1, 2. Σο αβέλα-πες ο πο μπουτ φαρ κάνα μπολντιόλα κάποιος, ντα σο πρέπει τι ντικχέν τουμέν;

 ΝΤΙΚΧΛΕΝ ποτές μερικέ τζενέν σο ισί έτοιμοι τι μπολντιόν; Ασουνένα ι σιγουριά λένγκε φωνιάτε καζόμ απαντίνενα κο ντούι ερωτήσεις πριν τι μπολντιόν. Ντικχένα λένγκε τζενέν ντα λένγκε αμαλέν τι καμαρώνεν-λεν. Κάνα οντουλά σο μπολντιόνα νικιόνα κατά πανί, τουμέν ασουνένα ο παλαμάκια ντα ντικχένα λένγκε μουγιά τι λεν-πες κατά χαρά. Χιλιάδες τζενέ κάθε εβδομάδα κερένα ανταβά βήμας ντα αφιερώνενα-πες κο Ιεχωβά ντα μπολντιόνα σαρ Μάρτυρες λέσκε.

² Άμα σκεφτίνενα τι μπολντιόν, ισινέν μπουτ ξεχωριστοί αντρέ ανταλέ πφιρνέ ντουνιάστε, σόσκε ισινέν τζενέ σο “ρόντενα ι Ιεχωβάσκε”. (Ψαλμ. 14:1, 2) Ανταβά μάθημας κερέλα λάφι τουμένγκε, καζόμ μπρεσένγκε-ντα τι αβέν. Αλλά αμέν-ντα σο ισινάμ μπολντέ μανγκάσα τι αβάς ατζέ πο αποφασισμέ τι υπηρετίνας ι Ιεχωβάς για πάντα. Οτθάρ για τι ντικχάς ακανά τριν κατά μπουτ λόγοι σο τθεράσα τι υπηρετίνας ι Ιεχωβάς.

3. Σόσκε μανγκένα ο υπηρέτες ι Ιεχωβάσκε ι αλήθεια ντα ι δικαιοσύνη; (Ψαλμός 119:​128, 163)

³ Ο Ιεχωβά ντινάς ακαγιά εντολή πι λαός: «Μανγκέν ι αλήθεια». (Ζαχ. 8:​19) Ο Ιησούς βακερντάς πι μαθητένγκε τι μανγκέν ι δικαιοσύνη. (Ματθ. 5:6) Ανταβά μανγκέλα τι βακερέλ ότι πρέπει κάποιος τι μανγκέλ σαρέ πι γκίσαρ ο πράγματα σο ισί δίκαια, λατσσέ ντα πάκι κο γιακχά κι Ντεβλέσκε. Τουμέν, μανγκένα ι αλήθεια ντα ι δικαιοσύνη; Ισινάμ σίγουροι ανταλέσκε. Μισίνενα ο ψέματα ντα σο-ντα ισί λάθος ντα πφιρνικανό. (Διαβάνεν Ψαλμός 119:​128, 163) Κάνα εκ τζενό βακερέλα ψέματα μοιάζελα κο Μπενγκ, κο άρχοντας ανταλέ ντουνιάσκο. (Ιωάν. 8:​44· 12:​31) Εκ κατά στόχοι ι Μπενγκέσκε ισί τι μελιαρέλ ο άγιος ναβ ι Ιεχωβά Ντεβλέσκο. Ο Μπενγκ βακερέλα ψέματα αμαρέ Ντεβλέσκε από αζομάν σο γκιλό κόντρα ι Ιεχωβάσαρ κι  Εδέμ. Μανγκέλας τι αμντίνεν ο τζενέ ότι ο Ιεχωβά νανέ τίμιος κο τρόπος σο κερέλα κουμάντος, ντικχέλα σάντε πες ντα να ντέλα κο τζενέ λατσσέ πράγματα. (Γέν. 3:1, 4, 5) Ο ψέματα σο βακερέλα ο Μπενγκ ι Ιεχωβάσκε ατζέκ ατζέκ πφερένα δηλητήριος ι γκοντί ντα ο γκι ι τζενένγκο. Κάνα ο τζενέ τραμπίνενα μα τι «μανγκέν ι αλήθεια», ο Μπενγκ μπορεί τι τσσίντελ-λεν τι κερέν σο-ντα γκεραλιπέ ντα πφιρνιπέ υπαρχίντιβελα.​—Ρωμ. 1:​25-31.

