SIKAIMOS 13
So avela andal religionuria mai angle?
1. Lashe le sa le religionuria?
Ande sa le religionuria si manush kai si lashe anda o ilo. Ai iek lashi viasta si ke ka o Del si leske pala lende. Numa but manush kerde dieli bi malade ando anau katar le religionuria (2 Korintiana 4:3, 4; 11:13-15). Univar ashunas ke andel religionuria si manush kai aminpe kal tsinorhe, vai ashunas ke le religionuria thonpe pala o terrorismo, o mundarimos, ai aver prame bi lashe kai keren le manush. Sa godo dukhavel o ilo le manushengo kai pakianpe ande kakala religionuria! Chito Mate 24:3-5, 1, 12.
E religion chachi presnail ka o Jehova, ai e religion jojamni anel leske lazhau. Sikavel prame kai nai ande Biblia, jojavel pa o Del ai pa e martia. Numa o Jehova kamel te prinzharen savorhe o chachimos pa leste. Chito Ezequiel 18:4; 1 Timote 2:3-5.
2. So avela andal religionuria mai angle?
Makar le religionuria mothon ke kamen le Devles, kamen chachimasa e lumia le Satanoski, numa le Devles khonik chi atsavel les (Iakov 4:4). E Biblia akharel ka sa le religionuria jojamne: e Babilonia e Bari. Babilonia sas iek foro kai sas de dumult polme te avel o Baro Brishin andel giesa katar o Noe, anda godo foro ankliste sa le religionuria jojamne. Pa tsirha vriama, kana khonik chi azhukerela, o Del si te ankalavel sa le religionuria kai atsaven ai keren nasul le manushenge. Chito Sicharimos (Apokalipsos) 17:1, 2, 5, 16, 17; 18:8.
O Jehova kidel le manushen lashe anda o ilo kai si andel religionuria jojamne pe sa e lumia, vo chi bisterdiol lendar. Sar kerel godo? Kana sikavel len o chachimos. Chito Iovano 6:45.
3. So trobun te keren le manush lashe anda o ilo?
E religion chachi kidel le manushen
O Jehova lel sama katar le manush kai ulin o chachimos ai kamen te keren so si vorta. Anda godia, phenel lenge te zhantar katar e religion jojamni. Te avela kamen les chachimasa, si te parhuven so trobula ande pengo traio te veselin lesko ilo. Chito Sicharimos (Apokalipsos) 18:4.
Ando pervo siglo, but manush lashe anda o ilo ashunde ai linepe pala le lashe viesti kai ningerenas le apostluria. O Jehova sikadias len sar te train mai mishto, mai barikane, ai sikadias len vareso lasho te azhukeren. Gadia sar kerde von, vi amen trobus te keras so mothol e Biblia ai te thas ka o Jehova mai anglal katar fersavi prama ande amaro traio. Chito 1 Thesaloniana 1:8, 9; 2:13.
O Jehova tholpe barikano kana zhan leste le manush kai meken e religion jojamni. Sa godola manush barikane le te aven amiguria le Devleske, aliaren o kamlimos le phralengo anda e khangeri ai azhukeren te train o traio kai chi mai getol. Sas te plachal tu te aves gadia? Chito Marko 10:29, 30; 2 Korintiana 6:17, 18.
4. So si te kerel o Del te avel barikamos ai pacha ande sa e lumia?
O Jehova si te anel pacha ande lumia kana ankalavela sa le religionuria jojamne. Le religionuria jojamne chi mai si te atsaven ai chi mai si te rhespin le manushen. Sa e lumia si te luvudil samo iekhe Devles, ka o Del o chacho. Nai kacha iek lashi viasta? Chito Sicharimos (Apokalipsos) 18:20, 21; 21:3, 4.
