Кала дуй израильски мурша авелэ андо Иерихоно, вонэ ашэлэпэ кай и Раав. Пала када уӷангля о царё андо Иерихоно и бишалдя каринг и Раав пэстирэ воинонэн. Вой гарадя лэ муршэн пэ крыша, ай лэ воинонэн бишалдя андэ авэр риг. И Раав ԥэндя лэ муршэнди, савэ пэ крыша: «Мэ поможысарава тумэнди. Мэ ӷанав, кай тумэнца о Иегова. Ай инке ӷанав, кай кадэя ԥув авэла тумари. Мангав тумэн, дэн алав, кай тумэ фэрина мэрнэ ерес».

И мануша, савэ авелэ тэ роздиқэн и ԥув, динэ алав ла Раавати: «Ни ек мануш, саво андэ тиро цэр, на мэрэла». Вонэ ԥэндэ лати: «Приԥандэ каринг пэстири фэлястра лоли дури, и тиро ери фэрияпэ».

Кадэла мурша змэклэпэ па дури через и фэлястра, сави сас по цэр кай и Раав. Вонэ жылэ андэ плая и трин дес гарадёнаспэ котэ. Ай тоди рисайлэ каринг о Иисусо Навино. Израильтяноря пэрэжылэ о Иордано и стидэпэ, кай тэ захутилэн и ԥув. О Иерихоно пэрво форо, саво вонэ захутилдэ. О Иегова ԥэндя, кай вонэ еқвар андо дес тэ ԥирэн круӷом о форо. Вонэ трэбуй сас кажно дес тэ терэн када и кадя шов дес. Пэ седьмо дес вонэ обжылэ о форо семь разоря. Тоди и  рашая задилаблэ андэ трубы, ай и воиноря фартэ зацыписайлэ. Лэ форостирэ стины сразу пэлинэ! Но о цэр ла Раавако, саво сас андэ стина, на роспэляпэ. И Раав и лако ери спасысайлэ, важ кода кай и Раав патялас лэ Иеговасти.