12. KOTOR
Sar shaj aves le Devlesko amal?
1–2. Phen le Jehovaske unyi amalen!
SOSKO amal trubulas tut? Kasavo, kas kames, thaj savesa mishto avri aves. Kasavo, kon dragoj, thaj pe kaste opre zhanes te dikhes.
2 O Jehova vi mashkar le manusha lel peske amalen. Jekh pelda, o Abraham lesko amal sas (Izaiash 41:8; Jakab 2:23). O Jehova vi le Davides zurales kamelas. Kodo phendas pa leste, ke kado manush kathar lesko jilo si (Aposhtola 13:22). Vi le Daniel profetas zurales kamelas o Jehova (Daniel 9:23).
3. Sostar kerdyilas o Abraham, o David thaj o Daniel le Jehovasko amal?
3 Sostar shaj sas o Abraham, o David, thaj o Daniel le Jehovasko amal? O Jehova kado phendas le Abrahameske: „shundan pe muri vorba” (1Mozesh 22:18). O Jehova kodolenge avla lengo amal, kon tele bandyon angla leste. Inke vi jekh nipo shaj avel lesko amal, ke o Jehova kado phendas le Izraelitenge: „Te ashunen pe muri vorba, thaj me tumaro Del avo, tume pale muro nipo avena” (Jeremiash 7:23). Te kames vi tu t’aves le Jehovasko amal, atunchi trubul te mukhes tu leske.
O JEHOVA SAMA LEL PE PESKE AMALA
4–5. Sar le sama o Jehova pe peske amala?
4 E Biblia kodo phenel, ke o Jehova rodel, sar „te zhutil kodolen, kon chache jilesa slugisaren les” (2Kronika 16:9). Ando Asharimata 32:8 kado shinavel sakoneske, kon lesko amal si: „Godyi dav tut, thaj sityarav tut, ke po lasho drom te phires. Vorba dav tut, mure jakha pe tute ashon.”
5 Jekh baro xojako chi kamel t’avas le Devleske amala. De o Jehova sama kamel te lel pe amende. (Ginav: Asharimata 55:22!) Le Jehovaske amala te sam, atunchi andar amaro jilo slugisaras les. Inke vi atunchi patyivale ashas karing leste, kana pharimo si amen. Kasavo zurales patyas ande leste, sar o David, kon kado iskirindas po Jehova: „Chi peravtar, ke voj pe muri chachi rig si” (Asharimata 16:8; 63:8). So kerel o Beng, te na avas le Jehovaske amala?
LE BENGESKE XOXAJIMATA
6. So phenel o Beng pa le manusha?
6 Ando 11. kotor zhanglam, ke o Beng kodo phendas po Jehova, ke xoxavel, thaj naj chacho, ke chi mukhel, ke o Adam thaj e Eva von te phenen so si o lasho, thaj so si o nasul. E Biblia ande Jobeski ginadyi phenel, ke o Beng vi pe le manusha xoxavel, pe kodola, kon kamen le Devleske amala t’aven. Kodo phenel, ke na anda kamimo slugin le Devles, anda kodo, ke del len variso. Vi kodo phenel, ke sakones zhanel te boldel kathar o Del. Dikhas, so shaj sityuvas kathar o Job, thaj sar las pe leste sama o Jehova.
7–8. a) So gindindas o Jehova po Job? b) So phendas o Beng po Job?
7 Kon sas o Job? Jekh lasho manush, kon karing 3600 bershenca majanglal trajindas. O Jehova kodo phendas, ke atunchi nas kasavo manush pe phuv, sar o Job. Daralas le Devles, thaj gracolaspe kathar kodo, so nasul si (Job 1:8). Ova, o Job le Jehovasko chacho amal sas.
8 O Beng kodo phendas, ke o Job na andar o chacho jilo slugil le Devles. Kado phendas le Jehovaske: „bar vazdan krujal leste, karing lesko kher, thaj karing sakofelo, so lesko si, sama te les pe leste! Leske vasteski butyi zhutin dan, thaj but allatura kerdyile les pe phuv. De puter avri tyiro vast, thaj mar tele sakofelo, so lesko si, thaj zhanav, ke armaja dela tut ande tyire jakha” (Job 1:10, 11).
9. So mukhlas o Jehova le Bengeske?
9 O Beng kodo xoxadas po Job, ke feri anda kodo slugin le Jehovas, ke del les variso. Vi kodo phendas, zhanel te kerel kodo, ke o Job te na slugil majdur le Jehovas. O Jehova chi hatyardas jekh le Bengesa, de mukhlas leske, te zumavel les, thaj kade avri te avel, ke o Job vi chaches anda kodo si lesko amal, ke kamel les.
