Марко 4:1-41
-
ПРИМЕРОРЯ ПАЛА ЦАРСТВО (1—34)
-
Кодэва, ко сеий (1—9)
-
Васо о Исусо дэл дума примеронэнца (10—12)
-
О Исусо обисний о примеро пала мануш, саво сеий (13—20)
-
И лампа на гаравэн тала чаро (21—23)
-
«Скати тумэ отшон аврэнди» (24, 25)
-
О мануш, саво сеий, совэл (26—29)
-
Само цынёнё зэрницо (30—32)
-
«Би примеронэнго во лэнца на дэлас дума» (33, 34)
-
-
О Исусо улэл и балвал (35—41)
4 О Исусо упалэ ля тэ сытярэл паша моря. Каринг лэстэ стидяпэ фартэ бут миро, важ када во бэшля андэ лодка и отплывисардя набут лэ береӷостар, ай вся о народо ашэляпэ по береӷо.
2 И во ля тэ призындярэл лэнди примероря, кай бутэсти тэ сытярэл. Во ԥэндя:
3 «Ашунэн: вижыля о мануш пэ мал тэ сеий.
4 Кала во росшолас о зэрно, дэсавэ семена пэлинэ паша дром. Привуряйлэ и чирикля и виклюисардэ лэн.
5 Дэсавэ семена пэлинэ котэ, кай сас почти ек и бара, и сразу пробарелэ, важ кода кай котэ сас набут ԥув.
6 Но кала вазгляпэ о қам, во оԥабардя и росточкоря, и вонэ зашутелэ, важ кода кай лэндэ на сас корнёря.
7 Дэсавэ семена пэлинэ машкар калючки. И тоди и калючки вибарелэ и замардэ и росточкоря, и вонэ на андэ́ урожаё.
8 Ай дэсавэ семена пэлинэ пэ лащи ԥув. Вонэ виӷульдэ, вибарелэ и динэ урожаё: в 30, в 60, и в 100 раз май бут кодэлэстар, со сас посеимэ».
9 Потом во инке ԥэндя: «Кастэ исин кан, кай тэ ашунэл, мэк ашунэл».
10 Кала о Исусо ашэляпэ екжэно, и 12 апосталоря и авэр ученикоря линэ тэ роспушэн лэстар пала кадэла примероря.
11 Во ԥэндя лэнди: «Тумэнди дино тэ полэн и свынто тайна пала лэ Дэвлэско Царство, ай важ авэр мануша кадэла алава — када просто примероря.
12 Кадя вонэ диқэн, но на шон сама, ашунэн, но на полэн. Вонэ никала на ринапэ каринг о Дэл, и во лэн на простия».
13 Тоди во ԥэндя лэнди: «Если тумэ на полэн кадэва примеро, тоди сар полэна всаворэ авэр?
14 О мануш пэ мал — када кодэва, ко росԥэнэн о алав лэ Дэвлэстар*.
15 И семена, савэ пэлинэ паша дром, — када о алав, саво сас шуто лэ манушэнди андо ди. Кала вонэ кати лэс ашунэн, каринг лэндэ авэл о Сатана и залэл кода, со сас посеимэ.
16 Кода, кай и семена пэлинэ котэ, кай сас почти ек и бара, сыкавэл, кай и мануша, кала ашунэн о алав, сразу жэ лошаса приашундён каринг лэстэ.
17 Но кадэва алав на мэкэл корнё андэ лэнго ди, важ када дэсави время вонэ патян, ай кала залэлпэ и ԥари время или лэн ӷонин важ о алав, вонэ хасарэн пэско патяимос.
18 Кода, кай и семена пэлинэ машкар калючки, сыкавэл, кай и мануша ашунэн о алав,
19 но потом кода, пала со пережывают и мануша андэ кадэя люма, о хохавно барвалимос и разно дила, каринг сави лэн цырдэл, — вся када попэрэл андэ лэнго ди и замарэл о алав, и лэстар нисо на вибарёл.
20 Ай кода, кай и семена пэлинэ пэ лащи ԥув, сыкавэл, кай и мануша ашунэн о алав, приашундён каринг лэстэ и када дэл урожаё: в 30, в 60 и в 100 раз май бут кодэлэстар, со сас посеимэ».
21 Кадяжэ о Исусо ԥэндя лэнди: «Хэба и лампа анэн, кай тэ гаравэн тала корзина или тала кровать? Ла анэн, кай тэ стон по видно ҭан*.
22 Вся, со гарадо, — дицола и вся, пала со на росԥэнэн, — ашундёла.
23 Кастэ исин кан, кай тэ ашунэл, мэк ашунэл».
24 Посли када о Исусо ԥэндя лэнди: «Авэн внимательни каринг кода, со ашунэн. Скати тумэ отшон аврэнди, скати вонэ отшона и тумэнди, и дажэ дошона упрал.
25 Важ кода кай кодэлэсти, кастэ исин, дэна май бут, ай кодэлэстар, кастэ нинай, одлэна дажэ кода, со лэстэ исин».
26 О Исусо инке ԥэндя: «Акэ соса можно тэ сыстос лэ Дэвлэско Царство. О мануш шол андэ ԥув и семена.
27 И рят во совэл, десэ ущел, ай и семена виӷулен, и росточкоря цырдэнпэ упрэ, но во на ӷанэн, сар када терэлпэ.
28 И ԥув екжэни дэл урожаё. Када терэлпэ полокорэс: спэрва виӷулел о стеблё, потом о колосо и тоди спило зэрно андо колосо.
29 Но кала о зэрно спилосайля, о мануш лэл о сэрпо, важ кода кай поджыля и время тэ стидэл о урожаё».
30 Потом о Исусо ԥэндя: «Соса можно тэ сыстос лэ Дэвлэско Царство? Саво примеро обисния лэс?
31 Во шолпэ пэ само цынёнё* зэрницо. Кала лэс садин, во само цынёнё анда всаворэ семена пэ ԥув.
32 Но андар лэстэ вибарёл само бари витка, сави исин андо садо. Латирэ виточки кадя розбарёнпэ, кай котэ моӷут тэ терэн ӷниздоря и чирикля».
33 О Исусо призындярэлас бут кацавэ примероря, кай тэ росԥэнэн лэнди о алав лэ Дэвлэстар. Во на росԥэнэнас лэнди май бут, чем вонэ моӷли тэ полэн.
34 Би примеронэнго во лэнца на дэлас дума, но пэстирэ учениконэнди вся обиснияс отдельно.
35 Вечером андэ кодэва жэ дес о Исусо ԥэндя лэ учениконэнди: «Пэрэплывисарам пэ авэр береӷо».
36 Вонэ одмэклэ лэ мирос и лаглэ лэ Исусоса пэ лодка. Лэнца лаглэ и мануша пэ авэр лодки.
37 Неожыдано вазгляпэ бари балвал. И волны марэнас андэ лодка, и ла почти зашутя паеса.
38 Ай во сас палал андэ лодка. Во стодя о шэран тала шэро и совэлас. Вонэ жунгадэ лэс и ԥэндэ: «Учителё, хэба тути всаек, кай амэ хындювас?»
39 Тоди во ущеля и уля и балвал, ай ла моряти приԥэндя: «Параш! Улэпэ!» И балвал уляпэ, и ашэля фартэ тихо.
40 Во пушля лэндар: «Со тумэ кадя пэрэдарайлэ? Хэба тумэ идоси на патян?»
41 Но лэн ля бари дар, и вонэ ԥэнэнас ек еқэсти: «Ко во кацаво? Дажэ и балвал и моря кандэн лэс!»
