LECȚIA 31
So si o Regato le Devlesco?
I mai importanto buchi anda savi del duma i Biblia si anda o Regato le Devlesco. Prin cado Regato, o Iehova va cherela so camlea de but timpo: va cherela i phuv iech paradiso. So si o Regato le Devlesco? Catar jianas că vo rail acana? So cărdea ji acana? Hai so va cherela ando viitorii? Ande cadai lecția hai ande le coaver dui cai va avena, va avela te arachas le răspunsuri cadale pușimatande.
1. So si o Regato le Devlesco hai con si lesco Rege?
O Regato si iech guverno cărdo catar o Iehova Del. O Rege cadale Regatosco si o Isus Cristos hai vo rail anda cerii. (Matei 4:17; Ioan 18:36) I Biblia phenel anda o Isus: „Vo va raila . . . anda sea o timpo”. (Luca 1:32, 33) Sar Rege le Regatosco le Devlesco, o Isus va raila opral sea i phuv.
2. Con va raila ande iech than le Isusoia?
O Isus ci rail corcoro. „Manușa anda orisavo tribo, șib, poporo hai națiunea . . . va raina sar regi pa i phuv.” (Revelația 5:9, 10) Chichi manușa va raina ande iech than le Cristosoia? De cana o Isus sas-lo pi phuv, milioanea manușa alosarde te aven lesche discipoli. Tha numai 144 000 mașcar lende jian ando cerii caște rain ande iech than le Isusoia. (Citisaren Revelația 14:1-4.) Sea le coaver manușa cai alosarde te aven lesche discipoli va avena te train pi phuv, tela o raimos cadale Regatosco. (Psalmo 37:29)
3. Sostar si o Regato le Devlesco but mai lașio sar le guvernea le manușenghe?
Chiar cana le conducători pa i phuv camen te cheren lașe buchia, len na-i len o zuralimos te cheren cadea. Ji la urmă aven aver conducători ande lengo than, cai camen pengo miștimos, na le manușengo. Tha o than le Isusosco, cai rail ando Regato le Devlesco, ci va avela te lel-les chonic. O Del ‘vazdea iech Regato cai ci va avela distrugime niciechdata’. (Daniel 2:44) O Isus va raila opral sea i phuv hai va phiravela-pe șucar savorența; ci va phiravela-pe mai șucar iechența sar averența. Vo silo iubitorii, lașio hai orta hai va sicavela le manușen te phiraven-pe sa cadea le coaverența: te aven pherde iubirea, lașimos hai ortomos. (Citisaren Isaia 11:9.)
HACHIAR MAI MIȘTO
Va avela te hachiares sostar si o Regato le Devlesco mai lașio sar orisavo guverno le manușengo.
4. O Regato le Devlesco va raila opral sea i phuv
O Isus Cristos silo but mai zuralo sar orisavo aver conducătorii cai sas vroiechdata. Citisaren Matei 28:18 hai pala codoia den duma:
-
Sostar le Isusosco zuralimos si mai baro sar codolengo cai rain pa i phuv?
Le guvernea le manușenghe paruven-pe butivar hai fiesavo anda lende rail numai pe iech rig la phuveachi. Tha so daisaras te phenas anda o Regato le Devlesco? Citisaren Daniel 7:14 hai pala codoia den duma:
-
Sostar si ande amaro miștimos că o Regato le Devlesco ‘ci va avela distrugime’?
-
Sostar si ande amaro miștimos că cado guverno va raila opral sea i phuv?
5. I guvernarea le manușenghi trebul parudi
Sostar trebul parudi i guvernarea le manușenghi? Dichen o MATERIALO VIDEO hai pala codoia den duma:
-
So buchia nasul andea i conducerea le manușenghi?
Citisaren Eclesiasto 8:9 hai pala codoia den duma:
-
Pachias că o Regato le Devlesco trebulas te lel o than le guvernengo pa i phuv? Sostar?
6. Codola cai rain ando Regato le Devlesco jianen sar si te aves manuș
Anda codoia că o Isus, amaro Rai, sas vi vo manuș, vo daștil ‘te hachiarel amare covlimata’. (Evrei 4:15) O Iehova alosardea „anda orisavo tribo, șib, poporo hai națiunea” 144 000 murșa hai jiuvlea loialo cai va raina ande iech than le Isusoia. (Revelația 5:9)
-
Zuriarel-tu te jianes că o Isus hai sea codola cai va raina leia jianen sar si te aves manuș? Sostar?
O Iehova alosardea murșa hai jiuvlea de orisavo felo caște rain ande iech than le Isusoia
7. Le legi le Regatosche le Devlesche sile but mai lașe sar le legi le manușenghe
Le guvernea le manușenghe den legi cai, dacă le manușa len-pe pala lende, cadala daștin te ferin-le hai te anen lenghe miștimata. Vi le Regatos le Devlesco siles legi cai le manușa trebun te încăren-le. Citisaren 1 Corinteni 6:9-11 hai pala codoia den duma:
-
Sar pachias că va avela i lumea cana sea le manușa va încărena le legi le Devlesche? a
-
Pachias că si normalo ca o Iehova te manghel le manușendar cai train tela lesco Regato te încăren cadal legi? Sostar?
-
Catar jianas că le manușa cai ci încăren cadal legi daștin te paruven-pe? (Dich o verseto 11.)
Le guvernea le manușenghe den legi cai ferin le manușen hai anen lenghe miștimata. Le Regatos le Devlesco siles legi but mai lașe cai ferin le manușen hai anen lenghe but mai bare miștimata
UNII DAȘTINAS TE PUȘEN-TU: „So si o Regato le Devlesco?”.
-
Tu so pheneias lenghe?
SO SICHILEAM
O Regato le Devlesco si iech guverno ciacio cai va raila anda o cerii opral sea i phuv.
So dichleam
-
Con rail ando Regato le Devlesco?
-
Sostar si o Regato le Devlesco but mai lașio sar orisavo guverno le manușengo?
-
So ajucărel o Iehova codolendar cai train tela lesco Regato?
RODE MAI BUT
Va avela te diches sar ajutil-ame i Biblia te hachiaras cai si o Regato le Devlesco.
„Si o Regato le Devlesco ande amaro ilo?” (Articolo pa amaro site-o)
Sostar alosarde le Martori le Iehovasche te așen pașa o Regato le Devlesco hai na pașa le guvernea le manușenghe?
Va avela te diches so phenel i Biblia anda le 144 000 creștini, save o Iehova alosardea-le te rain ande iech than le Isusoia.
So cărdea iecha jiuvlea cai sas ando phandaimos te hachiarel că numai o Del daștil te anel iech lumea orta?
„Hachiardem că ci va mai avena buchia neorta” (Ușten!, noiembria 2011)
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