4. Σαρ σικαντάς ο Ιεχωβά ότι ισί ο “Ντεβέλ σο λέσταρ αβέλα η αλήθεια”; (Ντικχέν ι φωτογραφία-ντα)

⁴ Ο Ιεχωβά ισί ο “Ντεβέλ σο λέσταρ αβέλα η αλήθεια”, ντα σικλιαρέλα ι αλήθεια αντράλ πι γκίσταρ σαρέ οντουλέντε σο μανγκένα-λες. (Ψαλμ. 31:5) Αντικάς, βοηθίνελα-λεν μα τι χουχάντιβεν κατά ψέματα ι Μπενγκέσκε. Ο Ιεχωβά σικλιαρέλα επίσης πι υπηρετόν τι αβέν τίμιοι ντα δίκαιοι. Οτθάρ, τθερένα πο μπουτ σεβασμός πουμαρέ νεαυτόσκε ντα ειρήνη αντρέ πουμέντε. (Παρ. 13:5, 6) Κερντάς-λες ανταβά τουμένγκε-ντα καζόμ κερένα μελέτη κατά Γραφή; Σικλιλέν ότι ο ντρομ ι Ιεχωβάσκο ισί ο πο λατσσό σαρέ ι τζενένγκε αλλά τουμένγκε-ντα. (Ψαλμ. 77:​13) Οτθάρ μανγκένα τι υποστηρίνεν ι δικαιοσύνη ι Ντεβλέσκι. (Ματθ. 6:​33) Μανγκένα τι μουτθαβέν ι αλήθεια ντα τι σικαβέν ότι ισί ψέματα οντουλά σο βακερντάς ο Μπενγκ αμαρέ Ντεβλέσκε, ι Ιεχωβάσκε. Σαρ μπορίνενα τι κερέν-λες ανταβά;

5. Σαρ μπορίνενα τι υποστηρίνεν ι αλήθεια ντα ι δικαιοσύνη;

⁵ Μπορίνενα τι τραμπίνεν τι τζουβντιόν εκχέ τροπόσαρ σο κα σικαβέλ σαριλένγκε ακαβά: «Μουκχάβα ο ψέματα ι Μπενγκέσκε ντα υποστηρίναβα ι αλήθεια. Μανγκάβα τι κερέλ-μαν κουμάντος ο Ιεχωβά, ντα μανγκάβα τι κεράβ σο-ντα βακερέλα βοβ ότι ισί δίκαιος». Σαρ κα κερέν-λες ανταβά; Πλησιάνεν ι Ιεχωβάς αντράλ κατά προσευχή ντα κερέν αφιέρωση λέστε, ντα σοράν σικαβέν τουμαρί αφιέρωση σαριλέντε τουμαρέ μπολντιμάσαρ. Ο μανγκιπέ σο τθερένα ι πραγματένγκε σο ισί αληθινά ντα δίκαια κα τσσίντελ-τουμέν τι τραμπίνεν τι μπολντιόν.

6. Καλά λόγους αρακχένα κο εδάφιος Ψαλμός 45:4 για τι μανγκέν ι Ιησού Χριστός;

⁶ Σόσκε μανγκένα ι Ιησού Χριστός; Ντικχέν μερικούς σημαντικούς λόγους σο βακέρντιβενα κο εδάφιος Ψαλμός 45:4. (Διαβάνεν) Ο Ιησούς ανέλα ι αλήθεια, ι ταπεινότητα ντα ι δικαιοσύνη. Άμα μανγκένα ι αλήθεια ντα ι δικαιοσύνη, ισί λογικός τι μανγκέν ι Ιησού  Χριστός-ντα. Ανέν τουμαρέ γκοντιάτε ι Ιησούς σο τσσίντελας μπίνταρανες κάθε πραγμάσταρ σο ισινέ αληθινός ντα δίκαιος. (Ιωάν. 18:​37) Αλλά σαρ ανέλα ο Ιησούς ι ταπεινότητα;

7. Σόσκε ταρτίνελα-τουμέν η ταπεινότητα ι Ιησούσκι;

