1. So camel o Iehova?

 O DEL camel ca i vestea lași anda o Regato te avel predichime pe sea i phuv. (Mar. 13:10; 1 Tim. 2:3, 4) Cadai buchi si cadea de importanto, că o Iehova alosardea pesche Șiaves iubime te supraveghil-la. Cadea că, daisaras te pachias că, tela i lași îndrumarea le Isusoschi, i lucrarea de predicare va avela cărdi cadea sar camel o Iehova, angla so te avel o sfârșito. (Mat. 24:14)

2. So va avela te dichas ande cado articolo?

² Ande cado articolo, va avela te dichas sar folosil o Isus „o sclavo fidelo hai prevăzătorii” caște del-ame haben spiritualo hai te organizil pesche continuatoren anda i mai bari campania de predicare anda sea-l timpuri. (Mat. 24:45) Sa cadea, va avela te dichas sar daștil te sicavel fiesavo anda amende că așel pașa o Isus hai o sclavo fidelo.

3. So autoritatea sas dini le Isusosche?

³ O Isus supraveghil i lucrarea de predicare. Sostar daisaras te phenas cadaia? Țâra timpoia angla so te vazdel-pe co cerii, o Isus phendea caring chichiva anda lesche discipoli loialo, cai sas chidine po plain Galileea: „Sea i autoritatea sas manghe dini ando cerii hai pi phuv”. Te dichas so phendea vo pala codoia: „Jian deci hai cheren discipoli anda le manușa anda sea-l națiuni”. (Mat. 28:18, 19) Cadea că, mașcar aver buchia, le Isusosche sas dini i autoritatea te conducil i lucrarea de predicare.

4. Sostar daisaras te pachias că o Isus supraveghil i lucrarea de predicare vi aghies?

 ⁴ Cadea sar phendea o Isus, lesche continuatori avenas te predichin hai te cheren discipoli „anda sea le națiuni”, hai vo avelas te avel lența „ande sea le ghiesa, ji co phandaimos le sistemosco”. (Mat. 28:20) Cadal cuvintea sicaven claro că i lucrarea de predicare avelas te cherel-pe mai dur tela le iacha le Isusosche ji ande amare ghiesa.

5. Sar las partea vi ame caște pherel-pe i profeția anda Psalmo 110:3?

⁵ O Isus ci darailea că, co sfârșito le sistemosco, ci va avena destui creștini cai te cheren i lucrarea de predicare. Vo jianelas că avelas te pherel-pe i profeția cai avel: „Chio poporo va avela gata anda sea o ilo ando ghies cana va avela te îngăres chi armata co marimos”. (Ps. 110:3) Dacă vi tu des duma anda i vestea lași, sicaves că așes pașa o Isus hai o sclavo fidelo hai cheres chi partea caște pherel-pe cadai profeția. Si ciaces, i predicarea jial angle, tha si vi pharimata.

6. Savo si iech pharimos cai si șiuto angla i lucrarea de predicare?

⁶ Iech pharimos cai si șiuto angla i lucrarea de predicare si că le manușa așen amenghe contra. Le apostați, le conducători religioși hai le politicieni phenen că i buchi cai cheras-la si nasul. Athade catar cadal hohaimata, amare neamuri, le manușa cas prinjianas-les sau amare colegi catar i buchi daștinas te camen te cheren-ame te na mai slujisaras le Iehovasche hai te na mai das duma anda i vestea lași. Ande chichiva thema, i opoziția si cadea de nasul că amare phrala sile darade, phandade sau chiar condamnime co phandaimos. Amen ajucăras-ame ca le manușa te phiraven-pe amența cadea. O Isus phendea de mai anglal: „Va avena urâme sea le themendar anda mânro anav”. (Mat. 24:9) I ura cai dichas-la că si le manușen caring amende sicavel că sam cuci andel iacha le Iehovasche. (Mat. 5:11, 12) O Satan o Beng si codo cai cherel ca le manușa te așen amenghe contra. Tha o Isus, o Șiav le Devlesco, silo but mai zuralo sar vo. Le ajutoroia le Isusosco, i vestea lași arăsăl ca le manușa anda sea le națiuni. Te dichas catar jianas cadaia.

