Năștisailem ando bărș 1955. Samas trin phrala hai me somas o mai țâno de mașcar lende. Barilem pașa i coasta de sud andai Finlanda, ande iech than cai acana arachel-pe o foro Vantaa.

Mânri dei boldea-pe sar Martora le Iehovasche chichiva bărșența angla so te cărdioav me. Mânro dad așelas lache contra hai ci mechelas mânra deia te sichiol amența andai Biblia hai nici te îngărel amen ca le întruniri. Cu sea cadala, voi sicadea amen le bare ciacimata la Bibliache cana amaro dad ci sas-lo pașa amende.

Încă de cana somas țâno șiavorro camlem te așiav loialo le Iehovasche. Sar exemplo, cana sas man efta bărșa, mânri învățătoarea holiardea-pe anda codoia că ci camlem te hav verilättyjä (clătite finlandezo cărde ratesa). Ieche vastesa chidelas zurales mânre ciama caște pâtrav mânre ușta, hai le coavere vastesa camelas te șiol ande mânro mui iech cotor clătita. Tha me daisardem te șiudav tele anda laco vast i furculița.

Mânro dad mulea cana sas man 12 bărșa. Pala codoia, daisardem te jiav ca le întruniri la congregațiache. Le phrala line sama mandar hai sicade manghe lașimos, hai cadaia ajutisardea man te barioav ando pachiamos. Astardem te citisarav andai Biblia ande fiesavo ghies hai te sichioav atento anda amare publicații. Cadal buchia ajutisarde man te bolav man co 14 bărșa, ande 8 augusto 1969.

 Ca țâra timpo pala so terminisardem i școala, astardem o pionierato regularo. Pala chichiva curche, muchisailem ande Pielavesi, iech foro anda o centro la Finlandaco, cai sas mai but nevoia phralendar.

Ande Pielavesi, prinjiandem iecha pheia cai avelas te arăsăl mânri rromni, i Sirkka. Ciailea man late că sas iech phei modesto hai că sas-la iech pachiamos zuralo. Voi ci rodelas barvalimata anda peste sau te avel mișto dichli averendar. Sea so camleam le dui sas te slujisaras le Iehovasche chichi mai but daisardeamas, oriso avelas te cheras andi buchi le Devleschi. Cărdeam o abiav ande 23 martia 1974. Ando than te jias ando șion de avghin, tiliardeam te slujisaras ande Karttula, cai sas mai bari nevoia phralendar anda i predicarea.

Încă de cana leam amen, o Iehova sicadea amenghe că dacă șioas o Regato po iechto than, vo avelas te lel sama te avel amen sea so trebulas amenghe. (Mat. 6:33) Sar exemplo, ande Karttula ci sas amen iech mașina. Mai anglal, phirdeamas po biciclete caște jias anda iech than ande aver. Tha, po ivend cărdiolas-pe zurales șâl. Cadea că, caște cheras o baro teritorio la congregațiaco, trebulas amenghe iech mașina. Tha, ci sas amen love te chinas amenghe iech.

Bi te ajucăras amen, mânro phral mai baro avilea ji amende te dichel amen. Pherdo lașimos, vo dea amen leschi mașina. I asigurarea sas deja pochindi. Trebulas numai te chinas motorina. Cadea că, acana sas amen i mașina cai trebulas amenghe caște jias andi predicarea.

O Iehova sicadea amenghe că vo cherelas peschi partea te lel sama pe amende. Amen numai trebulas te șioas o Regato po iechto than.

Ando bărș 1978, cana cărdeamas i Școala andal Pionieri, iech andal phrala cai sicavenas amen, o Raimo Kuokkanen a, zuriardea amen te gândisaras amen te jias ca i Școala Galaad. Cadea că, astardeam te sichioas i șib englezo caște daisaras te avas alosarde te jias. Cu sea cadala, ando bărș 1980, angla so te cheras iech cererea, samas acharde ca i filiala anda Finlanda. Ande codo timpo, le beteliști ci daștinas te cheren i Școala Galaad. Tha amen camleam te slujisaras cai phenelas amenghe o Iehova că si mai  mișto, na cai ciaiolas amen. Cadea că, găleam te slujisaras co Betelo. Tha, amen sichileam vi mai dur i șib englezo caște avas pregătime dacă avelas te avas acharde co Galaado.

Pala chichiva bărșa, o Corpo de Guvernare cărdea posibilo ca vi le beteliști te cheren cadai școala. Cărdeam le cereri sigo, tha na anda codoia că ci samas bucurime ando Betelo. Amen ciaiolas amen but code. Tha, dacă daștilas-pe, camleamas te slujisaras cai sas mai bari nevoia amendar. Samas acharde co Galaado hai terminisardeam i 79-to clasa ande septembria 1985. Amari dintuni repartiția sas andi Columbia.

