Με αρχισάλομ τι ασάβ σόσκε να πακιάβας ότι μο αμάλ ασχολίντιβελας ι θρησκειάσαρ. «Σο τζανέσα τούι ι Γραφιάκε;» πουτσλόμ-λες. Βοβ να απαντιντάς αμέσως. Τελικά, βακερντάς μάνγκε ότι λέσκι ντάι ισινέ Μάρτυρας ι Ιεχωβάσκι. Σικλιλόας κάποια πράγματα λάταρ. Τθεράβας περιέργεια, οτθάρ ζορισκιαρντόμ-λες τι βακερέλ μάνγκε πο μπουτ πράγματα.

Αμαρί συζήτηση συνεχισάλι μέχρι αργά ιράτ. Μο αμάλ βακερντάς μάνγκε ότι η Γραφή βακερέλα ότι ο Μπενγκ ισί ο άρχοντας ι ντουνιάσκο. (Ιωάν. 14:​30) Μπέκιμ τουμέν τζανένα-λες ανταβά σαρί τουμαρί ζωή, αλλά μάνγκε ισινέ κάτι νεβό ντα ταρτιντάς μι προσοχή. Πάντα ασουνάβας ότι εκ λατσσό ντα δίκαιος Ντεβέλ κερέλα κουμάντος ι ντουνιάς. Αλλά ανταβά να ταιριάνελας οντουλέντζαρ σο ντικχλόμας κι ζωή. Παρόλο σο ισινόμας σάντε 26 μπρεσένγκο, ντικχλόμας μπουτ πράγματα σο στεναχωρίνενας-μαν.

Μο ντατ ισινέ πιλότος κι Πολεμική Αεροπορία κο Ηνωμένες Πολιτείες. Οτθάρ, χουρντιαρέλα μπερί, τζανάβας λατσσές ότι υπαρχίντιβελας περίπτωση τι τσσουβέλ ο στρατός πυρηνική βόμβα. Ο στρατός ισινέ έτοιμος ανταλέσκε. Αζομάν σο σπουδάναβας κι Καλιφόρνια αβέλας-πες ο τζένγκι κο Βιετνάμ. Νικιάβας με-ντα κο ντρομά γιαβερέ φοιτητόντζαρ σο μανγκένας τι κερέν παράπονα. Ασκέρια σο τθερένας λουμπούτια κουλαντίνενας-αμέν, ντα αμέν τθάβνταας ντα να μπορίναας τι λας ανάσα ντα τι ντικχάς λατσσές κατά δακρυγόνα. Ισινέ βακίτι σο αβένας μπουτ φασαρίες ντα ο τζενέ τζάνας κόντρα κο κράτος. Μερένας μπουτ πολιτικοί, ο τζενέ νικιόνας κο ντρομά ντα αβένας φασαρίες. Ο κάθε εκ αμντίνελας ότι κάτι γιαβέρ έπρεπε τι αβέλας-πες. Ο πράγματα ισινέ μπουτ μπερδεμέ.

Κο 1970, ασταρντόμ μπουτί κι βόρεια ακτή της Αλάσκας ντα νικαντόμ μπουτ λοβέ. Σοράν γκιλόμ κο Λονδίνος, κιντόμ εκ μοτοσικλέτα ντα νασλόμ κο νότια χωρίς τι τζανάβ κατέ ακριβώς κα τζάβας. Μερικά μασεκά πο σοράν, ερεσλόμ κι Αφρική. Κο ντρομ, γνωριντόμ τζενέν σο μανγκένας βον-ντα τι νασέν ντουρ πουμαρέ προβληματένταρ​ —τι ελευθερώντιβεν ντα τι μουκχέν παλάλ σαρέ ο πράγματα σο τασαβένας-λεν.

Άρα ιτιρί οντουλένταρ σο ντικχλόμας ντα ασουντόμας, ο σικλιαριπέ ι Γραφιάκο ότι εκ γκεραλό πνεύμας κερέλα κουμάντος σαρέ κο πράγματα κι πφουβ ντικχιόλας μάνγκε λογικός. Αλλά κάι ισινέ ο Ντεβέλ σαρέ ανταλέντε σο αβένας-πες; Μανγκάβας τι σικλιάβ.

