Imaginisar tuche i situația cai avel: Ando timpo so chelel-pe pesche amalența, o Tim șiudel i mingea hai phaghel o geamo ieche vecinosco.

Dacă aveias ande lesco than, so chereias?

SITU TRIN VARIANTE:

1. Te nașes.

2. Te phenes că aver si doșalo.

3. Te phenes le vecinosche so cărdean hai că cames te pochines o geamo.

Daștil-pe că cames te alosares i Varianta A. Tha sea o timpo si mai mișto te phenes che greșeli, indiferento că phaglean iech geamo sau cărdean aver vareso.

1. Cadaia si mișto.

   I Biblia phenel: „Camas te phiravas ame pachivales ande sea”. (Evrei 13:18)

2. Le manușa iertin mai ușoro codolen cai phenen penghe greșeli.

   I Biblia phenel: „Con pachiarel pesche păcatea ci va jiala lesche mișto, tha codolesche cai phenel-le hai mechel-pe lendar, va avela sicadi lesche îndurarea”. (Proverbe 28:13)

3. O mai importanto, cheres fericime le Devles.

   I Biblia phenel: „O Iehova urâl codoles cai athavel, tha codo cai silo orta bucuril-pe catar iech amalimos chidino Leia”. (Proverbe 3:32)

I Karina, cai sila 20 bărș, camlea te garavel pesche dadestar iech amenda anda i viteza prea bari. Tha ci daisardea te cherel cadaia sea o timpo. „Pala iech bărș, phenel i Karina, mânro dad arachlea i amenda cai sas pe mânro anav. Sas zurales nasul!”

So sichioas? I Karina phenel: „Dacă garaves che greșeli, cheres le buchia mai nasul. Iech data, sea va trebula te pochines anda lende!”.

I Biblia phenel: „Sea peras butivar”. (Iacov 3:2) Hai, cadea sar dichleam mai opre, sicaves că san umilo hai maturo cana phenes che greșeli, hai cadaia chichi mai sigo.

Mai dur, si importanto te sichios andal greșeli. Iech șei po anav Vera phenel: „Camav te dichav le greșeli sar iech ocazia te sichioav; anda fiesavi greșeala sichioav iech lecția cai ajutil-ma te avav mai lași hai te cherav ande aver felo i data cai avel”. Te dichas sar daștis te cheres vi tu cadai buchi.

Les i bicicleta che dadeschi hai phaghes-la. So cheres?

• Ci phenes chanci hai cames te na dichel chio dad.

• Phenes che dadesche exacto so sas.

• Phenes che dadesche so sas, tha șios i doș pe aver varecon.

Ci les iech exameno anda codoia că ci sichilean anda leste. So cheres?

• Phenes că le subiectea sas prea phare.

• Phenes că tu san doșalo anda i țâni nota.

• Phenes că le profesores siles vareso tuia.

 Acana risar-tu ca le situații sicade mai opre hai încercosar te imaginisares tuche că san 1) chio dad hai 2) chio profesorii. So avelas te gândisarel chio dad hai chio profesorii dacă pheneias sigo che greșeli? So avelas te gândisaren von dacă garaveias che greșeli?

Acana gândisar-tu ca iech greșeala cai cărdean-la ando bărș nachlo hai de răspunso le pușimatande cai aven.

Savi sas i greșeala? So cărdean?

• Garadem-la.

• Phendem că aver varecon sas doșalo.

• Phendem sigo că me cărdem-la.

Dacă ci phendean chi greșeala, sar simțosardean-tu pala codoia?

• Zurales mișto – Som sicado!

• Doșalo – Trebulas te phenav o ciacimos.

Sar daștisardeanas te rezolvis mai mișto i problema?

So sichilean anda i greșeala cai cărdean-la?

Sostar unii manușa ci phenen penghe greșeli?

So daștin aver manușa te pachian anda tute cana cames de fiesavi data te garaves che greșeli, tha so daștin te pachian dacă phenes sigo che greșeli? (Luca 16:10)