Βα, συμφωνίνελα. Η Αγία Γραφή νανέ εκ επιστημονικός βιβλίος αλλά, κάνα κερέλα λάφι ασακέ πραγματένγκε, οντουλά σο βακερέλα ισί σωστά. Ντικχέν χάνικ παραδείγματα σο σικαβένα ότι η επιστήμη συμφωνίνελα ι Γραφιάσαρ ντα ότι κερέλα λάφι επιστημονικέ πραγματένγκε σο τζάνας κόντρα οντουλέντζαρ σο πακιάνας ο τζενέ κάνα γραφίντιλι.

•   Ο σύμπαν κερντιλό. (Γένεση 1:1) Μπουτ πουρανέ μασάλια όμως βακερένας ότι ο σύμπαν αβιλό τυχαία. Επίσης, ο τζενέ κι Βαβυλώνα πακιάνας ότι ο σύμπαν κερντιλό ντεβλένταρ σο ισινέ ντουέ ντεριαβένταρ. Γιαβερά μασάλια βακερένας ότι ο σύμπαν αβιλό εκχέ μπουτ μπαρέ βαντρέσταρ.

•   Ο σύμπαν να οδηγίντιβελα μερικέ ντεβλένταρ σο απλά ντένα εντολές για τι κερέν πουμαρό γκι, αλλά κατά γκοντιαβέρ νόμους σο ισί κι φύση. (Ιώβ 38:33· Ιερεμίας 33:25) Οκιά μπάνταρ, τζενέ μπουτέ τθεμένταρ βακερένας μασάλια σο σικλιαρένας ότι ο τζενέ επηρεάντιβενας κατά μπέτι συμπεριφορά ι ντεβλένγκι.

•   Η πφουβ ατσσόλα κι μπαρμπάλ. (Ιώβ 26:7) Οκιά μπάνταρ, μπουτ τζενέ κο πουρανέ μπρεσά πακιάνας ότι η πφουβ ισί σαρ εκ ίσια τεψία ντα ότι ισί οπράλ εκχέ μπατάλι τζενέστε ή οπράλ σε εκ ζώος, φιρειπείν οπράλ εκχέ βουβαλίστε ή οπράλ εκχέ ζαμπάτε.

•   Ο λενιά ντα ο πηγές πφερντιόνα πανί κατά ατμός σο νασέλα κατά πανιά ι πφουβιάκε ντα τζάλα κο σύννεφα, σοράν περέλα πάλι κι πφουβ σαρ μπρισίμ, βιβ ή χαλάζι. (Ιώβ 36:27, 28· Εκκλησιαστής 1:7· Ησαΐας 55:10· Αμώς 9:6) Ο Μπαλαμέ κο πουρανέ μπρεσά, όμως, πακιάνας ότι ο λενιά πφερντιόνα κατά πανιά σο ισί τελάλ κατά ντεριαβά. Μάλιστα ανταβά πακιάνας-λες μέχρι πριν 300 μπρεσά.

•   Ο βεσά μπαριόνα ντα περένα. Ο βεσά σο τθεράσα αντιβές, κο πουρανέ μπρεσά ισινέ τελάλ κατά ντεριάβ. (Ψαλμός 104:6, 8) Οκιά μπάνταρ, μπουτ μασάλια βακερένας ότι ο βεσά σο ντικχάσα αντιβές κερντιλέ ντεβλένταρ.

•   Ο πακλίκι αρακχαβέλα ι υγεία. Ο Νόμος σο ντιντιλό κο Ισραηλίτες βακερέλας λένγκε τι ατσσόν πάκι. Για παράδειγμας, κον ασταρέλας εκχέ μουλές έπρεπε τι τθοβέλ πο σέα, κον τθερέλας εκ νασφαλιπέ σο κα μπορίνενας τι λεν-λες ο γιαβερά-ντα έπρεπε τι τσσουβέν-λες καραντίνα, ντα ο μαγαρισιές ι τζενένγκε έπρεπε τι πραχούντιβεν. (Λευιτικό 11:28· 13:1-5· Δευτερονόμιο 23:13) Οκιά μπάνταρ, κο βακίτι σο ντιντιλέ ανταλά εντολές, ο τζενέ κι Αίγυπτος μακχένας πουμαρέ πληγές εκχέ τζουνγκαλέ αλοιφιάσαρ σο τθερέλας αντρέ μαγαρισιές τζενένγκε.

