Марко 7:1-37
7 Еқвар круӷом о Исусо стидэ́пэ и фарисеёря и дэсавэ законикоря, савэ авелэ анда Иерусалимо.
2 Вонэ додиқлэ, кай дэсавэ лэстирэ ученикоря хан мэлалэ*, или найхаладэ, вастэнца*.
3 (И фарисеёря, сар и всаворэ евреёря, строӷо ритярэн лэ ԥурэнго законо*, кочай вонэ на бэшэн тэ хан, пока на вихалавэна и вас жы па куй,
4 и, кала авэн па базаро, вонэ на бэшэн тэ хан, пока на халадёна. Исин и бут авэр традицыи, савэ вонэ строӷо ритярэн, например вонэ болэн* андо паи и стаканоря, и кувшыноря и харкумуни посуда.)
5 Тоди и фарисеёря и законикоря пушлэ лэстар: «Васо тирэ ученикоря на ритярэн лэ ԥурэнго законо и хан мэлалэ вастэнца?»
6 Во ԥэндя лэнди: «Двухлични мануша, най евья пала тумэндэ ԥэндя лэ Дэвлэско особо мануш о Иса́я: „Кадэла мануша стон патив пэр мандэ алавэнца, но лэнго ди дуреля мандар.
7 Евья вонэ полэн манди, важ кода кай вонэ сытярэн тэ жувэн па лэ манушэнго законо“.
8 Тумэ строӷо ритярэн лэ ԥурэнго законо, ай лэ Дэвлэско законо отшон».
9 Потом во ԥэндя лэнди: «Тумэ драго ӷанэн, сар тэ обжан лэ Дэвлэско законо важ пэстирэ традицыи!
10 Например, о Маисеё ԥэндя: „Стов патив по дад и пэ дэй“ и „Кодэлэс, ко дэл амрая* лэ дадэс или ла да, трэбуй тэ умарэн“.
11 Ай тумэ сытярэн: „Если о мануш ԥэнэна лэ дадэсти или ла дати: ‚Вся, соса мэ моӷу тэ поможысарав, — када карва́но (подарко, саво отстодо важ о Дэл)‘...“
12 Кадя тумэ домэкэн, кай во нисоса тэ на поможый пэстирэ дадэсти или ла дати.
13 Вижал, через и традицыи, савэ тумэ екжэнэ стодэ, тумэ отԥэндён тэ приашундён каринг о алав лэ Дэвлэстар. Ай инке тумэ терэн бут со авэр, сар и андэ кадэва маменто».
14 Во упалэ подақардя каринг пэстэ лэ мирос и ԥэндя: «Ашунэн ман и полэн.
15 Кода, со хал о мануш, не можэт лэс тэ мэлярэл*. Лэ манушэс мэлярэл кода, со вижал анда лэско ди».
16 ——*
17 Кала о Исусо ашадя лэ мирос и зажыля андо цэр, и ученикоря линэ тэ роспушэн лэстар пала кадэва примеро.
18 Во ԥэндя лэнди: «Тумэ со, тожэ на полэн? Хэба тумэ на ӷанэн: кода, со хал о мануш, не можэт лэс тэ мэлярэл?
19 Важ кода кай о хамос попэрэл най андо ди, ай андо жэлудко и потом жал андэ яма». Кадя во сыкадя, кай вся о хамос вужо.
20 Потом во ԥэндя: «Лэ манушэс мэлярэл кода, со вижал анда лэско ди.
21 Важ кода кай анда лэ манушэско ди жан и найлашэ гиндоря, савэ анэн каринг кода, кай о мануш тэ терэл билажавардимос*, тэ чорэл, тэ умарэл,
22 тэ придэл лэ хулас или ла хулая*, тэ ашэл чорымаско, тэ терэл вэрыто дила, тэ хохавэл, тэ андярэл пэс бесовестно*, тэ завидуий, тэ дэл дума найпативалэс, тэ ашэл абуримаско и тэ дилявэл.
23 Вся кадэва найлашымос жал анда ди и мэлярэл лэ манушэс».
24 Котар о Исусо жыля андэ гава паша фороря Ти́ро и Сидо́но. Котэ во ашэляпэ андэ ек цэр и на камля, кай варико пала када тэ уӷанэн. Но о миро всаек уӷангля, кай во.
25 Пала лэстэ сразу уӷангля ек манушни; андэ латири цынёни бэята сас о найвужо. Кадэя манушни авеля и пэля лэ Исусости андэ пэрнэ.
26 Вой сас гречанка, сави жувэлас андэ сирийско Финики́я*. И манушни ля тэ мангэл лэ Исусос тэ видаравэл лэ найвужэс анда латири бэята.
27 Но во ԥэндя лати: «Мэк спэрва чалёна и бэяцэ, важ кода кай неправильно тэ одлэс о марно лэ бэятонэндар и тэ шос лэ риконорэнди».
28 Ай вой ԥэндя лэсти: «Чаче, но дажэ и риконорэ хан тала столо и прошука, савэ умэклэ и цынёне бэяцэ».
29 Тоди во ԥэндя лати: «Важ кода, кай ту када ԥэндян, жа, о найвужо вижыля анда тири бэята».
30 Вой авеля цэрэ и додиқля, кай латири бэята пашлёл пэ кровать и о найвужо вижыля андар латэ.
31 Кала о Исусо ужыля анда гава, савэ паша Ти́ро, во прожыля через о Сидо́но и через и область Десятигра́дия и авеля каринг и Галилейско моря.
32 Каринг лэстэ андэ́ кашукэ манушэс, саво не моӷ понятно тэ дэл дума, и лэ Исусос линэ тэ мангэн, кай во тэ стол пэр лэстэ и вас.
33 О Исусо одындярдя лэс андэ риг лэ манушэндар, стодя лэсти андэ кан пэстирэ ная, шунгардя, ай потом ляпэ каринг лэстири шыб.
34 Посли када во подиқля по небо, пэрэԥурдяпэ и ԥэндя: «Ефафа́», со означает «Ԥэрнадюв».
35 И кодэва мануш ля тэ ашунэл, лэстэ лашарделя и дума, и во ля понятно тэ дэл дума.
36 О Исусо ԥэнэнас лэ манушэнди никасти пала када тэ на росԥэнэн, но со май бут во лэнди запретияс, со май бут вонэ росԥэнэнас пала кода, со тердяпэ.
37 Вонэ фартэ удивинаспэ и ԥэнэнас: «Во вся терэл драго! Лэстэ дажэ и кашукэ ашунэн, ай и мути дэн дума».
Сноски
^ Ворта «маӷримэ».
^ Катэ и дума жал пала иудейско религиозно обрядо.
^ Или «лэ ԥурэндирэ традицыи».
^ Или «аравэн».
^ Или «акушэл».
^ Ворта «тэ маӷрий».
^ Греч. парнэ́я во мн. ч.
^ Или «тэ измений андо брако».
^ Или «наӷло». Греч. асэ́лгия.
^ Ворта «сирафиники́янка». Май ӥто всаворэстар, вой арақаделя андэ Финики́я.
