1. Σο χασαρντάς ο Αδάμ ντα η Εύα, ντα καβά ισινέ ο αποτέλεσμας;

ΚΟΝ πακιάνα ότι πρέπει τι τσσουβέλ κανόνες ι λατσσιμάσκε ντα ι γκεραλιμάσκε; Κάνα ο Αδάμ ντα η Εύα χαλέ κατά δέντρος σο ντέλα γνώση ι λατσσιμάσκε ντα ι γκεραλιμάσκε, σικαντέ ξεκάθαρα ότι να τθερένας εμπιστοσύνη κο Ιεχωβά ντα κο κανόνες σο τσσουβέλα. Τραμπιντέ τι τσσουβέν πουμαρέ κανόνες. (Γέν. 3:​22) Ντικχέν όμως σο χασαρντέ. Χασαρντέ πουμαρί φιλία ι Ιεχωβάσαρ. Επίσης, χασαρντέ ι ευκαιρία τι τζουβντιόν για πάντα, ντα νακχαντέ ι αμαρτία ντα ο μεριπέ πουμαρέ τσσαβέντε. (Ρωμ. 5:​12) Λένγκι απόφαση αντάς λένγκε βάσανα.

2, 3. (α) Σο κερντάς ο Αιθίοπας κάνα κερντάς λέσαρ λάφι ο Φίλιππος; (β) Καλά ευλογίες τθεράσα κάνα μπολντιάσα, ντα καλά ερωτήσεις κα ντικχάς;

² Οκιά μπάνταρ, ντεν-τουμέν γκοντί σο κερντάς ο Αιθίοπας αξιωματικός κάνα κερντάς λέσαρ λάφι ο Φίλιππος. Ο αξιωματικός εκτιμιντάς αζόμ μπουτ οντουλά σο κερντάας λέσκε ο Ιεχωβά ντα ο Ιησούς σο μπολντιλό αμέσως. (Πράξ. 8:​34-38) Κάνα αφιερώνασα-αμέν κο Ντεβέλ ντα, σαρ οντουβά αξιωματικός μπολντιάσα, σικαβάσα ξεκάθαρα ότι εκτιμίνασα οντουλά σο κερντάς αμένγκε ο Ιεχωβά ντα ο Ιησούς. Επίσης, σικαβάσα εμπιστοσύνη κο Ιεχωβά ντα αγαβάσα ότι βοβ πρέπει τι τσσουβέλ κανόνες ι λατσσιμάσκε ντα ι γκεραλιμάσκε.

³ Σκεφτίνεν ο ευλογίες σο τθεράσα κάνα υπηρετίνασα ι Ιεχωβάς! Εκ ευλογία ισί ότι ο Ιεχωβά κα ντελ-αμέν σαρέ οντουλά σο χασαρντάς ο Αδάμ ντα η Εύα, αλλά ι ευκαιρία-ντα τι τζουβντιάς για πάντα. Επειδή τθεράσα πίστη κο  Ιησούς Χριστός, ο Ιεχωβά συγχωρίνελα αμαρέ λάθη ντα ντέλα-αμέν πάκι συνείδηση. (Ματθ. 20:​28· Πράξ. 10:​43) Επίσης, αβάσα εκ φαμιλί οντουλέ τζενέντζαρ σο τραμπιντάς ο Ιεχωβά τι υπηρετίνεν-λες ντα κα αβέν αμένγκε μπουτ σουκάρ ντιβεσά. (Ιωάν. 10:​14-16· Ρωμ. 8:​20, 21) Όμως, μερικοί σο γνωρίνενα ι Ιεχωβάς σακιντίνενα τι κερέν οντουβά σο κερντάς ο Αιθίοπας. Σο τσσιναβέλα-λεν τι μπολντιόν; Ντα σαρ μπορίνενα τι νακχαβέν οντουλά δυσκολίες;

4, 5. Καλά δυσκολίες νακχλάς ο Έιβερι ντα η Άννα;

