Andel bărșa cana somas adolescento, mânri relația chidini le Iehovaia începosardea te șudrol. Mânre colegi catar i școala dichiolas-pe că bucurin-pe catar but libertatea, tha vi me camlem te avav sar von. Simțosardem că le reguli mânre dadenghe hai le norme creștino, încărenas-ma phangli, hai le activități spiritualo fanas-ma phare. Chiar cana ci phendem niciechdata că o Iehova ci existil, începosardem te duriarav-ma lestar.

Chiar cana ci cărdilem inactivo, andem le Iehovasche iech închinarea de le manușenghe iacha. Andel țâra ocazi ande save gălem andi predicarea, ci somas niciechdata pregătime. Anda codoia, sas manghe pharo te începosarav te dav duma hai te șioav mărturia mai dur. Si ciaces, ci cărdem mișto i lucrarea de predicarea hai ci sas-ma nici bucuria, cadaia cărdea te aven-ma vi mai but sentimentea negativo caring i lucrarea. Pușlem-ma: „Sar daștin unii te predichin sea o timpo mai but curche hai șiona iech pala aver?”.

Cana pherdem 17 bărș, camlem zurales te avav libero, cadea că lem mânre buchia hai tiliardem  andi Australia. Mânre dada sas-le zurales duchade, tha sperisarde că va avela te slujisarav mai dur le Iehovasche.

Ande Australia, mânro amalimos le Iehovaia șudrilea vi mai but. Gălem cana hai cana ca le întruniri. Mânre amala sas-le tărne cai, cadea sar me, ande iech riat janas ca i întrunirea, hai ande aver, pienas hai chelenas andel cluburi. Cana dichav parpale, dav mânri seama că somas ieche pânreia andi organizația le Iehovaschi hai le coavereia andi lumea le Satanoschi, tha ci arachlem mânro than chachinde.

Cam pala dui bărșa, prinjiandem iecha pheia cai, bi te del peschi seama, cărdea-ma te gândisarav-ma mai mișto ca mânri viața. Me hai aver ștar pheia beșleam sea ande codo chăr hai achardeam le supraveghetoros de circumscripție hai lesca rromnia, i Tamara, te beșen amende chichi sas-le andi vizita. Cana laco rrom cherelas buchi ca le probleme la congregațiache, i Tamara beșelas amența, le șeianța, hai asalas ande iech than amența, cadaia placiaia-ma zurales but. Voi sas iech phei lași castar daisardean te pașios! Ci pachiaiem că daștis te simțos-tu cadichi de mișto pașa varecaste cadea de spiritualo!

Pe la Tamaraco mui dichiolas-pe iech bari bucuria, hai lachi iubirea anda o ciacimos hai anda i lucrarea lelas-pe. Voi sas zurales bucurime anda codoia că delas le Iehovas so sas-la mai lașio, ando timpo so me somas nefericime hai andem le Iehovasche iech servico numai de le manușenghe iacha. Lachi atitudinea pozitivo hai lachi ciaci fericirea parudea mânri viața. O exemplo la Tamaraco cărdea-ma te gândisarav-ma ca iech baro ciacimos biblico: O Iehova camel ca soavră anda amende te slujisaras lesche „bucuriaia”. (Ps. 100:2)

Camlem te avav vi me bucurime cadea sar i Tamara, tha, caște avel-ma cadai bucuria, trebulas te cherav bare paruimata. Trebuisardea manghe mai but timpo hai mai anglal cărdem țâne pași. Începosardem te pregătisarav-ma anda i lucrarea hai cărdem pionierato auxiliaro  po iechdata. Cadaia ajutisardea-ma te na mai aven-ma emoții hai te avel-ma pale pachiamos ande mande. Chichi folosisardem mai but i Biblia andi lucrarea, cadichi somas mai bucurime. Pala iech timpo cărdem pionierato auxiliaro ande fiesavo șion.

Începosardem te cherav manghe amala vi tărne hai vi mai phure, cai sas-le iech lași spiritualitatea hai cai arachenas bucuria ando servicio le Iehovasco. Lengo exemplo ajutisardea-ma te dichav so te șioav po iechto than ande mânri viața hai te cherav manghe iech lașio programo spiritualo. Placiaia-ma sea mai but te jiav andi lucrarea de predicare hai, ji la urmă, începosardem o pionierato regularo. Pala but bărșa, începosardem te avav fericime hai arachlem mânro than andi congregația.

Pala iech bărș prinjiandem le Alexos, iech lașio phral hai sincero cai iubilas le Iehovas hai i lucrarea de predicare. Vo sas-lo slujitorii auxiliaro hai cherelas pionierato de șov bărș. Mai but, o Alex slujisardea iech timpo ande Malawi, ande iech than cai sas mai bari nevoia phralendar. Code beșlea ande iech than chichiva misionarența, cai dine-les iech lașio exemplo hai zuriarde-les te șiol mai dur o Regato po iechto than andi viața.