 Όχι, να τθερέλα ντα ανταβά κα αγαβάς-λες άμα κα διαβάνας ι Γραφή γκοντιάσαρ. Ντικχέν μερικά μασάλια σο κερένα ι τζενέν τι πακιάν ότι οντουλά σο βακερέλα η Γραφή ι επιστημονικέ πραγματένγκε νανέ σωστά:

 Μασάλι: Η Αγία Γραφή βακερέλα ότι ο σύμπαν κερντιλό αντρέ σιοβέ ντιβεσέντε σο ατσσικιαρένας 24 σαάτια.

 Αλήθεια: Σαρ βακερέλα η Γραφή, να τζανάσα καζόμ ντιβεσά κερντάς ο Ντεβέλ για τι λατσσαρέλ ο σύμπαν. (Γένεση 1:1) Επίσης, ο ντιβεσά σο ο Ντεβέλ κερντάς σαρέ ο πράγματα σαρ αρακχάσα-λεν κο πρώτος κεφάλαιος κι Γένεση ισινέ βακίτια σο να τζανάσα καζόμ ατσσικιαρντέ. Μάλιστα, ο χρόνος σο αρχισάλο ο Ντεβέλ τι κερέλ ο ουρανός ντα ι πφουβ βακέρντιβελα οντουβά-ντα «ντιβές».—Γένεση 2:4.

 Μασάλι: Η Αγία Γραφή βακερέλα ότι ο τσαριά ντα ο δέντρα κερντιλέ πριν κατά κχαμ, αλλά σαρ τζανάσα σαρέ ανταλά ναστί μπαριόνα μπι ι κχαμέσκο.—Γένεση 1:11, 16.

 Αλήθεια: Η Γραφή βακερέλα ότι ο κχαμ, σο ισί εκ τσεργάν κο «ουρανός», κερντιλό πριν κατά τσαριά ντα κατά δέντρα. (Γένεση 1:1) Ο μπαρό φως ι κχαμέσκο ερεσλό κι πφουβ πριν τι αβέλ ο πρώτος «ντιβές», ή γιαβέρτουλους ο βακίτι, σο κερντάς ο Ντεβέλ ο πράγματα. Κο τρίτος «ντιβές», καζόμ η ατμόσφαιρα αβιλίας πάκι, ντέλας ο φως σο βοηθίνελας ο φυτά τι μπαριόν. (Γένεση 1:3-5, 12, 13) Σοράν ο κχαμ σικάντιλο οπράλ κι πφουβ-ντα.—Γένεση 1:16.

 Μασάλι: Η Αγία Γραφή βακερέλα ότι ο κχαμ ντέλα ντονταλάι κατά πφουβ.

 Αλήθεια: Ο εδάφιος Εκκλησιαστής 1:5 βακερέλα: «Ο κχαμ νικιόλα ντα ο κχαμ περέλα· σοράν βουρτίνελα πάλι σουγκό οτθέ σο νικιόλα». Όμως ανταβά εδάφιος να μανγκέλα τι βακερέλ ότι ο κχαμ ντέλα ντονταλάι, αλλά σικαβέλα οντουβά σο αμντίνελα εκ τζενό καζόμ ντικχέλα ο κχαμ κατά πφουβ. Μάλιστα αντιβές-ντα βακεράσα ότι ο κχαμ «νικιόλα» ντα «περέλα», παρόλο σο τζανάσα ότι να ντέλα ο κχαμ ντονταλάι κατά πφουβ αλλά ότι πφουβ ντέλα ντονταλάι κατά κχαμ.

 Μασάλι: Η Αγία Γραφή βακερέλα ότι η πφουβ ισί ίσια.

 Αλήθεια: Κάνα η Γραφή κερέλα λάφι ι πφουβιάκε ντα βακερέλα ο λάφι «μπουτ ντουρ» μανγκέλα τι σικαβέλ μπουτ ντουρ τθανά. Να μανγκέλα τι βακερέλ ότι η πφουβ ισί ίσια ή ότι τθερέλα εκ γωνία. (Ματθαίος 12:42) Αντικάς, ο λάφι-ντα «σταρ γωνίες ι πφουβιάκε» μανγκέλα τι σικαβέλ σαρό ο τθαν ι πφουβιάκο. Επίσης ανταβά λάφι βακεράσα-λες συμβολικά για τι σικαβάς καζόμ μπαρί ισί η πφουβ.—Ησαΐας 11:12· Λουκάς 13:29.