7. Sar pherel-pe aghies i profeția anda Revelația 14:6, 7?

⁷ Iech aver pharimos cai si amen cana das duma anda i vestea lași anda o Regato, si că le manușa den duma diferime șiba. Andi revelația cai dea-la le apostolosche Ioan, o Isus phendea de mai anglal că i vestea lași avelas te nachel părdal cado pharimos. (Citisar Revelația 14:6, 7.) Sar pherel-pe cadai profeția? Aghies, manușa anda sea i lumea daștin te citin po site-o jw.org, cai silo traducime ande mai but sar 1 000 șiba, materialea bazome pi Biblia. Sa cadea, sas aprobime ca o lil Bucurisar-tu viațatar anda sea o timpo!, o lil saveia ajutisaras le manușen te prinjianen mai mișto i Biblia, te avel traducime ande mai but sar 700 șiba. Pașa sea cadala, si cărdo haben spiritualo vi anda codola cașuche, sar avelas le materialea video ando limbajo le semnengo, hai vi andal core, anda save si cărde publicații andi Braille. Cana das amari zor ca sea mai but manușa te așunen o mesajo anda o Regato, dichas sar pheren-pe tela amare iacha le profeții biblico. Le manușa anda sea-l națiuni sichion te den duma ‘i șib uji’, adică prinjianen o ciacimos cai arachel-pe andi Biblia. (Zah. 8:23; Țef. 3:9) Sea cadala cheren-pe tela i lași supravegherea le Isus Cristososchi.

8. So sas cărdo ji acana prin i lucrarea de predicare?

⁸ Aghies, mai but sar 8 000 000 manușa anda 240 thema hai thana cheren parte anda i organizația le Iehovaschi hai, ande fiesavo bărș, șăla mii manușa bolen-pe. Tha mai  importanto sar o fapto că amaro număro bariol si că cadala neve discipoli line pe pende „i nevi personalitatea” hai sicaven calități spiritualo. (Col. 3:8-10) But anda lende sas-le mai anglal imoralo, marenas-pe, cherenas diferențea mașcar pende sau încărenas zurales ca lengo them. Vi i profeția scriime ande Isaia 2:4 pherel-pe, anda codoia că von ‘ci mai sichion o războio’. But manușa sile țârdine ca i organizația le Devleschi cana dichen că amen das amari zor te las pe amende i nevi personalitatea hai uștaras pe le urme amare supraveghetorosche, Cristos Isus. (Ioan 13:35; 1 Pet. 2:12) Sea cadala ci daștinas te aven cărde bi le ajutorosco le Isusosco.

9. Cadea sar phenel-pe ando Matei 24:45-47, so phendea o Isus de mai anglal că va avela ando timpo le sfârșitosco?

⁹ Citisar Matei 24:45-47. O Isus phendea de mai anglal că, ando timpo le sfârșitosco, avelas te numil ‘iech sclavo fidelo hai prevăzătorii’, cai te del haben spiritualo lesche continuatorenghe. Amen daisaras te dichas ciaces că o sclavo cherel but buchi vi aghies ande amaro miștimos. Prin o sclavo, iech țâno grupo cărdo anda creștini machle, o Isus, amaro supraveghetorii, del le jenen anda o poporo le Devlesco hai le manușen cai camen te prinjianen-les mai mișto „haben [spiritualo] co timpo potrivime”. Cadal creștini ci pachian că sile stăpâni opral averengo pachiamos. (2 Cor. 1:24) Mai but, von jianen că o Isus Cristos si „o conducătoro hai o comandanto” lesche poporosco. (Is. 55:4)

10. Andal publicații sicade andi imaginea, savi ajutisardea tut te jias po drom cai îngărel ca i viața veșnico?

¹⁰ Anda 1919, o sclavo fidelo cărdea mai but publicații caște ajutil codolen cai silen o ilo ujo te prinjianen o ciacimos. Anda 1921, sas cărdo o lil I Harfa le Devleschi, ande savo arachenas-pe sicaimata biblico de bază. Ando  timpo so le manușa parude-pe, sas cărde vi aver publicații. So lil ajutisardea tut te prinjianes hai te iubis amare Dades cerisco: „O Del te avel arachlo ciacio” (engl.), O ciacimos cai îngărel ca i viața eterno, Tu daștis te trais anda sea o timpo ando paradiso pi phuv, O prinjianimos cai îngărel ca i viața veșnico, So sicavel-ame ciaces i Biblia?, So sicavel-ame i Biblia? sau Bucurisar-tu viațatar anda sea o timpo!, amaro palutno lil anda o studio? Sea cadal lila ajutisarde-ame te cheras discipoli hai sas-le le mai lașe instrumentea ca lengo timpo.

11. Sostar trebul ca savore te primisaras haben spiritualo zuralo?

¹¹ Na numai codola neve ando ciacimos trebun te prinjianen mai mișto le Iehovas hai le bare sicaimata anda o Cuvânto le Devlesco. Savore trebul te cheras cadaia. O apostolo Pavel scriisardea: „Tha o zuralo haben si anda le bare manușa”. Vo mai phendea că, atunci cana cheras so sichileam andai Biblia, daisaras ‘te jianas so si mișto hai so si nasul’. (Evr. 5:14) Anda codoia că aghies le manușa sile mai rimosarde moralo sar niciechdata, daștil te avel amenghe pharo te cheras so phenel amenghe o Del. Tha o Isus lel sama pe amende hai zuriarel amaro pachiamos prin o sicaimos cai del-les amenghe caște daisaras te așias loialo. Vo cherel cadaia prin o scalvo fidelo hai prevăzătorii, cai pregătil amenghe haben spiritualo bazome po Cuvânto inspirime le Devlesco, i Biblia, caște del-les pe sea i phuv lesche slujitorenghe.

