1-3. (α) Καγιά ισινέ η κατάσταση κι Ιεχωβάσκο λαός όταν ο Ζαχαρίας αβιλό προφήτης; (β) Σόσκε μανγκλάς ο Ιεχωβά πι λαόσταρ τι βουρτίνελ λέστε;

ΕΚ ΡΟΛΟΣ σο πετάνελα, εκ τζουβέλ αντρέ σε εκ καλάθι ντα ντούι τζουβλιά σο πετάνενα κι μπαρμπάλ ντα τθερένα πακά σαρ ι λελεκίσκε. Ανταλά ισί μερικές εντυπωσιακές φαντασίες σο ντικχλάς ο Ζαχαρίας. (Ζαχαρίας 5:1, 7-9) Σόσκε ο Ιεχωβά κερντάς πι προφητής τι ντικχέλ ανταλά φαντασίες; Καγιά ισινέ η κατάσταση ι Ισραηλιτένγκι αζομάν; Ντα σαρ μπορίνασα τι βοηθίντιβας αντιβές ανταλέ φαντασιένταρ;

² Κο 537 Π.Κ.Χ., ο λαός ι Ιεχωβάσκο ισινέ μπουτ χαρούμενος. Για 70 μπρεσά ο Ισραηλίτες ισινέ αιχμάλωτοι κι Βαβυλώνα, αλλά ακανά ισινέ ελεύθεροι! Ισινέ πφερντέ χαρά σο βουρτίνενας κι Ιερουσαλήμ για τι ξαναχτίνεν ο ναός ντα τι ντεν λατρεία οτθέ ι Ιεχωβάς. Εκ μπρες πιο σοράν, ο Ισραηλίτες τσσουντέ ο θεμέλιος ι ναόσκο. Ο λαός ισινέ μπουτ χαρούμενος ντα “ντέλας βίκος αζόμ ζουρανές σο ασούντιβελας μπουτ ντουρ”. (Έσδρας 3:​10-13) Όμως, διάφορα τζενέ τζάνας μπουτ  κόντρα λέντζαρ ντα μανγκένας τι τσσιναβέν λένγκι μπουτί. Ο Ισραηλίτες χασαρντέ πουμαρό θάρρος, σταματισάλε τι χτίνεν ο ναός ντα ασχολίντιβενας πιο μπουτ πουμαρέ κχερέντζαρ ντα πουμαρέ χωραφίντζαρ. Δεκαέξι μπρεσά πιο σοράν, ο ναός ι Ιεχωβάσκο να κερντιλόας ατζέκ. Κάποιος χρειαζίντιβελας τι βοηθίνελ ι Ντεβλέσκε λαός τι ντελ-πες γκοντί ότι έπρεπε τι βουρτίνελ κο Ιεχωβά ντα τι σταματίνελ τι σκεφτίνελ πο νεαυτός. Ο Ιεχωβά μανγκέλας πι λαόσταρ τι ντελ-λες λατρεία αντράλ πι γκίσταρ ντα χωρίς τι νταρέλ.

³ Οτθάρ, κο μπρες 520, ο Ιεχωβά μπουτσσαντάς πι προφητής, ι Ζαχαριάς, για τι βοηθίνελ ι λαός τι ντελ-πες γκοντί σόσκε ελευθερωντάς-λες κατά Βαβυλώνα. Ισί σημαντικός ότι ο ναβ «Ζαχαρίας» μανγκέλα τι βακερέλ «Ο Ιεχωβά Ντινάς-πες Γκοντί». Παρόλο σο ο Ισραηλίτες μπισταρντέας σο κερντάας λένγκε ο Ιεχωβά, βοβ συνεχίνελας τι τθερέλ-λεν πι γκοντιάτε. (Διαβάνεν Ζαχαρίας 1:3, 4) Ο Ιεχωβά ντινάς πο λάφι ότι κα βοηθίνελας-λεν τι ανέν πάλι ι αληθινή λατρεία. Αλλά προειδοποιηντάς-λεν επίσης ότι κα δεχτίνελας λένγκι λατρεία σάντε άμα κα ντένας-λες ο πιο λατσσό σο τθερένας. Για τι ντικχάς ι έκτη ντα ι έβδομη φαντασία σο ντικχλάς ο Ζαχαρίας. Κα σικλιάς σαρ ο Ιεχωβά βοηθιντάς ι Ισραηλιτέν ντα σαρ ανταλά ντούι φαντασίες μπορίνενα τι βοηθίνεν-αμέν αντιβές.

