Марко 10:1-52
-
Тэ жэнинпэ и тэ розжанпэ (1—12)
-
О Исусо блаӷословий лэ бэятонэн (13—16)
-
И дума лэ барвалэ манушэса (17—25)
-
Жэртвы важ о Царство (26—31)
-
О Исусо упалэ ԥэнэн пала пэстири смэрть (32—34)
-
О Иаково и о Иоано мангэн лэ Исусостар ҭан андо Царство (35—45)
-
О Исусо витинэла бутэн (45)
-
-
О Исусо исцэлий лэ корэ Вартимеёс (46—52)
10 О Исусо ужыля котар пала лэн Ярда́но паша Иуде́я. Каринг лэстэ упалэ авеля бут миро, и во, сар обычно, ля лэн тэ сытярэл.
2 Тоди каринг лэстэ пашэлэ и фарисеёря и, кай тэ випушэн лэс годятар, пушлэ, исин кай о мурш право тэ розжалпэ пэстиря хулаяса чи най.
3 Во пушля лэндар: «Со приԥэндя тумэнди о Маисеё?»
4 Вонэ ԥэндэ: «О Маисеё домэкля тэ дас ла хулаяти о лил важ о розводо и тэ розжаспэ ласа».
5 О Исусо ԥэндя лэнди: «Во дя* тумэнди кадэва законо, важ кода кай тумэндэ оди ляпэ барэса.
6 Но спэрва „о Дэл* создал муршэс и жувля“.
7 „Важ када о мурш ашавэла лэ дадэс и ла да,
8 и дуй мануша ашэна сар ек*“. Важ када лэн ужэ най дуй, но вонэ акана — сар ек*.
9 Вижал, со о Дэл стидя*, кода о мануш на трэбуй тэ розделий».
10 Кала вонэ упалэ сас андо цэр, и ученикоря линэ лэстар пала када тэ роспушэн.
11 Во ԥэндя лэнди: «Кодэва, ко розжалпэ пэстиря хулаяса и жэнийпэ пэ авэр, придэл ла пэрвона хулая́*.
12 И если и жувли розжалпэ пэстирэ хуласа и жал пала авэр, вой придэл лэ пэрвонэ хулас*».
13 И мануша линэ тэ анэн каринг лэстэ лэ цынёне бэятонэн, кай во тэ стол пэр лэндэ и вас и тэ блаӷословий лэн*. Но и ученикоря цыпинас пэр лэндэ*.
14 Кала о Исусо додиқля када, во захоляйля и ԥэндя лэнди*: «Мэк и бэяцэ авэн каринг мандэ. На́ запретин лэнди, важ кода кай лэ Дэвлэско Царство прижал кацавэнди, сар вонэ.
15 Чаче ԥэнав тумэнди: кодэва, ко на прилэла лэ Дэвлэско Царство сар бэято, во на попэрэла андэр лэстэ».
16 И во ля тэ облэл лэ бэятонэн и тэ стол и вас пэр лэндэ, кай тэ блаӷословий лэн.
17 Кала о Исусо жыля май дур, каринг лэстэ поднашля ек мануш, пэля пэ чанга англа лэстэ и пушля: «Лашо Учителё*, со мэ тэ стерав, кай мандэ тэ авэл вечно жызня?»
18 О Исусо ԥэндя лэсти: «Васо ту взвиспэ каринг мандэ Лашо Учителё? Вся, со лашо, жал кати лэ Дэвлэстар.
19 Ту жэ ӷанэс о законо: на́ умар, на́ придэ лэ хулас или ла хулая*, на́ чор, на́ хохав пэ авэр, на́ диляр, стов патив по дад и пэ дэй».
20 Кодэва мануш ԥэндя лэсти: «Учителё, вся када мэ и кадя терав жы анда тэрнорэ бэрша».
21 О Исусо подиқля пэр лэстэ, лэсти ашэля во жалко, и во ԥэндя: «Исин ек, со тути на хутилэл: жа, битин вся, со тутэ исин, и роздэ и ловэ лэ чорорэнди, и тутэ авэла барвалимос по небо. Ай потом ав и ԥир пала мандэ».
22 Но кодэлэ манушэсти, кала во ашундя кадэла алава, ашэля ԥарэс по ди, и во ужыля помэклэ муеса, важ кода кай сас фартэ барвало.
23 О Исусо диқля пэ мануша, савэ тердёнас круӷом, и ԥэндя лэ учениконэнди: «Сар дэ ԥарэс авэла лэ барвалэнди тэ попэрэн андэ лэ Дэвлэско Царство!»
24 Но и ученикоря удивисайлэ лэстирэ алавэндар. Тоди о Исусо ԥэндя: «Бэяцэ, сар дэ найвушэро тэ попэрэн андэ лэ Дэвлэско Царство!
25 Май вушэро лэ верблюдости тэ прожал через ла сувьяко каноро, чем лэ барвалэсти тэ попэрэл андэ лэ Дэвлэско Царство».
26 Но вонэ инке май фартэ удивисайлэ и пушлэ лэстар*: «Ко тоди можэт тэ спасыйпэ?»
27 О Исусо диқля пэр лэндэ и ԥэндя: «Важ и мануша када невозможно, но най важ о Дэл, важ кода кай важ о Дэл вся возможно».
28 Тоди о Пётро ԥэндя лэсти: «Ай амэ? Амэ ашадям вся и лям тэ ԥирас пала тутэ».
