1. Savi si iech buchi cai sicavel i diferența mașcar le manușa le Iehovasche hai codola andai lumea?

 Le manușa le Iehovasche camen te predichin iagasa ando ilo a i vestea lași hai den sea penghi zor te cheren cadaia. Cadai buchi cherel i diferența mașcar le manușa le Iehovasche hai le creștini cai ci sile ciace. (Tit 2:14) Tha, poiechdata, daștil te avel tuche pharo te predichis iagasa ando ilo. Daștil-pe că vi tu simțosares tut sar iech phuro de congregație cai cherel phares buchi anda le phrala. Vo phendea: „Si ghiesa cana mânro ilo ci țârdel man te jiav andi predicarea”.

2. Sostar daștil te avel pharo poiechdata te predichisaras mai dur iagasa ando ilo?

² Daștil-pe că san mai bucurime hai placial tut mai but te cheres aver buchia anda o Iehova sar te jias andi predicarea. Sostar? Anda codoia că, cana vazdas hai lașiaras le clădiri teocratico, cana ajutisaras amare phralen pala iech dezastro sau zuriaras averen, dichas sigo le șucar rezultatea hai cadaia cherel amen te simțosaras amen mișto. Mai but, cana cheras buchi ande iech than amare phralența, bucurisaras amen catar i pacea hai iubirea, hai jianas că von dichen lașe iachența so cheras anda lende. Pe aver rig, daștil-pe că predichisaras de but bărșa ande sa codo teritorio hai dichas că le manușa ci camen te paruven-pe. Sau daștil-pe că das duma bute manușența cai ci camen te așunen so phenas lenghe andai Biblia. Sa cadea, sar pașiol o sfârșito, daisaras te ajucăras amen ca vi mai but manușa te așen amenghe contra. (Mat. 10:22) Tha so daștil te ajutil amen te încăras zurali sau chiar te bariaras cadai iag anda ilo cai si amen anda i predicarea?

3. Sar sicavel i paramici anda Luca 13:6-9 că o Isus predichilas iagasa ando ilo?

 ³ Daisaras te sichioas te predichisaras iagasa ando ilo cana dichas so cărdea o Isus. Cana vo sas-lo pi phuv, ci așiadea-pe nici iech țâra te predichil iagasa ando ilo le manușenghe. Sar nachenas le ghiesa, vo delas sea mai but peschi zor te predichil le manușenghe. (Citisar Luca 13:6-9.) Ande iech paramici o Isus phendea că leschi buchi si sar ieche manușeschi cai cherel buchi andi răz hai savo lea sama catar iech smochino trin bărșa chiar cana cado ci delas rodo. Sa cadea o Isus predichisardea trin bărșa le evreienghe, chiar cana le mai but mașcar lende ci cărdile lesche discipoli. Hai, cadea sar codo manuș cai cherelas buchi andi răz ci hasardea peschi speranța că o smochino va dela rodo, nici o Isus ci hasardea peschi speranța că le manușa va camena te așunen i vestea lași hai predichisardea mai dur iagasa ando ilo. Mai but, o Isus dea sea peschi zor caște arăsăl co ilo le manușengo.

4. So va avela te dichas mai dur?

⁴ Ande cado articolo, va avela te dichas sar o Isus predichisardea mai dur iagasa ando ilo, vi mai but ande lesche palutne șiov șiona pi phuv. (Dich i nota anda o sicaimos anda Luca 10:1, „Pala cadal buchia”.) Cana sichioas anda le buchia cai o Isus sicadea-len averenghe hai las amen pala leste, daisaras te predichisaras mai dur iagasa ando ilo. Mai dur, va avela te dichas ștar buchia cai cărdea-len o Isus: 1) vo șiutea po iechto than i voia le Iehovaschi, 2) hachiardea hai traisardea pala le profeții andai Biblia, 3) sas-les pachiamos că o Iehova va ajutila-les hai 4) vo ci hasardea peschi speranța că le manușa va așunena-les.

VO ȘIUTEA PO IECHTO THAN I VOIA LE IEHOVASCHI

5. Sar sicadea o Isus că i mai importanto buchi anda leste sas te cherel so camelas o Del?

⁵ O Isus predichisardea iagasa ando ilo „i vestea lași anda o Regato” anda codoia că jianglea că o Del camelas te cherel cadaia. (Luca 4:43) Anda o Isus, te predichil i vestea lași sas i mai importanto buchi anda leschi viața. Chiar andel palutne șiona angla te terminil peschi buchi pi phuv, vo gălea „foro forostar hai gav gavestar” caște sicavel le manușen. (Luca 13:22) Mai but, vo sicadea vi avere discipolen caște predichin i vestea lași ande iech than lesa. (Luca 10:1)

