Arakhadilem ando Santo Domingo, República Dominicana; sim o mai tsinorho anda shtar shave. Murhe dada sas sikade anda but prame ai kamenas te avas le manushentsa lashe ai pakivale. Shtar borsh mai anglal te arakhadiuau, prinzharde ka uni manush mormonuria kai zhanas ande aver riga te sikaven, plachaias len but sar sas von ai ke sas vuzhe ai lasharde. Ande tsirha vriama, murhi familia sas le pervo anda e República Dominicana te tholpe ande Iglesia de Jesucristo de los Santos de los Últimos Días, kai prinzharen la sar Iglesia Mormona.

Kidavas man le manushentsa anda e khangeri kana kerenas vareso lasho, numa so mai plachalas man sas ke dikhenas sar bari prama e familia ai ke trobun te aven lashe manush. Simas barikano te avau mormon ai kamavas te ningerau lengo suato ande aver riga.

Kana sas man 18 borsh, murhi familia ai me mukisailiam ando Estados Unidos te zhau ande iek lashi escuela. Iek borsh mai angle, murhe kak, kai si marturia le Jehovaske, avile amende ando Florida ai akharde amen te zhas lentsa ande iek baro chidimos. Plachaias man te dikhau ke savorhe rodenas le texturia ande pengi Biblia ai ke ramonas, pala godia manglem vareso te ramou ai iek rhartia ai astardem te kerau sar lende.

Porme te getol o baro chidimos, sar kamavas te ningerau o suato pa le mormonuria, murhe kak, phende mange ke kamenas te azhutin man te prinzharau mai mishto e Biblia. Me zhanavas mai anda o Libro de Mormón ke anda e Biblia pala godia, plachaias man so phende mange.

Porme ke geletar, mai diam duma pa e Biblia po telefono. Phenenas mange te dau man gogi ande so pakiavas ai so phenel e Biblia. Kamenas te arakhau me o chachimos.

Sas but dieli anda murhi religion ke gindivas ke sas chache, numa chi zhanavas ke e Biblia chi sikavel godo. Murhi bibi tradias mange e ¡Despertad!, 8 anda o noviembre, 1995, katar le marturia le Jehovaske, kotse sas dui artikuluria kai denas duma pa le mormonuria. Nashtivas te pakiau ke chi zhanavas but dieli kai sikavelas murhi khangeri, pala godia rodem ande amari rig po Internet te dikhau te avela chacho so chitosardem; ai sas chacho. Ai vi arakhlem mai but dieli kana gelem andel museuria katar le mormonuria ando Utah, Estados Unidos.

Mai anglal gindivas ke e Biblia ai o Libro de Mormón malavenas iek avresa. Kana astardem te lau sama mai ande so phenel e Biblia, dem po gor ke chi malavenas. Iek ejemplo si Ezequiel 18:4, kotse e Biblia sikavel ke kana o manush merel chi ashel vareso zhuvindo ande leste. Numa o Libro de Mormón phenel ando Alma 42:9 ke o traio nashtil te merel.

Na numa so pakianas, vi chi zhanavas so te pakiau pa le ginduria kai sas len pa pengo them. Iek ejemplo si ke o sado Eden sas ando Jackson (Misuri, Estados Unidos). Ai vi le profeturia anda e khangeri, phenen ke e Amperetsia le Devleski amperetsila mashkar o Estados Unidos, ai lela sama so kamel ai e voia katar suako manush.

Pushavas man so sas te avel murhe themesa ai le kolavrentsa kana nakhela godo. Iek gies, iek manush kai sikiolas te ningerel o suato sar mormon akhardias man ai astardiam te das duma. Pushlem lestar: “Te avela ke cho them marelpe avresa, sas te mares tu le manushentsa kai si mormon anda godo them?”. Nashtivas te pakiau kana phendias mange ke ei. Astardem te mai lau sama e religion katar le mormonuria ai pushlem katar le bare manush kai ningerenas e khangeri uni dieli kai sikavenas, numa phende mange ke nas suato ka so pushavas ke la vriamasa sas te zhanau.

Nas mange drago so phende mange, ashilem tristo. Astardem te pushau man sostar kamavas te ningerau o suato pa le mormonuria ai dem po gor ke, sas mange drago te azhutiu le manushen; ai vi plachalas man sar dikhenas le mormonuria ka o manush kai ningerel e viasta pa lende. Makar chi zhanavas but pa o Del, chitosardemas but texturia anda e Biblia numa chi dikhavas la sar iek baro libro kai chachimasa si. Ai vi chi zhanavas ke ka o Del sas iek gindo la Phuviake ai le manushenge.

Sikilem but prame kana astardem te sikiuau e Biblia le marturentsa le Jehovaske, prame sar: savo si o anau le Devlesko, so nakhel amentsa kana meras, so kerel o Jesus ande voia le Devleski... Ke mishto ke astardem te prinzharau kako shukar libro, sode plachalas man te dau duma avre manushentsa pa o chachimos kai sikiuavas! Me zhanavas ke sas iek Del, numa sikilem ke shai rhugivas man sar te dau duma iekhe manushesa kai si iek lasho amigo. Boldilem sar marturo le Jehovasko o 12 anda o Julio, 2004, ai shou shon mai angle astardem te dau but anda murhi vriama te ningerau le lashe viesti.

Pansh borsh kerdem buki ando baro kher Betel katar le marturia le Jehovaske, ando Brooklyn (Nueva York). Ke shukar te azhutiu tsirhitsa te kerdion Bibli ai aver publikasionuria te azhutin ka millonuria manush pe sa e lumia. Ke veselime sim te azhutiu sa gadala borsh le manushen te prinzharen le Devles!