1. Sostar si pharo anda chichiva phrala te jian andi predicarea? (Dich vi i imaginea.)

 AMEN predichisaras anda codoia că iubisaras but le Iehovas hai camas ca vi aver manușa te prinjianen-les. But mașcar amende arachen bucuria andi predicarea, tha, anda aver, si pharo te cheren cadaia. Daștil-pe că chichiva sile mai lajiavune hai pachian că ci daștin te sicaven mișto averen. Aver ci simțon-pe mișto te jian ca le chăra le manușenghe bi te aven acharde. Chichiva daran că le manușa ci va așunena-len hai că chiar va holiarena-pe. Chiar cana iubin zurales but le Iehovas, cadale phralenghe hai pheianghe si lenghe pharo te den duma anda i vestea lași manușența cas ci prinjianen-len. Cu sea cadala, von hachiaren chichi de importanto si cadai buchi hai jian mai butivar andi predicarea. O ilo le Iehovasco bariol cana dichel că den penghi zor te cheren cadaia.

2. Dacă si tuche pharo te araches bucuria andi predicarea, sostar ci trebul te aves perado?

² Si vi tuche pharo poiechdata te araches bucuria andi predicarea? Dacă da, na av perado. Cana ci pachias tut ande tute, sicaves că san iech manuș umilo, cai ci ciaiol-les te țârdel i atenția caring peste hai te hal-pe le manușența. Hai chonic ci camel te holiarel le manușen, vi mai but cana del peschi zor te cherel vareso ande lengo miștimos. Chio Dad cerisco jianel mișto so si ande chio ilo hai camel te ajutil tut. (Is. 41:13) Ande cado articolo, va avela te dichas panji buchia cai va ajutina amen te nachas părdal amare daraimata hai te arachas bucuria andi predicarea.

MECH CA O LIL LE DEVLESCO TE ZURIAREL TUT

3. So ajutisardea le profetos Ieremia te predichil le manușenghe?

³ Încă andal ghiesa purane, o Lil le Devlesco zuriardea le manușen le Iehovasche cana sas lenghe dine te cheren buchia phare. Iech anda lende sas o profeto Ieremia. Mai anglal, lesco ilo sas-lo darado cana o Iehova phendea lesche te predichil. Vo  phendea: „Me ci jianav te dav duma, anda codoia că som numai iech șiavorro”. (Ier. 1:6) So ajutisardea-les te pachial-pe mai but ande peste? Vo astardea zuralimos anda o Lil le Devlesco. O Ieremia scriisardea: „Leschi duma arăslea sar iech bari iag, sar iech iag phandadi ande mânre cocala hai chinilem te mai încărav-la ande mande”. (Ier. 20:8, 9) Chiar cana o profeto trebuisardea te predichil ande iech teritorio pharo, o mesajo cai phendea-les dea-les o zuralimos cai sas-les nevoia caște cherel peschi buchi.

4. So miștimata si amen cana citisaras anda o Lil le Devlesco hai gândisaras amen ca so sichileam? (Coloseni 1:9, 10)

⁴ Vi aghies, le creștini astaren zuralimos prin le dumes le Iehovasche cai arachen-pe andi Biblia. O apostolo Pavel zuriardea pesche phralen cai beșenas ando Colose te prinjianen chichi mai mișto le sicaimata anda o Lil le Devlesco. Vo phendea vi sostar te cheren cadaia: „Caște phiren ande iech modo demno le Iehovastar, . . . ando timpo so den mai dur rodo ande orisavi lași buchi”. (Citisar Coloseni 1:9, 10.) Anda cadai „lași buchi” cherel partea vi i predicarea cai cheras-la caște phenas le manușenghe i vestea lași. Cadea că, cana citisaras anda o Lil le Devlesco hai gândisaras amen ca so sichileam, zuriaras amaro pachiamos ando Iehova hai hachiaras chichi de importanto si te phenas le manușenghe o mesajo anda o Regato.