6. So phanglimos si mașcar i predicarea hai aver buchia cai cheras-len anda o Iehova? (Dich vi le imagini.)

 ⁶ Vi aghies, te predichisaras i vestea lași si i mai importanto buchi cai o Iehova hai o Isus camen te cheras-la. (Mat. 24:14; 28:19, 20) Si iech phanglimos chidino mașcar i predicarea hai orisavi aver buchi cai cheras-la anda o Iehova. Sar exemplo, vazdas Săli le Regatosche sau slujisaras co Betelo hai cadea ajutisaras te avel phendi mai dur i vestea lași. Pala iech dezastro, amen na numai ajutisaras amare phralen te avel-len le buchia cai trebul lenghe, tha ajutisaras-len te jian pale ca le întruniri hai vi andi predicarea. Cana anas amenghe amintea că i predicarea si i mai importanto buchi cai o Iehova camel te cheras-la, va avela te camas vi mai but te jias andi predicarea. O János, iech phuro de congregație andai Ungaria, phenel: „Phenav manghe butivar că nici iech aver buchi cai cherav-la anda o Iehova ci daștil te lel o than la predicareaco; i predicarea si i mai importanto buchi cai trebul te cheras-la”.

7. Sostar camel o Iehova te predichisaras mai dur? (1 Timotei 2:3, 4)

⁷ Daisaras te bariaras i iag anda amare ile cai si amen anda i predicarea cana dichas le manușen cadea sar dichel-len o Iehova. Vo camel ca chichi mai but manușa te așunen i vestea lași hai te astaren te slujin lesche. (Citisar 1 Timotei 2:3, 4.) Caște cheras cadaia, o Iehova sicavel amen sar te predichisaras mai mișto cado mesajo cai salvil i viața le manușenghi. Sar exemplo, ando lilorro Iubin le manușen – Cheren discipoli phenel-pe so daisaras te cheras caște astaras te das duma le manușența hai te cheras-len discipoli le Isusosche. Chiar cana chichiva ci camen te slujin le Iehovasche acana, daștil-pe că von va cherena cadai buchi angla so te phandavel-pe o baro necazo. Von daștin te anen phenghe amintea ando viitorii so phenas lenghe acana hai te camen te aven de i rig le Iehovaschi. Tha, va daștina te cheren cadaia numai dacă amen predichisaras lenghe mai dur.

VO HACHIARDEA HAI TRAISARDEA PALA LE PROFEȚII ANDAI BIBLIA

8. Sar ajutisarde le Isusos le profeții andai Biblia te folosil pesco timpo ando mai lașio modo?

⁸ O Isus hachiardea sar avelas te pheren-pe le profeții andai Biblia. Vo jianelas că leschi buchi avelas te încărel numai trin bărșa hai dipaș. (Dan. 9:26, 27) Sa cadea, vo prinjianelas vi le profeții cai sicavenas sar hai cana avelas te merel. (Luca 18:31-34) Anda codoia că o Isus prinjianelas mișto le profeții andai Biblia, vo folosisardea pesco timpo ando mai lașio modo. Cadea că, vo predichisardea iagasa ando ilo caște terminil i buchi cai sas lesche dini.

9. Sostar den amen zor te predichisaras iagasa ando ilo le profeții andai Biblia?

⁹ Cana hachiaras le profeții andai Biblia daștil te avel amen mai but zor te predichisaras iagasa ando ilo. Jianas că na pa but timpo cadai lumea nasul va avela chosli cu sea. Cana dichas so buchia întâmplon-pe andi lumea hai sar phiraven-pe le manușa hachiaras că pherel-pe so phendea i Biblia de mai anglal andal palutne ghiesa. Hachiaras vi că i dușmănia cai si mașcar o Zuralimos Mondialo Anglo-Americano hai mașcar i Rusia hai codola cai așen de lachi rig, pheren i profeția anda o rege le sudosco hai o rege le nordosco cai va marena-pe iech averesa „ando timpo le sfârșitosco”. (Dan. 11:40) Sa cadea, jianas că le pânre la statuiache anda Daniel 2:43-45 sile o Zuralimos Mondialo Anglo-Americano. Hai pachias ciaces că cadea sar sicaven le profeții la Bibliache i vremea cana o Regato le Devlesco va chosela sea le guvernea le manușenghe si pașă, si zurales pașă. Sea cadal profeții ajutin amen te jianas că na pa but timpo va avela o sfârșito cadala lumeaco. Cadea că trebul te das sea amari zor caște predichisaras i vestea lași.