⁴ Να τθερένα σιγουριά πουμαρέ νεαυτόσκε. Ο ντατ ντα η ντάι του Έιβερι ισί Μάρτυρες ι Ιεχωβάσκε. Λέσκο ντατ τθερέλα μπουτ λατσσό ναβ σαρ ντατ ντα πρεσβύτερος. Όμως, ο Έιβερι σακιντίνελας τι μπολντιόλ. Σόσκε; «Πακιάβας ότι να κα μπορίναβας ποτές τι αβάβ αζόμ λατσσό σαρ μο ντατ», βακερέλα. Επίσης, πακιάλας ότι να κα μπορίνελας τι κερέλ ο ευθύνες σο μπορεί τι ντιντιόνας-λες. «Αγχώντιβαβας κάνα σκεφτίναβας ότι κα κεράβ προσευχές ντα ομιλίες ανγκλάλ γιαβερέντε ή ότι κα αβάβ υπεύθυνος σε εκ όμιλος για το έργος».

⁵ Η Άννα, σο ισί 18 μπρεσένγκι, να τθερέλας ιτς σιγουριά πι νεαυτόσκε. Παρόλο σο μπαριλί κι αλήθεια, αμντίνελας ότι να κα μπορίνελας τι ντελ καν κο κανόνες κι Ιεχωβάσκε. Σόσκε; Η Άννα να εκτιμίνελας πο νεαυτός ντα ισινέ φαρ σο νιωθίνελας μπουτ μπέτι. Μπουτ τζενέ σο νιωθίνενα μπέτι τσσινένα-πες, τσαλαβένα-πες ή πφαμπαρένα-πες. Κάτι ασακό κερέλας η Άννα-ντα. Ανταβά κερέλας πιο δύσκολα ο πράγματα. Βόι βακερέλα: «Να βακεράβας καεκχέσκε σο κεράβας, ούτε μι νταντέσκε ντα μι νταγιάκε, ντα αμντίναβας ότι ο Ιεχωβά να κα μανγκέλας-μαν επειδή κεράβας-λες ανταβά μι νεαυτόστε».

6. Σο τσσιναβέλας ι Βανεσά τι μπολντιόλ;

⁶ Ο αμαλά. Η Βανέσα, σο ισί 22 μπρεσένγκι, βακερέλα: «Τθεράβας εκχέ μπουτ λατσσέ αμαλινά σο τζανάβας-λα περίπου ντες μπρες». Οντιά αμαλίν όμως να βοηθίνελας-λα τι ερεσέλ κο μπολντιπέ. Ανταβά στεναχωρίνελας μπουτ ι Βανεσά. Βόι βακερέλα: «Νανέ μάνγκε εύκολος τι κεράβ αμαλέν, ντα νταράβας ότι άμα κα χαλαβάβας οντιά φιλία να κα τθεράβας πάλι εκχέ λατσσέ αμαλινά».

7. Καλέ πραγμάσταρ νταρέλας η Μακέιλα, ντα σόσκε;

⁷ Νταρένα ότι κα κερέν εκ μπαρό λάθος. Η Μακέιλα ισινέ παντζέ μπρεσένγκι κάνα λάκο πφραλ χαλάς αποκοπή. Καζόμ μπαριόλας, ντικχέλας σαρ επηρεάνενας λάκε νταντές ντα λάκε νταγιά οντουλά σο κερέλας λάκο πφραλ. Βόι βακερέλα: «Νταράβας ότι άμα κα μπολντιάβας ντα κα  κεράβας λάθος, κα χάβας αποκοπή ντα κα ανάβας ατζέ πιο μπαρί στεναχώρια μι νταντέσκε ντα μι νταγιάκε».

8. Καλέ πραγμάσταρ νταρέλας ο Μάιλς;

⁸ Νταρένα ότι κα τζαν λέντζαρ κόντρα. Ο ντατ ντα η μαμοσολί του Μάιλς υπηρετίνενα ι Ιεχωβάς, αλλά λέσκι ντάι νανέ Μάρτυρας. «Μπεσάβας μι νταγιάσαρ 18 μπρεσά», βακερέλα, «ντα νταράβας τι βακεράβ λάκε ότι μανγκάβας τι μπολντιάβ. Ντικχλόμας σο κερντάς κάνα αβιλό Μάρτυρας μο ντατ. Νταράβας ότι κα ανέλας μάνγκε προβλήματα».

