1 Каринфо 9:1-27
9 Хэба мэ не моӷу тэ терав, со камав? Хэба мэ най апостало? Хэба мэ на диқлэм лэ Исусос, амарэ Барэ Хулас? И хэба пар тумэндэ на дицол, кай мэ стодэм зор андэ лэ Барэ Хуластири дила?
2 Дажэ если важ авэр мэ най апостало, тумэндэ нинай кацаво гиндо. Тумэ — печать, сави доԥэнэн, кай мэ лэ Барэ Хуласко апостало.
3 Акэ савэ алавэса мэ зашавапэ пала пэстэ англа кодэла, ко сындой ман:
4 хэба амэндэ нинай право тэ хас и тэ пас?
5 Хэба амэндэ нинай право тэ жэнисавас и тэ жувас ла хулаяса*, сави андярэл лэ Христостири время? Кадя терэн авэр апосталоря, лэ Барэ Хуластирэ ԥрала и о Ки́фа*.
6 Или кати амэ лэ Варнаваса трэбуй тэ затерас пэ жызня?
7 Саво халавдо терэл андэ халавдия важ пэстирэ ловэ? Ко садий о виноӷрадо и на хал лэс? Или ко ритярэл о хабэ и на пэл лэско ҭуд?
8 Мэ ԥэнав най лэ манушэнго гиндо. Пала када жэ ԥэнэн и о законо.
9 Андэ лэ Маисеёско законо пистромэ: «На́ заԥандэн о муй лэ гурувэсти, саво мэлий о зэрно». Кати пала гурува гиндой катэ о Дэл?
10 Или во ԥэндя када важ амэндэ? Чаче, када сас пистромэ, кай амэнди кадэлэстар тэ авэл драго. И лэдуй — ко пахыий и мал и ко мэлий о зэрно — трэбуй тэ надеинпэ, кай кажно андар лэндэ лэла пэстири бажын.
11 Если амэ пэрэдям тумэнди* о алав лэ Дэвлэстар, хэба авэла неправильно амэнди тэ лас* тумэндар помощь лэ ловэнца?
12 Если кай авэр исин право тэ лэн тумэндар помощь, то амэндэ уж точно исин кадэва право. Но амэ на жас пэ када. Амэ састэс вся пэрэандярас, кай тэ на мешысарас никасти тэ патял андэ лащи новость пала Христос.
13 Тумэ трэбуй тэ ӷанэн, кай кодэла, ко терэл рашаицко дила андэ қандири, хан кода, со и мануша интя анэн. И кодэлэнди, ко терэл дила паша жэртвенико, дорэсэлпэ и пай кодэлэстар, со сԥабарэн пэр лэстэ.
14 Точно кадя жэ о Баро Хулай ԥэндя, кай кодэла, ко росԥэнэн и лащи новость, тэ жувэн кадэла дилатар.
15 Но мэ нисо кацаво тумэндар на мангавас. И мэ пистросардэм тумэнди най важ кода, кай варисо камав тэ мангав тумэндар. Фэдэр мэ мэрава, чем... Нико на одлэла мандар о право тэ абуросарав!
16 Если мэ росԥэнав и лащи новость, манди найсоса тэ абуросарав. Мэ трэбуй када тэ терав. И бида манди, если мэ на росԥэнав и лащи новость!
17 Если мэ када терав анда ди, манди дорэсэлапэ и бах. И дажэ если ман оди на цырдэл, мэ всаек трэбуй када тэ терав, важ кода кай када мэрни дила.
18 Ай сави бах манди пэрэл? Манди на трэбуй ловэ, кай тэ росԥэнав и лащи новость. Кадя мэ моӷу тэ мангав аврэндар кода, пэр со мандэ исин право, кай тэ росԥэнав и лащи новость.
19 Хоть мэ и свободно мануш, мэ ашэлэм рабо важ всаворэ. Мэ стердэм када, кай тэ поможысарав со май бутэ манушэнди.
20 Важ и иудеёря мэ жував сар иудеё, кай тэ поможысарав лэ иудеёнэнди. Мэ жував кадя, ԥэнэса ритярав о законо (хоть екжэно мэ на ритярав о законо), кай тэ поможысарав кодэлэнди, ко ритярэл о законо.
21 Мэ жував кадя, ԥэнэса на ритярав о законо (хоть мэ и жував па лэ Дэвлэско законо и ритярав лэ Христоско законо), кай тэ поможысарав кодэлэнди, кастэ нинай законо.
22 Мэ ашэлэм би зорэско важ кодэла, кастэ нинай зор, кай тэ поможысарав кодэлэнди, ко би зорэско. Мэ стердэм вся, со сас па мэрно зор, кай тэ поможысарав со май разнонэ манушэнди и тэ спасысарав хоть дэсавэн андар лэндэ.
23 Мэ терав вся, кай тэ росԥэнав аврэнди и лащи новость.
24 Тумэ ӷанэн, кай прастэн всаворэ, но вицэлэл кати ек. Прастэн кадя, кай тэ вицэлэн!
25 Кодэла, ко борийпэ аврэнца*, старыинпэ андэ вся тэ ритярэн пэс андэ вас. Но вонэ терэн када, кай лэнди тэ дорэсэлпэ и бах, сави найвечно. Ай амэ терас када, кай амэнди тэ дорэсэлпэ и бах, сави вечно.
26 Важ када мэ ӷанав, каринг прастав, и давдап кадя, кай тэ на марав андэ балвал*.
27 Мэ зритярав пэстири тила и застависарав ла тэ кандэл ман*. Тэ на тердоп мэ када, о Дэл на блаӷослависардоп ман, хоть мэ и росԥэнав аврэнди и лащи новость.
Сноски
^ Или «тэ лас пэса ла хулая́».
^ Кадяжэ лэс ӷанэн сар лэ Петрос.
^ Или «садисардям машкар тумэндэ».
^ Или «тэ стидас».
^ Или «прастэл; залэлпэ спортоса».
^ Или «о воздухо».
^ Или «тэ кандэл ман сар рабо».