10. Sar den amen i zor te predichisaras iagasa ando ilo le profeții andai Biblia?

¹⁰ Andel profeții andai Biblia arachas vi o mesajo cai camas te predichisaras-les. I Carrie, iech  phei cai slujil andi Republica Dominicano, phenel: „Cana gândiv man ca le șucar buchia cai o Iehova promitisardea că va dela-len amenghe ando viitorii, simțosarav că trebul te phenav vi averenghe anda cadala”. Voi mai phenel: „Cana dichav le pharimata cai si le manușen aghies, hachiarav că vi len silen nevoia te jianen le șucar buchia cai o Iehova phendea că va cherela-len ando viitorii vi anda lende. Le profeții andai Biblia sicaven că o Iehova ajutil amen te cheras cadai buchi hai cadaia zuriarel amen te predichisaras mai dur”. I Leila, cai trail andi Ungaria, phenel: „So phenel-pe ando Isaia 11:6-9 zuriarel man te phenav i vestea lași vi codolenghe cai fal-pe că ci va așunena-la. Jianav că le Iehovasche ajutorosa oricon daștil te paruvel-pe”. Hai o Christopher, iech phral andai Zambia, phenel: „Cadea sar phendea-pe de mai anglal ando Marcu 13:10, i vestea lași si phendi pe sea i phuv, hai anda mande si iech bari pachiv te daștiv vi me te ajutiv te pherel-pe cadai profeția”. So aver profeții andai Biblia den tut i zor te predichis vi mai dur?

LES SAS-LES PACHIAMOS CĂ O IEHOVA VA AJUTILA-LES

11. Sostar trebulas o Isus te pachial-pe ando Iehova caște predichil mai dur iagasa ando ilo? (Luca 12:49, 53)

¹¹ Le Isusos sas-les pachiamos că o Iehova va ajutila-les te predichil mai dur iagasa ando ilo. O Isus alosardea mișto pesche dumes hai dea duma pherdo pachiv cana predichilas. Tha, vo jianglea că o mesajo anda o Regato le Devlesco va cherena chichiva manușen te aven holiarde hai but anda lende avenas te așen lesche contra. (Citisar Luca 12:49, 53.) I vestea lași cai phendea-la o Isus holiardea le bare rașaien, cai zumade te mudaren-les. (Ioan 8:59; 10:31, 39) Tha, o Isus predichisardea mai dur anda codoia că jianglea că o Iehova sas-lo lesa. Vo phendea: „Ci som corcoro, tha o Dad, cai bișialdea man, silo manța. . . . Vo ci mechlea man corcoro, anda codoia că sea o timpo cherav le buchia cai placian-les”. (Ioan 8:16, 29)

12. So cărdea o Isus caște ajutil le discipolen te predichin mai dur chiar cana le manușa așenas lenghe contra?

¹² O Isus andea amintea pesche discipolenghe că daștinas te pachian anda sea o ilo că o Iehova avelas te ajutil-len. O Isus phendea lenghe mai butivar că lesco Dad avelas te avel pașa lende chiar cana le manușa așenas lenghe contra. (Mat. 10:18-20; Luca 12:11, 12) Cu sea cadala, anda codoia că jianglea că but avenas te așen contra i vestea lași, vo zuriardea-len te aven prudenți. (Mat. 10:16; Luca 10:3) O Isus phendea lenghe vi că, cana le manușa ci camenas te așunen-len, von ci trebun te așen pe lengo șăro. (Luca 10:10, 11) Mai but, o Isus phendea lenghe  te nașen cana le manușa așenas lenghe contra. (Mat. 10:23) Chiar cana o Isus predichilas iagasa ando ilo hai sas-les pachiamos ando Iehova, vo ci șiutea peschi viața ando pericolo de ivea. (Ioan 11:53, 54)

13. Sostar daștis te pachias ciaces că o Iehova va avela pașa tute?

¹³ Vi amenghe trebul amen o ajutori le Iehovasco caște daisaras te predichisaras mai dur iagasa ando ilo cana le manușa așen amenghe contra. (Rev. 12:17) Tha, sostar daștis te pachias ciaces că o Iehova va avela pașa tute? Te dichas so phendea o Isus ande iech manglimos cai si scriime ando Ioan, o capitolo 17. Vo manglea le Iehovas te lel sama le apostolendar, hai o Iehova cărdea so manglea lestar o Isus. O lil Fapte sicavel sar o Iehova ajutisardea le apostolen te predichin iagasa ando ilo chiar cana le manușa așenas lenghe contra. Ande pesco manglimos, o Isus manglea pesche Dadestar te lel sama vi codolendar cai sicade pachiamos ando mesajo phendo le apostolendar. Vi tu san mașcar cadala. O Iehova cherel mai dur so manglea o Isus lestar ando manglimos. Vo va ajutila vi tut cadea sar ajutisardea le apostolen. (Ioan 17:11, 15, 20)