9. Σο κα αβέλ-πες κάνα σικλιόνα καζόμ αγάπη ντα υπομονή σικαβέλα ο Ιεχωβά;

⁹ Ο Αδάμ ντα η Εύα τραμπιντέ μα τι υπηρετίνεν ι Ιεχωβάς επειδή να μπαριαρντέ πουμαρί αγάπη λέσκε. Όμως, ο Ιεχωβά μουκχλάς-λεν τι τζουβντιόν μπερεκέτι για τι κερέν τσσαβέν ντα τι αποφασίνεν κορκορέ σαρ τι μπαριαρέν-λεν. Τραμπιντέ μα τι ντεν καν ι Ιεχωβάς, ντα οντουλά σο αβιλέ-πες πιο σοράν σικαντέ ξεκάθαρα καζόμ μπαρό λάθος κερντέ. Λένγκο μπαρό τσσαβό μουνταρντάς πι πφραλές, ντα καζόμ νακχέλας ο καιρός, ατζέ πιο μπουτ τζενέ χάνας-πες ντα ντικχένας σάντε πουμαρό νεαυτός. (Γέν. 4:8· 6:​11-13) Όμως, ο Ιεχωβά πουταρντάς ο ντρομ για τι σώνελ σαρέ λένγκε τσσαβέν σο μανγκένα τι υπηρετίνεν-λες. (Ιωάν. 6:​38-40, 57, 58) Τουμαρί αγάπη ι Ιεχωβάσκε λογικά κα μπαριόλ καζόμ κα σικλιόν πιο λατσσές ι υπομονή ντα ι αγάπη σο σικαβέλα ο Ιεχωβά. Να κα κερέν οντουβά σο κερντάς ο Αδάμ ντα η Εύα ντα κα αφιερώντιβεν κο Ιεχωβά.

10. Σόσκε μπορίνελα ο εδάφιος Ψαλμός 19:7 τι βοηθίνελ-τουμέν τι υπηρετίνεν ι Ιεχωβάς;

¹⁰ Συνεχίνεν τι σικλιόν ι Ιεχωβάσκε. Καζόμ πιο μπουτ σικλιόνα ι Ιεχωβάσκε αζόμ πιο σίγουροι κα αβέν ότι μπορίνενα τι υπηρετίνεν-λες λατσσές. Ο Έιβερι, σο κερντάμ λάφι λέσκε πιο οπρέ, βακερέλα: «Αρχισάλομ τι τθεράβ σιγουριά μι νεαυτόσκε κάνα διαβαντόμ ντα σκεφτιντόμ λατσσές ο λάφια σο ισί κο εδάφιος Ψαλμός 19:​7». (Διαβάνεν) Κάνα ο Έιβερι ντικχλάς σαρ κερντάς ο Ιεχωβά τι νικιόν μπαγιά ανταλά λάφια, λέσκι αγάπη ι Ντεβλέσκε μπαριλί ατζέ πιο  μπουτ. Η αγάπη ι Ντεβλέσκε ντέλα-αμέν ι σιγουριά ότι μπορίνασα τι υπηρετίνας-λες, βοηθίνελα-αμέν μα τι κεράς ο πράγματα σο να μανγκέλα ντα ντέλα-αμέν ι ζορ τι υπηρετίνας-λες. Η Άννα, σο κερντάμ λάφι λάκε πιο οπρέ, βακερέλα: «Αντράλ κατά διάβασμας ι Γραφιάκο ντα κατά προσωπική μελέτη, αγαντόμ ότι κάνα κεράβα κακός μι σωμάστε ντα ντουκχαβάβα μο νεαυτός, ντουκχαβάβα ι Ιεχωβάς-ντα». (1 Πέτρ. 5:7) Η Άννα “κερντάς ο λάφια ι Ντεβλέσκε”. (Ιακ. 1:​22) Καβά ισινέ ο αποτέλεσμας; Βόι βακερέλα: «Κάνα ντικχλόμ καζόμ βοηθίντιβαβας σο ντάβας καν κο Ιεχωβά, μπαριλί μπουτ μι αγάπη λέσκε. Ακανά ισινόμ σίγουρη ότι ο Ιεχωβά πάντα κα οδηγίνελ-μαν κάνα κα χρειαζίντιβαβ λέσκι βοήθεια». Η Άννα μπορισάλι τι τσσιναβέλ τι κερέλ κακός πι σωμάστε. Αφιερωσάλι κο Ιεχωβά ντα μπολντιλί.

