SIKAIMOS 7
So si e Amperetsia le Devleski?
1. So si e Amperetsia le Devleski?
Sostar shai phenes ke o Jesus si o mai malado te amperetsil? (MARKO 1:40-42).
Si iek Amperetsia ando cheri. Ande tsirha vriama si te peravel sa le amperetsii le manushenge te kerdiol e voia le Devleski pe Phuv, sar kerdiol ando cheri. Kacha amperetsia si so trobul sa le manushen. Si te kidel savorhen ande iek fialo gindo. Gadala si lashe viesti, nai? Chito Daniel 2:44; Mate 6:9, 10; 24:14.
Ande suako amperetsia trobul iek amperato. Anda godia o Del o Jehova thodias peske Shaves, o Jesus Kristo, te avel Amperato katar peski Amperetsia. Chito Sicharimos (Apokalipsos) 11:15.
Dikh o video: So si e Amperetsia le Devleski?
2. Sostar si o Jesus o mai malado te amperetsil?
O Shau le Devlesko si o mai malado te amperetsil, ke anklel leske anda o ilo te kerel o mishtimos le manushenge ai kerel sa so si vorta (Mate 11:28-30). Leste si e putiaria te azhutil le manushen ai si te kerel godo kana amperetsila e Phuv anda o cheri. Polme te zhuvindil, gelo ando cheri kai rig chachi le Devleski (Zhiduvuria 10:12, 13). Kotse azhukerdias zhi kai o Del dias les e voia te avel amperato. Chito Luk 1:32, 33.
3. Si te amperetsin aver zhene le Jesusosa?
E Biblia phenel ke uni zhene kai si chachimasa le Devlesa si te amperetsin le Jesusosa. Ando Daniel 7:27 phenel ke von suntsome le. Le pervo manush kai o Del alosardias te aven suntsome sas le apostluria le Jesusoske. De kin godia vriama, o Jehova alosarel mursh ai zhuvlia kai pakianpe ande leste zhi agies. Kana gadala manush meren zhan ando cheri ande iek stato dujosko, sar sas le Jesusosa. Chito Iovano 14:1-3; 1 Korintiana 15:50.
Sode manush si te zhan ando cheri? O Jesus phendias ke tsirha manush si te zhan (Luk 12:32). Le manush kai si te amperetsin e Phuv lesa si 144.000. Chito Sicharimos (Apokalipsos) 14:1.
4. So sas kana o Jesus astardias te amperetsil?
O Jesus astardias te amperetsil ando borsh 1914, atunchi gunisardias anda o cheri le Benges leske angelontsa ai shudias len pe Phuv. O Beng joliailo defial zurales, terburisailo, ai astardias te anel bedi la lumiake (Sicharimos [Apokalipsos] 12:7-10, 12). De atunchara kerdias te avel defial pharo o traio le manushengo. O mundarimos, o izdraimos ande Phuv, e bari bokh ai le nasualimata sikaven iek profesia la Bibliaki kai kerdiol chachi ai ke pa tsirha vriama sa e Phuv si te avel tela e Amperetsia le Devleski. Chito Luk 21:7, 10, 11, 31.
5. So kerel e Amperetsia le Devleski agies, ai so si te kerel mai angle?
E Amperetsia le Devleski ningerel lashe viesti pe sa e lumia te kidel iek “baro narodo” anda sa le thema. Suako gies millonuria manush kai si len iek lasho ilo, thonpe pala o Jesus. Von si te aven skepime kana kacha Amperetsia ankalavela sa o chorhumos kai si ande lumia. Te kamasa te las o mishtimos anda so si te kerel e Amperetsia le Devleski, musai te pakias o mui le Jesusosko. Chito Sicharimos (Apokalipsos) 7:9, 14, 16, 17.
Andel 1.000 borsh kai si te trais tela godia Amperetsia, si te kerdiol chacho so kamelas o Del de mai anglal le manushenge. Sa e Phuv si te avel iek paraiso. Polme, o Jesus si te del pale godia Amperetsia peske Dadeske (1 Korintiana 15:24-26). Sas te plachal tu te phenes varekaske so si te kerel godia Amperetsia? Chito 2 Petri 3:13.
