LEKTIONA 43
Har dikenn christe ap alkohol?
Ap i phub denna menshe, kolenge kowa mishto hi, te pijenn le chatchedi, te hin le wawarentsa khetne. Wawar kamenn gar kek alkohol te pijell. Pale wawar pijenn jaake bud, te wenn le mato. Mer haiwah: Hakeno dikell wawartchandes ap koi themra. Hoi penell i bibla pral alkohol?
1. Hunte mukas mer alkohol krik?
An i bibla hi gar tchinlo, te mukas alkohol krik. Te djala pral ko latcho koowa, hoi o Deblestar wella, penell i bibla, kai dell lo men “i mool, hoi o mensheskro dji bachteles krella” (Gilja 104:14, 15). Ninna patsle morsha un djuwja dran i bibla pijan alkohol (1. Timoteo 5:23).
2. Hoi penell i bibla kolenge, kai kamenn alkohol te pijell?
O Jehowah kamell gar, te pijas men mates un te was pipangre (Galatarja 5:21). An i bibla hi tchinlo: “Ma ab mank kolende, kai pen mates pijenn” (Gosewe Laba 23:20). Doleske pijah mer gar jaake bud, kai hi men buder kek kontrolla pral mende; pral kowa hoi mer krah un penah, oder te was nasselo. Te djinell jek gar, kaana leske doha hi, hi leske kowa feteder, te pijell lo tchi.
3. Har nai sikrah wawarenge respekta, te djala pral alkohol?
Hakeno hunte djinell kokres: Kamau me alkohol te pijell, oder gar? Te kamell jek kek alkohol te pijell, rakrah mer gar tchilatches pral leste un rakrah witar gar ap leste dren, jaake, te pijell lo (Remarja 14:10). Te haiwah, kai o alkohol jekeske i problema hi, mukah mer o pipen krik (Dik pal an Remarja 14:21). I bibla penell menge, te dikas “ap o wawareste, hoi leske mishto hi” un gar kokres ap mende (Dik pal an 1. Korintarja 10:23, 24).
RODAS DUREDER
Kanna dikeh, hawe biblakre prinzipje tuke mishto hin, te nai djiness: Kamau me alkohol te pijell? Un te kameh tchomone te pijell: Har bud pijau me? Tu dikeh ninna, hoi jek hunte krella, te hi o alkohol les i problema.
4. Tu hunte djiness: Kamau me te pijell?
Har dikas o Jesus ap kowa, te pijas alkohol? Te dikah ap ko glanstuno baro koowa, hoi job kerdas, djinah kowa. Dikenn pal an Johanni 2:1-11, un rakrenn khetne pral:
-
Hoi sikrell menge leskro glanstuno baro koowa pral kowa, har o Jesus ap o alkohol un kolende dikas, kai alkohol pijenna?
-
Har hunte dikenn christe ap kolende, kai kamenn alkohol te pijell, te djinah, kai penas o Jesus gar, te pijas tchi?
Ninna te nai pijah mer alkohol, hi kowa gar gosewo, te pijas an haki situationa tchomone. Dikenn pal an Gosewe Laba 22:3, un rakrenn khetne pral kowa, hoi ko biblakro lab pral kola situatione penella, hoi kanna wenna:
-
Tu te ulreh oder te budreh ap i bari mashina.
-
Tu te hal wawartchandes.
-
Te penell i dramaskro, tuke hi feteder, te mukess o pipen krik.
-
Tu te djineh gar, har bud te pijess nai.
-
Te tchiwell o them tuke i lab pre, kaana nai pijeh alkohol.
-
Te hal tu jekeha khetne, kai tchi buder pijella doleske, kai his les kek kontrolla pral o pipen.
Hi kowa mishto, te deh wawaren alkohol te pijell, te hi i biab oder te weh wawarentsa khetne? Te nai djiness, hoi te kress, dikenn o VIDEO.
Dikenn pal an Remarja 13:13, un 1. Korintarja 10:31, 32, un rakrenn pal hako lab pral:
-
Har nai krell koi prinzipa, kai well o Jehowah bachteles pral kowa, hoi mer krah?
Hako christo hunte djinell peske kokres: Kamau me tchomone te pijell oder gar? Ninna te penell jek, an kaja situationa pijau me tchomone, nai penell lo peske, an i wawar situationa pijau me tchi
5. Penn tuke, har bud tu kameh te pijell
Tu te kameh alkohol te pijell, ma biste: Ninna te hi i Jehoweske kowa mishto, te pijas alkohol, kamell lo gar, te was mato. Hoske? Dikenn pal an Hosea 4:11, 18, un rakrenn khetne pral:
-
Hoi nai djala, te pijell pes jek mato?
Te djinah maro limit, un te krah men gar bares glan wawarende, hi menge kowa mishto, te pijas gar budeder har bud. Dikenn pal an Gosewe Laba 11:2, un rakrenn khetne pral:
-
Hoske hi kowa mishto, te das menge i limit, har bud te pijas?
6. Hoi menge mishto hi, te pijas men buder gar mates
Dik, hoi i morsheske mishto his, te mukell lo o pipen. Te dikan o VIDEO, rakrenn khetne pral:
-
Hoi kras o alkohol ko morsheha Dimitri?
-
Nai heras lo sik mit o pipen pre?
-
Har nai phagas lo kowa, kai hunte pijell lo alkohol?
Dikenn pal an 1. Korintarja 6:10, 11, un rakrenn khetne pral:
-
Har dikell o Dewel ap pipangre?
-
Hoi sikrella, kai nai rissrell i pipaskro peskro djipen?
Dikenn pal an Mateo 5:30, un rakrenn khetne pral:
-
I Jeseskri illustrationa sikrella, kai hunte dell jek ninna tchomone pre an peskro djipen, te kamell lo, te dikell o Jehowah latches ap leste. Hoi nai kreh tu, te hi o alkohol tuke i problema? a
Dikenn pal an 1. Korintarja 15:33, un rakrenn khetne pral:
-
Hoske nai penah mer, kai sikrell pes har bud mer pijah an kowa, koleha mer khetne ham?
JEK NAI PUTCHELLA: “Hoske te pijap tchi buder?”
-
Hoi penals tu ap kowa?
HOI KATE PENLO WAS
Ninna te hi alkohol i latchepen i Jehowestar, hoi mukell lo men te pijell, kamell o Jehowah gar, te pijas men mates.
Hoi penals tu?
-
Hoi penell i bibla pral alkohol?
-
Hoske te das jak, te pijas gar budeder har bud?
-
Har nai sikrah mer wawarenge mari respekta, te djala pral kowa, te pijas alkohol?
BUDEDER
Kate well ternenge latche tipps dino, te djala pral alkohol.
Kate hatseh 8 tipps, hoi te krell jek nai, te hi o alkohol leske i problema.
“Rikras o pipen jaake, kai hi kowa mishto” (O Gardeskro Kheer, Januar 1, 2010)
Kate drawereh, har christenge i toast hi.
“Hoi Drawepangre Putchan” (O Gardeskro Kheer, Februar 15, 2007)
An koi artikla “I fass, kai das kek endo” djala pral i morsheste, kai his i pipaskro un kowa phagas.
“I bibla kras lengro djipen newes” (O Gardeskro Kheer, Mai 1, 2012)
a Te hi jek i pipaskro, nai well kowa jaake, kai hunte djal lo pash i dramaskro, te nai djal leske feteder. Bud dramangre penenn, te his o alkohol jekeske i problema, hi leske kowa feteder, te ma pijell lo buder alkohol.
