1, 2. а) Со значит тэ любис лэ Дэвлэс? б) Сар о Исусо сыкадя, кай любий лэ Иеговас всаворя годяса?

 «ЛЮБИН тумарэ Дэвлэс лэ Иеговас всаворэ́ одеса, всаворя жызняса, всаворэ́ зорэса и всаворя годяса» (Лука 10:27). О Исусо ԥэндя, кай када — само ӷлавно анда вся лэ Маисеёско законо. Амэ трэбуй тэ любисарас лэ Иеговас всаворэ́ одеса. Со андэ када ужал? Вся, со амэндэ андо ди, — кода, со камас, пэрэандярас и пала со пережываем. Инке амэ трэбуй тэ сыкавас пэстиря жызняса, кай вся и время кандас лэ Иеговас, и тэ отдас лэсти вся пэско зор. Но кадяжэ важно, со амэ терас пэстиря годяса. Амэндэ никала на вижала тэ полас всаворэ лэ Иеговастирэ гиндоря. Но амэ можэм фэдэр тэ уӷанас, сар во гиндой, если розуӷанаса «лэ Христоско гиндо» (1 Кр. 2:16). Кода, сар гиндой о Исусо, — када точно копия кодэлэсти, сар гиндой о Иегова.

² О Исусо любияс лэ Иеговас всаворя годяса. Во ӷанэнас, со лэстар аштярэл о Дэл, и сас ӷотово тэ пристол вся пэско зор, кай тэ кандэл лэс. Лэс на даравэлас дажэ кода, кай лэсти авэла ԥарэс. Тэ радуий пэстирэ Дадэс, сас кай о Исусо всегда по пэрво ҭан. Во нисости на домэкэлас тэ ашэл важ лэстэ май важно.

3. Сости сытёлас о апостало Пётро паша Исусо и саво совето во дя лэ христианонэнди? (1 Пётро 4:1).

³ О Пётро и авэр апосталоря проандярэнас лэ Исусоса бут время. Лэнди випэля бари бах тэ уӷанэн, сар во гиндой,  и тэ сытён тэ диқэн пэ вся лэстирэ яқэнца. Андэ пэско пэрво письмо о Пётро ԥэндя лэ христианонэнди, кай вонэ, сар халавдэ, трэбуй тэ пэрэлэн кодэва жэ гиндо a, саво сас кай о Христос. (Проадинон 1 Пётро 4:1.) Васо о Пётро ԥэнэн катэ пала халавдэ? О греческо алав, саво во стодя, пэрэдэл о гиндо пала халавдо, саво лэл пэса вся, со трэбуй, англа кода, сар тэ жал тэ марэлпэ. Если и христианоря лэна тэ старыинпэ тэ пэрэлэн лэ Исусоско гиндо, лэндэ андэ вас авэла ԥэнэса мощно марди. Кадэя марди поможыя лэнди тэ боринпэ лэ бэзэхэстирэ одеса и тэ на подэнпэ кадэла люмати, савяса хулаий о Сатана (2 Кр. 10:3—5; Еф. 6:12).

4. Пала со амэ подаса дума андэ кадэя статья?

⁴ Анда кадэя статья амэ уӷанаса, сар гиндояс о Исусо. Када поможыя амэнди: 1) тэ сытювас тэ гиндосарас сар о Иегова, 2) тэ авас найабуримастирэ и 3) здраво тэ гиндосарас.

СЫТЁН ТЭ ГИНДОН САР О ИЕГОВА

5. Росԥэнэн о случаё, кала о Пётро диқэлас пэ ситуацыя най кадя, сар о Иегова.

⁵ Роздиқаса ек случаё, кала о Пётро диқэлас пэ ситуацыя най кадя, сар о Иегова. О Исусо ԥэндя лэ апосталонэнди, кай во трэбуй тэ жал андо Иерусалимо и кай лэс астарэна, фартэ мучина и умарэна (Матф. 16:21). О Пётро ӷанэнас, кай о Исусо — када сас о Избрано, саво трэбуй тэ спасый лэ Дэвлэстирэ народос. Важ када лэсти сас ԥарэс тэ патял, кай о Иегова домэкэла лэ Исусостири смэрть (Матф. 16:16). Кочай о Пётро одындярдя лэ Исусос андэ риг и ԥэндя: «Здик пэр пэстэ, Учителё! Никала кацаво туса на авэла!» (Матф. 16:22, сноска). О Пётро и о Исусо разнонэ ригэндар диқэнас пэ кадэя ситуацыя. Васо? О Пётро диқэлас пэр латэ най кадя, сар о Иегова.