O BENG ZUMAVEL LE JOBES
10. Sosa zumadas o Beng le Jobes, thaj sar reslas les kado?
10 O Beng majdinti kade kerdas te choren vaj te pustitin le Jobeske intregi allaton, thaj mudardas leske bute slugen. O Job sakofelo xasardas. Po agor o Beng mudardas le Jobeske 10 shavoren ande jekh bari balval. O Job inke patyivalo ashilas karing o Jehova. „Pe kodo but, pe soste perdal gelas o Job, de chi kerdas bezex, thaj khanchi nasul chi phendas po Del” (Job 1:12–19, 22).
O Jehova palpale potyindas le Jobeske, ke lesko patyivalo amal sas
11. a) So kerdas inke o Beng le Jobesa? b) So kerdas o Job pe kado?
11 O Beng chi das opre. Kade cirdelas le Devles: „mar leske kokala thaj vi les, thaj kade avla, ke ande tye jakha dela tu armaja.” Pala kado o Beng jekh pharo nasvalimo shutas po Job (Job 2:5, 7). De o Job vi atunchi patyivalo ashilas karing o Jehova. Kado phendas: „Zhi kaj trajinav, uzhe jilesko ashav!” (Job 27:5).
12. Sar sikadas o Job, ke o Beng xoxavel?
12 O Job khanchi chi zhanglas pe le Bengeske xoxajimata, thaj chi pe kodo, ke sostar trubul kattyi dukh t’avel les. Kodo gindindas, ke o Jehova del pe leste o but pharimo (Job 6:4; 16:11–14). De inke vi kade patyivalo ashilas karing o Jehova. Pala kado aba uzhes dicholas, ke o Job patyivalo sas. Anda kodo sas le Devlesko amal, ke kamelas les. Le Bengeske intregi vorbi xoxajimata sas.
13. So kerdyilas ande kodo ke o Job patyivalo ashilas?
13 O Job chi zhanglas so perelpe ando cheri, patyivalo ashilas karing o Del thaj sikadas, ke o Beng nasul si. O Jehova palpale potyindas le Jobeske anda kodo, ke lesko patyivalo amal sas (Job 42:12–17).
O BENG VI PE TUTE XOXAVEL
14–15. So phenel o Beng pe sakone manusheste?
14 But shaj sityuvas ande kodo, so le Jobesa pelas. O Beng vi pe amende kodo xoxavel, ke feri anda kodo sluginas le Jehovas, ke del amen variso. Ando Job 2:4 o Beng kado phendas: „O manush sakofelo kothe del anda pesko trajo.” Kade na numa po Job xoxadas kodolesa, ke naj patyivalo, ke pe sako manush xoxadas. But shela bershenca pala soste o Job mulas, o Beng inke vi akanak nasul phenel po Jehova thaj xoxavel pe leske slugi. Ande Godyaver Vorbi 27:11 kado shaj ginavas: „Av godyaver muro shavo, thaj ker lossh mure jileske, te shaj dav palpale vorba kodoleske, kon man prassal.”
15 Shaj keres kade, ke mukhes tu le Jehovaske, thaj lesko patyivalo amal aves, thaj kadalesa sikaves ke o Beng xoxavel. Vi te trubul zurales te boldes pe tyo trajo, te shaj aves le Devlesko amal, vi atunchi kadoj o majlasho drom pe soste shaj phires! Zurales trubul te tordyos. O Beng kodo phenel pe tute, ke chi ashos patyivalo karing o Del, kana pharimo resel tut. Anda kado, kodo kamel, dumo te boldes le Devleske. Sar kerel kado?
16. a) Soske butyanca kamel te resel o Beng, te na sluginas le Jehovas? b) Tut sar zumavel o Beng tele te tordyarel, te na slugis le Jehovas?
16 Le Benges but butya si pe kodo, te resel, te na avas le Devleske amala. Amenge avel, „sar jekh bari vadno muca, kon cipil, thaj pe kodo si, te xal varikas” (1Peter 5:8). Ande kado na chudintu, kana tye amala, tye nipura vaj kavera tele kamen te vorbin tut pe kodo, te sityos e Biblia, thaj te keres o lasho. Kade shaj hatyares tut, sar kas kamen te azban (Janosh 15:19, 20). * Thaj inke o Beng le „chachimaske andyaloske sikavelpe”. Buzhangles opre kamel te lel amen pe kodo, te na mukhas ame le Jehovaske (2Korintus 11:14). Leski kaver butyi kodo si, ke kamel te patyavavel amenca, ke soha nashtig avas dosta lashe pasha kodo, te sluginas le Devles (Godyaver Vorbi 24:10).
MUKH TUT LE JEHOVASKE VORBENGE!
