1, 2. а) Кала тэ простис со май ԥарэс? б) Сар и Дэниз сыкадя, кай простисардя лэ манушэс, через саво латэ тердяпэ бари бида?

 ԤАРЭС тути тэ простис? Бутэнди када найвушэро — особено, если варико ԥэндя или стердя кода, со фартэ шындя амаро ди. Но амэ можэм тэ улас кадэя дук и тэ сытювас тэ простисарас. Роздиқам, со сас амаря ԥьяса, савя ақарэн Дэни́з a. Латэ вижыля тэ простий, хоть вой попэля андэ фартэ ԥари ситуацыя. Андо 2017 бэрш и Дэниз вместе пэстирэ ереса лагля тэ диқэл лэ Иеговастирэ свидетелёнэндири всемирно ӷлавно управления. Кала вонэ ладэнас палпалэ, вонэ фартэ динэпэдап авря машынаса. Котэ о водителё на уприсардя и машына и дяпэдап андэр лэндэ. И Дэниз хасардя и сознания. Кала вой прошутяпэ, вой уӷангля, кай латирэ бэяцэ фартэ динэпэдап, ай лако хулай, о Бра́яно, хынделя. Акэ со амари ԥэй ԥэнэн пала кодэя время: «Кадэя бида халя ман зорэстар». Ӷэт май интя вой уӷангля, кай кодэва водителё сас твэрэзо и во диқэлас по дром — када сас нещасно случаё. Но кай амари ԥэй всаек росшындёлас оди. Важ када вой мангэласпэ, кай о Иегова тэ дэл лати покоё по ди.

² Кодэлэс, ко дяпэдап андэр лэндэ, дошалярдэ, кай во дэзначай умардя манушэс. Тэ прижанглоп лэс дошалэса, во уж точно попэлиноп андо баруно. Но о сындомари ԥэндя амаря ԥьяти, кай кодэлэстар, со вой ԥэнэна, лэла тэ зависит о приӷоворо. И Дэниз росԥэнэн: «Мандэ сас кацаво по ди, ԥэнэса манди розранглэ и рана и шутэ интя вадра лон. Манди прижыляпэ инке еқвар тэ пэрэжував со май баро чорымос андэ мэрни жызня». Через дэсавэ курте и Дэниз сас по сындо. Со вой ԥэндя лэ сындомарести? Вой мангля тэ освободий кодэлэ манушэс b. Кала вой додя дума, о сындомари заровья. Во  ԥэндя: «Важ 25 бэрш, скати мэ сындомари, мэ на диқлэм нисо кацаво. Мандэ инке на сас кацаво, кай о ери, кастэ хынделя варико анда чаче, тэ мангэл важ о мануш, саво дошало андэ лэндири бида. Катэ по сындо никала на ашунделя, кай трэбуй тэ любисарас и тэ простисарас».

3. Васо и Дэниз закамля тэ простий?

³ Со поможысардя амаря ԥьяти тэ простий? Вой гиндояс пала кода, сар простий о Иегова (Мих. 7:18). Если амэ блаӷодарни лэ Иеговасти важ кода, кай во простий амэн, када придэла амэнди баро зор, кай амэ тэ простисарас аврэн.

4. Со о Иегова аштярэл амэндар? (Ефесо 4:32).

⁴ О Иегова камэл, кай амэ, кала простисарас аврэн, тэ терас када анда вся ди, кадя жэ сар во. (Проадинон Ефесо 4:32.) Амэ трэбуй тэ авас ӷотови тэ простисарас кодэлэн, ко обжыляпэ амэнца найдраго (Пс. 86:5; Лука 17:4). Давайте роздиқаса, со поможыя амэнди тэ сытювас тэ простисарас, дажэ кала када найвушэро.

НА ОТШУВ КОДА, СО ТУТЭ АНДО ДИ

5. Сар ԥэнэнпэ андэ Притчи 12:18, состар можэт тэ дуқал амаро ди?

⁵ Через аврэ манушэстири дума или дила амэндэ можэт фартэ тэ дуқал оди, особено если када стердя чачо мануш (Пс. 55:12—14). Дэкала амэ кадя можэм тэ мучисавас, ԥэнэса амэнди стодэ шури андо ди. (Проадинон Притчи 12:18.) Канешно, можно тэ терэс муй, кай нисо на тердяпэ, и тэ отшос кода, со андо ди. Но када всаек со тэ ашавэс и шури андэ рана. Точно кадя жэ амэ не можэм тэ аштярас, кай амэнди ашэла фэдэр, если вобще на шас сама пэ кода, со андо ди.