4. Σο ντικχλάς ο Ζαχαρίας κι έκτη φαντασία; Σόσκε ο ρόλος ισινέ γραμμέ κατά ντούι-ντα μπάντες; (Ντικχ ι φωτογραφία 1 σο ισί κι αρχή)

⁴ Ο κεφάλαιος 5 κατά βιβλίος Ζαχαρίας αρχίνελα με εκ παράξενη φαντασία. (Διαβάνεν Ζαχαρίας 5:1, 2) Ο Ζαχαρίας ντικχλάς εκ ρόλος τι πετάνελ κι μπαρμπάλ. Ανταβά ρόλος ισινέ περίπου 9 επί 4,5 μέτρα. Ο ρόλος ισινέ πουταρντό ντα κάποια λάφια ισινέ γραμμέ αντρέ. (Ζαχαρίας 5:3) Ισινέ σημαντικά λάφια σο σικαβένας ι τιμωρία σο κα τθερένας μερικά τζενέ. Κο πουρανέ μπρεσά, συνήθως γραφίνενας σάντε εκχέ μπαντάταρ κο ρόλος. Αλλά ανταλά λάφια ισινέ αζόμ σημαντικά σο ισινέ γραμμέ κατά ντούι-ντα μπάντες.

5, 6. Σαρ ντικχέλα ο Ιεχωβά σο-ντα τσοριπέ αβέλα-πες;

⁵ Διαβάνεν Ζαχαρίας 5:3, 4. Σαρέ ο τζενέ ισί υπεύθυνοι κο Ντεβέλ οντουλένγκε σο κερένα, ντα πιο μπουτ ι Ιεχωβάσκο λαός, επειδή τθερέλα οπρά-πέστε λέσκο ναβ. Λέσκο λαός μανγκέλα-λες ντα τζανέλα ότι ο τσοριπέ προσβαλίνελα λέσκο ναβ. (Παροιμίες 30:8, 9) Μερικά τζενέ μπορεί τι πακιάνα ότι νανέ λάθος τι τσορέν αν τθερένα εκ λατσσί δικαιολογία. Αλλά καζόμ-ντα λατσσί τι ντικχίντιβελα οντιά δικαιολογία, εκ τζενό σο τσορέλα σικαβέλα ότι λέσκι επιθυμία ισί πιο σημαντική κατά Ιεχωβά, Λέσκε ναβέσταρ ντα κατά νόμος σο ντινάς-αμέν.

⁶ Προσοχιντέν ότι ο εδάφια Ζαχαρίας 5:3, 4 βακερένα ότι η αρμάν “κα τζάλας αντρέ κο κχερ κι τσορέσκο” ντα ότι “κα ατσσόλας αντρέ οντουλέ κχερέστε ντα κα καταστραφίνελας-λες”; Άρα, ο Ιεχωβά μπορίνελα τι κερέλ τι λιντιόλ αμπέρι ντα τι κρίνελ κάθε αμαρτία σο αβέλα-πες αντρέ λέσκε λαόστε. Ατζέ-ντα άμα εκ τζενό κα  μπορίνελας τι γκεραβέλ πο τσοριπέ κατά ασκέρια, πι αφεντικόνταρ, κατά πρεσβύτεροι ή πι νταντέσταρ ντα πι νταγιάταρ, να μπορίνελα τι γκεραβέλ-λες κατά Ιεχωβά. Ο Ντεβέλ κα κερέλ τι λιντιόλ αμπέρι σο-ντα τσοριπέ αβέλα-πες. (Εβραίους 4:​13) Πραγματικά απολαμβάνασα τι αβάς τζενέντζαρ σο κερένα ο πιο λατσσό σο μπορίνενα για τι αβέν τίμιοι «σαρέ κο πράγματα»!​—Εβραίους 13:18.

