1. Σο σικλιλάμ κι μπρεσέσκι συνέλευση κο 2023;

 ΚΙ ΜΠΡΕΣΕΣΚΙ ΣΥΝΕΛΕΥΣΗ κο 2023, a αλλαξάλο ο τρόπος σο αγαβάσα μερικά πράγματα ντα ασουντάμ μπουτ σουκάρ αμπέρια αμαρέ εργόσκε. Σικλιλάμ, για παράδειγμας, ότι μερικά τζενέ μπέκιμ τι τθερέν ι ευκαιρία τι τσσίντεν κατά λαός ι Ιεχωβάσκο ατζέ-ντα σοράν κατά καταστροφή ι Μπαρέ Βαβυλωνάκι. Σικλιλάμ επίσης ότι, κατά Νοέμβριος 2023, ο ευαγγελιζόμενοι να κα γραφίνεν σαρέ ο πράγματα σο κερένα κο έργος. Μήπως ανταλά αλλαγές μανγκένα τι βακερέν ότι αμαρό έργος νανέ ακανά αζόμ σημαντικός καζόμ ισινέ ανγκλέ; Σίγουρα νάα!

2. Σόσκε αβέλα αμαρό έργος πο σημαντικός κάθε ντιβές σο νακχέλα; (Μάρκος 13:10)

² Κάθε ντιβές σο νακχέλα, αμαρό έργος αβέλα πο σημαντικός. Σόσκε; Επειδή ο σαάτι τελειώνελα. Ντικχέν σο βακερντάας ο Ιησούς αμαρέ εργόσκε κο τελευταία ντιβεσά. (Διαβάνεν Μάρκος 13:​10) Σαρ διαβάνασα κο Ευαγγέλιος σο γραφιντάς ο Ματθαίος, ο Ιησούς βακερντάς ότι ο λατσσέ αμπέρια κα μουτθάντιβενας σαρί κι πφουβ πριν τι αβέλ «ο τέλος». (Ματθ. 24:14) Ανταβά λάφι μανγκέλα τι σικαβέλ ο τέλος ανταλέ πφιρνέ ντουνιάσκο σο κερέλα-λες κουμάντος ο Μπενγκ. Ο Ιεχωβά τραμπιντάς “ο ντιβές ντα ο σαάτι” σο κα αβέν ανταλά πράγματα, ντα κα αβέν ατζεχάνικ. (Ματθ. 24:36· 25:13· Πράξ. 1:7) Κάθε ντιβές σο νακχέλα, ισινάμ εκ ντιβές πο πασέ ανταλέ βακιτίστε.  (Ρωμ. 13:11) Μέχρι όμως τι αβέλ ο τέλος, πρέπει τι συνεχίνας τι κεράς έργος.

3. Σο τσσίντελα-αμέν τι κεράς έργος;

³ Καζόμ ντάσα-αμέν γκοντί αμαρό έργος, ισί λατσσό τι σκεφτίνας εκ σημαντική ερώτηση: Σόσκε μουτθαβάσα ο λατσσέ αμπέρια; Επειδή η αγάπη τσσίντελα-αμέν τι κεράς έργος. Κάνα νικιάσα κο έργος, σικαβάσα αμαρί αγάπη ι λατσσέ αμπερίνγκε, αμαρί αγάπη ι τζενένγκε ντα, πο μπουτ, ι αγάπη σο τθεράσα ι Ιεχωβάσκε ντα λέσκε ναβέσκε. Για τι λας-λεν εκχέ σειράσαρ.

ΚΕΡΑΣΑ ΕΡΓΟΣ ΕΠΕΙΔΗ ΜΑΝΓΚΑΣΑ Ο ΛΑΤΣΣΕ ΑΜΠΕΡΙΑ

4. Σο κεράσα κάνα λάσα εκ λατσσό αμπέρι;