6. Сар амэ можэм пэс тэ андярас, кала амэнца обжанпэ найдраго?

⁶ Кала варико обжалпэ амэнца найдраго, пэрво, со амэндэ появийпэ андо ди, када и холи. И Библия на вэрыцый холи. Ӷлавно, кай вой тэ на хулаий амэнца (Пс. 4:4; Еф. 4:26). Васо? Кода, со андо ди, часто цырдэл каринг и дила. Ай обычно и холи ни каринг со лашо на анэн (Иак. 1:20). Тэ захолявэс и тэ на парашэс тэ холявэс — када най ек. Да, амэндэ можэт тэ лэлпэ и холи андо ди, но амэ екжэнэ витидас: парашаса тэ холявас чи най.

7. Со инке можэт тэ авэл амэндэ по ди, кала варико терэл амэнди ԥарэс?

⁷ Кала амэнца найдраго обжанпэ, амэндэ можэт тэ авэл най кати холи. Например, и ԥэй, савя ақарэн Эн, росԥэнэн: «Мэ сымас цыкнёры, кала о дад ашадя ла да и жэнисайля пэ мэрни няня. По ди сас ԥэнэса ашадэ и ман. Кала лэндэ арақаделэ бэяцэ, мэ гиндосаравас, кай мэ будэр никасти на трэбуй. Мэ барювавас и нащи вишавас кадэва гиндо анда шэро». И ԥэй, савя ақарэн Джарджэ́т, ԥэнэн, со тердяпэ ласа, кала лако хулай сас авряса: «Амэ дружысарасас жы цынёнендар. Вместе самас пианероря. Ай катэ кацаво тердяпэ. Мэ гиндосаравас, кай мэрно ди росшындёла дуқатар». И ԥэй, савя ақарэн Но́ми, ԥэнэн: «Мандэ дажэ гиндо на сас, кай мэрно хулай можэт тэ стерэл манди ԥарэс по ди: во ԥэндя, кай чоралэс диқэлас билажавардимос. Кала мэ када ашундэм, мэ задиляйлэмас! Ман ԥэнэса стодэ тэлэ моса».

8. а) Васо инке амэ трэбуй тэ простисарас аврэн? б) Саво лашымос амэнди кодэлэстар, кай простисарас аврэн? (Диқэн и рамка  «Если тути фартэ шындэ оди».)

⁸ Най па амаро зор тэ тердярас варикастири дума и дила. Но тэ мэкас када андэ амаро  ди или най — када андэ амарэ вас. И часто само фэдэр, со ту можэш тэ стерэс, если туса обжанпэ найдраго, — када тэ простис. Васо? Амэ любисарас лэ Иеговас, ай во камэл, кай амэ тэ простисарас. Если амэ на парашас тэ холявас и на камас тэ простисарас, тоди амэ можэм тэ стерас дилимос и тэ римосарас о зор (Прит. 14:17, 29, 30). Акэ со росԥэнэн ек ԥэй, савя ақарэн Кристина: «Кала мэ болдав андо шэро о ԥаримос, мэ май набут асав. Кадяжэ мэ шутэм сама, кай андэ кацавэ маменторя римонпэ мэрнэ лашэ привычки: мэ хав абисо и на висовавпэ. Кочай манди найвушэро тэ ритярав пэс андэ вас. И важ када манди май ԥарэс тэ ладисарав мэрнэ хуласа и аврэ манушэнца».

9. Васо трэбуй тэ вишос и холи анда ди?

⁹ Если о мануш на прижанэн пэстири дош и на мангэл извинения, кадэлэстар можэт фартэ тэ ровэл оди — ԥэнэса анда шындо ҭан идоси питял о рат. Но амэ можэм тэ поможысарас лэсти тэ засастёл. Сар? И ԥэй Джарджэт, савяко хулай сас авряса, ԥэнэн: «Трэбуй сас тэ прожал время, кай мэ тэ парашав тэ холявав по бывшо хулай. Но кала мандэ када вижыля, по ди ашэля фартэ спокойно». Кала амэ отшас и холи, амэ будэр на домэкас лати тэ римой амэн и амаро ди. Амэ терас фэдэр корко пэсти: ԥэнэса амэ залас тэ андярас нэви жызня и упалэ можэм тэ жувас и тэ радосавас (Прит. 11:17). Со, если ту вся када полэс, но всаек не можэш тэ простис?