Κο γιαβερά μασεκά, αρακχλόμ ι απάντηση. Ντα καζόμ νακχέλας ο βακίτι, γνωριντόμ ντα μανγκλόμ μπουτέ τζενέν σο ατσσιλέας πιστοί κο αληθινός Ντεβέλ σο-ντα τι αβέλας-πες.

Κάνα βουρτισάλομ κο Λονδίνος, κερντόμ λάφι μι αμαλέσκε νταγιάσαρ, ντα βόι ντινάς-μαν εκ Αγία Γραφή. Πο σοράν, γκιλόμ κο Άμστερνταμ, κι Ολλανδία, σο εκ Μάρτυρας ντικχλάς-μαν τι διαβάναβ ι Γραφή κο ντρομ τελάλ εκχέ λαμπάταρ ντα βοηθιντάς-μαν τι σικλιάβ πο μπουτ. Σοράν, γκιλόμ κο Δουβλίνος, κι Ιρλανδία. Αρακχλόμ ο γραφείος τμήματος ι Ιεχωβάσκε Μαρτυρένγκο ντα μπασκιαρντόμ ι πόρτα. Οτθέ, γνωριντόμ εκχέ γκοντιαβέρ πφραλές σο βακερένας λέσκε Άρθουρ Μάθιους ντα ισινέ μπουτ μπρεσά κι αλήθεια. Μανγκλόμ μελέτη, ντα βοβ δεχτιντάς τι κερέλ-μαν.

Μπεϊντίναβας μπουτ μι μελέτη ντα κεράβας σαρ σαρ τι διαβάναβ ο βιβλία ντα ο περιοδικά ι Μαρτυρένγκε. Ανταβά κεράβας εμ ι Γραφιάσαρ. Τθεράβας μπαρό ενθουσιασμός! Κο συναθροίσεις, ντικχάβας ότι ατζέ-ντα ο χουρντέ τζανένας ο απαντήσεις κο ερωτήσεις σο ρόντενας μπουτ μπρεσά ο μορφωμέ τζενέ. “Σόσκε υπαρχίντιβελα ο γκεραλιπέ; Κον ισί ο Ντεβέλ; Σο αβέλα-πες κάνα μεράσα;” Κεράβας παρέα σάντε ι Μαρτυρέντζαρ. Ανταβά ισινέ εύκολος σόσκε να τζανάβας καεκχέ γιαβερές σαρό κο τθεμ. Βοηθιντέ-μαν τι μπαριαράβ μο μανγκιπέ ι Ιεχωβάσκε ντα τι μανγκάβ τι κεράβ λέσκο θέλημας.

Κο 1972, μπολντιλόμ. Εκ μπρες πο σοράν, αρχισάλομ ο σκαπανικός ντα υπηρετίναβας εκχέ χουρντέ κχανγκιριάτε κο Νιούρι, κι Βόρεια Ιρλανδία. Νοικιαντόμ εκ κχερ σο ισινέ ντουρ εκχέ βεσέστε ντα ισινέ κερντό μπαρέντζαρ. Κο χωράφι οτθέ πασέ ισινέ γκουρουμνιά, ντα κεράβας πρόβες μο ομιλίες ανγκλά-λέντε. Ντικχιόλας ότι ασουνένας προσεκτικά καζόμ τσαμτσαρένας πουμαρό χαμπέ. Ναστί ντένας-μαν συμβουλή, αλλά βοηθιντέ-μαν τι σικλιάβ τι κεράβ λάφι ανγκλάλ κο γιαβερά. Κο 1974, αρχισάλομ ο ειδικός σκαπανικός γιεκ ι πφραλέσαρ Νάιτζελ Πιτ, σο αβιλάμ μπουτ λατσσέ αμαλά για πάντα.

