Иоано 4:1-54
4 Каринг и фарисеёря дожыля дума, кай о Исусо сытярэл и болэл май бутэ учениконэн, чем о Иоа́но,
2 хоть болэлас най о Исусо, ай лэстирэ ученикоря.
3 Кала о Исусо уӷангля пала када, во ужыля анда Иуде́я и упалэ жыля андэ Галиле́я.
4 Лэсти трэбуй сас тэ прожал через и Сама́рия.
5 Во авеля андо самаритя́нско форо Сиха́рё, кадэва форо тердёл найдур ла малятар, сави о Иа́ково отдя пэстирэ шавэсти лэ Иосифости.
6 Котэ сас лэ Иаковостири хаинг*. О Исусо сас вицыено анда дром и кочай прибэшля паша латэ. Сас варикай 12 часов дня*.
7 Интя пала паи авеля ек самаритя́нка. О Исусо ԥэндя лати: «Дэ манди паи».
8 (Лэ учениконэн на сас паша лэстэ: вонэ жылэ андо форо тэ тинэн тэ хан.)
9 И самаритя́нка пушля лэстар: «Со? Ту жэ евреё! И ту мангэс паи мандар, ла самаритянкатар?» (Дила андэ кода, кай и иудеёря на хан и на пэн лэ самаритянонэнца.)
10 О Исусо ԥэндя лати: «Тэ ӷанглоп ту, со* дэл лэ манушэнди о Дэл и ко ԥэнэн тути: „Дэ манди паи“, тоди ту екжэни манглоп лэстар, и во диноп тути жундо паи».
11 Вой ԥэндя лэсти: «Тутэ дажэ нинай вадра, кай тэ дорэсэс о паи, ай и хаинг ӷлыбоко. Катар тутэ исин кадэва жундо паи?
12 Кадэя хаинг дя амэнди амаро ԥуро о Иа́ково. Андар латэ о паи пэлас и во екжэно, и лэстирэ шавэ, и о ското. Хэба ту май баро лэ Иаковостар?»
13 Пэ када о Исусо ԥэндя лати: «Кодэва, ко пэл кадэва паи, упалэ закамэла тэ пэл.
14 Ай кодэва, ко лэла тэ пэл паи, саво дава мэ, будэр никала на закамэла тэ пэл. О паи, саво мэ лэсти дава, ашэла андэр лэстэ сар родниково паи, саво на парашэл и дэл вечно жызня».
15 И жувли ԥэндя лэсти: «Дэ манди кадэва паи, кай ман будэр тэ на цырдэл тэ пав и кай манди тэ на прижалпэ тэ авав кардэ пала паи».
16 О Исусо ԥэндя ла самаритянкати: «Жа ақар пэстирэ хулас и ав палпалэ».
17 Вой ԥэндя: «Мандэ нинай хулай». О Исусо ԥэндя лати: «Када чаче, тутэ нинай хулай.
18 Ту санас миростэ панчвар, ай кодэва, каса ту жувэс акана, тути най хулай. Ту ԥэндян чачимос».
19 И жувли ԥэндя: «Мэ диқав, кай ту лэ Дэвлэско особо мануш.
20 Амарэ ԥурэ тэлёнас лэ Дэвлэсти пэ кадэва плай, ай тумэ ԥэнэн, кай тэ тэлён лэсти трэбуй андо Иерусалимо».
21 О Исусо ԥэндя лати: «Манушни, патя манди, авэла время, кала тумэ лэна тэ тэлён лэ Дадэсти и най пэ кадэва плай, и най андо Иерусалимо.
22 Тумэ тэлён кодэлэсти, со на ӷанэн, ай амэ тэлювас кодэлэсти, со ӷанас, важ кода кай спэрва лэ евреёнэнди сас дино тэ спасынпэ*.
23 И всаек, пашол и время, и вой ужэ поджыля, кала кодэла, ко па чачимастэ андярэл лэ Дадэстири время, лэна тэ полэн лэс через о свынто зор и через о чачимос. Важ кода кай о Дад родэл пэсти кати кодэлэн, ко акадя лэла тэ андярэл лэстири время.
24 О Дэл на дицол*, и кодэла, ко андярэл лэстири время, полэн лэс через о свынто зор и через о чачимос».
25 И жувли ԥэндя лэсти: «Мэ ӷанав, кай трэбуй тэ авэл о Избрано, пэ саво ԥэнэн Христос. Во авэла и росԥэнэна амэнди пала вся».
26 О Исусо ԥэндя лати: «Када мэ, кодэва, ко дэл дума туса».
27 Андэ кодэя время авелэ лэстирэ ученикоря. Вонэ удивисайлэ, кай во дэл дума ла жувляса, но нико на пушля: «Со ту латар камэс?» или «Васо ту ласа дэс дума?»