ШУВ САМА ПЭ КОДА, СО ТУТЭ ПО ДИ

10. Васо трэбуй тэ дэс пэсти время, кай тэ лэс зор? (Кадяжэ диқэн и картинка.)

¹⁰ Со поможыя тути тэ парашэс тэ холявэс? На грабисав. Погиндосар: если о мануш варисо пэсти фартэ ԥагля или шындя, лэсти трэбуй долӷо тэ лечийпэ, ай кадяжэ время, кай упалэ тэ лэл зор. Кода жэ можно тэ ԥэнэс, если амэнди шындэ оди. Дэ пэсти время, кай тэ лэс зор. Тоди тути авэла май вушэро анда вся ди тэ простис кодэлэс, ко туса найдраго обжыляпэ (Эккл. 3:3; 1 Пёт. 1:22).

11. Сар и молитва поможыя тути тэ простис?

¹¹ Манг лэ Иеговас тэ поможый тути тэ простис c. Акэ сар када терэлас и Эн, савяко  дад ашадя лэ ерес: «Мэ мангавас лэ Иеговас тэ простий кажнонэс андар мэндэ важ вся, со амэ стердям най кадя. Тоди мэ пистросардэм письмо мэрнэ дадэсти и лэстиря хулаяти. Мэ ԥэндэм, кай простисарав лэн». И Эн на гаравэл, кай лати сас найвушэро када тэ стерэл. Но вой ԥэнэн: «Мэ старысавав тэ шавпэ по Иегова и надеисавав, кай блаӷодаря кадэлэсти мэрно дад и лэстири хулаи варикала закамэна май бут тэ уӷанэн пала мэрно Дэл».

12. Васо трэбуй тэ патяс лэ Иеговасти, ай най пэстирэ одести? (Притчи 3:5, 6).

¹² Патя лэ Иеговасти, ай най пэстирэ одести. (Проадинон Притчи 3:5, 6.) Амаро Дэл май драго ӷанэн, со важ амэндэ май фэдэр (Ис. 55:8, 9). Во никала на мангэл амэн тэ стерас кода, через со амэнди авелоп вэрыто. Вижал, если во ԥэнэн амэнди тэ простисарас, када точно анэна амэнди лашымос (Пс. 40:4; Ис. 48:17, 18). Если амэ ласа тэ надеисавас пэ пэско ди, тоди амэндэ никала на вижала тэ простисарас (Прит. 14:12; Иер. 17:9). И ԥэй Номи, савяко хулай диқэлас билажавардимос, ԥэнэн: «Спэрва мэ на камавас лэс тэ простисарав и гиндосаравас, кай мандэ исин пэ када право. Мэ даравас, кай во бистрэла, сави бида во манди стердясас, и упалэ стерэла манди больно. Мэ най еқвар ԥэнавас пэсти, кай о Иегова полэл ман. Но прожыля время, и мэ полэм: о Иегова полэл, со мандэ андо ди, но када на сыкавэл, кай во соӷласно кадэлэса. Во ӷанэн, кай манди ԥарэс и кай мандэ най сразу вижала тэ парашав тэ холявав. Но во кадяжэ камэл, кай мэ тэ сытював тэ простисарав» d.

ПАРАШ ТЭ ГИНДОС ПАЛА ВЭРЫТО И ГИНДОСАР ПАЛА ЛАШО

13. Саво совето важ амэндэ пистромэ андо Римо 12:18—21?

¹³ Тэ простис — када май бут, чем просто тэ бистрэс и дума и каринг латэ будэр тэ на риспэ. Амэ камас тэ поладисарас кодэлэса, ко амэн холярдя. И со май фартэ амэ када камас, если во — амаро ԥрал или ԥэй анда лэ Дэвлэско ери (Матф. 5:23, 24). Амэ на камас, кай ек о гиндо пала кадэва мануш тэ одлэл амэндар и радость. Важ када амэ на ласа тэ холявас и тэ вижас андар пэстэ, ай старысаваса  тэ жалуисарас и тэ простисарас (проадинон Римо 12:18—21; 1 Пёт. 3:9). Со амэнди андэ када поможыя?

