1. So șucar promisiunea cherel o Iehova codolenghe cai păcătuisarde hai căin-pe ciaces?

 O IEHOVA si amaro Creatorii, Codo cai del-ame legi hai amaro Judecătorii, tha vo si vi amaro Dad cerisco. (Ps. 100:3; Isa. 33:22) Vo na numai că daștil, tha vi camel te iertil amare păcatea cana căisaras-ame ciaces. (Ps. 86:5) Prin o profeto Isaia, vo cărdea amenghe anda sea o ilo iech șucar promisiunea: „Chiar cana tumare păcatea sile sar o pohtan zurales lolo, va avena cărde parne sar o iv”. (Is. 1:18)

2. So trebul te cheras caște avas andi pacea averența?

² Anda codoia că sam imperfecți, savore phenas sau cheras buchia cai holiaren averen. (Iac. 3:2) Tha cadaia ci trebul te așavel-ame te avas amala lența. Cadea că si zurales importanto te iertisaras. (Prov. 17:9; 19:11; Mat. 18:21, 22) O Iehova camel te nachas părdal le țâne greșeli cai aver cheren-le. (Col. 3:13) O mai baro motivo sostar trebulas te cheras cadaia si că vi o Iehova iertil amen „anda sasto ilo”. (Is. 55:7)

3. So va dichaia mai dur?

³ Ande cado articolo, va avela te dichas sar daștin le manușa imperfecți te aven iertători cadea sar o Iehova. Sa cadea, va avela te arachas o răspunso ca le pușimata cai aven: So păcatea trebun phende le phurenghe? Sostar zuriarel-ame o Iehova te avas iertători? Hai so daisaras te sichioas anda o exemplo chichiva phralengo hai pheiango cai sas-le zurales duchade anda so cărde lenghe aver?

4. a) So trebul te cherel iech creștino cai cărdea iech baro păcato? b) Savi si i buchi le phurenghi cana varecon păcătuisardea?

⁴ Le bare păcatea trebun te aven phende le phurenghe. Ando 1 Corinteni 6:9, 10, del-pe duma anda chichiva păcatea sar cadala. Le bare păcatea si cana uștaren-pe zurales nasul le norme le Devlesche. Dacă iech creștino cherel iech baro păcato, cado trebul te manghel iertarea le Iehovastar ando manglimos hai te jial ca le phure de congregație. (Ps. 32:5; Iac. 5:14) So trebun te cheren le phure? Numai le Iehovas siles o zuralimos te iertil cu sea le păcatea prin i jertfa de răscumpărare le Isusoschi. * Cu sea cadala, o Iehova dea le phuren i buchi te dichen, pe baza la Bibliachi, dacă iech jeno cai păcătuisardea daștil te mai așel andi congregația. (1 Cor. 5:12) Mașcar aver buchia, von trebun te roden o răspunso ca le pușimata cai aven: Camlea codo jeno te păcătuil hai chiar cărdea pesche iech plano? Garadea averendar so cărdea? Cărdea o păcato mai but timpo? Si dovezi cai sicaven că căisardea-pe ciaces? Dichiol-pe că o Iehova iertisardea-les? (Fap. 3:19)

5. So miștimata anel i buchi cai cheren-la le phure de congregație?

⁵ Cana le phure chiden-pe ande iech than ieche jeneia cai păcătuisardea, von camen te arăsăn te len sa codoi decizia cai sas deja lini ando cerii. (Mat. 18:18) Sar anel cadai buchi miștimata la congregațiache? Del amen i asigurarea că codo cai păcătuisardea hai ci căil-pe silo duriardo andai congregația caște na cherel nasul le cuci bacreanghe le Iehovasche. (1 Cor. 5:6, 7, 11-13; Tit 3:10, 11) Sa cadea, cadaia daștil te ajutil codoles cai păcătuisardea te căil-pe ciaces, anda sea o ilo, anda so cărdea hai, cadea, te avel-les i iertarea le Iehovaschi. (Luca 5:32) Le phure cheren manglimata anda iech jeno cai căisardea-pe hai manghen le Iehovas te ajutil-les te avel pale sastevesto spiritualo. (Iac. 5:15)