⁷ Ο Ιησούς ανέλα ι ταπεινότητα πι παραδειγμάσαρ. Φιρειπείν, ντέλα σαρί ι δόξα πι Νταντέστε, ποτές πι νεαυτόστε. (Μάρκ. 10:​17, 18· Ιωάν. 5:​19) Σαρ νιωθίνενα σο ντικχένα ασακί ταπεινότητα; Να τσσίντελα-τουμέν ανταβά τι μανγκέν ι Ντεβλέσκε Τσσαβές ντα τι τζαν παλά-λέστε; Σίγουρα. Σόσκε ισί ταπεινός ο Ιησούς; Επειδή μανγκέλα πι Νταντές ντα μοιάζελα λέστε, ντα λέσκο Ντατ ισί ταπεινός. (Ψαλμ. 18:​35· Εβρ. 1:3) Να ταρτίνελα-τουμέν ανταβά κο Ιησούς σο σικαβέλα τέλεια ο ιδιότητες ι Ιεχωβάσκε;

8. Σόσκε μανγκάσα ι Ιησούς σο ισί αμαρό Βασιλιάς;

⁸ Μανγκάσα ι Ιησούς σο ισί αμαρό Βασιλιάς επειδή βοβ ισί ο πο λατσσό για τι κερέλ-αμέν κουμάντος. Ο ίδιος ο Ιεχωβά σικλιαρντάς πι Τσσαβές ντα τσσουντάς-λες τι κερέλ κουμάντος. (Ησ. 50:4, 5) Σκεφτίνεν ο μπαρό μανγκιπέ-ντα σο σικαντάς ο Ιησούς κάνα ντινάς πι ζωή. (Ιωάν. 13:1) Σαρ τουμαρό Βασιλιάς, ο Ιησούς αξίνελα σαρό τουμαρό μανγκιπέ. Βακερντάς ότι οντουλά σο μανγκένα-λες μπαγιά​—οντουλά σο βακερέλα ότι ισί λέσκε αμαλά—​σικαβένα πουμαρό μανγκιπέ κάνα ντένα καν λέσκε εντολέντε. (Ιωάν. 14:​15· 15:​14, 15) Σο προνόμιος ισί τι αβάς αμαλά ι Ιεχωβάσκε Τσσαβέσκε!

9. Καλέ πραγματέντε μοιάζελα ο μπολντιπέ ι Χριστιανόνγκο ι Χριστόσκε μπολντιμάσαρ;

⁹ Εκ κατά εντολές ι Ιησούσκε ισί τι μπολντιόν οντουλά σο τζάνα παλά-λέστε. (Ματθ. 28:​19, 20) Βοβ ντινάς ο παράδειγμας. Λέσκο μπολντιπέ ισί χάνικ διαφορετικός κατά μπολντιπέ σο κερένα οντουλά σο τζάνα παλά-λέστε. (Ντικχέν ο πλαίσιος « Ο Μπολντιπέ ι Ιησούσκο ντα ο Μπολντιπέ ι Τζενένγκο σο Τζάνα Παλά-λέστε​—Σόσκε Ισί Διαφορετικός;») Μερικέ πραγματέντε όμως μοιάζελα. Κάνα ο Ιησούς μπολντιλό, σικαντάς πι Νταντέσκε ότι μανγκέλα τι κερέλ λέσκο θέλημας. (Εβρ. 10:7) Αντικάς οντουλά-ντα σο τζάνα παλάλ κο Χριστός μπολντιόνα για τι σικαβέν σαριλέντε πουμαρί αφιέρωση κο Ιεχωβά Ντεβέλ. Ακανά, ο πο σημαντικός πράγμας λένγκε ζωγιάτε ισί τι κερέν οντουβά σο μανγκέλα ο Ιεχωβά, όχι οντουβά σο μανγκένα βον. Αντικάς ακολουθίνενα ο παράδειγμας πουμαρέ Κυριόσκο.

10. Σόσκε πρέπει ο μανγκιπέ σο τθερένα ι Ιησούσκε τι τσσίντελ-τουμέν τι μπολντιόν;