11. Σο κερντάς η Βανέσα για τι αρακχέλ νεβέ αμαλέν, ντα σο σικλιάσα ανταλέσταρ;

¹¹ Τι τραμπίνεν τουμαρέ αμαλέν γκοντιάσαρ. Η Βανέσα, σο κερντάμ λάφι λάκε πιο οπρέ, αγαντάς ότι λάκι αμαλίν τσσιναβέλας-λα τι υπηρετίνελ ι Ιεχωβάς. Οτθάρ, τσσιναντάς τι κερέλ λάσαρ παρέα. Αλλά να κερντάς σάντε ανταβά. Προσπαθιντάς μπουτ τι κερέλ νεβέ αμαλέν, ανταγιά φαρ αντρέ κι κχανγκιρί. Βοηθιντάς-λα ο παράδειγμας ι Νωέσκο ντα λέσκε φαμιλιάκο. Βακερέλα: «Κατέ-ντα τι ντικχένας ισινέ τζενέ σο να μανγκένας ι Ιεχωβάς, αλλά βον κερένας λατσσί παρέα σαρ φαμιλί». Σοράν πι μπολντιμάσταρ, η Βανέσα αρχισάλι ο σκαπανικός. Ακανά βακερέλα: «Ανταβά βοηθιντάς-μαν τι κεράβ νεβέ αμαλέν όχι σάντε μιρέ κχανγκιριάταρ αλλά γιαβερέ κχανγκιρίνταρ-ντα». Τουμέν-ντα κα αρακχέν λατσσέ αμαλέν άμα κερένα καζόμ πιο μπουτ αβέλα-πες κο έργος σο ντινάς-αμέν ο Ιεχωβά.​—Ματθ. 24:14.

12. Καγιά νταρ να τθερέλας ο Αδάμ ντα η Εύα, ντα καβά ισινέ ο αποτέλεσμας;

¹² Τι τθερέν ι σωστή νταρ. Μερικές φορές η νταρ κερέλα αμένγκε λατσσιπέ. Για παράδειγμας, πρέπει τι νταράς μα τι στεναχωρίνας ι Ιεχωβάς. (Ψαλμ. 111:​10) Άμα ο Αδάμ ντα η Εύα τθερένας ανταγιά νταρ, να κα τζάνας κόντρα κο Ιεχωβά. Αλλά γκιλέ. Ντα κάνα κερντέ-λες ανταβά, λένγκε γιακχά πουτάρντιλε, δηλαδή αγαντέ ντιπ  λατσσές ότι ισινέ αμαρτωλοί. Πουμαρέ τσσαβέντε μπορίνενας τι νακχαβέν σάντε ι αμαρτία ντα ο μεριπέ. Επειδή αγαντέ ότι ισινέ αμαρτωλοί, λατζασάλε σο ισινέ νανγκέ ντα ιτσσαρντέ-πες.​—Γέν. 3:7, 21.