6. Dacă iech jeno sas-lo șiudino avri andai congregația, mai daștil te avel iertime? Explichin.

⁶ Te phenas că le phure de congregație dichen că iech jeno cai păcătuisardea ci căil-pe. Cana si cadea, vo trebul te avel șiudino avri andai congregația. Hai dacă uștardea iech legea anda o them cai beșel, le phure ci va garavena so cărdea. O Iehova mechel ca le autorități laico te judechin hai te pedepsin oricas uștarel le legi, indiferento dacă căil-pe sau nici. (Rom. 13:4) Cu sea cadala, dacă pala codoia o jeno hachiarel chichi de nasul sas so cărdea, fal-les pharo anda sea o ilo hai paruvel pesco phiraimos, o Iehova silo gata te iertil-les. (Luca 15:17-24) Vo cherel cadaia vi cana si duma andal păcatea zurales bare. (2 Cron. 33:9, 12, 13; 1 Tim. 1:15)

7. Sar daisaras te iertisaras ieche jenes cai păcătuisardea contra amenghe?

⁷ Zuriarel-ame but te jianas că ci si amari buchi te alosaras dacă varecon va avela sau nici iertime le Iehovastar. Tha si vareso cai vi amen trebul te alosaras te cheras. Poiechdata, iech jeno păcătuil contra amenghe – daștil-pe că chiar zurales but – , tha fal-les nasul anda so cărdea hai manghel-ame te iertisaras-les. Aver data, codo jeno daștilas te na manghel pesche iertarea. Vi cadea, daisaras te alosaras te iertisaras-les hai te na încăras holi ande amaro ilo caring leste. O ciacimos si, că poiechdata trebul amenghe mai but timpo hai te das mai but amari zor caște iertisaras varecas, vi mai but dacă sam  zurales duchade. Ande O Turno de Veghe anda 15 septembria 1994 phenel-pe: „Atunci cana iertisaren ieche jenes păcătoso ci însemnol că san de acord le buchianța nasul cai cărdea-le. Anda iech creștino, te iertil însemnol te mechel pherdo pachiamos cadai buchi andel vasta le Iehovasche. Vo si o ciacio Judecătorii sea le universosco hai vo va cherela ortomos co timpo potrivime”. Sostar zuriarel-ame o Iehova te avas iertători hai te mechas i judecata code cai si laco than, ande lesche vasta?

8. Sar sicavas recunoștința anda i îndurarea le Iehovaschi cana iertisaras?

⁸ Cana iertisaras sicavas recunoștința. Ande iech ilustrarea, o Isus phendea anda o Iehova că si sar iech stăpâno cai ci mai manglea ieche sclavostar le but love cai dea-le lesche po camimos hai cai ci daștilas te pochinel-le parpale. Tha cado sclavo ci camlea te iertil ieche avere sclavos cai trebulas te del-les but mai țâra love. (Mat. 18:23-35) So camlea o Isus te sicavel-ame? Cana sicavas ciaci recunoștința anda i bari îndurarea le Iehovaschi caring amende, cadaia va zuriarela vi amen te iertisaras averen. (Ps. 103:9) Bărșănța mai anglal, ande O Turno de Veghe phendea-pe: „Orichichi de but iertisaras amare pașarden, ci va avela te arăsas niciechdata te iertisaras cadea de but sar amaro Del, cai iertil fiesaves anda amende hai sicavel amenghe îndurarea prin o Cristos”.

9. Caring caste sicavel o Iehova îndurarea? (Matei 6:14, 15)

⁹ Codola cai iertin va avena iertime. O Iehova sicavel îndurarea codolenghe cai sile îndurători. (Mat. 5:7; Iac. 2:13) O Isus phendea claro cadai buchi cana sicadea pesche discipolen sar te manghen-pe. (Citisar Matei 6:14, 15.) O Iehova sicadea sa cado principio bute bărșența mai anglal, cana traisardea o Iov. Cado manuș pherdo pachiamos sas-lo zurales duchado hai pusado ando ilo catar le buchia nasul cai phende-le lesche le trin murșa, po anav Elifaz, Bildad hai Țofar. Atunci, o Iehova phendea caring o Iov te manghel-pe anda lende. O Iov cărdea cadea hai o Iehova dea-les but miștimata. (Iov 42:8-10)

10. Sostar si nasul te încăras holi ande amaro ilo? (Efeseni 4:31, 32)

¹⁰ Cheras amenghe nasul cana încăras holi ando ilo. O Iehova camel te avel amen pacea hai te hastras catar o baro pharimos cai anel-les i holi cai încăras-la ando ilo. (Citisar Efeseni 4:31, 32.) Vo zuriarel-ame: „Mech i holi hai duriar-la tutar”. (Ps. 37:8) Cana încăras conto catar cado sfato, sicavas că sam goghiaver. I holi cai încăras-la ande amaro ilo daștil te cherel nasul amare sastimasche hai amara goghiache. (Prov. 14:30) Cana încăras holi ande amaro ilo, si sar cana pias otrava; ajucăras-ame te cherel nasul codolesche cai holiardea-ame, tha o ciacimos si că numai duchavas-ame corcore. Pe aver rig, cana iertisaras, si sar cana cheras amenghe corcore iech cadouo. (Prov. 11:17) Si amen pacea andi goghi hai ando ilo, hai daisaras te jias angle ando servicio le Iehovasco.