7. Σο μπορίνασα τι κεράς για τι γλιτώνας κατά αρμάν σο ισί κο ρόλος σο πετάνελα;

⁷ Σο-ντα τσοριπέ αβέλα-πες προσβαλίνελα ι Ιεχωβάς. Ισί μπαρό προνόμιος αμένγκε τι τζανάς ντα τι ντας καν κο λάφια κι Ιεχωβάσκε σο σικαβένα ο σωστός ντα ο λάθος, ντα τι τζουβντιάς με τρόπος σο να προσβαλίνελα λέσκο ναβ. Άμα κεράσα-λες ανταβά, κα γλιτώνας ι τιμωρία σο κα ανέλ ο Ιεχωβά οπράλ οντουλέ τζενέντε σο να ντένα-λες καν.

8-10. (α) Σόσκε χάλα σοβέλ εκ τζενό; (β) Καγιά σοβέλ να ατσσικιαρντάς ο βασιλιάς Σεδεκίας;

⁸ Σοράν, ο ρόλος σο πετάνελα γκερντάς εκ προειδοποίηση οντουλέντε σο “χάνα ψεύτικη σοβέλ” κι Ντεβλέσκο ναβ. (Ζαχαρίας 5:4) Εκ τζενό χάλα σοβέλ για τι σικαβέλ ότι κάτι ισί μπαγιά ή για τι ντελ εκ σημαντική υπόσχεση ότι κα κερέλ ή ότι να κα κερέλ εκ συγκεκριμέ πράγμας.

⁹ Όταν εκ τζενό χάλα σοβέλ κο ναβ κι Ιεχωβάσκο ισί μπουτ σοβαρός πράγμας. Σικλιάσα-λες ανταβά οντουλέσταρ σο αβιλό-πες κο Σεδεκίας, κο τελευταίος βασιλιάς σο κυβερνιντάς κι Ιερουσαλήμ. Ο Σεδεκίας χαλάς σοβέλ κο ναβ κι Ιεχωβάσκο ότι κα ντέλας καν κο βασιλιάς κι Βαβυλωνάκο. Όμως, να ατσσικιαρντάς πι υπόσχεση. Οτθάρ, ο Ιεχωβά βακερντάς ότι ο Σεδεκίας “κα μερέλας κι Βαβυλώνα, κο τθαν σο  τζουβντιόλα ο βασιλιάς σο κερντάς-λες βασιλιάς, επειδή λέσκι σοβέλ να σεβαντάς ντα λέσκι συμφωνία να ατσσικιαρντάς”.​—Ιεζεκιήλ 17:16.

¹⁰ Ο βασιλιάς Σεδεκίας χαλάας σοβέλ κο ναβ κι Ντεβλέσκο, ντα ο Ιεχωβά μπεσέλας τι ατσσικιαρέλ πι υπόσχεση. (2 Χρονικών 36:​13) Αλλά ο Σεδεκίας να ατσσικιαρντάς πι υπόσχεση ντα μανγκλάς βοήθεια κατά Αίγυπτος για τι τζαλ κόντρα κι Βαβυλώνα. Όμως, η Αίγυπτος να μπορίνελας τι βοηθίνελ-λες.​—Ιεζεκιήλ 17:​11-15, 17, 18.