13, 14. (α) Σόσκε να χρειαζίντιβελα τι νταράς μπουτ κατά μεριπέ σαρ βακερέλα κι 1 Πέτρου 3:​21; (β) Σόσκε μανγκάσα ι Ιεχωβάς;

¹³ Παρόλο σο χρειαζίντιβελα τι νταράς μα τι στεναχωρίνας ι Ιεχωβάς, να χρειαζίντιβελα τι νταράς μπουτ κατά μεριπέ. Ο Ιεχωβά ντινάς-αμέν ι ευκαιρία τι τζουβντιάς για πάντα. Άμα κα κεράς εκ αμαρτία αλλά κα μετανιώνας μπαγιά, ο Ιεχωβά κα συγχωρίνελ αμαρέ λάθη. Κα συγχωρίνελ-αμέν επειδή πακιάσα κι θυσία λέσκε Τσσαβέσκι. Εκ σημαντικός τρόπος για τι σικαβάς πίστη ισί τι αφιερώντιβας κο Ντεβέλ ντα τι μπολντιάς.​—Διαβάνεν 1 Πέτρου 3:21.

¹⁴ Τθεράσα μπουτ λόγους τι μανγκάς ι Ιεχωβάς. Βοβ, να ντέλα-αμέν σάντε ο λατσσέ πράγματα σο απολαμβάνασα κάθε ντιβές, αλλά σικλιαρέλα-αμέν κον ισί ντα σο μανγκέλα τι κερέλ. (Ιωάν. 8:​31, 32) Ντινάς-αμέν ι Χριστιανική κχανγκιρί για τι οδηγίνελ-αμέν ντα τι βοηθίνελ-αμέν. Βοηθίνελα-αμέν τι νταϊντίνας αμαρέ προβλήματα, ντα ντέλα πο λάφι ότι κα τθεράς τέλεια ζωή για πάντα. (Ψαλμ. 68:​19· Αποκ. 21:3, 4) Κάνα σκεφτίνασα καζόμ μπουτ πράγματα κερντάς αμένγκε ο Ιεχωβά για τι σικαβέλ αμένγκε πι αγάπη, μανγκάσα-λες ατζέ πιο μπουτ. Ντα κάνα μανγκάσα ι Ιεχωβάς, νταράσα λέσταρ. Νταράσα μα τι στεναχωρίνας Οντουλές σο μανγκάσα αζόμ μπουτ.

15. Σαρ νακχαντάς η Μακέιλα ι νταρ σο τθερέλας ότι μπορεί τι κερέλας λάθος;

¹⁵ Η Μακέιλα, σο κερντάμ λάφι λάκε πιο οπρέ, νακχαντάς ι νταρ σο τθερέλας ότι μπορεί τι κερέλας λάθος κάνα αγαντάς καζόμ μπουτ συγχωρίνελα ο Ιεχωβά. «Αγαντόμ ότι ισινάμ ατελείς ντα κα κεράς λάθη. Αλλά επίσης αγαντόμ ότι ο Ιεχωβά μανγκέλα-αμέν ντα κα συγχωρίνελ-αμέν χάρη κο λύτρος». Λάκι αγάπη ι Ιεχωβάσκε κερντάς-λα τι μανγκέλ τι αφιερώντιβελ λέστε ντα τι μπολντιόλ.

16. Σαρ βοηθισάλο ο Μάιλς τι νακχαβέλ ι νταρ ότι κα τζάλας λέσαρ κόντρα λέσκι ντάι;

¹⁶ Ο Μάιλς, σο νταρέλας ότι λέσκι ντάι κα τζάλας λέσαρ κόντρα άμα κα βακερέλας λάκε ότι αποφασιντάς τι μπολντιόλ, μανγκλάς βοήθεια κατά επίσκοπος. «Βοβ-ντα μπαριλόας εκχέ φαμιλιάτε σο να ισινέ σαρέ κι αλήθεια», βακερέλα ο Μάιλς. «Βοηθιντάς-μαν τι σκεφτίναβ σο τι βακεράβ μι νταγιάκε για τι νταβ-λα τι αγαβέλ ότι με τραμπιντόμας τι μπολντιάβ ντα να τσσουβέλας-μαν ζορίσαρ μο ντατ». Λέσκι ντάι να μπεϊντιντάς ι απόφαση σο λιντάς ο Μάιλς. Οτθάρ, έπρεπε τι νασέλ λάκε κχερέσταρ, αλλά κερντάς οντουβά σο αποφασιντάς. «Κάνα σικλιλόμ ι λατσσέ πραγματένγκε σο κερντάς ο Ιεχωβά μάνγκε, ανταβά αγγιντάς μο γκι», βακερέλα. «Κάνα σκεφτιντόμ λατσσές ι Ιησούσκο λύτρος, αγαντόμ καζόμ μπουτ μανγκέλα-μαν ο Ιεχωβά. Ανταβά κερντάς-μαν τι μανγκάβ  τι αφιερώντιβαβ κο Ιεχωβά ντα τι μπολντιάβ».