⁴ Ντένα-τουμέν γκοντί σαρ νιωσάλεν κάνα λιντέν εκ λατσσό αμπέρι; Μπέκιμ εκ τουμαρέ τζενένταρ κερντάς εκχέ μαξιμίς ή λιντέν εκ μπουτί σο τθερένας-λα μπουτ ανάγκη. Σίγουρα, μπεσένας σαρ σαρ για τι βακερέν ανταλά λατσσέ αμπέρια τουμαρέ τζενένγκε ντα τουμαρέ αμαλένγκε. Νιωσάλεν κάτι ασακό κάνα ασουντέν ο πο λατσσέ αμπέρια σο υπαρχίντιβενα​—ο λατσσέ αμπέρια ι Ντεβλέσκε Βασιλειάκε;

5. Σαρ νιωσάλεν ι πρώτη φαρ σο ασουντέν ι αλήθεια κατά Λάφι ι Ντεβλέσκο; (Ντικχέν ο φωτογραφίες-ντα)

⁵ Ντεν-τουμέν γκοντί σαρ νιωσάλεν ι πρώτη φαρ σο ασουντέν ι αλήθεια κατά Λάφι ι Ντεβλέσκο. Σικλιλέν ότι τουμαρό Ντατ σο ισί κο ουρανός τθερέλα τουμένγκε αγάπη ντα ότι μανγκέλα τι αβέν αντρέ λέσκε φαμιλιάτε. Επίσης, σικλιλέν ότι ντινάς ι υπόσχεση τι τσσιναβέλ ι ντουκχ ντα ο βάσανα, ότι τθερένα ι ελπίδα τι ντικχέν τουμαρέ αγαπημέ τζενέν σο μουλέ τι αναστίντιβεν, ντα μπουτ γιαβερά πράγματα. (Μάρκ. 10:29, 30· Ιωάν. 5:28, 29· Ρωμ. 8:38, 39· Αποκ. 21:3, 4) Ανταλά αλήθειες ερεσλέ τουμαρέ γκίστε. (Λουκ. 24:32) Μανγκλέν οντουλά σο σικλιλέν, ντα να μπορίνενας τι ατσσικιαρέν ανταλά σουκάρ αλήθειες σάντε τουμένγκε!​—Ντικχέν Ιερεμίας 20:9.

6. Σο σικλιόνα κατά εμπειρία του Έρνεστ ντα της Ρόουζ;

⁶ Ντεν σημασία σε εκ εμπειρία. Εκ πφραλ,  ο Έρνεστ, b ισινέ περίπου 10 μπρεσένγκο κάνα μουλό λέσκο ντατ. Ο Έρνεστ βακερέλα: «Σκεφτίναβας: “Κάι ισί μο ντατ; Ισί κο ουρανός ή να υπαρχίντιβελα πουθενά;” Ζηλίναβας ι γιαβερέ τσσαβέν σο τθερένας νταντές». Ο Έρνεστ τζάλας μπουτ φαρ κο μεζάρι πι νταντέσκο ντα κοτσίντζαρ προσευχίντιβελας: «Σε παρακαλώ, Ντέβλα, μανγκάβα τι σικλιάβ κάι ισί μο ντατ». Περίπου 17 μπρεσά σοράν λέσκε νταντέσκε μεριμάσταρ, βακερντέ κο Έρνεστ τι κερέλ μελέτη κατά Γραφή, ντα βοβ μανγκλάς-λες χαράσαρ. Ενθουσιασάλο κάνα σικλιλό ότι ο μουλέ να αγαβένα τίποτα, σαρ τι σοβένας πφαρές, ντα ότι η Αγία Γραφή ντέλα ι υπόσχεση ότι κα αβέλ ανάσταση. (Εκκλ. 9:5, 10· Πράξ. 24:15) Τελικά, αρακχλάς ο απαντήσεις κο ερωτήσεις σο μανγκέλας τι σικλιόλ αζόμ μπουτ μπρεσά! Ο Έρνεστ ισινέ μπουτ χαρούμενος σο σικλιόλας ο αλήθειες ι Γραφιάκε. Λέσκι ρομνί, η Ρόουζ, αρχισάλι βόι-ντα μελέτη ντα μανγκλάς βόι-ντα οντουλά σο σικλιόλας. Κο 1978 μπολντιλέ. Βακερένας αντράλ πουμαρέ γκίσταρ ανταλά σουκάρ αλήθειες πουμαρέ τζενέντε, αμαλέντε ντα γιαβερέντε σο μανγκένας τι ασουνέν. Σαρέ ανταλά μπρεσά, ο Έρνεστ ντα η Ρόουζ βοηθιντέ πο μπουτ από 70 τζενέν τι μπολντιόν.