6. Андар со дицол, кай о Исусо гиндояс кадя жэ, сар о Иегова?

⁶ О Исусо всегда гиндояс кадя, сар лэско небесно Дад. Во ԥэндя лэ Петрости: «Вижа мандар, Сатана! Ту змарэс ман па правильно дром, важ кода кай гиндос най пала лэ Дэвлэстири время, ай пала лэ манушэндири время» (Матф. 16:23). О Исусо ӷанэнас: кай тэ терэл кода, со уӷодно лэ Иеговасти, лэсти трэбуй сас тэ пэрэандярэл ԥаримос и тэ мэрэл. Важ када во отшутя лэ Петроско совето, хоть о Пётро на камэлас нисо вэрыто. Сости сытярдя лэ Петрос кадэя ситуацыя? Лэсти сас важно тэ полэл, со гиндой о Иегова, и тэ стерэл лэстирэ гиндоря пэстирэ гиндонэнца. Амэ можэм бут сости анда када тэ сытювас.

7. Сар о Пётро сыкадя, кай ӷотово тэ лашарэл пэско гиндо, кай тэ гиндой сар о Дэл? (Диқэн и картинка.)

⁷ Ӷэт май интя о Пётро сыкадя, кай камэл тэ сытёл тэ гиндой кадя жэ, сар о Иегова. Кала о Дэл витидя, кай и мануша анда авэр народоря тэ авэн андэ лэско ери, во бишалдя лэ Петрос тэ росԥэнэн и лащи новость лэ Карнилиёсти. Обычно и евреёря на вэдинаспэ лэ манушэнца анда авэр народоря. Важ када, кай тэ стерэл лэ Дэвлэстири дила, лэ Петрости трэбуй сас тэ лашарэл пэско гиндо. Кала во поля, сар о Иегова диқэл пэ мануша анда авэр народоря, во ля па аврятэ пэр лэндэ тэ диқэл. Важ када о Пётро «би алавэско» жыля интя, каринг лэс бишалдя о Дэл (Дила 10:28, 29). Во росԥэндя важ о Дэл лэ Карнилиёсти и лэстирэ ерести, и вонэ болделэ. Кадэла мануша ашэлэ пэрви христианоря анда авэр народоря (Дила 10:21—23, 34, 35, 44—48).

8. Сар амэ можэм тэ сыкавас, кай гиндосарас кадя жэ, сар о Иегова? (1 Пётро 3:8).

 ⁸ Прожылэ бут бэрша, и о Пётро пистросардя лэ ԥралэнди и лэ ԥэянди: «Старыинпэ тэ гиндон еқэндар». (Проадинон 1 Пётро 3:8.) Амэ ласа тэ гиндосарас еқэндар, если кажно андар мэндэ лэла тэ сытёл тэ гиндой сар о Дэл. Ай лэстирэ гиндоря можно тэ виарақас андэ Библия. Кала трэбуй тэ гиндосарас еқэндар? Например, о Исусо ԥэндя пэстирэ учениконэнди тэ стон лэ Дэвлэско Царство по пэрво ҭан андэ пэстири жызня (Матф. 6:33). Ԥэнаса, варико закамэла тэ лэл тэ терэл полновремено служэния. Вместо кода кай тэ ԥэнэс лэсти: «Состэ тути када?», фэдэр тэ подритярэс лэс лашэ алавэса и тэ поможыс пэ дила.

АВЭН НАЙАБУРИМАСТИРЭ

9, 10. Сар о Исусо сыкадя, кай во ни ӷрама найабуримаско?

⁹ Вечером, англа пэстири смэрть, о Исусо сыкадя лэ Петрости и аврэ апосталонэнди, пэскати дэ важно тэ авэн найабуримастирэ. Када сас, кала вонэ послиднё разо бэшлэ тэ хан вместе. Май данглал, десэ, о Исусо мангля лэ Петрос и лэ Иоанос вся тэ стерэн важ и мисяйля. Май ӥто всаворэстар, вонэ стодэ о чаро и рушникоря. Варико трэбуй сас тэ вихалавэл и пэрнэ лэ ӷостёнэнди. Но ко лэлапэ пала кадэя найпочотно дила?

