Arakhadilem ande iek foro tsinorho ande Galicia, anda e España. Samas ojto phral ai me simas e shtarto. Samas iek familia barikani. Ande godia vriama but famili tradenas ka iek anda penge shave te trail ande iek khangeri. Ai anda amari familia geliam trin.

Gelem te traiu ande iek khangeri kana sas man 13 borsh ai kotse gata sas iek anda murhe phea. Ande godia khangeri khonik nas amigo khanikasko, trobusas te pakias o mui, te rhugis ai te keras numa le dieli kai phenenas amenge. Diminiatsi kidasas amen te das amen gogi ando Del ai nas vushoro mange, murhe ginduria zhanastar pe aver rig. Polme gilabasas ai zhasas kai khangeri, numa sa so ashunavas sas ande shib latin, pala godia chi aliaravas but ai aliaravas ke o Del sas defial dur mandar. Gies giesestar chi ashundiolas khanchi ke khonik chi delas duma, ai vi kana dikhavas murha phea numa shai phenasas amenge: “Sunto Maria”. Polme te jas numa denas amen dopash chaso te das duma. Kotse chi simas barikani sar simas khere! Aliaravas man korkorho ai rovavas sorho gies.

Makar chi aliaravas man pasha o Del kana sas man 17 borsh kerdilem rashaii. Chachimasa kerdem godo sostar sas so azhukerenas mandar, numa ande tsirha vriama astardem te gindiu te avela ke chaches kamavas godo mange. Le rashaiia phenenas amenge ke te na zhanasas chachimasa te kamasa te avas rashaiia, sas te zhas ande iag! Numa godo chi azhutisardias man. Me zhanavas ke ka o Jesukristo chi plachalas les te avel korkorho, vo nakhelas but vriama le manushentsa, sikavelas len ai azhutilas len (Mate 4:23-25). Kana sas man 20 borsh chi zhanavas pala soste te mai avau rashaii. E zhuvli kai ningerelas le rashaian, phendias mange ke te avela chi zhanavas so te kerau, trobuvas te zhautar. Nashtivas te pakiau godo ai gelemtar. Gindiu ke daralas te pherau o shero varekasko.

Kana areslem khere, murhe dada aliarde mange, numa sar nas buki ando foro gelemtar ando Niamtso kai beshelas iek anda murhe phral. Vo kidelaspe manushentsa anda e España kai sas comunista. Aliaravas man mishto godole manushentsa kai marenaspe pala le zhuvlia ai le manush kai keren buki. Kerdilem comunista ai la vriamasa, ansurisailem iekhesa anda lende. Zhavas lentsa kana buntuinaspe te mangen lashe prame le kolavrenge. Aliaravas man mishto kana azhutivas.

Numa, la vriamasa chi aliaravas man gadia de mishto. Gindivas ke godo grupo comunista chi kerelas so motholas. Ai ando 1971, ando Fráncfort, uni terne te sikaven peski joli dine iag ka o consulado anda España ke von sas joliariko pala le prame kai kerelas e amperetsia anda España ande godia vriama. Numa me gindivas ke chi trobulas te kerdiol godo.

Kana arakhadilo amaro pervo shau, phendem murhe rhomeske ke chi mai sas te zhau lentsa. Aliaravas man defial korkorho, ke chi iek anda murhe amiguria avilesas te dikhen murhe shaves ai man. Pushavas man, soske trais? Chachimasa le prame kai keras si te lasharen vareso?

Ando 1976, dui marturia le Jehovaske anda e España avile mande khere ai mekle mange uni publikasionuria anda e Biblia. Kana ambolde, pushlem lendar sostar sam po kino ai sostar nakhen prame kai nai vorta. La Bibliasa dine anglal pa sa so pushavas man. Pala godia fuga astardem te sikiuau pa e Biblia lentsa.

Kana astardem, numa kamavas te sikiuau prame neve. Meklem te gindiu gadia kana geliam murhe rhomesa kai kidenpe le Marturia. Ande godia vriama sas amen dui shave. Le Marturia ningerenas amen kai kidenpe ai arakhenas amare shaven kana samas kotse. Astardem te kamau len but.

Numa, sas uni prame kai nas vushoro te aliarau. Gelem ande España te dikhau murha familia, ai murho kak, kai sas rashai, phendias mange te na mai sikiuau le Marturentsa. Le phral kotsar azhutisarde man but kana dine anglal pa so pushavas man la Bibliasa, sar kerde le phral anda Niamtso. Kana amboldem khere alosardem te astarau pale te sikiuau. Makar murho rhom chi kamlias te mai sikiol, me chi meklem. Ando 1978 boldilem ai kerdilem marturo le Jehovasko.

Akana ke aliarau o chachimos la Bibliako zhanau soske ai sostar traiu. Iek ejemplo si, 1 Petri 3:1-4 kai phenel le rhomniange te pakian o mui katar pengo rhom, te sikaven respeto anda o ilo ai te sikaven pacha, godo “si defial drago le Devleske”. Kako chachimos la Bibliako ai aver azhutisarde man te avau iek lashi dei ai rhomni.

De trandai pansh borsh ke sim marturo le Jehovasko. Sim barikani te luvudiu ka o Del, te avau ande iek chachi familia murhe phralentsa pe sa e lumia ai ke shtar anda murhe pansh shave luvudin ka o Jehova mantsa.