17. Sostar mukhasame le Jehovaske?
17 Kana mukhasame le Jehovaske, sikavas, ke o Beng xoxavel. So zhutil amen ande kodo, kado te keras? E Biblia kado iskiril: „Te kames le Jehovas, tyire Devles, ande tyiro intrego jilo, ande tyiro intrego dyi, thaj ande tyire intrego zorasa” (5Mozesh 6:5). Anda kodo mukhasame le Jehovaske, ke kamas les. Sar majfeder kamasa les, rodasa leski voja, thaj kodo kamasa te keras, so mangel. O Janosh aposhtol kado iskirindas: „te kamas le Devles, andre inkras leski vorba. Leske vorbi pale naj phare amenge” (1Janosh 5:3).
18–19. a) So si nasul angla Jehova? b) Kathar zhanas, ke o Jehova chi mangel kasavo, so chi zhanas te keras?
18 De so si nasul angla o Jehova? O „ Gracontu kathar kodo, sostar vi o Jehova gracolpe!” kotor vi majbut butya sikavel. Anglunes shajke kade mezilpe, ke mashkar kadal unyi butya china naj kasave nasul. De te ginavesa le vershura, thaj gindistu pe kodol, atunchi dikhesa sosko godyaver si te mukhestu le Jehovaske krisake. Shajke opre pinzhares, ke trubul te boldes pe varisoste ande tyo trajo. Kado shaj avel pharo, de te keresa les, hatyaresa kodi pacha thaj lossh, so anda kodo si, ke le Devlesko patyivalo amal san (Izaiash 48:17, 18). Kathar zhanas, ke zhanas te keras kadal?
19 O Jehova soha chi mangel kasavo, so chi zhanas te keras (5Mozesh 30:11–14). Voj chacho amal si, kon majfeder pinzharel amen, sar ame amen. Zhanel ande soste sam zurale, thaj ande soste sam kovle (Asharimata 103:14). O Pal aposhtol kadalesa zurarel amen: „Feri kasavo zumavipe reslas tumen, so vi kaveren. De patyivalo si o Del, thaj chi mukhela ke kasavo zumavipe te resel tumen, so aba chi zhanen te phiraven, thaj kana ande zumavipe san, vi o drom kerel pe soste avri zhanen te zhan, ke avri zhanen te inkren” (1Korintus 10:13). Zhanas, ke o Jehova mindig del zor, te keras, so lashoj. Majbari zor, dela tut, sar so siklo san, avri te zhanes te inkres ande le zumavimata (2Korintus 4:7). Pala soste o Pal hatyardas ke o Jehova das les zor, kado iskirindas: „Pe sakofelo sima zor, thaj najisarav kodoleske, kon zor del man” (Filippi 4:13).
TE KAMES KODO, SO O DEL KAMEL!
20. Sosko trubul t’aves thaj sostar?
20 Te kamas le Jehovaske amala t’avas, naj dosta te mukhasa opre kodolesa, so voj chi kamel (Roma 12:9). Trubul te kamas kodo, so voj kamel. Ande Asharimata 15:1–5 tele iskril, so si kadal. (Ginav!) Le Jehovaske amalenge kasave trubul t’aven, sar voj. Thaj kadala te sikaven avri „o kamipo, e lossh, e pacha, te zhanel te zhukarel, dragimo, lashimo, patyamo, kovlipe, palpale inkripe” (Galacia 5:22, 23).
21. Sar zhanes kodola te keres, so kuch si ande le Devleske jakha?
21 Sar zhanes te keres kadala ande tyo trajo? Trubul te sityos te kames, so o Jehova kamel. Sako dyes te ginavesa, thaj te sityosa e Biblia, kado zhutil tut, majpashe te zhas kaj o Jehova (Izaiash 30:20, 21). Kade te keresa, majfeder kamesa le Jehovas, thaj pe kodo inkrela tut, te mukhestu leske.
22. So avla atunchi te mukhesatu le Jehovaske?
22 Kodo, ke trubul te boldes pe tyo trajo, kasavoj, sar kana varikon kaver gada lel opre. E Biblia pe kodo zurarel, te shudes tele le „dulmutane manushes”, thaj le opre o nyevo (Kolosse 3:9, 10). Shajke pharoj te boldes pe tyo trajo, de te mukhesatu le Jehovaske, kodo shinavel, ke „palpale potyinena” tuke (Asharimata 19:11). Ker kade, ke mukhestu le Jehovaske, thaj sikav andre, ke o Beng xoxavel! Slugin le Jehovas, de na anda kodo, so na butara dela tut, ke anda chacho jilo thaj anda kamipe. Kade le Devlesko chacho amal avesa!
^ 16. kotor Kado na kodo sikavel, ke sakones o Beng tradel, kon tele kamen te vorbin tut, te na sityuv e Biblia. De voj si „kadala lumako Del”, thaj „e intrego luma [ande lesko] vast si”. Anda kado na chudintu pe kodo, ke si kasave, kon kamen te tordyaren tut, te na slugis le Jehovas (2Korintus 4:4; 1Janosh 5:19).