Οντουβά βακίτι, κι Βόρεια Ιρλανδία αβένας μπουτ «Ταραχές». Μερικοί βακερντέ ότι ισινέ ο «τθεμ σο φουρτίντιβενας βόμβες ντα σφαίρες». Ο  τζενέ κο ντρομά χάνας-πες, ασούντιβενας πυροβολισμοί ντα φουρτίντιβενας βόμβες κο κούρσες, ντα ανταβά ισινέ κάτι συνηθισμέ. Ο φασαρίες αβένας εμ κατά πολιτική εμ κατά θρησκεία. Όμως, εμ ο Προτεστάντες εμ ο Καθολικοί τζανένας ότι ο Μάρτυρες να τσσίντενα καεκχέσταρ κι πολιτική, ντα αντικάς μπορίναας τι κεράς έργος ελεύθερα ντα τι αβάς αρακχαντέ. Ο τζενέ σο αρακχάας, μπουτ φαρ τζανένας κάνα ντα κατέ κα αβένας ο φασαρίες ντα βακερένας-λες αμένγκε για τι ατσσάς ντουρ.

Όμως ο κίνδυνος ατζέκ ατζέκ υπαρχίντιβελας. Εκ ντιβές, γιεκ ι πφραλέσαρ Ντένις Κάριγκαν, σο ισινέ σκαπανέας, κεράας έργος σε εκ χουρντί πόλη οτθέ πασέ, σο να ισινέ Μάρτυρες ντα γκιλάμας σάντε εκ φαρ ατζέκ. Εκ τζουβέλ κατηγοριντάς-αμέν ότι ισινάμας Βρετανοί στρατιώτες σο γκιλάμας από τσοράλ, μπέκιμ επειδή καέκ αμένταρ να κερέλας λάφι σαρ ο Ιρλανδοί. Νταρασάλαμ μπουτ. Ατζέ-ντα λατσσιπέ τι σικαβέας οντουλέ στρατιωτέντε κα μπορίνενας τι μουνταρέν-τουτ ή τι φουρτίνεν τούκε εκ σφαίρα κι κοτς. Αντικάς σαρ μπεσάας αβρί, κορκορέ αντρέ κο σιλ ντα μπεκλεντίναας ι λεωφορειόσκε, ντικχλάμ εκ κούρσα τι σταματίνελ ανγκλάλ κι καφετέρια σο κατηγοριντάας-αμέν οντιά τζουβέλ. Βόι νικίστιλι αβρί ντα αρχισάλι τι βακερέλ κάτι κο ντούι μουρσά σο ισινέ κι κούρσα. Ισινέ αναστατωμέ ντα σικαντάς πι βαστέσαρ κάρινγκ αμέντε. Αζομάν, βον αβιλέ χάνικ χάνικ πασέ αμέντε πουμαρέ κουρσάσαρ ντα πουτσλέ-αμέν κάνα νακχέλα ο λεωφορείος. Κάνα αβιλό ο λεωφορείος, κερντέ λάφι ι οδηγόσαρ. Να ασουνάας σο βακερένας. Να υπαρχίντιβενας γιαβερά τζενέ, οτθάρ ισινάμας σίγουροι ότι κανονιντέ τι μουνταρέν-αμέν κάνα ο λεωφορείος κα νικιόλας κατά τθεμ. Αλλά να αβιλό-πες ανταβά. Καζόμ γουλιάβας κατά λεωφορείος, πουτσλόμ ι οδηγός: «Οντουλά τζενέ αμένγκε πουτσένας;» Ο οδηγός απαντιντάς: «Τζανάβα κον ισινέν ντα βακερντόμ-λες λένγκε. Μα νταρέν. Ισινέν αρακχαντέ».

Κο 1976, σε εκ συνέλευση περιφερείας a κο Δουβλίνος, γνωριντόμ εκχέ πφενιά σο ισινέ ειδική σκαπάνισσα κατά Αγγλία ντα βακερένας λάκε Πολίν Λόμαξ. Ισινέ εκ πνευματική, ταπεινή πφεν ντα μανγκένας-λα σαρέ. Βόι ντα λάκο πφραλ, ο Ρέι, ισινέ κι αλήθεια χουρντιαρέλα μπερί. Εκ μπρες πο σοράν, η Πολίν ντα με παντρισάλαμ ντα συνεχιντάμ ο ειδικός σκαπανικός κι Μπαλιμίνα, κι Βόρεια Ιρλανδία.