29 О Исусо ԥэндя: «Чаче ԥэнав тумэнди: кажнонэсти, ко важ мандэ и важ и лащи новость ашадя о цэр, или лэ ԥралэн, или лэ ԥэян, или ла да, или лэ дадэс, или лэ бэятонэн, или пэстирэ маля,
30 дорэсэлапэ акана в 100 раз май бут цэра, ԥрала, ԥэя, дэя, бэяцэ и маля, и инке лэс ӷонина, ай май англэ лэсти дорэсэлапэ и вечно жызня.
31 Бут пэрви ашэна послидни, ай и послидни ашэна пэрви».
32 Вонэ жанас па дром, саво андярэлас андо Иерусалимо. О Исусо жалас май англэ, ай и удивлёни ученикоря жанас палал. Кодэла жэ, ко жалас лэнца, сас пэрэдаранэ. Во упалэ одындярдя андэ риг лэ 12 апосталонэн и ля тэ росԥэнэн лэнди, со лэса трэбуй тэ авэл:
33 «Амэ жас андо Иерусалимо, и котэ лэ манушэстирэ Шавэс отдэна андэ вас лэ барэ рашанди и лэ закониконэнди. Вонэ виандярэна лэсти смэртно приӷоворо и отдэна лэ манушэнди анда авэр народоря,
34 савэ лэна тэ асанпэ лэстар, тэ шунгардэн пэр лэстэ, тэ марэн лэс чукняса и умарэна, но через трин дес во жундёла».
35 Каринг о Исусо поджылэ о Иа́ково и о Иоа́но, лэ Зеведеёстирэ шавэ, и ԥэндэ: «Учителё, амэ камас, кай ту тэ стерэс кода, со амэ мангаса».
36 Во пушля лэндар: «Со тумэ камэн, кай мэ важ тумэндэ тэ стерав?»
37 Вонэ ԥэндэ: «Кала ту авэса ашунгло, мэк ек андар мэндэ бэшэл справа тутар, ай авэр слева».
38 Но о Исусо ԥэндя лэнди: «Тумэ на полэн, со мангэн. Можэте тумэ тэ пэн анда стакано, анда саво мэ пав, или тэ болдён кадя, сар мэ болдював?»
39 Вонэ ԥэндэ: «Можэм». Тоди о Исусо ԥэндя: «Тумэ пэна анда стакано, анда саво мэ пав, и болдёна кадя, сар мэ болдював.
40 Но най мэ витидав, ко бэшэла справа и слева мандар. Кадэла ҭана прижан кодэлэнди, важ кастэ вонэ сас витидэ́».
41 Кала авэр дэш ученикоря ашундэ када, вонэ холяйлэ по Иа́ково и по Иоа́но.
42 Но о Исусо подақардя лэн всаворэн каринг пэстэ и ԥэндя: «Тумэ ӷанэн, кай и правителя* хулаин лэ народонэнца и кай и барэ мануша правин пэр лэндэ,
43 ай машкар тумэндэ кадя на трэбуй тэ авэл. Но ко камэл тэ авэл машкар тумэндэ ашунгло, трэбуй тэ авэл тумэнди слуӷо,
44 и ко камэл тэ авэл машкар тумэндэ пэрво, трэбуй тэ авэл всаворэнди рабо.
45 Важ кода кай лэ манушэско Шаво авеля най кай важ лэстэ тэ терэн и дила, ай кай во тэ терэл и дила важ авэр, тэ отдэл пэстири жызня сар цэмин пала бут мануша и тэ витинэн лэн».
46 Посли када вонэ авелэ андо Ерихо́но. Ай кала во, лэстирэ ученикоря и бут миро вижанас анда Ерихо́но, паша дром бэшэлас ек коро чороро мануш, савэс ақарэнас Вартиме́ё, во сас лэ Тимеёско шаво.
47 Во ашундя, кай жал о Исусо анда Назаре́то и зацыписайля: «Лэ Давидоско шаво, Исусо, здик пэр мандэ!»
48 Бут мануша заставинас лэс тэ ашэл мулком, но во цыпияс инке май фартэ: «Лэ Давидоско шаво, здик пэр мандэ!»
49 О Исусо притерделя и ԥэндя: «Ақарэн лэс». Лэ корэс ақардэ и ԥэндэ лэсти: «На́ дар! Ущи, во ақарэл тут».
50 Во сшутя пар пэстэ и жылетка, сразу жэ ущеля и жыля каринг о Исусо.
51 О Исусо пушля лэстар: «Со мэ важ тутэ тэ стерав?» О коро ԥэндя: «Учителё*, стер кадя, кай мэ тэ диқав».
52 Тоди о Исусо ԥэндя лэсти: «Жа, ту патяян, и када исцэлисардя тут*». Во сразу ля тэ диқэл и ля тэ ԥирэл пала лэстэ.
Сноски
^ Или «пистросардя».
^ Ворта «во».
^ Ворта «ек тила».
^ Ворта «ек тила».
^ Ворта «стодя тала ек ӷамо».
^ Или «измений ла пэрвона хулаяти».
^ Или «измений лэ пэрвонэ хуласти».
^ Ворта «тэ лэлпэ каринг лэндэ».
^ Катэ и дума жал пала родителя.
^ Катэ и дума жал пала ученикоря.
^ Май ӥто всаворэстар, кадя ԥэнэнас, кай важ пэстири выӷода тэ вихвалин лэ манушэс. Када шоласпэ пэ кода, сар взвинаспэ каринг и законикоря.
^ Или «на́ изменисар андо брако».
^ Или, можэт, «ек еқэстар».
^ Или «кодэла, кас прижанэн правителёнэнца».
^ Ворта «равуни́».
^ Или «тиро патяимос исцэлисардя тут».
