POIECHDATA, le murșa cai scriisarde i Biblia phende butivar sa codol dumes. Mai dur, va dichasa trin motivea sostar daștil-pe că von cărde cadaia.

O timpo cana sas scriime codol dumes. Andel purane ghiesa, le mai bute israelițen ci sas-len iech copia pala i Legea. Von așunenas i Legea sar sas-li citime, cana i națiunea chidelas-pe co tabernacolo. (Deut. 31:10-12) Daștil-pe că sas buchia cai țârdenas lenghi atenția ando timpo so beșenas ande pânrende hai așunenas but ceasuri sar citilas-pe i Legea, ando mașcar bute manușengo. (Neem. 8:2, 3, 7) Ande cadal ocazii, cana phenenas-pe mai butivar le sicaimata bare, sas mai ușoro andal manușa te încăren ande penghi goghi cotora andal Scripturi, hai pala codoia te cheren so phenelas-pe code. Cana phenenas-pe mai butivar anumime dumes, von ci mai bâstrănas le buchia mai detaliato, sar avenas le dispoziții hai hotărâri judecătorești dine le Devlestar. (Lev. 18:4-22; Deut. 5:1)

O modo le scriimasco. Cam deș anda iech șăl andai Biblia si cărdi anda ghilea, sar avenas le Psalmi, Cântarea cântărilor hai Plângerile. Ande chichiva ghilea arachenas-pe iech refreno cai cherelas o phanglimos sea la ghileasa hai ajutilas codolen cai așunenas-la te încăren ande penghi goghi le versuri. Sar exemplo, dichen le dumes cai arachen-pe ando Psalmo 115:9-11: „Israel, pachia tut ando Iehova! – Vo si chio ajutorii hai chio scuto! Chăr le Aaronosco, pachia tut ando Iehova! – Vo si chio ajutorii hai chio scuto! Tumen cai daran le Iehovastar, pachian tumen ando Iehova! – Vo si tumaro ajutorii hai tumaro scuto!”. Anda codoia că cadal dumes sas-le phende mai butivar, codola cai ghilabanas o psalmo sichionas le dumes mai sigo hai încărenas mai mișto ande penghi goghi hai ilo iech cuci ciacimos.

Caște sicavel-pe le sicaimata importanto. Poiechdata, codola cai scriisarde i Biblia folosisarde sa codol dumes caște sicaven bare sicaimata. Sar exemplo, cana o Iehova phendea le israelițenghe te na han rat, vo phendea lenghe mai butivar prin o Moise sostar te na cheren cadaia. O Del camlea te sicavel lenghe că „i viața orisave jiuvindimaschi si lesco rat”, aver varesar phendo o rat si viața. (Lev. 17:11, 14) Mai târzio, cana le apostoli hai le phure anda Ierusalimo phende save si le buchia cai duriaren amen le Devlestar, von phende pale că le manușa le Iehovasche trebun te încăren-pe parpale catar o rat. (Fap. 15:20, 29)

O Iehova ci camlea ca le manușa te cheren penghe iech obiceio anda o fapto te phenen mai butivar anumime cotora andal Scripturi. Sar exemplo, o Isus phendea: „Cana manghen tumen le Devlesche, te na phenen sa codol buchia de fiesavi data”. (Mat. 6:7) Mai dur, vo phendea codolenghe cai așunenas-les anda soste te den duma ando manglimos. (Mat. 6:9-13) Cadea că, vi cana ci va avela te phenas sa codol dumes ande amare manglimata, ci va avela te încăras amen parpale te mangas amen anda sa codol buchia mai butivar. (Mat. 7:7-11)

Cadea că, hachiaras că si lașe motivea sostar ando Lil le Devlesco si scriime mai butivar sa codol dumes. Cadaia si iech anda le but moduri prin save amaro Baro Sicaitorii sicavel amen so si ande amaro miștimos. (Is. 48:17, 18)