7. Σο αβέλα-πες κάνα μανγκάσα μπουτ ι αλήθεια ι Γραφιάκι; (Λουκάς 6:45)

⁷ Κάνα μανγκάσα μπουτ ι αλήθεια ι Γραφιάκι, να μπορίνασα τι ατσσικιαράς-λα αντρ’ αμέντε. (Διαβάνεν Λουκάς 6:​45) Νιωθίνασα σαρ ο μαθητές ι Ιησούσκε κο πρώτος αιώνας, σο βακερντέ: «Ναστί τσσιναβάσα τι κεράς λάφι οντουλένγκε σο ντικχλάμ ντα ασουντάμ». (Πράξ. 4:20) Νιωθίνασα αζόμ μπαρί αγάπη ι αληθειάκε σο μανγκάσα τι μουτθαβάς-λα αζόμ πο μπουτ τζενέντε αβέλα-πες.

ΚΕΡΑΣΑ ΕΡΓΟΣ ΕΠΕΙΔΗ ΜΑΝΓΚΑΣΑ Ι ΤΖΕΝΕΝ

8. Σο τσσίντελα-αμέν τι μουτθαβάς ο λατσσέ αμπέρια ι γιαβερένγκε; (Ντικχέν ο πλαίσιος «Μανγκέν ι Τζενέν​—Κερέν Μαθητέν») (Ντικχέν ι φωτογραφία-ντα)

⁸ Σαρ ο Ιεχωβά ντα λέσκο Τσσαβό, αντικάς αμέν-ντα μανγκάσα ι τζενέν. (Παρ. 8:31· Ιωάν. 3:16) Πφαμπάσα μπουτ οντουλένγκε σο ισί χωρίς Ντεβέλ ντα “να μπεσένα πο λατσσέ ντιβεσένγκε”. (Εφεσ. 2:12) Επειδή τθερένα προβλήματα, μπέκιμ τι νιωθίνεν σαρ τι αβέν αντρέ εκχέ μπουτ αχόρτ γουρνάτε. Αλλά αμέν τθεράσα ο σολό για τι νικαβάς-λεν αβρί. Ο σολό ισί ο λατσσέ αμπέρια ι Ντεβλέσκε Βασιλειάκε. Επειδή μανγκάσα ι τζενέν ντα πφαμπάσα λένγκε, ανταβά τσσίντελα-αμέν τι κεράς σο νακχέλα αμαρέ βαστέσταρ για τι μουτθαβάς λένγκε ο λατσσέ αμπέρια. Ανταλά σουκάρ αμπέρια μπορίνενα τι ντεν-λεν ελπίδα, τι βοηθίνεν-λεν τι αβέν ευτυχισμέ ατζέ-ντα ακανά, ντα τι ντεν-λεν ι ευκαιρία τι τζουβντιόν εκ ντιβές «ι πραγματική ζωή», δηλαδή ι ζωή για πάντα κο νεβό ντουνιάς κι Ντεβλέσκο.​—1 Τιμ. 6:19.

9. Καλέ πραγμάσκε προειδοποιήνασα ι τζενέν, ντα σόσκε; (Ιεζεκιήλ 33:7, 8)