14. Со амэнди трэбуй тэ старысавас тэ терас и васо?

¹⁴ Сар амэнди трэбуй тэ старысавас тэ диқас по мануш, саво обжыляпэ амэнца найдраго? Кадя, сар пэр лэстэ диқэл о Иегова. О Дэл шол сама по лашымос, саво исин андэ лэ манушэско характеро (2 Лет. 16:9; Пс. 130:3). Обычно, со амэ родас, кода и арақас. Если амэ шас сама по лашымос андэ мануша, тоди амэнди май вушэро лэн тэ простисарас. О ԥрал, савэс ақарэн Джа́радо, ԥэнэн: «Кала мэ варисавэ ԥралэса на дополям ек еқэс, мэ сразу гиндосарав, сар дэ бут лашымос исин андэр лэстэ. Када поможый манди лэс тэ простисарав».

15. Васо важно тэ ԥэнэс лэ манушэсти, кай ту лэс простисардян?

¹⁵ Кадяжэ важно тэ ԥэнэс лэ манушэсти, кай ту лэс простисардян. Васо? Акэ со ԥэнэн и Номи: «Еқвар мэрно хулай пушля мандар: „Ту ман простисардян?“ Мэ кати камлэм тэ ԥэнав лэсти, но и алава терделэ мандэ андо  кырло. Тоди мэ полэм, кай мэ лэс кадя и на простисардэм анда вся ди. Через дэсави время мандэ вижыля тэ ԥэнав лэсти кадэла трин алава, савэ во фартэ аштярэлас: „Мэ тут простисарав“. Трэбуй сас тэ диқэс, сар лэстирэ яқа ԥэрделэ ясвэнца! Мэ и екжэни на аштяравас, кай амэнди лэдуенди авэла фартэ драго кадэлэстар. Акана мэ упалэ патяв мэрнэ хуласти, и амэ лэса со май лашэ друӷоря».

16. Со ту уӷанглян пала кода, сар тэ простис?

¹⁶ О Иегова полэл, кай амэнди можэт тэ авэл найвушэро тэ простисарас, и всаек во камэл, кай амэ тэ простисарас ек еқэс (Клс. 3:13). Анда кадэя статья амэ уӷанглям, со амэнди андэ када поможыя. На трэбуй вобще тэ отшас кода, со андо ди, но и тэ шас пэ када бут сама тожэ найдраго. На́ тердювам пэ ек ҭан и сытювам тэ жувас май дур. Тоди амэндэ вижала тэ вишас анда шэро и вэрыти гиндоря и амэ ласа тэ гиндосарас пала лашымос. (Диқэн и рамка  «Сар тэ простис».)

САВО АМЭНДИ ЛАШЫМОС, ЕСЛИ ПРОСТИСАРАС

17. Васо важно тэ простисарас аврэн?

¹⁷ Сар амэ диқлям, амэнди трэбуй тэ простисарас. 1) Кадэлэса амэ радосарас амарэ небеснонэ Дадэс, лэ Иеговас, саво подэл амэнди примеро андэ када (Лука 6:36). 2) Амэ сыкавас, пэскати амэ блаӷодарни лэ Иеговасти, кай во жалуий амэн анда вся ди (Матф. 6:12). 3) Када лашарэл амаро зор и поможый тэ ладисарас аврэнца.

18, 19. Сар и прощения можэт тэ парувэл и жызня?

¹⁸ Кала амэ простисарас аврэн, можэт тэ авэл кадя, сар амэ дажэ на аштярасас. Акэ со сас кай и Дэниз, пала сави амэ адиносардям андэ кадэя статья. Хоть вой када на ӷанэнас, о мануш, саво сас дошало андэ авария, посли сындо тидэласпэ тэ умарэл корко пэс. Но амаря ԥьяко поступко парудя лэстири жызня. Кода, кай вой простисардя кадэлэ манушэс, фартэ ля лэс лэ одестар, и во ля тэ розуӷанэн и Библия лэ Иеговастирэ свидетелёнэнца.

¹⁹ Дэкала здэлпэ, кай тэ простис — када най па амаро зор. Но если амэ кадя стераса, возможно, када авэла само бахтало маменто андэ амари жызня (Матф. 5:7). Хэба камлоп амэ корконэ тэ одлас пэстар кадэя радость? Важ када простисар аврэн кадя, сар о Иегова!