11, 12. (α) Καγιά ισί η πιο σημαντική υπόσχεση σο μπορίνασα τι ντας; (β) Σαρ πρέπει αμαρί αφιέρωση τι επηρεάνελ αμαρί ζωή;

¹¹ Οντουλένταρ σο αβιλέ-πες κο Σεδεκίας σικλιάσα ότι ο Ιεχωβά ασουνέλα ο υποσχέσεις σο ντάσα. Για τι κεράς-λες τι χαιρίνελ, πρέπει τι ατσσικιαράς αμαρέ υποσχέσεις. (Ψαλμός 76:​11) Η πιο σημαντική υπόσχεση σο μπορίνασα τι ντας ισί αμαρί αφιέρωση κο Ιεχωβά. Όταν αφιερώνασα-αμέν λέστε, ντάσα ι υπόσχεση ότι κα υπηρετίνας-λες σο-ντα τι αβέλ-πες αμαρέ ζωγιάτε.

¹² Σαρ μπορίνασα τι ατσσικιαράς ι υπόσχεση σο ντινάμ κο Ιεχωβά; «Κάθε ντιβές» νακχάσα μπαρέ ντα χουρντέ δοκιμασίες. Σικαβάσα καζόμ ζουρανί ισί αμαρί φιλία ι Ιεχωβάσαρ με το τρόπος σο αντιμετωπίνασα ανταλά δοκιμασίες. (Ψαλμός 61:8) Για παράδειγμας, σο κα κερέν άμα κάποιος κι μπουτί ή κο σχολείος περέλα τουμένγκε; Κα βακερέν λέσκε «όχι» ντα κα σικαβέν ότι μανγκένα τι ασουνέν ι Ιεχωβάς; (Παροιμίες 23:​26) Ή σο αβέλα-πες άμα ισινέν ο μόνος τουμαρέ φαμιλιάτε σο υπηρετίνελα ι Ιεχωβάς; Μανγκένα λέσταρ βοήθεια για τι συνεχίνεν τι συμπεριφερίντιβεν με Χριστιανικός τρόπος; Σαρ-ντα τι νακχένα τουμαρέ ζωγιάτε, ευχαριστίνενα ι Ιεχωβάς κάθε ντιβές επειδή μανγκέλα-τουμέν ντα οδηγίνελα-τουμέν; Αρακχένα χρόνος τι διαβάνεν ι Γραφή κάθε ντιβές; Ντινάμ ι υπόσχεση ότι κα κεράς ανταλά πράγματα όταν αφιερωντάμ αμαρί ζωή κο Ιεχωβά. Όταν ασουνάσα-λες ντα ντάσα-λες ο πιο λατσσό σο τθεράσα, σικαβάσα ότι μανγκάσα-λες ντα ότι ισινάμ λέσκε. Η υπηρεσία ι Ιεχωβάσκι επηρεάνελα σαρί αμαρί ζωή. Ντα επειδή ισινάμ πιστοί κο Ιεχωβά, ντέλα ι υπόσχεση ότι κα τθεράς εκ μπουτ σουκάρ μέλλον.​—Δευτερονόμιο 10:​12, 13.

13. Σο σικλιάσα κατά έκτη φαντασία σο ντικχλάς ο Ζαχαρίας;

¹³ Η έκτη φαντασία ι Ζαχαριάσκι βοηθίνελα-αμέν τι αγαβάς ότι, άμα μανγκάσα ι Ιεχωβάς, να κα τσοράς ντα κα ατσσικιαράς αμαρέ υποσχέσεις. Σικλιάσα επίσης ότι, παρόλο σο ο Ισραηλίτες κερντέ μπουτ λάθη, ο Ιεχωβά ατσσικιαρντάς πι υπόσχεση ντα να μουκχλάς πι λαός. Αγαβέλας ότι ισινέ σε μπουτ δύσκολη κατάσταση επειδή ο ντουσμάνια λιντέας-λεν ντονταλάι. Πι παραδειγμάσαρ, ο Ιεχωβά σικλιαρέλα-αμέν ότι πρέπει τι ατσσικιαράς αμαρέ υποσχέσεις. Ντα μπορίνασα τι αβάς σίγουροι ότι κα βοηθίνελ-αμέν τι ατσσικιαράς-λεν. Εκ τρόπος σο βοηθίνελα-αμέν ο Ιεχωβά ισί ότι ντέλα-αμέν ελπίδα για το μέλλον. Ατζεχάνικ, κα νασκιαρέλ σαρό ο πφιρνιπέ κατά πφουβ. Μπορίνασα τι διαβάνας  ανταλέσκε κι γιαβέρ φαντασία κι Ζαχαριάσκι.