 ⁹ Επίσης, αμαρί αγάπη ι τζενένγκε τσσίντελα-αμέν τι προειδοποιήνας-λεν ότι ερεσέλα ο τέλος ανταλέ πφιρνέ ντουνιάσκο. (Διαβάνεν Ιεζεκιήλ 33:7, 8) Τζιτζίνασα ι γιαβερένγκε ντα αμαρέ τζενένγκε σο νανέ Μάρτυρες. Μπουτ λένταρ συνεχίνενα πουμαρί ζωή χωρίς τι τζανέν ότι κα αβέλ εκ «μπαρί στεναχώρια, ασακί σο να αβιλί-πες κατά αρχή ι ντουνιάσκι μέχρι ακανά ούτε κα αβέλ-πες γιαβέρ φαρ». (Ματθ. 24:21) Μανγκάσα τι σικλιόν σο κα αβέλ-πες οντουλέ βακιτίστε, κάνα ο Ντεβέλ κα κρίνελ ι τζενέν. Πρώτα κα καταστραφίντιβελ η ψεύτικη θρησκεία ντα σοράν σαρό ο πφιρνό ντουνιάς κο Αρμαγεδδώνας. (Αποκ. 16:14, 16· 17:16, 17· 19:11, 19, 20) Προσευχίντιβασα τι ασουνέν ι προειδοποίηση καζόμ πο μπουτ τζενέ αβέλα-πες ντα τι αρχίνεν τι υπηρετίνεν ι Ιεχωβάς αμέντζαρ ακανά. Αλλά σο κα αβέλ-πες οντουλέντζαρ σο να ντένα προσοχή κι προειδοποίηση ακανά; Αντρέ ανταλέντε ισί αμαρέ αγαπημέ τζενέ-ντα.

10. Σόσκε ισί σημαντικός τι συνεχίνας τι προειδοποιήνας ι τζενέν;

¹⁰ Σαρ εξηγιντάς αμένγκε ο γιαβέρ μάθημας, μπέκιμ ο Ιεχωβά τι μανγκέλ τι σώνελ μερικέ τζενέν σο κα αλλάνεν ντα κα αρχίνεν τι πακιάν Λέστε κάνα κα ντικχέν ι καταστροφή ι Μπαρέ Βαβυλωνάκι. Άμα κα αβέλ-πες ανταβά, ισί ατζέ πο σημαντικός τι συνεχίνας τι προειδοποιήνας-λεν. Σκεφτίνεν: Οντουλά σο βακεράσα λένγκε ακανά μπέκιμ τι ανέν-λεν πουμαρέ γκοντιάτε αζομάν. (Ντικχέν Ιεζεκιήλ 33:33) Μπορεί τι θυμίνεν ι προειδοποίηση σο ασουνένας αμένταρ ντα τι αρχίνεν τι υπηρετίνεν ι Ιεχωβάς αμέντζαρ πριν τι αβέλ ο τέλος. Για παράδειγμας, ο φύλακας κο Φίλιπποι αλλαξάλο ντα αρχισάλο τι πακιάλ κο Ντεβέλ σάντε αφού «αβιλό μπαρό σεισμός». Αντικάς-ντα, μπέκιμ μερικά τζενέ σο να ασουνένα ακανά τι αλλάνεν αφού κα καταστραφίντιβελ η Βαβυλώνα η Μπαρί, επειδή ανταβά πράγμας κα σαστίνελ ι ντουνιάς.​—Πράξ. 16:25-34.

ΚΕΡΑΣΑ ΕΡΓΟΣ ΕΠΕΙΔΗ ΜΑΝΓΚΑΣΑ Ι ΙΕΧΩΒΑΣ ΝΤΑ ΛΕΣΚΟ ΝΑΒ

11. Σαρ ντάσα κο Ιεχωβά δόξα, τιμή ντα ζορ; (Αποκάλυψη 4:11) (Ντικχέν ο φωτογραφίες-ντα)

¹¹ Ο πο σημαντικός λόγος σο μουτθαβάσα ο λατσσέ αμπέρια ισί ότι μανγκάσα ι Ιεχωβά Ντεβλές ντα λέσκο άγιος ναβ. Ντικχάσα αμαρό έργος σαρ εκ τρόπος για τι ντας δόξα ι Ντεβλές σο μανγκάσα. (Διαβάνεν Αποκάλυψη 4:11) Συμφωνίνασα αντράλ αμαρέ γκίσταρ ότι ο Ιεχωβά Ντεβέλ ισί άξιος τι λελ ι δόξα, ι τιμή ντα ι ζορ κατά αφοσιωμέ υπηρέτες λέσκε. Ντάσα-λες δόξα ντα τιμή κάνα βακεράσα κο γιαβερά ο αποδείξεις σο σικαβένα ότι βοβ “κερντάς-λεν σαρέ” ντα ότι χάρη λέσταρ τθεράσα αμαρί ζωή. Ντάσα-λες ζορ​—αμαρί ζορ​—κάνα χρησιμοποιήνασα αμαρό σαάτι, αμαρί ζορ ντα αμαρέ  λοβέ για τι κεράς καζόμ πο μπουτ έργος μπορίνασα. (Ματθ. 6:33· Λουκ. 13:24· Κολ. 3:23) Για τι βακεράς-λες απλά, μπεϊντίνασα τι κεράς λάφι ι Ντεβλέσκε σο μανγκάσα. Ντα μανγκάσα τι κεράς λάφι κο γιαβερά λέσκε ναβέσκε ντα τι μουτθαβάς σο Ντεβέλ ισί. Σόσκε;