Ισινέ εκ βακίτι σο ισινάμας κο έργος περιοχής, ντα υπηρετίναας αμαρέ πφραλέν κο Μπέλφαστ, κο Λοντοντέρι ντα γιαβερέ επικίνδυνε τθεμέντε. Λέλας-αμέν ροϊπέ σο ντικχάας ι πίστη αμαρέ πφραλένγκι σο μουκχλέας ο πράγματα σο πακιάνας σαρέ πουμαρέ γκίσαρ, ο ρατσισμός ντα ο μίσος για τι υπηρετίνεν ι Ιεχωβάς. Ντα βοβ ντέλας-λεν μπερεκέτι ευλογίες ντα αρακχαβέλας-λεν!

Αφού μπεσλάμ 10 μπρεσά κι Ιρλανδία, κο 1981, καλιντέ-αμέν τι νακχάς ι Γαλαάδ τάξη 72. Σοράν κατά σχολή, μπουτσσαντέ-αμέν κι Σιέρα Λεόνε, κι Δυτική Αφρική.

Μπεσάας εκχέ ιεραποστολικέ κχερέστε γιεκ 11 μπουτ λατσσέ τζενέντζαρ. Τθεράας εκ κουζίνα, τριν κινέφια, ντούι ντουζιέρες, εκ τηλέφωνος, εκ πλυντήριος ντα εκ στεγνωτήριος. Ο ρεύμας τσσιντιόλας μπουτ φαρ ντα χωρίς τι μπεκλεντίνας. Ο ποντίκια τζάνας αβένας κι σκεπή, ντα ο σαπά γλιστρίνενας κο υπόγειος.

Παρόλο σο να ισινέ εύκολος τι τζουβντιός οτθέ, ο έργος ισινέ μπουτ σουκάρ. Ο τζενέ σεβάνενας ι Γραφή ντα ασουνένας προσεκτικά. Μπουτ λένταρ κερένας μελέτη ντα δεχτίνενας ι αλήθεια. Ο τζενέ οτθέ ντένας-μαν βίκος «Κύριο Ρόμπερτ». Η Πολίν ισινέ η «Κυρία Ρόμπερτ». Χάνικ πο σοράν όμως, καζόμ ντάβας πο μπουτ μι σαατίσταρ για τι κεράβ  μπουτί κο γραφείος τμήματος ντα πο χάνικ σαάτι κο έργος, ο τζενέ αρχισάλε τι ντεν-λα βίκος «Κυρία Πολίν». Με αβιλόμ ο «Κύριος Πολίν». Να χρειαζίντιβελα τι βακεράβ τουμένγκε καζόμ αβέλας μι ρομνιάκο γκι!

Μπουτ πφραλά ισινέ τσορορέ, αλλά ο Ιεχωβά πάντα ντέλας-λεν σο-ντα τθερένας ανάγκη, ντα μπάζιμα μουκχέλας-λεν πουταρντέ μόσαρ. (Ματθ. 6:​33) Ντάβα-μαν γκοντί εκχέ πφενιά σο τθερέλας λοβέ σάντε για τι κινέλ ο χαμπέ οντουλέ ντιβεσέσκε πέσκε ντα πι τσσαβένγκε, αλλά ντινάς-λεν σαρέ εκχέ πφραλέστε σο τθερέλας ελονοσία ντα να τθερέλας ο λοβέ για τι κινέλ φάρμακα. Πο σοράν, εκ τζουβέλ αβιλί ξαφνικά κι πφεν ντα ποκιντάς-λα για τι λατσσαρέλ λάκε μπαλά. Ισινέ μπουτ ασακέ ιστορίες.