¹⁰ Δεχτίνενα ότι ο Ιησούς ισί ο μοναδικός Τσσαβό ι Ιεχωβάσκο ντα ο Βασιλιάς σο τραμπιντάς ο Ντεβέλ για τι κερέλ-αμέν κουμάντος. Τζανένα ότι ο Ιησούς ισί ταπεινός ντα μοιάζελα τέλεια πι Νταντέστε. Σικλιλέν ότι παρβαρέλας ι μποκχαλέν, λοκχιαρέλας ο γκι οντουλένγκο σο χασαρντέας πουμαρί ζορ, ατζέ-ντα κερέλας λατσσές ι νασφαλέν. (Ματθ. 14:​14-21) Ντικχλέν σαρ οδηγίνελα πι κχανγκιρί αντιβές. (Ματθ. 23:​10) Τζανένα επίσης ότι κα κερέλ ατζέ πο μπουτ πράγματα ανγκλ’ αμέντε σαρ Βασιλιάς κι Βασιλεία κι Ντεβλέσκι. Σαρ μπορίνενα τι σικαβέν ότι μανγκένα-λες; Άμα ακολουθίνενα λέσκο παράδειγμας. (Ιωάν. 14:​21) Μπορίνενα τι αρχίνεν τι κερέν-λες ανταβά κάνα κα αφιερώνεν-τουμέν κο Ιεχωβά, ντα σοράν κα μπολντιόν.

11. Καβά ισί ο πο σημαντικός λόγος για τι μπολντιόν, ντα σόσκε;

¹¹ Καβά ισί ο πο σημαντικός λόγος για τι μπολντιόν; Ο Ιησούς σικαντάς καγιά ισί η πο μπαρί εντολή ι Ντεβλέσκι κάνα βακερντάς: «Πρέπει τι μανγκές ι Ιεχωβάς τι Ντεβλές σαρέ τι γκίσαρ ντα σαρέ τι ψυχιάσαρ ντα σαρέ τι γκοντιάσαρ ντα σαρέ τι ζοριάσαρ». (Μάρκ. 12:​30) Σικαβένα ανταλά λάφια καζόμ μπουτ μανγκένα τουμέν-ντα ι Ντεβλές;

12. Τουμέν, σόσκε μανγκένα ι Ιεχωβάς; (Ντικχέν ι φωτογραφία-ντα)

 ¹² Τθερένα αζόμ μπουτ λόγοι για τι μανγκέν ι Ιεχωβάς. Για παράδειγμας, αγαντέν ότι βοβ ισί “σο ντέλα ι ζωή” ντα ότι «σαρέ ο λατσσέ ντα τέλεια δώρα αβένα» Λέσταρ. (Ψαλμ. 36:9· Ιακ. 1:​17) Κάθε λατσσό πράγμας σο απολαμβάνενα αβέλα αμαρέ λατσσέ Ντεβλέσταρ, σο ντέλα πι βαστέσταρ.

13. Σόσκε ισί ο λύτρος αζόμ σουκάρ δώρος;

¹³ Ο λύτρος ισί εκ μπουτ σουκάρ δώρος σο ντινάς-αμέν ο Ιεχωβά. Σόσκε βακεράσα-λες ανταβά; Σκεφτίνεν καζόμ λατσσί φιλία τθερέλα ο Ιεχωβά πι Τσσαβέσαρ. Ο Ιησούς βακερντάς: «Μανγκέλα-μαν μο Ντατ» ντα «Μανγκάβα ι Νταντές». (Ιωάν. 10:​17· 14:​31) Λένγκι φιλία αβέλας πο ζουρανί για δισεκατομμύρια μπρεσά. (Παρ. 8:​22, 23, 30) Σκεφτίνεν ακανά καζόμ ντουκχ πρέπει τι νιωσάλο ο Ντεβέλ κάνα μουκχλάς τι τσσίντελ μπουτ λέσκο Τσσαβό ντα τι μερέλ. Ο Ιεχωβά μανγκέλα ι τζενέν​—αλλά ι κάθε εκχές τουμένταρ-ντα—​αζόμ μπουτ σο ντινάς πι αγαπημέ Τσσαβές σαρ θυσία για τι μπορίνεν τουμέν ντα γιαβερά τι τζουβντιόν για πάντα. (Ιωάν. 3:​16· Γαλ. 2:​20) Ανταβά ισί ο πο σημαντικός λόγος για τι μανγκάς ι Ντεβλές.