14, 15. (α) Σο ντικχλάς ο Ζαχαρίας κι έβδομη φαντασία; (Ντικχ ι φωτογραφία 2 σο ισί κι αρχή) (β) Καγιά ισινέ η τζουβέλ αντρέ κο καλάθι; Σόσκε ο άγγελος πφαντάς ο καλάθι;

¹⁴ Αφού ο Ζαχαρίας ντικχλάς ο ρόλος σο πετάνελα, εκ άγγελος βακερντάς λέσκε: «Βάντε οπρέ το γιακχά». Σοράν, ο Ζαχαρίας ντικχλάς εκ καλάθι σο βακέρντιβελα «εφά». (Διαβάνεν Ζαχαρίας 5:​5-8) Ο καλάθι ισινέ πφαντό με εκ στρογγυλός καπάκι κερντό από μόλυβδος. Όταν ο καλάθι πουτάρντιλο, ο Ζαχαρίας ντικχλάς εκχέ “τζουβλιά τι μπεσέλ αντρέ”. Ο άγγελος εξηγιντάς κο Ζαχαρίας ότι η τζουβέλ αντρέ κο καλάθι ισινέ ο «Πφιρνιπέ». Σκεφτίνεν ι νταρ σο νιωσάλο ο Ζαχαρίας όταν ντικχλάς ι τζουβλιά τι προσπαθίνελ τι νικιόλ αβρί! Όμως, ο άγγελος τσσιντιντάς-λα σουγκό κο καλάθι ντα πφαντάς-λες πάλι ι πφαρέ καπακίσαρ. Σο μανγκέλα τι βακερέλ ανταβά;

¹⁵ Ανταγιά φαντασία ντέλα-αμέν ι σιγουριά ότι ο Ιεχωβά να κα δεχτίνελ καέκ πφιρνιπέ αντρέ πι λαόστε. Αν ο Ιεχωβά κα ντικχέλ εκ μπέτι πράγμας, κα κερέλ κάτι σουγκό για τι νασκιαρέλ-λες. (1 Κορινθίους 5:​13) Ο άγγελος σικαντάς-λες ανταβά όταν τσσουντάς σουγκό ο πφαρό καπάκι οπράλ κο καλάθι.

16. (α) Σο αβιλό-πες κο καλάθι; (Ντικχ ι φωτογραφία 3 σο ισί κι αρχή) (β) Κατέ γκερένας ο καλάθι ο τζουβλιά σο τθερένας πακά;

¹⁶ Σοράν, ο Ζαχαρίας ντικχλάς ντουέ τζουβλίν σο τθερένας ζουρανέ πακά σαρ ο πακά ι λελεκίσκε. (Διαβάνεν Ζαχαρίας 5:​9-11) Ανταλά τζουβλιά ισινέ μπουτ διαφορετικά κατά πφιρνί τζουβέλ σο ισινέ αντρέ κο καλάθι. Ο τζουβλιά σο τθερένας  πακά βαντιντέ ο καλάθι σο ισινέ αντρέ ο «Πφιρνιπέ» ντα νασλέ. Κατέ γκερένας-λες; Κο «τθεμ Σεναάρ», δηλαδή κι Βαβυλώνα. Σόσκε οτθέ;

