Иоано 1:1-51
1 Спэрва* сас Алав*, и о Алав сас паша Дэл, и о Алав сас дэвлэса*.
2 Во сас спэрва лэ Дэвлэса*.
3 Вся, со исин, появисайля через лэстэ*, и би лэско нисо на сас стердо.
4 Через лэстэ появисайля жызня, ай и жызня* сас свето важ о миро.
5 О свето светий андэ тэмнота, но и тэмнота не можэт тэ бирой лэс.
6 Авеля о мануш, савэс бишалдя о Дэл. Лэс ақарэнас Иоа́но.
7 Во авеля сар свидетелё — тэ потвердий о чачимос пала свето, кай через лэстэ само разни мануша тэ патян.
8 Во на сас кодэва свето, но трэбуй сас тэ потвердий о чачимос пала свето.
9 О чачуно свето, саво светий лэ разнонэ манушэнди, трэбуй сас ӥто тэ авэл андэ люма.
10 Во сас андэ люма, но и люма, сави появисайля через лэстэ, лэс на ӷатярдя.
11 Во авеля кай пэстирэ, но вонэ лэс на прижанглэ.
12 Ай кодэлэнди, ко лэс прижангля, во домэкля* тэ ашэн лэ Дэвлэстирэ бэяцэ, важ кода кай вонэ патянас андэр лэстэ*.
13 Вонэ арақаделэ най лэ манушэндар и най важ кода, кай кадя закамля о миро или лэндирэ родителя, но вонэ арақаделэ лэ Дэвлэстар.
14 О Алав ашэля манушэса и жувэлас машкар амэндэ. Амэ диқлям, сар марэл лэстар и бах — када о Дэл стердя, кай лэско особено шаво тэ ашэл ашунгло. Во на парашэлас тэ росԥэнэн* о чачимос, и о Дэл вся и время лэс блаӷословияс*.
15 (О Иоа́но потвердияс о чачимос пала лэстэ и ԥэнэнас англа всаворэ: «Када пала лэстэ мэ ԥэндэм: „Кодэва, ко жал посли мандэ, ашэля май баро мандар, важ кода кай авеля пэ люма, кала ман инке на сас“».)
16 Во вся и время здиқэлас пар мэндэ па пэско баро ковло ди, саво лэстэ кацаво дэ баро, кай нисоса на сыстояпэ.
17 Через о Маисеё о Дэл дя законо, ай через о Исусо Христос — здиқля пар мэндэ па пэско баро ковло ди и дя тэ уӷанас о чачимос.
18 Ни ек мануш никала на диқля лэ Дэвлэс. Пала лэстэ амэнди росԥэндя о особено дэвликуно шаво, саво находийпэ паша Дад*.
19 Акэ со о Иоа́но сар свидетелё потвердисардя. Кала и иудеёря бишалдэ анда Иерусалимо лэ рашан и лэ левитонэн тэ пушэн лэстар: «Ко ту?» —
20 во на ля тэ блудий андэ дума и ворта ԥэндя: «Мэ най Христос*».
21 Вонэ пушлэ: «Тоди ко ту? О Илья?» Во ԥэндя: «Най». Посли када вонэ пушлэ: «Можэт, ту лэ Дэвлэско особо мануш*?» И во упалэ ԥэндя: «Най!»
22 Вонэ пушлэ лэстар: «Мо ԥэн ужэ, ко ту? Ԥэн амэнди, кай амэ тэ пэрэдас тирэ алава кодэлэнди, ко амэн бишалдя. Со ту ԥэнэса пала пэстэ?»
23 Во ԥэндя: «Мэ кодэва, каско ӷолосо ӷромко ашундёл андэ пустыня: „Вировнин о дром важ о Иегова*!“ — сар ԥэндя лэ Дэвлэско особо мануш о Иса́я».
24 Ай кадэлэ манушэн бишалдэ и фарисеёря.
25 Вонэ пушлэ лэстар: «Васо ту болэс, если ту най о Христос, най о Илья и най лэ Дэвлэско особо мануш?»
26 О Иоа́но ԥэндя: «Мэ болав андо паи. Но машкар тумэндэ исин кодэва, кас тумэ на ӷанэн,
27 кодэва, ко авэл посли мандэ. Мэ на ашав дажэ тэ росԥандав и пряшки пэ лэстирэ сандали».
28 Када сас андэ Вифа́ния, пала лэн Ярда́но, кай болэлас о Иоа́но.
29 Пэ авэр дес во диқля лэ Исусос, саво жалас каринг лэстэ, и ԥэндя: «Акэ лэ Дэвлэско Бакроро, саво залэл* ла люмако бэзэх!
30 Када пала лэстэ мэ ԥэндэм: „Посли мандэ авэл кодэва, ко ашэля мандар май баро, важ кода кай авеля пэ люма, кала ман инке на сас“.
31 Мэ лэс на ӷанавас, но мэ авелэм тэ болав лэ паеса, кай пала лэстэ тэ ашундёл андо Израилё».