14. Καβά ισί ο πο λατσσό στόχος σο κα μπορίνενας τι τραμπίνεν;

¹⁴ Τουμαρό μανγκιπέ ι Ιεχωβάσκε μπαριόλα καζόμ σικλιόνα πο μπουτ λέσκε. Σίγουρα μανγκένα τι τζαν ατζέ πο πασέ λέστε ακανά ντα  για πάντα, ντα μπορίνενα τι κερέν-λες ανταβά. Βοβ βακερέλα τουμένγκε λατσσιμάσαρ τι κερέν λέσκο γκι τι χαιρίνελ. (Παρ. 23:​15, 16) Μπορίνενα τι κερέν-λες ανταβά, όχι σάντε λαφίντζαρ, αλλά οντουλέντζαρ-ντα σο κερένα. Ο τρόπος σο τζουβντιόνα κα σικαβέλ ότι μανγκένα μπαγιά ι Ιεχωβάς. (1 Ιωάν. 5:3) Ανταβά ισί ο πο λατσσό στόχος σο κα μπορίνενας τι τραμπίνεν τουμαρέ ζωγιάτε.

15. Σαρ μπορίνενα τι σικαβέν τουμαρό μανγκιπέ ι Ιεχωβάσκε;

¹⁵ Σαρ μπορίνενα τι σικαβέν τουμαρό μανγκιπέ ι Ιεχωβάσκε; Πρώτα, κερένα εκ ξεχωριστή προσευχή σο αντράλ λάταρ αφιερώντιβενα κο μόνος αληθινός Ντεβέλ. (Ψαλμ. 40:8) Σοράν, μπολντιόνα για τι σικαβέν σαριλέντε τουμαρί αφιέρωση σο κερντέν κορκορέ κο Ιεχωβά. Σαρ ντικχλάμ κι αρχή ανταλέ μαθημάστε, τουμαρό μπολντιπέ ισί εκ μπουτ ευτυχισμέ στιγμή σο κα αλλάνελ σαρί τουμαρί ζωή. Αρχίνενα εκ νεβί ζωή, όχι τουμαρέ νεαυτόσκε, αλλά ι Ιεχωβάσκε. (Ρωμ. 14:8· 1 Πέτρ. 4:1, 2) Ανταβά μπέκιμ ντικχιόλα μπαρό βήμας, ντα αντικάς ισί. Αλλά πουτρέλα ο ντρομ σο οδηγίνελα κι πο λατσσί ζωή σο υπαρχίντιβελα. Σαρ αβέλα-πες ανταβά;

16. Σαρ ευλογίνελα ο Ιεχωβά οντουλέν σο ντένα πουμαρί ζωή κι υπηρεσία λέσκι, σαρ σικαβέλα ο εδάφιος Ψαλμός 41:12;

¹⁶ Ο Ιεχωβά ισί ο μόνος σο ντέλα αζόμ μπουτ πι βαστέσταρ. Σο-ντα τι ντεν-λες, βοβ πάντα κα ντελ-τουμέν ατζέ πο μπουτ. (Μάρκ. 10:​29, 30) Κα ντελ-τουμέν ι πο σουκάρ, πφερντί ντα λατσσί ζωή σο υπαρχίντιβελα​—ατζέ-ντα ακανά ανταλέ πφιρνέ ντουνιάστε σο ισί έτοιμος τι καταστραφίντιβελ. Ντα ανταγιά ισί σάντε η αρχή. Ο ταξίδι σο αρχίνελα τουμαρέ μπολντιμάσαρ να χρειαζίντιβελα τι μπιτίνελ. Μπορίνενα τι συνεχίνεν τι υπηρετίνεν τουμαρέ αγαπημέ Νταντές για πάντα. Ο μανγκιπέ σο τθερέλα τουμένγκε τουμαρό Ντατ ντα τουμέν λέσκε κα συνεχίνελ τι μπαριόλ. Ντα κα τζουβντιόν καζόμ τζουβντιόλα βοβ, για πάντα.​—Διαβάνεν Ψαλμός 41:12.

17. Σο μπορίνενα τι ντεν κο Ιεχωβά σο να τθερέλα-λες;

¹⁷ Κάνα αποφασίνενα τι αφιερώντιβεν ντα τι μπολντιόν, τθερένα ο προνόμιος τι ντεν μπαγιά κάτι πολύτιμος τουμαρέ Νταντέστε. Βοβ  ντινάς-τουμέν κάθε λατσσό πράγμας, κάθε σουκάρ στιγμή σο τθερένας τουμαρέ ζωγιάτε. Τουμέν-ντα μπορίνενα τι σικαβέν λέσκε τουμαρί εκτίμηση κάνα κα ντεν Οντουλέστε σο κερντάς ο ουρανός ντα ι πφουβ κάτι σο να τθερέλα​—τουμαρί αφοσιωμέ υπηρεσία. (Ιώβ 1:8· 41:​11· Παρ. 27:​11) Υπαρχίντιβελα πο λατσσό τρόπος για τι χρησιμοποιήνεν τουμαρί ζωή; Σίγουρα, τουμαρό μανγκιπέ ι Ιεχωβάσκε ισί ο πο λατσσό λόγος για τι μπολντιόν.