14. Catar jianas că daisaras te predichisaras iagasa ando ilo vi andel phare ghiesa? (Dich vi i imaginea.)

¹⁴ Sar pașiol o sfârșito cadala lumeaco, jianas că va avela sea mai pharo te phenas i vestea lași iagasa ando ilo. Tha jianas ciaces că va avela te primisaras o ajutorii cai trebul amenghe. (Luca 21:12-15) Cadea sar o Isus hai lesche discipoli, amen sicavas pachiv caring le manușa cai alosaren te na așunen so phenas lenghe hai ci has amen lența. Chiar vi cana amari buchi si așiadi, amare phrala daștin te predichin mai dur i vestea lași anda codoia că șion pengo pachiamos ando Iehova, na ande pengo zuralimos. Cadea sar ando iechto secolo, o Iehova del zuralimos pesche slujitorenghe „caște avel predichime cu sea o mesajo”, adică cadea sar camel o Iehova. (2 Tim. 4:17) Daștis te pachias ciaces că, dacă șios chio pachiamos ando Iehova, va avela te predichis mai dur iagasa ando ilo.

VO CI HASARDEA PESCHI SPERANȚA CĂ LE MANUȘA VA AȘUNENA-LES

15. Sar sicadea o Isus că ci hasardea peschi speranța că le manușa va așunena i vestea lași?

¹⁵ Ande peschi buchi pi phuv, o Isus pachialas ciaces că le manușa va așunena i vestea lași. Cadaia ajutisardea-les te așel bucurime hai te predichil  mai dur iagasa ando ilo. Sar exemplo, angla te terminil-pe o bărș 30 a.e., o Isus dichlea că but manușa camenas te așunen i vestea lași hai phendea că i predicarea si sar le phuvea opral save daștil te avel chidini i recolta. (Ioan 4:35) Cam pala iech bărș, vo phendea pesche discipolenghe: „O secerișo si baro”. (Mat. 9:37, 38) Hai pala iech vremea, vo phendea pale cadai buchi: „O secerișo si baro . . . Manghen le Stăpânos casco si o secerișo te bișialel mai buten te cheren buchi”. (Luca 10:2) O Isus ci hasardea peschi speranța că le manușa va pachiana andi vestea lași hai cana von pachiaie ande late, lesco ilo „pherdea-pe bucuriatar”. (Luca 10:21)

16. Sar ajutin amen le paramicea phende le Isusostar te na hasaras amari speranța că le manușa va așunena amen? (Luca 13:18-21) (Dich vi i imaginea.)

¹⁶ O Isus ajutisardea pesche discipolen te na hasaren penghi speranța că le manușa va pachiana andi vestea lași. Caște sicavel cadaia, o Isus phendea dui paramicea. (Citisar Luca 13:18-21.) Ande iech paramici, o Isus phendea că o mesajo anda o Regato si sar iech țâni cuchi muștareschi, cai avelas te bariol zurales but. Prin cadaia o Isus camlea te sicavel că but manușa avenas te pachian andi vestea lași hai că chanci ci daștil te așiavel cado bariarimos. Ande i coaver paramici, vo phendea că o Regato si sar o humer caște sicavel că o mesajo anda o Regato va avela predichime ande but thana pe sea i phuv hai cadaia va cherela le manușen te paruven-pe, chiar cana ci avelas te dichel-pe sigo cadai buchi. Cadea, o Isus sicadea le discipolenghe că i vestea lași cai von predichinas-la va ajutila bute manușen.

17. Sostar ci trebul te hasaras amari speranța că le manușa va așunena i vestea lași?

¹⁷ Cana dichas sar ajutil i predicarea bute manușen pa sea i phuv, sam zuriarde te predichisaras vi mai dur iagasa ando ilo. Ande fiesavo bărș, milioanea manușa aven amența te anas amenghe amintea le merimastar le Isusosco hai sichion i Biblia amența. Șăla mii manușa bolen-pe hai predichin vi von amența i vestea lași. Ci jianas chichi manușa va pachiana andi vestea lași, tha jianas că o Iehova chidel iech bari mulțimea cai va așela andi viața pala o baro necazo. (Rev. 7:9, 14) O Iehova, Casco si o secerișo, pachial că but manușa va așunena i vestea lași hai va paruvena-pe. Cadea că, vi amen trebul te predichisaras mai dur.

18. So camas te dichen le manușa amende?

¹⁸ Sea o timpo le ciace discipoli le Isusosche sas-le prinjiande anda codoia că predichinas i vestea lași iagasa ando ilo. Cana le manușa dichle sar le apostoli predichinas pherde tromai, „dine phenghi sama că sas-le le Isusosa”. (Fap. 4:13) Vi amen camas te predichisaras iagasa ando ilo caște sicavas savorenghe că las amen pala o Isus.