Μπεσλάμ κι Σιέρα Λεόνε εννιά μπρεσά. Σοράν, μπουτσσαντέ-αμέν κο Μπέθελ κι Νιγηρία. Ακανά ισινάμας σε εκ μπαρό γραφείος τμήματος. Με κεράβας ι ίδια μπουτί κο γραφείος σαρ οντιά σο τθεράβας κι Σιέρα Λεόνε, αλλά μι ρομνιάκε η αλλαγή ισινέ μπαρί ντα δύσκολη. Ανγκλέ, κερέλας 130 σαάτια έργος κο μάσεκ ντα τθερέλας μελέτες σο τζάνας μπουτ λατσσές. Ακανά, διορισάλι τι σουβέλ σέα, ντα σαρό ο ντιβές κερέλας σάντε ανταβά. Μανγκέλας χάνικ βακίτι για τι συνηθίνελ, αλλά αγαντάς ότι ο γιαβερά εκτιμίνενας μπουτ λάκι μπουτί ντα τθερέλας πι γκοντιάτε σαρ τι ντελ ζορ κο γιαβερά Μπεθελίτες.

Ο πολιτισμός κι Νιγηρία ισινέ νεβό αμένγκε, ντα τθεράας τι σικλιάς μπουτ πράγματα. Εκ ντιβές, εκ πφραλ αβιλό μι γραφειόστε τι γνωρίνελ μάνγκε εκχέ πφενιά σο μόλις αβιλίας τι κερέλ μπουτί κο Μπέθελ. Κάνα γκιλόμ τι νταβ-λα μο βας, βόι πελί μόσαρ ανγκλάλ μι πιντρέντε. Σαστισάλομ! Αμέσως, αβιλέ μι γκοντιάτε ντούι εδάφια: Πράξεις 10:​25, 26 ντα Αποκάλυψη 19:​10. Σκεφτιντόμ: “Τι βακεράβ λάκε ότι δεν πρέπει τι κερέλ-λες ανταβά;” Οντιά στιγμή όμως, σκεφτιντόμ ότι οντουλέ πφενιά δεχτιντέ-λα κο Μπέθελ. Άρα τζανέλας σο σικλιαρέλα η Γραφή.

Να τζανάβας σο τι κεράβ αλλά συνεχιντόμ τι κεράβ λάσαρ λάφι ντα σοράν ροντιντόμ χάνικ ανταλέσκε. Σικλιλόμ ότι η πφεν κερντάς εκ έθιμος σο ατζέκ ατζέκ τθερένας-λες μερικέ τθεμέντε. Ανταβά κερένας-λες εμ ο μουρσά. Ισινέ εκ τρόπος για τι σικαβέν σεβασμός. Να κερένας-λες για τι ντεν λατρεία. Υπαρχίντιβενα ασακέ παραδείγματα κι Γραφή-ντα. (1 Σαμ. 24:8) Χαιρισάλομ σο να βακερντόμ, χωρίς τι τζανάβ, κάτι σο κα ανέλας-λα σε δύσκολη θέση.

 Γνωριντάμ μπουτέ τζενέν κατά Νιγηρία σο σικαντέας ζουρανί πίστη ι μπρεσέντζαρ σο νακχένας. Σκεφτίνεν σο αβιλό-πες κο Αϊζάια Αντάγκμπονα. b Σικλιλό ι αλήθεια κάνα ισινέ τερνό, αλλά σοράν παθισάλο λέπρα. Μπουτσσαντέ-λες εκχέ τθεμέστε σο τθερέλας σάντε λεπρόν ντα σάντε βοβ ισινέ Μάρτυρας. Παρόλο σο τζάνας λέσαρ κόντρα, βοηθιντάς πο μπουτ από 30 λεπρόν τι σικλιόν ι αλήθεια ντα κερντάς οτθέ εκ κχανγκιρί.

Κο 1996, διορισάλαμ κο γραφείος τμήματος κι Κένυα. Ανταγιά ισινέ η πρώτη φαρ σο γκιλόμ οντουλέ τθεμέστε σοράν κατά ταξίδι σο βακερντόμ κι αρχή. Μπεσάας κο Μπέθελ. Τθεράας μπουτέ μισαφιρίν οτθέ. Μερικοί λένταρ όμως ισινέ χάνικ διαφορετικοί. Ισινέ μαϊμούνες. Βον «τσορένας» ι πφενίν σο γκερένας φρούτα. Εκ ντιβές, εκ πφεν κο Μπέθελ μουκχλάς πο παράθυρος πουταρντό. Κάνα γκιλί κχερέ, ντικχλάς εκ φαμιλί μαϊμουνένγκι τι απολαμβάνελ ο χαμπίματα σο αρακχλάς λάκε δωματιόστε. Η πφεν αρχισάλι τι ντελ βίκος ντα νικίστιλι τθαβντιμάσαρ κατά πόρτα. Ο μαϊμούνες αρχισάλε βον-ντα τι ντεν βίκος ντα χουτλέ κατά παράθυρος.