18. Καλά πράγματα κα μπορίνενας τι πουτσέν τουμαρό νεαυτός;

¹⁸ Οτθάρ, σαρ απαντίνενα κι ερώτηση: Κα μπολντιόν; Σάντε τουμέν μπορίνενα τι απαντίνεν. Αλλά μπέκιμ κα αβέλας λατσσό τι πουτσέν-τουμέν: “Σόσκε τι μπεκλεντίναβ;” (Πράξ. 8:​36) Ανέν τουμαρέ γκοντιάτε ο τριν σημεία σο ντικχλάμ. Πρώτον, μανγκένα ι αλήθεια ντα ι δικαιοσύνη. Πουτσέν-τουμέν: “Μανγκάβα τι ντικχάβ ο ντιβές σο σαρέ κα βακερέν ι αλήθεια ντα κα κερέν ο πράγματα σο ισί δίκαια;” Δεύτερον, μανγκένα ι Ιησού Χριστός. Πουτσέν-τουμέν: “Μανγκάβα τι αβέλ μο Βασιλιάς ο Τσσαβό ι Ντεβλέσκο, ντα μανγκάβα τι ακολουθίναβ λέσκο παράδειγμας;” Τρίτον, ο πο σημαντικός ισί ότι μανγκένα ι Ιεχωβάς. Πουτσέν-τουμέν: “Μανγκάβα τι ανάβ χαρά κο γκι κι Ιεχωβάσκο, ντα τι υπηρετίναβ-λες;” Άμα τουμαρέ απαντήσεις ανταλέ ερωτησιέντε ισί βα, σόσκε μα τι μπολντιόν; Σόσκε τι μπεκλεντίνεν;​—Πράξ. 16:33.

19. Σόσκε δεν πρέπει τι σακιντίνεν τι μπολντιόν; Βακερέν εκ παράδειγμας. (Ιωάννης 4:34)

¹⁹ Άμα σακιντίνενα τι μπολντιόν, σκεφτίνεν εκ παράδειγμας σο βακερντάς ο Ιησούς. (Διαβάνεν Ιωάννης 4:​34) Ντικχέν ότι ο Ιησούς βακερντάς ότι κάνα κερέλας ο θέλημας πι Νταντέσκο ισινέ σαρ τι χάλας. Σόσκε; Ο χαμπέ κερέλα αμένγκε λατσσιπέ. Ο Ιησούς τζανέλας ότι σο-ντα μανγκέλα αμένταρ ο Ιεχωβά τι κεράς ισί αμαρέ λατσσιμάσκε. Ο Ιεχωβά να μανγκέλα τι κεράς τίποτα σο κα κερέλας αμένγκε ζιάνι. Μανγκέλα ο Ιεχωβά τι μπολντιόν; Βα. (Πράξ. 2:​38) Οτθάρ, μπορίνενα τι αβέν σίγουροι ότι κάνα ντένα καν κι εντολή τι μπολντιόν, ανταβά κα κερέλ τουμένγκε λατσσιπέ. Άμα να κα σακιντίνενας τι απολαμβάνεν ο πο λατσσό χαμπέ σο ντιντιλό-τουμέν, σόσκε τι σακιντίνεν τι μπολντιόν;

20. Σο κα ντικχάς κο γιαβέρ μάθημας;

²⁰ Σόσκε τι μπεκλεντίνεν; Μπουτ τζενέ μπέκιμ τι απαντίνενας: «Να ισινόμ έτοιμος ατζέκ». Ισί μπαγιά ότι η απόφαση τι αφιερώντιβεν κο Ιεχωβά ντα τι μπολντιόν ισί η πο σημαντική απόφαση σο κα λεν ποτές. Οτθάρ, χρειαζίντιβελα χρόνος, σκέψη ντα μπαρί προσπάθεια για τι ετοιμάνεν-τουμέν. Αλλά άμα μανγκένα μπαγιά τι κερέν ανταβά βήμας, σαρ μπορίνενα τι προετοιμάντιβεν ακανά; Κα ντικχάς ι απάντηση κο γιαβέρ μάθημας.