¹⁰ Тердяпэ кода, со и апосталоря нисар на аштярэнас. О Исусо зля пар пэстэ и жылетка, заԥангляпэ рушникоса, шутя андо чаро паи и ля тэ халавэл лэнди и пэрнэ (Иоан. 13:4, 5). Кадя о Исусо тердя кодэя дила, сави обычно терэлас о слуӷо. Кадэлэса во сыкадя, кай андэ лэско ди ни ӷрама нинай абуримос. О Исусо вихаладя и пэрнэ еқэсти, аврэсти и кадя всаворэ апосталонэнди. Када заля чимало время. Но о Исусо стердя кадэя дила би алавэско. Во вихаладя и пэрнэ дажэ лэ Иудасти, саво камэлас лэс тэ здэл. Посли када о Исусо спокойно ԥэндя: «Тумэ полэн, со мэ важ тумэндэ стердэм? Тумэ взвинпэ каринг мандэ „Учителё“ и „Баро Хулай“, и када правильно: кадя када и исин. Если мэ, Баро Хулай и Учителё, халадэм тумэнди и пэрнэ, тоди и тумэ трэбуй тэ халавэн и пэрнэ ек еқэсти» (Иоан. 13:12—14).

11. Андар со дицол, кай о Пётро сытеля тэ авэл найабуримаско? (1 Пётро 5:5). (Кадяжэ диқэн и картинка.)

¹¹ О Пётро драго поля, кай во трэбуй тэ авэл найабуримаско. Еқвар, кала о Исусо ужэ рисайля по небо, о Пётро исцэлисардя лэ манушэс, саво вся пэстири жызня сас лангано (Дила 1:8, 9; 3:2, 6—8). Тэ диқэн пэ кадэя чуда спрастаепэ бут мануша (Дила 3:11). Сар андярэла пэс о Пётро? Трэбуй тэ на бистрас, кай во вибареля машкар кацаво миро, важ саво сас важно тэ ашундёл драго машкар авэр. Закамэла во, кай о лашо алав тэ прижал лэсти? О Пётро камля, кай тэ шон сама най пэр лэстэ, ай по Иегова и по Исусо. Во сас найабуримаско и ԥэндя, кай вся и патив важ кадэя чуда прижал най лэсти: «И пэрнэ кадэлэ манушэстирэ, савэс тумэ диқэн и ӷанэн, ашэлэ састэ через лэ Исусоско алав и через кода, кай патяс андэр лэстэ» (Дила 3:12—16). Ӷэт май интя во пистросардя лэ христианонэнди, кай вонэ трэбуй тэ авэн найабуримастирэ. Андэ греческо шыб тердёл алав, саво пэрэдэл о гиндо, кай трэбуй варисо тэ лэс пэр пэстэ или тэ заԥандэс пэр пэстэ и кущик. Тоди амэ  сразу можэм тэ згиндосарас пала Исусо: кала во заԥангля пэр пэстэ о рушнико и вихаладя и пэрнэ лэ апосталонэнди. (Проадинон 1 Пётро 5:5.)

12. Сар амэ тожэ можэм тэ авас найабуримастирэ?

¹² Амэ можэм тэ лас примеро лэ Петростар и тожэ тэ авас найабуримастирэ. Сэр: тэ авэс найабуримаско — када май бут, чем просто тэ подтидэс правильни алава андэ дума. О Пётро шутя сама пэ важно маменто: кай тэ ашас найабуримастирэ, спэрва трэбуй тэ следисарас пала пэстирэ гиндоря, важ кода кай вся залэлпэ кодэлэстар, со амэ гиндосарас пала пэстэ и пала авэр. Амэ терас варисо важ авэр важ кода, кай любисарас лэ Иеговас и лэ манушэн, ай най важ кода, кай камас тэ ашас ашунглэ. Если амэ найабуримастирэ, тоди дажэ просто дила, сави амэ терас важ о Иегова и важ и ԥрала, анэна амэнди радость. И амэнди всаек, шона сама пэ амари лащи дила чи най (Матф. 6:1—4).

«ЗДРАВО ГИНДОН»

13. Со када здраво тэ гиндос?