Η Πολίν ντα με γκιλάμ εκχέ κχανγκιριάτε σο κερέλα λάφι ι τσσιπ σουαχίλι. Χάνικ πο σοράν, διορισάλομ τι κεράβ ι Μελέτη Βιβλίου Εκκλησίας (ακανά βακέρντιβελα Σικλιαριπέ ι Γραφιάκο κι Κχανγκιρί). Όμως, κεράβας λάφι ι τσσιπ σαρ εκ χουρντό μαξίμι. Προετοιμάντιβαβας κχεράλ για τι μπορίναβ τι διαβάναβ ο ερωτήσεις. Αλλά άμα ο απαντήσεις ι πφραλένγκε να ισινέ ντιπ αντικάς σαρ βακερέλας-λεν η παράγραφος, να αγαβάβας-λεν. Να νιωθίναβας ιτς άνετα! Τζιτζίναβας ι πφραλένγκε ντα ι πφενίνγκε. Σαστίναβας σο μουκχένας-μαν τι κεράβ ι συνάθροιση ντα σικαβένας υπομονή ντα ταπεινότητα.

Να πφαντάμας ούτε εκ μπρες κι Κένυα κάνα, κο 1997, καλιντέ-αμέν κο Μπέθελ κο Μπρούκλιν, κι Νέα Υόρκη. Ακανά ισινάμας εκχέ χουλανέ τθεμέστε, ντα ανταβά μπορεί τι ανέλ γιαβερά προβλήματα. (Παρ. 30:8, 9) Αλλά ατζέ-ντα εκχέ ασακέ τθεμέστε, ο πφραλά ντα ο πφενιά τθερένα ζουρανί πνευματικότητα. Αμαρέ πφραλά χρησιμοποιήνενα πουμαρό σαάτι ντα πουμαρέ πράγματα, όχι για τι αβέν χουλανέ, αλλά για τι βοηθίνεν κο λατσσό έργος σο κερέλα η οργάνωση ι Ιεχωβάσκι.

Καζόμ νακχένας ο μπρεσά, ντικχλάμ ι πίστη αμαρέ πφραλένγκι διαφορετικέ περιπτωσιέντε. Κι Ιρλανδία, πίστη ατζέ-ντα κο τζένγκι. Κι Αφρική, πίστη ατζέ-ντα κο τσοροριπέ ντα κάνα ο πφραλά τζουβντιόνας τθεμέντε σο να ισινέ γιαβερά Μάρτυρες. Κο Ηνωμένες Πολιτείες, πίστη ατζέ-ντα κο χουλανιπέ. Καζόμ μπουτ πρέπει τι χαιρίνελα ο Ιεχωβά καζόμ ντικχέλα κατά ουρανός τζενέν σο σικαβένα πουμαρό μανγκιπέ λέσκε σαβέ τι μανγκές περιπτωσιέντε!

Καζόμ σουγκό νακχλέ ο μπρεσά​—πο σουγκό κατά μηχανή σο σουβέλα! (Ιώβ 7:6) Ακανά κεράσα μπουτί γιεκ γιαβερέντζαρ κο παγκόσμια κεντρικά γραφεία κο Γουόργουικ κι Νέα Υόρκη, ντα τθεράας ι χαρά τι συνεχίνας τι υπηρετίνας γιεκ γιαβερέ τζενέντζαρ σο μανγκένα μπαγιά ο εκ ι γιαβερές. Ισινάμ πφερντέ ευτυχία ντα μπαρί χαρά καζόμ κεράσα ο πο λατσσό για τι τσσίντας αμαρέ Βασιλιάσταρ, κατά Χριστός Ιησούς, σο μπουτ σουγκό κα ευλογίνελ ι μπουτέ τζενέν σο πακιάνα λέστε.​—Ματθ. 25:34.