12. Cadea sar o Isus, sar sicavas pachiv caring o anav le Devlesco?

¹² Cadea sar o Isus, amen sicavas pachiv caring o anav le Devlesco. (Ioan 17:6, 26) Sar exemplo, anda 1931, amen leam o anav biblico „Le Martori le Iehovasche”. Prin cadaia sicavas chichi de cuci si anda amende o anav le Devlesco hai o amalimos chidino amare Dadeia cerisco. (Is. 43:10-12) Hai anda  octombria 1931, o anav „Iehova” apăril pi coperta fiesavea revistachi O Turno de Veghe. Mai but, i Biblia – Traducerea lumii noi șiutea parpale o anav le Devlesco ando than cai trebulas. So bari diferența si mașcar amende hai le changherea, cai chosle o anav „Iehova” anda but traduceri la Bibliache!

13. So cherel-tu te pachias că o Isus folosil aghies „o sclavo fidelo hai prevăzătorii”? (Ioan 6:68)

¹³ Prin „o sclavo fidelo hai prevăzătorii”, o Isus cărdea pi phuv iech șucar organizația, ande savi daisaras te anas iech închinarea uji le Iehovasche. Sar diches cadai organizația? Daștil-pe că vi tu simțosares sa cadea sar o apostolo Petru, cai phendea caring o Isus: „Caste te jias? Che cuvintea îngăren ca i viața veșnico”. (Ioan 6:68) Te gândisaras-ame iech țâra: Cai avileamas aghies dacă ci prinjiandeamas i organizația le Iehovaschi? Prin late, o Cristos lel sama te del-ame sicaimos caște avas zurale spiritualo. Sa cadea, sicavel-ame caște avas mai lașe andi lucrarea de predicare hai ajutil-ame te las pe amende „i nevi personalitatea”, caște avas cuci andel iacha le Iehovasche. (Ef. 4:24)

14. So miștimata sas-tu andi pandemia de COVID-19 anda codoia că san andi organizația le Iehovaschi?

¹⁴ O Isus del-ame iech îndrumarea goghiaver ande cadal timpuri phare. Cadai buchi dichilea-pe mișto cana astardea i pandemia de COVID-19. Ando timpo so but manușa ci jianenas so te cheren, o Isus lea sama te primisaras îndrumări claro, cai avenas te ferin-ame. Cadea că, samas sicade te phiravas masca andel thana cai si mai but manușa hai te așas dur iech averestar. Le phurenghe sas phendo te încăren o phanglimos savorența andai congregația hai te aven atento dacă trebul lenghe vareso fizico sau spiritualo. (Is. 32:1, 2) Mai  but, primisardeam îndrumări hai samas zuriarde prin le rapoartea catar o Corpo de Guvernare.

15. So îndrumări sas dine andi pandemia ande soste priveal le întruniri hai i lucrarea de predicare hai so miștimata sas amen?

¹⁵ Andi pandemia, primisardeam îndrumări claro anda sar te cheras amare întruniri hai i lucrarea de predicare. De pe iech ghies pe aver, astardeam te încăras amare întruniri hai congresea prin videoconferința. Sa cadea, vi o modo sar predichisardeam parudea-pe hai astardeam te șioas mărturia sea mai but prin lila hai telefono. Cu sea cadala, o Iehova dichlea că das amari zor caște cheras sea so daisaras hai dea-ame but miștimata. But filiale dichle că o număro le vestitorengo barilea but. Ande sa cado timpo, bute phralen sas len șucar experiențea. (Dich o chenarii „ O Iehova del-ame miștimata anda codoia că das amari zor te predichisaras”.)

16. So daisaras te pachias?

¹⁶ Daștil-pe că chichiva pachian că i organizația lea prea but măsuri caște ferin-ame ande cadai pandemia. Tha butivar sicadea-pe că i îndrumarea cai primisardeam-la sas goghiaver. (Mat. 11:19) Ando timpo so gândisaras-ame ca o modo iubitorii ande savo o Isus conducil pesche poporos, amaro pachiamos zuriarel-pe că, indiferento so va avela ando viitorii, o Iehova hai lesco Șiavo va avena pașa amende. (Citisar Evrei 13:5, 6.)

17. So simțosaras anda codoia că o Isus si amaro supraveghetorii?

¹⁷ So bari binecuvântarea si că o Isus si amaro supraveghetorii! Cheras partea anda iech organizația cai ci cheren-pe diferențea culturalo, naționalo hai ande soste priveal i șib. Si amen but haben spiritualo caște daisaras te avas zurale hai sam sicade te cheras mișto amari lucrarea de predicare. Fiesavo anda amende sam ajutime te avas manușa mai lașe hai te avel-ame iech bari iubirea iech caring aver. Daisaras te das-ame bare că o Isus si amaro supraveghetorii!