Arakhadilem ai barilem pasha e Roma, ai murho traio sas defial pharo. Chi prinzhardem ka murhi dei, ai chi ningeravas man mishto murhe dadesa. Numa lavas man pala o zakono la vulitsako.

Astardem te chorau kal 10 borsh, ai kana sas man 12 sas e pervo data kai gelemtar kheral. Butivar murho dat gelo te rodel man kai kris. Sar sa simas joliariko, javas man le manushentsa. Kal 14 borsh, gelemtar kheral te na mai amboldau. Traivas pel vulitsi ai piavas draba chorhe. De riate putravas iek matora ai sobavas kotse ai diminiatsi rodavas kai te jalavau man.

Kerdilem baro chor. Keravas suako fialo, choravas kal manush pel vulitsi ai de riate davas andel khera. Ashundiolas but mandar ai pala godia akharde man te chorau avrentsa ai astardiam te choras bancuria. Pala e joli kai sas man, le kolaver respetinas man. Chi zhavas katsende te na avilosas e pushka pe mande ai thavas la tela o sherand. Murho traio sas te ja man varekasa, te piau draba chorhe, te chorau, te phirau but zhuvliantsa ai te phenau zhungale suaturia. E kris lelaspe pala mande ai butivar gelem phandado. Kana chi simas pe vulitsa, simas phandado.

Iek data kana anklistem anda e rhobia, gelem te dikhau murha bibia. Me chi zhanavas ke voi ai dui anda murhe voruria sas marturia le Jehovaske. Von akharde man kai chidenpe ai gelem te dikhau sar sas. Kana aresliam, kamlem te beshau pasha e vudar te lau sama kon delas andre ai kon zhalastar. Ai sar simas sikado, ningerdem mantsa e pushka.

Godo gies kai chidinisailem lentsa parhudias murho traio. Gindisailem: “Chi pakiau te avel kako pe kacha lumia”. Pe suako rig dikhavas manush veselime ai dragostosuria. Zhi agies serau mange ke le marturia le Jehovaske kerde te aliarau man mishto. Aliaravas man but kilometria dur katar e lumia kai beshavas!

Alosardem te estudiu e Biblia le Marturentsa ai so mai zhavas angle dem po gor ke trobuvas te parhuvau sa murho traio. Lem opre le suaturia katar Proverbios 13:20: “Kon phirel jarane manushentsa kerdiola jarano, numa kon phirel godolentsa kai chi gindin so keren si te zhal leske nasul”. Aliardem ke trobuvas te duriuvau katar le manush kai chorenas mantsa, godo nas vushoro numa o Jehova azhutisardias man.

Meklem te piau tsigeri ai draba chorhe, shindem murhe bal, ankaladem le slaga kai sas man andel kan, ai chi mai phendem suaturia zhungale. Gadia aliardeman vuzho, atunchi sas e pervo data kai sas man e voia te alosarau so te kerau.

Chi plachalas man te chitou ai te estudiu, pala godo sas pharo mange te thau man te estudiu e Biblia. Numa tsirha po tsirha astardem te kamau ka o Jehova ai vareso ande mande parhudilo. Astardem te keiu man pala sa so kerdem. Butivar chi aliaravas man mishto, ke gindivas ke o Jehova nas te iertil man pala le prame bi lashe kai kerdem. Kana aliaravas man gadia, delas man pacha te chitou sar o Jehova iertisardias le bezeja kai kerdias o amperato David (2 Samuel 11:1–12:13).

Aver prama kai nas vushoro mange sas te zhau kher kherestar te predikiu (Mate 28:19, 20). Daravas te arakhau varekas kai kerdem vareso nasul, numa tsirha po tsirha meklem e dar palpale ai plachalas man te dau duma le manushentsa pa amaro Dat kai si ando cheri, vo iertil amen ilesa.

Te prinzharau ka o Jehova skepisardias murho traio! Le amiguria kai sas man mule le vai phandade le, numa me sim barikano ai azhukerau iek traio shukar mai angle. Sikilem te avau lasho anda o ilo, te pakiau o mui ai te na mai la man pala e joli. Pala godia ningerau man mishto savorhentsa. Si pala mande iek lashi zhuvli, e Carmen, ai sam barikane. Le dui azhutis le manushen te sikion pa e Biblia.

Ai bisterdem te phenau!, akana lau love katar iek lashi buki. Univar zhau kal bancuria numa chi mai chorau, zhau te vuzharau len.