Andi Columbia, amari dintuni repartiția sas ca i filiala de othar. Dem mânri zor te cherav chichi mai mișto mânri buchi ca i filiala, tha, pala iech bărș, simțosardem i nevoia catar iech paruimos. Cadaia sas i iechto hai corcori data ande mânri viața cana manglem te paruvel-pe mânri repartiția. Cadea că, samas bișialde ando foro Neiva, anda i regiunea Huila.

Ciailea man sea o timpo i predicarea. Andi Finlanda, cana somas corcoro hai cărdemas pionierato, gălemas andi predicarea de teharin ji pi riat târzio. Vi pala so me hai i Sirkka leam amen, găleamas butivar sea o ghies andi predicarea. Cana cărdeamas predicarea andel thana mai duriarde, suteamas andi mașina. Cadea, ci hasardeamas o timpo po drom hai astardeamas i predicarea de teharin.

Sar misionari, simțosardeam pale i bucuria cai sas amen cana cărdeamas pionerato. Amari congregația bariolas hai bucurisardeam amen te avas ande iech than amare lașe phralența columbiano, save sicavenas amenghe pachiv hai iubirea.

Pașa i Neiva, o than cai amen cărdeamas predicarea, sas foruria cai ci beșelas niciech Martoro. Butivar pușlemas man sar avelas te arăsăl i vestea lași vi code. Anda codoia că code sas marimata, cadal thana sas-le periculoso anda codola cai ci beșenas code. Cadea că, manglem man ca varecon anda cadal foruria te cărdiol iech Martoro. Gândisardem man că iech manuș sar cado trebulas te beșel andi Neiva caște daștil te sichiol o ciacimos. Sa cadea, manglem man, ca pala so bolel-pe te arăsăl iech creștino zuralo ando pachiamos hai te jial parpale ando foro cai barilea caște predichil. Tha le Iehovas sas-les iech soluția vi mai lași sar codoia ca savi gândisardem man me.

Na pala but timpo, astardem te sicavav andai Biblia ieche tărnes po anav Fernando González. Vo beșelas ande Algeciras, iech andal foruri cai ci sas Martori. Ande fiesavo curco, o Fernando jialas mai but sar 50 km ji andi Neiva, cai cherelas buchi. Pregătilas-pe zurales mișto anda o studio hai astardea te avel ca sea le întruniri. Încă anda o iechto curco de cana studiilas, o Fernando chidelas ande iech than mai bute manușen anda o foro cai barilea caște phenel lenghe so sichiolas andai Biblia.

O Fernando boldea-pe ande ianuaria 1990, pala șov șiona de cana astardea te sichiol andai Biblia. Pala codoia, astardea o pionierato regularo. Anda codoia că ande Algeciras sas acana iech Martoro de othar, i filiala pachiaia că daștil te bișialel code pionieri speciali cai te cheren predicarea  ande codo than. Ande februaria 1992, ande cado foro sas cărdi iech nevi congregația.

Tha o Fernando ci predichisardea numai ando foro cai barilea. Pala so căsătorisailo, vo hai leschi rromni muchisarde-pe ando San Vicente del Caguán, iech aver foro cai ci sas niciech Martoro. Von ajutisarde te avel cărdi vi code iech congregația. Ando bărș 2002, o Fernando sas-lo numime phral cai vizitil le congregații. Vi aghies, vo hai leschi rromni, i Olga, slujin mai dur andi buchi itineranto.

Anda cadai experiența, hachiardem chichi de importanto si te mangas amen anda buchia concreto anda amari repartiția. O Iehova cherel so amen ci daisaras te cheras. Ji la urmă, i buchi si leschi, na amari. (Mat. 9:38)

Ando bărș 1990, samas bișialde andi buchi itineranto, hai amari dintuni circumscripția sas chiar ando baro foro le themesco, Bogotá. Cadai repartiția daradea amen. Me hai mânri rromni sam manușa simplo hai na-i amen talentea deosebime. Mai but, amen ci beșleam niciechdata ande iech foro baro. Tha o Iehova încărdea peschi promisiunea anda Filipeni 2:13: „Că o Del si codo cai cherel buchi ande tumende, cadea sar ciaiol-les. Cherel tumen vi te camen hai vi del tumen o zuralimos caște cheren so trebul”.

Pala codoia, amen samas bișialde ande iech circumscripția anda savi cherelas partea vi o foro Medellín, anda savo dem duma co începuto. Le manușa de cathar sas-le cadea de sicade te dichen sar maren-pe hai mudaren-pe le manușa po drom, că ci mai daranas. Iechdata, cana încărdemas iech studio biblico, po drom așundea-pe sar le manușa țârdenas iech ande aver le pistolența. Me somas gata te șiudav man ca i phuv, tha o murș casa sichilemas citisardea mai dur o paragrafo sar cana ci sas chanci. Cana terminisardea te citil, manglea pesche iertarea hai gălea avri. Pala chichiva minutea, avilea parpale duie șiavorrența hai phendea manghe pe iech glaso liniștime: „Mangav manghe iertarea, tha trebuisardea te anav andre mânre șiavorren”.