32 Кадяжэ о Иоа́но росԥэндя: «Мэ диқлэм, кай па небо, сар ӷолубо, змэкляпэ о свынто зор и ашэляпэ пэр лэстэ.
33 Мэ лэс на ӷанавас, но кодэва, ко бишалдя ман тэ болав паеса, ԥэндя манди: „Ту диқэса кодэлэс, пэр кастэ змэкэлапэ о свынто зор и пэр кастэ во ашэлапэ, — акэ во и исин, ко болэл свынтонэ зорэса“.
34 Мэ диқлэм када и сар свидетелё ԥэнав о чачимос: во — лэ Дэвлэско Шаво».
35 Пэ авэр дес о Иоа́но упалэ тердёлас котэ пэстирэ дуе учениконэнца
36 и, кала додиқля лэ Исусос, ԥэндя: «Акэ лэ Дэвлэско Бакроро!»
37 Лэдуй ученикоря жылэ пала Исусо, кала ашундэ када.
38 О Исусо обрисайля, додиқля, кай вонэ жан палал, и пушля лэндар: «Со тумэ родэн?» Вонэ ԥэндэ лэсти: «Рави́ (када пэрэандярдёл сар «учителё»), кай ту ашэлянпэ тэ ратярэс?»
39 Во ԥэндя: «Авэн, и диқэна екжэнэ». Сас варикай четыре часа дня*. Вонэ жылэ и диқлэ, кай во ашэляпэ тэ ратярэл, и ашэнаспэ лэса вся о дес.
40 Ек анда кодэла ученикоря, савэ ашундэ лэ Иоаностирэ алава и жылэ лэ Исусоса, сас о Андрий, лэ Симаноско лэ Петроско ԥрал.
41 Во сразу виарақля пэстирэ ԥралэс лэ Симанос и ԥэндя лэсти: «Амэ виарақлям лэ Избранонэс» (пэ греческо шыб «Христос*»),
42 ай тоди андя лэс каринг о Исусо. О Исусо диқля пэр лэстэ и ԥэндя: «Ту Си́мано, лэ Иоаноско шаво. Пэр тутэ лэна тэ ԥэнэн Ки́фа» (пэ греческо шыб Пётро).
43 Пэ авэр дес о Исусо закамля тэ жал андэ Галиле́я. Во диқляпэ лэ Филипоса и ԥэндя лэсти: «Ԥир пала мандэ».
44 Кадэва мануш сас анда Вифсаи́да — анда лэ Андриёско и лэ Петроско чачо форо.
45 О Фили́по жыля каринг о Нафанаи́ло и ԥэндя лэсти: «Амэ виарақлям кодэлэс, пала кастэ пистромэ андэ лэ Маисеёско законо и пала кастэ пистронас лэ Дэвлэстирэ особи мануша — лэ Исусос, лэ Иосифостирэ шавэс, анда Назаре́то».
46 Но о Нафанаи́ло пушля: «Хэба андо Назаре́то можэт тэ авэл варисо лашо*?» О Фили́по ԥэндя: «Жа и дик».
47 О Исусо додиқля лэ Нафанаилос, саво жалас каринг лэстэ, и ԥэндя: «Акэ чачуно израильтя́нино, андэ саво нинай хытрия».
48 О Нафанаи́ло пушля: «Катар ту ман ӷанэс?» О Исусо ԥэндя: «Англа кода сар о Фили́по ақардя тут, мэ диқлэм тут тала инжырово витка».
49 Тоди о Нафанаи́ло ԥэндя лэсти: «Учителё*, ту — лэ Дэвлэско Шаво, ту — лэ Израилёско Царё».
50 Пэ када о Исусо ԥэндя: «Ту патяс важ кода, кай мэ ԥэндэм тути: „Мэ диқлэм тут тала инжырово витка“? Ту диқэса пэбутэстэ май бут».
51 Кадяжэ во ԥэндя: «Патян: тумэ диқэна ԥэрнадо небо и лэ Дэвлэстирэ анӷелонэн, савэ змэкэнпэ каринг лэ манушэско Шаво и ваздэнпэ упрэ».
Сноски
^ Или «фартэ дэлмут, кала нисо инке на сас создано».
^ Или «лэ Дэвлэско прецтавителё».
^ Или «дэвликуно».
^ Или «сас лэ Дэвлэса, кала инке нисо на сас создано».
^ Или «о Дэл стердя вместе лэса».
^ Или «лэстири жызня».
^ Или «дя право».
^ Ворта «андэ лэско алав».
^ Или «пэр лэстэ вся и время здиқэлас о Дэл».
^ Или «тэ сытярэл».
^ Ворта «паша лэ Дадэско колин». Тэ авэс варикастэ паша колин — када сыкавэлас, кай во стол бари патив пэр тутэ.
^ Или «Избрано».
^ Ворта «ундярэл».
^ Ворта «десять часов (сар вижыля о қам)».
^ Озн. «помақло».
^ Или «моӷут тэ авэн бахталэ мануша».
^ Ворта «рави́».