5. So trebul te cheres caște țârdes miștimata cana citis hai sichios andai Biblia?

⁵ Caște țârdes miștimata anda o Lil le Devlesco, cher tuche timpo caște citis-les, te sichios anda leste hai vi te gândis tut ca so sichilean. Na sighiar. Dacă araches iech verseto cai ci hachiares-les, na nach părdal leste. Rode te prinjianes mai mișto codo verseto. Caște cheres cadaia, daștis te folosis o Indexo le publicațiengo Watch Tower sau o Ghido de cercetare anda le Martori le Iehovasche. Dacă cheres tuche timpo te sichios atento, chio pachiamos că so si ando Lil le Devlesco si o ciacimos va avela zuriardo. (1 Tes. 5:21) Cana zuriares sea mai but chio pachiamos, va aveia mai bucurime te phenes vi averenghe so sichilean.

PREGĂTISAR TUT MIȘTO ANDA I PREDICAREA

6. Sostar trebul te pregătisaras amen mișto anda i predicarea?

⁶ Cana pregătisaras amen mișto angla te jias andi predicarea, ci va avela te daras te das duma le manușența. Mai anglal te bișialel-len andi predicarea, o Isus ajutisardea pesche discipolen te pregătin-pe. (Luca 10:1-11) Anda codoia că așunde catar so sicadea-len o Isus, le  discipoli arachle iech bari bucuria ande sea so daisarde te cheren. (Luca 10:17)

7. Sar daisaras te pregătisaras amen anda i predicarea? (Dich vi i imaginea.)

⁷ Sar daisaras te pregătisaras amen? I iechto buchi cai daisaras te cheras-la si te alosaras anda so camas te das duma andi predicarea. Pala codoia, te das amari zor te phenas codo ciacimos prin amare dumes. Sa cadea, daisaras te gândisaras amen ca sar daștinas le manușa anda o than cai cheras i predicarea te phiraven-pe amența. Te gândisaras amen ca dui sau trin situații hai so va avela te phenas lenghe. Hai cana das duma le manușența, te das amari zor te avas liniștime, te asas hai te phiravas amen amalicanes.

8. Sar si le creștini cadea sar le vase cărde andai phuv anda save dea duma o apostolo Pavel?

⁸ O apostolo Pavel dea iech exemplo caște sicavel savo si amaro rolo andi predicarea. Vo phendea: „Si amen cado barvalimos ande vase cărde andai phuv”. (2 Cor. 4:7) Tha so si „cado barvalimos”? Si i predicarea anda o Regato, iech buchi cai salvil vieți. (2 Cor. 4:1) Tha so si le „vase cărde andai phuv”? Von si le manușa le Devlesche, cai phenen le manușenghe i vestea lași. Andel ghiesa le Pavelosche, codola cai bichinenas folosinas vase cărde andai phuv caște îngăren lența habena, mol, love sau aver buchia cuci. Sa cadea, o Iehova dea amen o cuci mesajo anda i vestea lași. Le Iehovasa pașa amende, daisaras te astaras o zuralimos caște predichisaras mai dur pherde pachiamos.

MANG TUT ANDA TROMAI

9. Sar daisaras te nachas părdal i dar le manușendar hai i dar că von ci va camena te așunen amen? (Dich vi i imaginea.)

⁹ Poiechdata, cana jias andi predicarea, daștil te astarel amen i dar le manușendar sau i dar că von ci va camena te așunen amen. So daștil te ajutil amen te nachas părdal cadal daraimata? Te dichas so cărde le apostoli cana codola cai așenas lenghe contra phende lenghe te na mai predichin. Ando than te mechen-pe astarde daratar, von mangle le Iehovas te ajutil-len ‘te phenen mai dur lesco cuvânto pherde tromai’. Hai o Iehova dea-len sigo răspunso. (Fap. 4:18, 29, 31) Vi amen daisaras te mangas le Iehovas te ajutil amen de fiesavi data cana i dar le manușendar așavel amen te cheras leschi buchi. Mang le Iehovas te bariarel ande chio ilo sea mai but i iubirea caring le manușa, ca voi te avel mai bari sar i dar le manușendar.