11. So phenel i Biblia andai răzbunarea? (Romani 12:19-21)

¹¹ I răzbunarea si le Iehovaschi. O Iehova ci dea-ame o drepto te risaras parpale o nasulimos varecasche cai păcătuisardea contra amenghe. (Citisar Romani 12:19-21.) Anda codoia că ci jianas sea le buchia hai dichas-le ande iech modo imperfecto, ci daisaras te judechisaras orta le buchia, cadea sar o Del. (Evr. 4:13) Hai, poiechdata, i holi anda amaro  ilo daștil te îngărel-ame te na jianas so trebul te cheras. O Iehova cărdea le Iacovos te scriil: „I holi le manușeschi ci cherel o ortomos le Devlesco”. (Iac. 1:20) Daisaras te pachias că sea so cherel o Iehova si anda ortomos hai că ji la urmă, vo va cherela iech ortomos perfecto.

12. Sar daisaras te sicavas că pachias-ame ando ortomos le Iehovasco?

¹² I iertarea sicavel amaro pachiamos ando ortomos le Iehovasco. Cana mechas le buchia andel vasta le Iehovasche, sicavas că si amen pachiamos ande lesco zuralimos te chosel orisavo nasulimos cărdo catar o păcato. Andi lumea nevi, le ducha le ilesche ‘ci va mai avena ande amari goghi, hai nici ci va mai avena parpale ande amaro ilo’. (Is. 65:17) Tha cana varecon duchavel amen zurales, daisaras ciaces te duriaras anda amaro ilo i holi? Mai dur, va avela te dichas o exemplo chichiva creștinengo cai daisarde te cheren cadaia.

13, 14. So daisaras te sichioas anda i iertarea anda i experiența prin savi nachlea o Tony hai o José?

¹³ But phrala hai pheia alosarde te iertisaren, chiar cana sas-le zurales duchade averendar. So miștimata sas-len anda codoia că alosarde te cheren cadaia?

¹⁴ Bute timpoia mai anglal te prinjianel o ciacimos, o Tony *, anda Filipine, așundea că iech anda lesche phrala sas-lo mudardo ieche murșestar, po anav José. Anda codoia că sas iech manuș holiarico hai hutelas sigo co marimos, o Tony camlea te risarel parpale o nasulimos codolesche cai mudardea lesche phrales. O José sas-lo șiuto ando phandaimos anda mudarimos. Pala codoia, cana o José sas-lo mechlo avri, o Tony solahardea că va arachela-les hai că va mudarela-les. Vo chiar chindea iech arma caște cherel cadaia. Tha astardea te prinjianel mai mișto i Biblia le Martorența le Iehovasche. O Tony phenel: „Ando timpo so sichilem mai but buchia andai Biblia, hachiardem că trebul te paruvav mânri viața, mânro phiraimos nasul hai te mechav i holi”. O Tony boldea-pe, hai ji la urmă sas-lo numime phuro de congregație. Ande sa cado timpo, vi o José arăslea iech Martoro  le Iehovasco. Te gândisaras-ame so simțosardea o Tony cana așundea cadai buchi! Vo siguro ci ajucărdea-pe. Cana arăsle te dichen-pe, dine-pe angali hai o Tony phendea caring o José că iertisardea-les. O Tony phenel că atunci cana alosardea te iertil, lesco ilo pherdea-pe cadichi de but bucuriaia că ci daștil te phenel andel cuvintea so simțosardea. Si ciaces, o Iehova andea but miștimata le phralesche Tony anda codoia că alosardea te iertil.

15, 16. So sichioas anda i iertarea catar o Peter hai i Sue?