28 Ай и жувли ашадя пэско кувшыно, жыля андо форо и ля тэ ԥэнэн лэ манушэнди:
29 «Жан диқэн по мануш, саво росԥэндя манди пала вся мэрни жызня. Можэт, во Христос?»
30 Вонэ вижылэ анда форо и жылэ каринг лэстэ.
31 Андэ кодэя время и ученикоря мангэнас лэ Исусос: «Учителё*, лэ заха».
32 Но во ԥэндя лэнди: «Мандэ исин хамос, пала саво тумэ на ӷанэн».
33 Тоди и ученикоря линэ тэ ԥэнэн ек еқэсти: «Со, варико андя лэсти тэ хал?»
34 Ай о Исусо ԥэндя лэнди: «Мэрно хамос — тэ терав кода, со уӷодно кодэлэсти, ко ман бишалдя, и тэ достерав и дила, сави во манди дя.
35 Хэба тумэ на ԥэнэн, кай, сар тэ стидэн о урожаё, инке исин штар шон? Ни акэ, ԥэнав тумэнди, ваздэн и яқа и диқэн: пэ маля спилосайля о зэрно* и о урожаё можно тэ стидэн.
36 Кодэлэсти, ко стидэл, ужэ потинэн пала лэстири бути, и во стидэл урожаё важ и вечно жызня, важ када и кодэва, ко сеий, и кодэва, ко стидэл, лошавэн вместе.
37 Най евья ԥэнэн: „Ек сеий, ай авэр стидэл“.
38 Мэ бишалдэм тумэн тэ стидэн кода, со тумэ на сеисардэ. Сеисардэ авэр, ай тумэ мардэ и бажын лэндиря дилатар».
39 Бут самаритя́норя анда кодэва форо патяе андо Исусо, кала ашундэ, со росԥэндя и жувли, сави ԥэнэнас: «Во росԥэндя манди пала вся мэрни жызня».
40 Важ када и самаритя́норя авелэ каринг лэстэ и манглэ лэс тэ ашэлпэ лэндэ. Во сас котэ дуй дес.
41 Бут авэр мануша, кала ашундэ кода, со ԥэнэнас екжэно о Исусо, патяе андэр лэстэ.
42 Вонэ ԥэндэ кодэла жувляти: «Амэ патяс ужэ най важ кода, кай ту амэнди росԥэндян. Амэ екжэнэ ашундям лэс и акана ӷанас, кай кадэва мануш чаче спасыя и люма».
43 Через дуй дес о Исусо жыля котар андэ Галиле́я,
44 хоть во екжэно ԥэнэнас, кай лэ Дэвлэстирэ особонэ манушэса на обжанпэ пативаса пэ лэстирэ краёря.
45 Кала жэ во авеля андэ Галиле́я, и мануша котэ анда ди шутэ лэс сама, важ кода кай вонэ тожэ сас по празнико андо Иерусалимо и диқлэ вся, со во котэ стердя.
46 О Исусо упалэ авеля андо галилейско форо Ка́на, кай во варикала стердя вино анда паи. Ай андо Капернау́мо жувэлас ек баро мануш, саво терэлас по царё, и лэстэ занасвайля о шаво.
47 Кадэва мануш, кала ашундя, кай о Исусо рисайля анда Иуде́я и авеля андэ Галиле́я, жыля каринг лэстэ и ля тэ мангэл лэс тэ авэл и тэ исцэлий лэстирэ шавэс, саво сас фартэ насвало.
48 Но о Исусо ԥэндя лэсти: «Пока тумэ на диқэна удивительно дила и чудеса, никала на патяна».
49 О баро мануш ԥэндя лэсти: «Баро Хулай, ав, пока мэрно бэято на муля».
50 О Исусо ԥэндя: «Рисав цэрэ, тиро шаво вилечисайля». Кодэва мануш патяя лэ Исусости и жылятар.
51 Кала во инке сас андо дром, каринг лэстэ вижылэ лэстирэ раборя и ԥэндэ, кай лэ бэятости ашэля фэдэр*.
52 Во пушля лэндар, андэ саво часо када тердяпэ. Вонэ ԥэндэ: «И температура спэля лэстэ арати варикай в час дня*».
53 И лэско дад поля, кай када тердяпэ андэ кодэва маменто, кала о Исусо ԥэндя лэсти: «Тиро шаво вилечисайля». Тоди во и вся лэско ери патяе андо Исусо.
54 Када сас дуйто чуда, сави о Исусо стердя андэ Галиле́я, кала авеля анда Иуде́я.
Сноски
^ Или «роднико».
^ Ворта «шэсть часов (сар вижыля о қам)».
^ Или «саво подарко».
^ Ворта «тэ спасынпэ трэбуй через и евреёря».
^ Или «о Дэл на дицол, и во жувэл по небо». Ворта «о Дэл сыно фано».
^ Ворта «рави́».
^ Или «и маля ашэлэ парнэ».
^ Ворта «о шаворо жундо».
^ Ворта «в семь часов (сар вижыля о қам)».