10. Sar ajutil amen o Iehova te cheras amari buchi sar Martori? (Isaia 43:10-12)

 ¹⁰ O Iehova alosardea amen te avas lesche Martori hai phendea amenghe că va ajutila amen te avas tromane. (Citisar Isaia 43:10-12.) Te gândisaras amen ca ștar buchia prin save o Iehova bariarel amaro tromai. I dintuni buchi, o Isus silo amența de fiesavi data cana phenas i vestea lași. (Mat. 28:18-20) I duito buchi, o Iehova bișialel pesche îngeren caște ajutin amen. (Rev. 14:6) I trinto buchi, o Iehova del amen pesco spirito sfânto caște ajutil amen te anas amenghe andi goghi so sichileam. (Ioan 14:25, 26) Hai i ștarto buchi, o Iehova dea amen phrala hai pheia cai te jian amența andi predicarea. Daisaras te nachas părdal amare daraimata hai te predichisaras tromane anda codoia că o Iehova hai amare phrala pherde iubirea sile pașa amende.

PARUV CHIO PROGRAMO PALA O MANUȘ HAI ALOSAR TE DICHES LE LAȘE BUCHIA

11. Sar daisaras te arachas mai bute manușen cana jias andi predicarea? (Dich vi i imaginea.)

¹¹ Gălean vi tu andi predicarea hai arachlean țâra manușen chăre? Dacă da, puș tut: „Cai daștinas te aven le manușa anda mânro teritorio acana?”. (Fap. 16:13) „Daștinas te aven ca i buchi sau te chinen vareso?” Dacă si cadea, daștis te araches mai bute manușen cana cheres predicarea po drom? Iech phral cai bușiol Joshua phenel: „Rodem te jiav andi predicarea andel thana cai si magazinea hai mai but manușa”. Mai but, vo hai leschi rromni, Bridget, arachenas mai bute manușen chăre, cana jianas andi predicarea chăr chărestar mai pașă rachiatar, mașcar o ceaso 6 hai 8, sau curche pala mismeri. (Ef. 5:15, 16)

12. Sar daisaras te jianas ande soste pachian le manușa hai so si importanto anda lende?

¹² Dacă diches că le manușa anda chio teritorio ci prea camen te așunen so phenes lenghe andai Biblia, de chi zor te hachiares ande soste pachian von sau so si importanto anda lende. Cana jian andi predicarea, o Joshua hai i Bridget folosin iech pușimos cai arachel-pe ande iech anda amare pliantea. Sar exemplo, cana folosin o plianto So pachias andai Biblia?, von phenen: „Chichiva manușa dichen i Biblia sar iech lil cai avel le Devlestar. Tha aver ci pachian cadaia. Tu so phenes?”. Butivar, pala cado pușimos, astaren te den duma lența mai dur anda o Del.

13. Sostar daisaras te phenas că amen cărdeam amari buchi mișto chiar cana le manușa ci camen te așunen amen? (Proverbe 27:11)

 ¹³ Te cheras mișto amari buchi andi predicarea ci încărel catar chichi de but jene așunen amen. Sostar? Anda codoia că amen cărdeam so mangle amendar o Iehova hai lesco Șiavo: șiuteam iech lași mărturia. (Fap. 10:42) Chiar cana ci das duma chanicasa sau le manușa ci camen te așunen i vestea lași, amaro ilo bariol bucuriatar anda codoia că jianas că amaro Dad cerisco dichel amen lașe iachența. (Citisar Proverbe 27:11.)

14. Sostar daisaras te avas voime cana iech phral arachel ando teritorio ieche manușes cai camel te așunel i vestea lași?