Nachleam vi prin aver situații phare. Iechdata, cana cărdeamas predicarea chăr chărestar, mânri rromni nașlea mande astardi daratar, parni sar iech momeli. Phendea manghe că varecon țârdea caring late le pistolosa. Cărdilem sar iech barr. Tha mai târzio, hachiardem că na caring i Sirkka camlea te țârdel tha caring iech murș cai nachelas pașa late.

Ando timpo, sichileam te na mai daras cana dichleamas marimata po drom. Samas zuriarde cana dichleam le phralen de othar cai ci mechenas-pe. Vi von nachenas prin pharimata sar cadala sau chiar mai nasul. Anda codoia, gândisardeam amen că o Iehova va ajutila vi amen cadea sar ajutilas vi len. Deam amari zor te așunas pala le sfaturi le phurenghe, cărdeam sea so daisardeam caște las sama amendar hai mechleam le buchia andel vasta le Iehovasche.

Si ciaces, na sea le situații sas-le cadea de periculoso sar pachiaiamas amen. Iech-var, cana samas angla iech udar cai cărdeamas predicarea, așundeam sar cana dui jiuvlea hanas-pe hai  acușenas-pe. Ci camlemas te dichav iech scena sar cadaia, tha i jiuvli cai beșelas code achardea man te jiav pi terasa. Ji la urmă, hachiardem că ci „hanas-pe” dui jiuvlea, tha dui papagali, cai cherenas sar le vecini.

Ando bărș 1997, somas numime instructoro ca i Școala de Instruire Ministerială b. Sea o timpo dichlem cuci le școli teocratico, tha ci nachlean niciechdata prin mânri goghi te avav me codo cai sicavav le phralen.

Mai târzio, slujisardem sar supraveghetoro de district. Cana cadai forma de serviciu ci mai sas, cărdem pale buchi andi circumscripția. Cadea că, de mai but sar 30 bărșa, slujiv sar phral cai sicavel averen ca le școli hai sar phral cai vizitil le congregații. Cadal buchia andine manghe but miștimata. Tha sas man vi chichiva pharimata, cadea sar va avela te phenav mai dur.

Som iech manuș zuralo hai hotărâme. Si ciaces, cadaia ajutisardea man te nachav părdal le pharimata anda mânri viața. Tha, poiechdata, dem prea but mânri zor te lașiarav anumime problemea andal congregații. Mai butivar, dem le phralen sfaturi zurale hai phendem lenghe te sicaven mai but iubirea hai te mechen pendar. Tha, sas interesanto, că ande codol momentea, chiar man ci sas man cadal calități. (Rom. 7:21-23)

Poiechdata, le doșa cai cărdem-len peravenas man zurales but. (Rom. 7:24) Iechdata, chiar phendem le Iehovasche ando manglimos că o mai mișto avelas te mechav mânri repartiția sar misionaro hai te jiav parpale chăre, andi Finlanda. Ande codoi riat, gălem ca iech întrunirea la congregațiachi. So așundem ca i întrunirea zuriardea man te așiav andi repartiția hai te cherav buchi mai dur ca mânre imperfecțiuni. Vi aghies, mânro ilo silo pusado cana gândiv man sar dea man răspunso o Iehova co manglimos. Mai but, ci si man dumes te mulțumisarav lesche anda o lașimos savesa ajutisardea man te nachav părdal mânre covlimata.

Me hai i Sirkka sam zurales recunoscători le Iehovasche că dea amen o privilegio te cheras buchi anda leste i mai bari partea anda amari viața. Sa cadea, mulțumisarav anda ilo le Iehovasche că ande sea cadal bărșa sas man pașa mande iech rromni iubitoro hai loialo.

Na pa but timpo, va avela te pherav 70 bărșa hai ci va avela te mai slujisarav sar instructoro ca le școli teocratico hai sar phral cai vizitil le congregații. Tha cadai buchi ci peravel man. Sostar? Anda codoia că pachiav că so anel i mai bari pachiv le Iehovasche si te slujisaras lesche modesto hai te așaras-les anda iech ilo pherdo iubirea hai recunoștința. (Mica 6:8; Mar. 12:32-34) Caște anas pachiv le Iehovasche ci trebul te rodas te cheras bare buchia andi organizația caște avas dichle averendar.

Cana dichav man parpale ca le șucar buchia cai daisardem te cherav-len anda o Iehova, dav mânri sama că ci sas manghe dine anda codoia că som mai lașio sar aver sau că jianglem te cherav zurales mișto vareso. Nici! O ciacimos si că von avile anda o lașimos nemeritime le Iehovasco. Vo dea-len manghe, chiar cana sas man but covlimata. Bi lesco, ci daisardemas te cherav chanci. Cadea că, mânre covlimata sicade so baro si o zuralimos le Iehovasco! (2 Cor. 12:9)