О Авраамо сытярэлас пэстирэ шавэс лэ Исаакос тэ любий лэ Иеговас и тэ патял всаворэсти, пала со о Иегова дэл алав. Еқвар, кала лэ Исаакости сас варикай 25 бэрш, о Иегова ԥэндя лэ Авраамости варисо тэ стерэл. Со во трэбуй сас тэ стерэл?

О Дэл ԥэндя лэ Авраамости: «Мангав тут, лэ пэстирэ шавэс, саво тутэ ек, жа по плай Мориа́ и ан лэс котэ андэ жертва». О Авраамо на ӷанэнас, васо о Иегова мангля лэс тэ стерэл када. Но во всаек кангля.

Пэ авэр дес о Авраамо ущеля тэсара, ля лэ Исаакос и дуен пэстирэ слуӷонэн, и жыля андэ Мориа́. Через трин дес линэ тэ дицон и плая. О Авраамо мангля лэ слуӷонэн тэ поаштярэн, пока вонэ лэ Исаакоса жана, кай тэ анэн и жертва. О Авраамо дя лэ Исаакости и кашта, ай екжэно ля и шури. О Исаако пушля пэстирэ дадэстар: «Ай кай о бакро, савэс амэ анаса андэ жертва?» О Авраамо ԥэндя: «Мэрно шаво, вся, со трэбуй, о Иегова дэла».

Кала вазглэпэ по плай, вонэ стердэ жертвеннико. Тоди о Авраамо сԥангля лэ Исаакости вас и пэрнэ, и стодя лэс по жертвеннико.

О Авраамо ля и шури. И катэ лэ Иеговаско анӷело ԥэндя па нэбо: «Авраамо! На тер нисо лэ шавэсти! Акана мэ ӷанав, кай ту патяс андо Дэл, важ кода кай ту на жалуисардян тэ отдэс андэ жертва пэстирэ шавэс». Тоди о Авраамо додиқля  лэ бакрэс, саво заӷульдя лэ роӷонэнца андэ кусторя и нащи виӷулелас. Во май йто росԥангля лэ Исаакос и андя андэ жертва лэ бакрэс.

Кодэлэ десэстар о Иегова ля тэ ԥэнэн, кай о Авраамо лэско друӷо. Ӷанэс васо? О Авраамо андэ вся кандэлас лэ Иеговас, даже кала на полэлас, васо о Иегова мангэл лэс варисо тэ стерэл.

О Иегова инке еқвар ԥэндя лэ Авраамости пала алав, саво во дя: «Мэ дава лашимос тути, и тутэ авэна бут бэятцэ». О Иегова кадяжэ дя алав, кай через лэ Авраамоско ери во стерэла бут лашимос важ всаворэ лашэ мануша.