânro ilo.” (Elif, Turcia)

 Verseto biblico: „Șiuden sea tumare phare gânduri po [Del], anda codoia că les duchal-les tumendar”. (1 Petru 5:7)

 So hachiaras: Cana manghes tut, pachia ciaces că o Del așunel tut. (Psalmii 55:22; 65:2) Le Devles duchal-les tutar hai camel te hachiares că san cuci ande lesche iacha.

 „Cana sichilem anda o Iehova, le bare șinimata anda mânro ilo astarde te sastion țâra po țâra. Acana daștiv te șiorav mânro ilo angla o Del. Vo si sar iech amal cai hachiarel ciaces prin so nachav.” (Ana, Belize)

 Verseto biblico: „O, Iehova! . . . Va avela te cheres ciacimos le șiavenghe cas nai-len dad hai codolenghe phagărde, ca o manuș pa i phuv, te na mai daravel-len”. (Psalmo 10:17, 18)

 So hachiaras: Na pa but timpo, o Del va chosela sea le buchia jiungale, mașcar save si vi o marimos hai o phiraimos nasul caring le jiuvlea.

 „Sas sar iech lașio medicamento anda mânro duchado ilo, cana așundem că o Iehova va așiavela o phiraimos jiungalo caring le jiuvlea hai le șeiorra. Cadaia cherel te avel man pacea andi goghi.” (Roberta, Mexic)

 Caște prinjianes mai but buchia anda i speranța cai del-la i Biblia, sostar daștis te pachias că so phenel voi si ciaces hai anda o ajutorii andai Biblia cai den-les aghies le Martori le Iehovasche, mang te avel varecon tute gratuime.

 Descărchisar cado articolo ande iech formato cai daștil te avel tipărime.