17, 18. (α) Σόσκε ισινέ η Βαβυλώνα ο “τθαν σο έπρεπε τι αβέλ” ο «Πφιρνιπέ»; (β) Σο ισινέν αποφασισμέ τι κερέν;

¹⁷ Ο Ισραηλίτες σο τζουβντιόνας κο ντιβεσά του Ζαχαρία, αγαβένας σόσκε η Βαβυλώνα ισινέ ο πιο λατσσό τθαν για τι γκερέν οτθέ ο «Πφιρνιπέ». Τζανένας ότι ισινέ εκ πφιρνί πόλη, πφερντί λουμνικανέ πραγματέντζαρ ντα ψεύτικε ντεβλέντζαρ. Ο Ζαχαρίας ντα ο γιαβερά Ιουδαίοι σο τζουβντιλέας κι Βαβυλώνα προσπαθίνενας μπουτ κάθε ντιβές μα τι επηρεάντιβεν κατά ψεύτικη θρησκεία σο ισινέ οτθέ. Άρα, ανταγιά φαντασία ντέλας ι σιγουριά ότι ο Ιεχωβά κα ατσσικιαρέλας πι λατρεία πάκι.

¹⁸ Επίσης, ανταγιά φαντασία βοηθίνελας ι Ιουδαιόν τι ντεν-πες γκοντί ότι βον-ντα τθερένας ι ευθύνη τι συνεχίνεν τι ντεν πάκι λατρεία κο Ιεχωβά. Ναστί υπαρχίντιβελα ντα ούτε κα υπαρχίντιβελ πφιρνιπέ αντρέ κο λαός κι Ντεβλέσκο. Αντιβές, ο Ιεχωβά αντάς-αμέν αντρέ κι πάκι οργάνωση σο τθερέλα, ντα ατθέ νιωθίνασα λέσκι αγάπη ντα λέσκο αρακχαϊπέ. Ο κάθε εκ αμένταρ τθερέλα ι ευθύνη τι βοηθίνελ για τι ατσσόλ πάκι η οργάνωση ι Ιεχωβάσκι. Ο πφιρνιπέ δεν πρέπει τι αβέλ αντρέ κο λαός κι Ιεχωβάσκο.

19. Σο σημασία τθερένα αμένγκε αντιβές ο εντυπωσιακές φαντασίες σο ντικχλάς ο Ζαχαρίας;

¹⁹ Η έκτη ντα η έβδομη φαντασία σο ντικχλάς ο Ζαχαρίας ισί σημαντική προειδοποίηση οντουλένγκε σο κερένα ο κακός. Ο Ιεχωβά να κα μουκχέλ ο πφιρνιπέ τι συνεχίνελ. Αμέν σαρ υπηρέτες λέσκε, πρέπει τι μισίνας ο πφιρνιπέ. Ανταλά φαντασίες ντένα-αμέν επίσης ι σιγουριά ότι, άμα προσπαθίνασα τι κεράς χαρούμενος αμαρέ λατσσέ Νταντές, να κα ντελ-αμέν αρμανιά αλλά κα αρακχαβέλ-αμέν ντα κα ευλογίνελ-αμέν. Παρόλο σο μπορεί τι αβέλ δύσκολος τι ατσσάς πάκι ανταλέ πφιρνέ ντουνιάστε, με τη βοήθεια ι Ιεχωβάσκι μπορίνασα τι καταφερίνας-λεν! Αλλά σαρ μπορίνασα τι αβάς σίγουροι ότι η αληθινή λατρεία κα συνεχίνελ τι υπαρχίντιβελ; Ντα καζόμ ερεσέλα η μπαρί στεναχώρια, σαρ τζανάσα ότι ο Ιεχωβά κα αρακχαβέλ πι οργάνωση; Κα ντικχάς ανταλά ερωτήσεις κο γιαβέρ μάθημας.