LEKTIONA 8
Hoske mukell o Dewel i bibacht un o tchilatchepen jaake rar?
1. Ha wajas o tchilatchepen pre?
Kek lendar nai anas bacht un latchepen
Ap i phub wajas o tchilatchepen pre, ha o chochepen o bengestar was. O beng his glanstunes i latcho bollepaskro. Hoi djas leha? I bibla penella, gai job “gar an o tchatchepen tardo” his (Johanni 8:44). An peskro dji mukas o beng tchimoni bares te well, hoi kokeres o Dewleskro his: O mangepen. O Adam un i Ewa shunan ap leskro chochepen. Jaake wan bibacht un merepen ap o swetto. — Dikh pala an 1. Mose 3:1-6, 19.
Ha o beng ap i Ewate penas, te ma gandell li ap i Dewleste, hadas pes o beng pral o Dewles un peskro souverenepen. * O budesta khamenn gar, te penell o Dewel lenge, hoi te krenn le. Jaake denn jon i benges tchatcho. Dran kowa nai was o beng “o rai pral kai phub”. — Dikh pala an Johanni 14:30; 1. Johanni 5:19.
2. His kowa, hoi o Dewel gerdas, mishto doha?
Hallauter, hoi o Dewel gerdas, hi perfekt. I manushen, i bollepangren, hallauteren his jaake bud soor, te nai gandenn le ap leskre laba (1. Johanni 5:3). O Dewel gerdas men jaake, gai nashte rodah mer menge kowa win, hoi te krass; ap koi jek rig hi o latchepen, ap koi wawar rig hi o tchilatchepen. Te rodah mer menge o latchepen win, tsikerah mer o Dewles, gai gamah les. — Dikh pala an Jakobo 1:13-15; 2. Johanni 6.
3. Hoske mukell o Dewel o tchilatchepen an maro tsiro?
O Jehowah mukas jek tsiro, gai nashte hadenn le pen pral peskro souverenepen pre. Hoske? Te haiwell hakeno, gai i manushen kowa tchi anella, te hi o Dewel gar o rai pral lende (Gilja 36:1-5; 1. Korintarja 3:18). Pal 6.000 bersha, an hoi i manusha djiwan, haiwell hakeno: Kek pralstuni nai las o khurepen, o tchorblepen, o tchilatchepen un o nasslepen krik. — Dikh pala an 2. Mose 9:16.
Hallauter, hoi o Dewel menge dran peskri pralstuni anella, hi menge mishto (Gilja 32:8)! Sigo lell o Jehowah haki phubjakri pralstuni krik. Balle djiwenn kokeres kola ap i phub, gai rodan pen wri, te well o Dewel lengro rai (Gilja 37:10, 11). — Dikh pala an Debleskro tsiro 11:15.
Kate hatseh ninna o Video Hoske mukell o Dewel i bibacht jaake rar?
4. Hoi nai krah mer an maro tsiro?
O beng penas, tel mende della kek, gai i Jehowes jaake bud gamella, gai djiwell lo leske. Khamals tu tsikerell, gai job i chocheno hi? Ko nashte kre tu! An maro tsiro, gai pes o Dewel pale rikerella, nai tsikerah mer, tel hawi pralstuni mer khamah te djiwell: Tel i Dewleskri pralstuni? Tel i manusheskri pralstuni? Jaake, ha mer maro djipen djiwah, well kowa tsikedo. — Dikh pala an Efesarja 6:11; 1. Petro 4:2.
5. Ha nai well o Dewel maro pralstuno?
Tsike an tiro djipen, gai o Dewel tiro pralstuno hi
O Dewel hi maro pralstuno, te mangah un te patsah mer jaake ap leste, ha o Dewleskro lab, i bibla, menge kowa sikerella (Johanni 4:23). Gai o beng gar maro pralstuno hi, tsikerah mer, te rikerah mer men – jaake, ha o Jesus kowa gerdas – wri dran kooma ha o khurepen, i politika, ninna i harmenationa (Luka 16:16). — Dikh pala an Johanni 17:14.
O bengestar wella kooma, hoi wri ladjedo hi, kooma, hoi tchilatcho hi. Te krah mer sawo kooma bude gar, nai san wawar pral maro djipen (1. Petro 4:3, 4). Mer haiwah: Mer hunte tsikeras, ap hawi rig mer ham. Te atchah mer ninna tel probleme ap i Dewleskri rig, tsikerah mer, gai o beng i baro chocheno hi. — Dikh pala an Josua 1:8; Debleskro tsiro 22:15.
Dran peskro gamlepen das men o Dewel peskro lab koi pre, gai lell job i bibacht, ninna o tchilatchepen krik. Hakeno, gai an peskro djipen o patsepen ap i Dewleskri laba tsikerella, nai djiwell ap mari phub hake tsireske. — Dikh pala an Johanni 3:16.
^ Abs. 2 Te hi jek souveren, hi an leskro wast i tseli rajeskri soor an i them.