¹⁵ Ande 1985, o Peter hai i Sue sas-le ca iech întrunirea catar i sala le Regatoschi. Anda iech data, sas iech bari explozia. Iech murș șiutea iech bomba chiar andi sala le Regatoschi. I Sue sas dini dab zurales hai cadaia cărdea zurales nasul ca laco dichimos hai așundimos. Mai but, voi ci mai daștil te sunghel niciech chan. * O Peter hai i Sue pușle-pe mai butivar: „So felo manuș daștilas te cherel iech buchi cadea de nasul?”. Pala mai but bărșa, codo cai șiutea i bomba, cai ci sas iech slujitoro le Iehovasco, sas-lo șiuto ando phandaimos anda leschi sasti viața. Cana sas-le pușle dacă iertisarde codole murșes, o Peter hai i Sue phende: „O Iehova sicavel-ame că dacă încăras holi ande amaro ilo, cadaia cherel nasul amare sastimasche, amare ilesche hai amara goghiache. Anda codoia, încă catar o începuto, mangleam le Iehovas te ajutil-ame te duriaras amendar i holi hai te daisaras te jias mai dur”.

¹⁶ Anda lende, i iertarea sas iech țâra phari. Von phenen: „Poiechdata, cana i Sue sili duchadi anda o nasulimos prin savo nachlea, avel parpale vi i holi ande amaro ilo. Tha ci mechas ca amari goghi te așel code, cadea că i holi ci bariol hai nachel sigo. Dacă codo cai șiutea i bomba avelas te cărdiol phral, daisaras te phenas ciaces că avelas te primisaras-les sea le ileia. Le buchia prin save nachleam, sicade-ame că dacă cheras cadea sar phenel o Del prin i Biblia, lel-pe iech baro bar pa amaro ilo hai sam ciaces liberi. Arachas  but mângâierea vi cana gândisaras-ame că, na pa but timpo, o Iehova va chosela sea le nasulimata”.

17. So sichioas anda i iertarea catar i Myra?

¹⁷ I Myra prinjiandea o ciacimos cana sas-li deja căsătorime hai sas-la dui țâne șiave. Tha laco rrom ci avilea co ciacimos. Pala iech timpo, vo cărdea adultero hai mechlea pesca familia. I Myra phenel: „Cana mânro rrom mechlea-ame, sas-ma sa codol sentimentea cai si bute jenen cana sile athade codolestar cas iubin: ci avelas manghe te pachiav so întâmplol-pe, sas-ma iech bari duch ando ilo, falea-ma zurales nasul anda sea, chiar doșardem-ma hai somas zurales holiardi”. Chiar cana lachi căsnicia nachlea, i duch că sas-li athadi așilea. I Myra mai phenel: „Somas zurales duchadi hai pherdi holi, but șiona iech pala aver. Ji la urmă, dem mânri sama că cadaia duriarelas-ma le Iehovastar hai averendar”. Aghies, i Myra phenel că duriardea pestar i holi anda ilo, cai sas-la caring codo cai sas laco rrom. La chiar sila i speranța ca, ande iech ghies, vo te pașiol le Iehovastar. I Myra dichel pherdi pachiamos caring o viitorii. Sa cadea, voi sili zurales bucurime că daisardea, sar dei corcori, te bariarel ando ciacimos lache duie șiaven. Aghies, voi slujil le Iehovasche ande iech than lache șiavența hai lenghe familiența.

18. So pachiamos daștil te avel-ame ando Iehova, cai si O Mai Baro Judecătorii?

¹⁸ Anel amenghe iech bari pacea te jianas că ci așel pe amare dume i phari buchi te judechisaras averen. Sar O Mai Baro Judecătorii, o Iehova si codo cai cherel cadai buchi importanto. (Rom. 14:10-12) Daisaras te pachias ciaces că andi judecata le Iehovaschi, va dichiola-pe sea o timpo că vo încărel conto catar pesche bare norme anda so si mișto hai so si nasul. (Gen. 18:25; 1 Regi 8:32) Vo ci va cherela niciechdata so si neorta!

19. So va cherela-pe anda codoia că o ortomos le Iehovasco silo perfecto?

¹⁹ Abia ajucăras o timpo cana o Iehova va chosela cu sea le buchia nasul cai andea-le i imperfecțiunea hai o păcato. Atunci, le ducha fizico hai le ilesche va avena cu sea sastiarde. (Ps. 72:12-14; Rev. 21:3, 4) Ci va mai avena nici măcar andi amari goghi. Ji atunci, sam zurales recunoscători le Iehovasche că daisaras te las-ame pala lesco exemplo hai dea vi amen o zuralimos te iertisaras averen.