¹⁴ Daisaras te avas voime vi cana aver phral arachel andi predicarea ieche manușes cai camel te jianel i vestea lași. Ando Turno de veghe, phendea-pe că amari buchi si sar cana rodel-pe iech șiavo hasardo. Mai but manușa roden-les ande mai but thana. Cana arachen le șiaves, fiesavo mașcar lende va avela voime, na numai codo cai arachlea-les. Sa cadea, sea le phrala andai congregația den penghi zor ande iech than te cheren neve discipoli le Isusosche. Si amen nevoia savore phralendar andai congregația caște predichisaras sea le manușenghe anda amaro teritorio. Hai cana iech manuș nevo astarel te avel ca le întruniri, savore sam voime.

IUBIN LE IEHOVAS HAI LE MANUȘEN

15. Sar ajutin amen le versetea anda Matei 22:37-39 te bariaras amari bucuria andi predicarea? (Dich vi i imaginea .)

¹⁵ Caște bariaras amari bucuria andi predicarea, trebul te anas amenghe andi goghi sostar cheras cadaia. Amen jias andi predicarea anda codoia că iubisaras le Iehovas hai le manușen. (Citisar Matei 22:37-39.) Te gândisaras amen chichi de but bariol o ilo le Iehovasco cana dichel amen că cheras leschi buchi hai so voime si le manușa cana astaren te sichion andai Biblia! Sa cadea, te na bâstras că codola cai camen te așunen i vestea lași hai alosaren te slujin le Iehovasche va traina anda sea o timpo. (Ioan 6:40; 1 Tim. 4:16)

16. Sar daștis te araches bucuria andi predicarea cana naches prin iech pharimos cai ci mechel tut te încles avri anda o chăr? De iech exemplo.

¹⁶ Si tut vroiech pharimos cai ci mechel tut te încles avri anda o chăr? Dacă naches prin cadaia, de sea chi zor te diches so daștis te cheres caște sicaves chi iubirea caring o Iehova  hai caring le manușa. Cana sas i pandemia de COVID-19, o Samuel hai leschi rromni, i Dania, ci daisarde te înclen avri anda o chăr. Ande codo pharo timpo, von predichisarde butivar prin o telefono, prin le lila hai încărde studii biblico po Zoomo. O Samuel dea duma anda i vestea lași vi le manușența cai arachelas-len ca i clinica cai cherelas pesco tratamento anda o cancero. Vo phenel: „Le pharimata prin save nachas daștin te peraven amen, te chiniaren amen hai te covliaren amaro pachiamos. Trebul te arachas bucuria andi buchi cai cheras-la anda o Iehova”. Mai but, i Dania pelea hai ci mai daisardea te vazdel-pe anda o pato trin șiona. Pala codoia, așilea șiov șiona ande iech scamin cu rotile. Voi phenel: „Dem mânri zor te cherav sea so daisardem. Cana i asistenta avelas amende chăre, sau le curieri anenas amenghe buchia, demas duma lența anda i vestea lași. Mai but, dem duma anda o Del co telefono vi iecha jiuvleasa cai bichinelas echipamentea medicalo”. Chiar cana o Samuel hai i Dania ci mai daisarde te cheren cadea de but sar mai anglal, von cărde sea so încărdea lendar hai arachle bucuria ande penghi buchi.

17. Sar daștis te țârdes sea mai but miștimata anda le sfaturi cai arachen-pe ande cado articolo?

¹⁷ Le sfaturi anda cado articolo sile sar le ingredientea anda iech haben. Caște daștis te cheres iech lașio haben, ci trebul te meches avri niciech anda lende. Sa cadea, daisaras te țârdas sea mai but miștimata anda cadal sfaturi cana folosisaras-len ande iech than. Cana cheras cadea, ci va avela te mechas amen perade hai va avela te arachas mai but bucuria andi predicarea.