¹³ Пэ саво христианино можно тэ ԥэнэс, кай во здраво гиндой? (1 Пёт. 4:7). Кацаво  мануш, англа кода сар тэ прилэл решэния, камэл точно тэ уӷанэн, чалёла вой лэ Дэвлэсти чи най. Важ лэстэ нинай нисо май важно андэ жызня, чем о Иегова. Во на гиндой пала пэстэ фартэ бут и полэл, кай на ӷанэн вся. Ай инке во часто мангэлпэ. Кадэлэса во сыкавэл, кай патял лэ Дэвлэсти и камэл тэ полэл, со во гиндой.

14. Сар еқвар о Пётро сыкадя, кай во на гиндояс здраво?

¹⁴ Рятэ, англа пэстири смэрть, о Исусо ԥэндя лэ апосталонэнди: «Андэ кадэя рят тумэ всаворэ ман ашавэна». О Пётро ворта ԥэндя: «Дажэ если всаворэ тут ашавэна, мэ никала на ашавава!» Май интя о Исусо дя совето дэсавэ учениконэнди: «Отшон и линдра и на́ парашэн тэ мангэнпэ» (Матф. 26:31, 33, 41). Но о Пётро на приашунделя каринг кадэла алава. Можэт, важ када лэсти на хутилдя смилость тэ ԥэнэн, кай во лэ Исусоско ученико. Во отԥэнделя пэстирэ Учителёстар и через када дя тэ ровэл (Матф. 26:69—75).

15. Сар андэ лэ Исусостири послиднё рят пэ ԥув дицэля, кай во здраво гиндой?

¹⁵ Хоть о Исусо сас идеально, во на надеияспэ пэр пэстэ. Во всаворэ́ одеса патялас лэ Иеговасти и рятэ, англа пэстири смэрть, бут мангэласпэ. Када поможысардя лэсти смило тэ терэл кода, со сас уӷодно лэ Дэвлэсти (Матф. 26:39, 42, 44; Иоан. 18:4, 5). Чаче, о Пётро вся пэстири жызня на бистрэлас,  пэскати дэ важно важ о Исусо сас и молитва.

16. Андар со дицол, кай о Пётро сытеля здраво тэ гиндой? (1 Пётро 4:7).

¹⁶ Прожыля время, и о Пётро сытеля инке май фартэ тэ надеийпэ по Иегова андэ молитва. Кала о Исусо жунделя, во ԥэндя лэ Петрости и аврэ апосталонэнди, кай лэндэ авэла свынто зор, саво поможыя лэнди тэ росԥэнэн пала Дэл. Ай пока вонэ трэбуй сас тэ ашэнпэ андо Иерусалимо (Лука 24:49; Дила 1:4, 5). Со терэлас о Пётро, пока аштярэлас? Во и авэр христианоря «на парашэнас тэ стидэнпэ вместе и тэ мангэнпэ» (Дила 1:13, 14). Май интя андэ пэско пэрво письмо о Пётро ԥэндя лэ ԥралэнди и лэ ԥэянди здраво тэ гиндон и вся и время тэ взвинпэ каринг о Дэл андэ молитва. (Проадинон 1 Пётро 4:7.) Дицол, кай о Пётро сытеля тэ патял лэ Иеговасти и дэлас баро зор лэ ԥралэнди и лэ ԥэянди (Гал. 2:9).

17. Со амэнди трэбуй вся и время тэ терас? (Кадяжэ диқэн и картинка.)

¹⁷ Кай здраво тэ гиндосарас, трэбуй май часто тэ мангаспэ. Дажэ андэ прости вопросоря амэ на камас тэ надеисавас пэр пэстэ, ай взвисавас пала совето каринг о Иегова. Но инке май фартэ када трэбуй тэ терас, кала амэ прилас важно решэния. Важ кода кай лэ Дэвлэсти дицол май драго, со важ амэндэ фэдэр.

18. Со поможыя амэнди май драго тэ полас лэ Иеговаско гиндо?

¹⁸ Амэ блаӷодарни лэ Иеговасти важ кода, кай во дя амэнди кацаво жэ характеро, сар лэстэ (Быт. 1:26). Канешно, амэ не можэм андэ вся тэ авас сар о Иегова (Ис. 55:9). Но амэ можэм, сар о Пётро, тэ сытювас май драго тэ полас лэ Иеговаско гиндо. Амэндэ када вижала, если амэ ласа тэ сытювас тэ гиндосарас сар о Иегова, аваса найабуримастирэ и ласа здраво тэ гиндосарас.