17. Καγιά ευκαιρία τθεράσα;

¹⁷ Κάνα η Εύα χαλάς κατά δέντρος κι Εδέμ, γκιλί κόντρα πι Νταντέστε. Κάνα ο Αδάμ κερντάς οντουβά σο κερντάς βόι, σικαντάς ότι να εκτιμίνελας σαρέ ο λατσσέ πράγματα σο κερντάας ο Ιεχωβά λέσκε. Σαρέ τθεράσα ι ευκαιρία τι σικαβάς ότι να μοιάζασα κο Αδάμ ντα κι Εύα. Αμέν εκτιμίνασα σαρέ οντουλά σο κερντάς αμένγκε ο Ιεχωβά. Αμαρέ μπολντιμάσαρ, σικαβάσα κο Ιεχωβά ότι δεχτίνασα ι εξουσία σο τθερέλα τι τσσουβέλ κανόνες ι λατσσιμάσκε ντα ι γκεραλιμάσκε. Σικαβάσα ότι μανγκάσα αμαρέ Νταντές ντα ότι τθεράσα εμπιστοσύνη λέσκε.

18. Σαρ μπορίνενα τι τθερέν επιτυχία καζόμ υπηρετίνενα ι Ιεχωβάς;

¹⁸ Σοράν αμαρέ μπολντιμάσταρ πρέπει τι συνεχίνας τι κεράς οντουβά σο μανγκέλα ο Ιεχωβά, όχι οντουβά σο μανγκάσα αμέν. Εκατομμύρια τζενέ τζουβντιόνα αντικάς. Μπορίνενα τι μοιάζεν λέντε άμα σικλιόνα ατζέ πιο μπουτ ο Λάφι ι Ντεβλέσκο, άμα κερένα παρέα ι πφραλέντζαρ ντα ι πφενίντζαρ ντα άμα βακερένα σαρέ τουμαρέ γκίσαρ κο γιαβερά οντουλά σο σικλιλέν τουμαρέ λατσσέ Νταντέσκε. (Εβρ. 10:​24, 25) Κάνα λένα αποφάσεις, τι ασουνέν ο συμβουλές σο ντέλα-τουμέν ο Ιεχωβά αντράλ πι Λαφίσταρ ντα κατά οργάνωση. (Ησ. 30:​21) Αντικάς, σο-ντα κερένα κα τθερέλ επιτυχία.​—Παρ. 16:3, 20.

19. Σο πρέπει τι ατσσικιαρέν τουμαρέ γκοντιάτε, ντα σόσκε;

¹⁹ Άμα κα ατσσικιαρέν τουμαρέ γκοντιάτε καζόμ λατσσό ισί τουμένγκε τι ντεν καν ι Ιεχωβάς, κα μανγκέν ατζέ πιο μπουτ εμ λες εμ λέσκε κανόνες. Τίποτα οντουλένταρ σο ντέλα-τουμέν ο Μπενγκ να κα τσσιναβέλ-τουμέν τι υπηρετίνεν ι Ιεχωβάς. Σκεφτίνεν τουμαρό νεαυτός χίλια μπρεσά πιο σοράν. Κα ντεν-τουμέν γκοντί ότι η απόφαση σο λιντέν τι μπολντιόν ισινέ η πιο λατσσί απόφαση!