Ande 2003, me hai o Alex căsătorisardeam-ame hai de atunci slujisaras ando servicio cu timp integral. Sichileam ande iech than but șucar lecții, hai o Iehova binecuvântisardea-ame ande but feluri.

Ande 2009, samas numime misionari ando Timoro de Est, iech țâno them anda o arhipelago indoneziano. Ci ajucărdeam-ame hai samas bucurime, tha ande sa codo timpo, vi daraileam iech țâra. Panji șiona mai târzio, samas deja andi capitala le themeschi, Dili.

Trebuisardea te cheras bare paruimata ande amaro modo viațaco. Sea sas nevo: i cultura, i șib, o hamos hai o than cai beșleam. Andi lucrarea  deam duma manușența zurales ciore, cai ci sas-le but școala sau ci sas-le ca școala niciechdata hai suferisarde anda codoia că sas-le asuprime. O războio hai o marimos mechle bute jenenghe anda lende iech bari duch fizico hai emoționalo. *

I lucrarea de predicare sas zurales șucar! Iech data arachlem iech șei po anav Maria *, cai sas-la 13 bărș. Sas-li zurales duchadi. Lachi dei mulea chichiva bărșența mai anglal, hai lache dades dichelas-les numai po iechdata. Cadea sar but șiave de lache bărșa, i Maria ci jianelas so te cherel andi viața. Anav manghe amintea că, iech data începosardea te phenel manghe asfența sea so sas ande laco ilo. Tha ci hachiardem so phenelas manghe anda codoia că ci demas duma încă mișto lachi șib. Rughisardem le Iehovas te ajutil-ma te zuriarav-la hai începosardem te citisarav lache versetea cai sastiarde lachi duch. Andel bărșa cai avile, dichlem sar o ciacimos parudea sar simțosardea-pe i Maria, sar sicavelas de avreal, hai sea lachi viața. Boldea-pe, hai acana vi la sila studii biblico. Aghies, i Maria cherel partea anda iech bari familia spiritualo hai ci mai simțol-pe corcori.

Dichiol-pe că, o Iehova binecuvântil i lucrarea de predicare anda o Timoro de Est. Chiar cana le mai but andal phrala bolde-pe numai acana deș bărș, but anda lende sile pionieri, slujitori auxiliari sau phure de congregație. Aver slujin ca le birouri de traducere ca distanța, cai ajutin ca i traducerea le publicațienghi andel șiba localo. Som zurales fericime te așunav-le sar ghilaban ca le întruniri, te dichav-le sar asan hai te dichav sar barion spiritualo.

I viața ando Timoro de Est sas zurales diferime catar i viața andi Australia. Tha ci daisardem te imaginisarav manghe că codoi perioada avelas te avel cadichi de șucar! Po iechdata jiavas ande iech microbuzo pherdo manușența, tha vi mașeia șuco hai zelenimatanța catar i piața. Aver data, încărdem iech studio biblico ande iech țânorro chăr, cai telal sas phuv, hai pașa amende, nașenas le țâne cahnea. Sas zurales tato, hai i umiditatea sas zurales bari. Cu sea cadala, butivar phendem manghe: „Sima iech șucar viața!”.

Cana dichav parpale, som recunoscătorii mânre dadenghe că dine penghi zor te sicaven-ma te iubisarav o ciacimos hai sas-le pașa mande vi ande le phare bărșa cana somas adolescento. O principio andal Proverbe 22:6 pherdilea-pe ande mânri viața. Mânre dada den-pe bare manța hai mânre rromeia hai bucurin-pe că dichen-ame că slujisaras le Iehovasche. Anda 2016, slujisaras andi lucrarea itineranto anda o teritorio la filialaco anda Australasia.

Avel manghe pharo te pachiav că, mai anglal pachiaiem că i lucrarea sili phari anda mande. Tha acana placial-ma i lucrarea de predicare! Dem mânri seama că ando timpo so phiras po pharo drom la viațaco, so cherel-ame ciaces fericime si te slujisaras le Iehovasche anda sea o ilo. Le palutne 18 bărș, ande save slujisardem le Iehovasche ande iech than le Alexoia, sas le mai șucar bărșa anda mânri viața. Acana hachiarav mișto le cuvintea cai phendea-le o psalmisto David le Iehovasche: „Sea codola cai garaven-pe tute va bucurina-pe, va dena cingar sea o timpo bucuriatar. . . . codola cai iubin chio anav va bucurina-pe ande tute”. (Ps. 5:11)