12. Σαρ αγιάνασα ο ναβ ι Ιεχωβάσκο αμαρέ εργόστε;

¹² Αμαρί αγάπη ι Ιεχωβάσκε τσσίντελα-αμέν τι αγιάνας λέσκο ναβ. (Ματθ. 6:9) Μανγκάσα αμέν-ντα τι κεράς κάτι για τι καθαρίντιβελ ι Ιεχωβάσκο ναβ κατά μπέτι ψέματα σο βακερντάς ο Μπενγκ. (Γέν. 3:1-5· Ιώβ 2:4· Ιωάν. 8:44) Αμαρέ εργόστε, μανγκάσα μπουτ τι υπερασπίνας αμαρέ Ντεβλές ντα τι βακεράς ι αλήθεια λέσκε σαρέ κο τζενέ σο μανγκένα τι ασουνέν. Μανγκάσα τι σικλιόν σαρέ ο τζενέ ότι η πο σημαντική ιδιότητα σο τθερέλα ισί η αγάπη, ότι ο τρόπος σο κυβερνίνελα ισί σωστός ντα δίκαιος ντα ότι λέσκι Βασιλεία ατζεχάνικ κα σταματίνελ σαρέ ο βάσανα ντα κα ανέλ ειρήνη ντα ευτυχία κο τζενέ. (Ψαλμ. 37:10, 11, 29· 1 Ιωάν. 4:8) Κάνα υπερασπίνασα ο ναβ ι Ιεχωβάσκο αμαρέ εργόστε, αγιάνασα λέσκο ναβ. Επίσης, ισινάμ ευτυχισμέ επειδή κεράσα οντουβά σο πρέπει τι κεράς σαρ Μάρτυρες ι Ιεχωβάσκε. Σόσκε βακεράσα-λες ανταβά;

13. Σόσκε ισί προνόμιος αμένγκε τι βακέρντιβας Μάρτυρες ι Ιεχωβάσκε; (Ησαΐας 43:10-12)

¹³ Ο Ιεχωβά τραμπιντάς-αμέν για τι αβάς «μάρτυρες» λέσκε. (Διαβάνεν Ησαΐας 43:​10⁠-12) Μερικά μπρεσά πο τζανγκλέ, εκ επιστολή κατά Κυβερνών Σώμας βακερέλας: «Ο πο μπαρό προνόμιος σο μπορίνελα τι τθερέλ εκ τζενό ισί τι βακέρντιβελ Μάρτυρας ι Ιεχωβάσκο». c Σόσκε; Σκεφτίνεν εκ παράδειγμας. Ανέν τουμαρέ γκοντιάτε ότι ισινέν σε εκ δικαστήριος ντα κατηγορίνενα-τουμέν ότι κερντέν κάτι μπέτι. Ακανά χρειαζίντιβενα εκχέ τζενές σο κα βακερέλ κο γιαβερά ότι  ανταβά ισί ψέμας ντα ότι ισινέν εκ λατσσό τζενό σο ποτές να κα κερέλας ανταβά μπέτι πράγμας. Κας κα τραμπίνενας; Σίγουρα, κάποιον σο τζανένα ντα ντένα λέσκε μπέσα, ντα σο τθερέλα λατσσό ναβ για τι πακιάν-λες ο γιαβερά. Ο Ιεχωβά τραμπιντάς αμέν για τι αβάς λέσκε Μάρτυρες. Ανταβά σικαβέλα ότι τζανέλα-αμέν λατσσές ντα ντέλα αμένγκε μπέσα. Σικαβέλα επίσης ότι ισί σίγουρος ότι κα βακεράς κο γιαβερά ότι σάντε βοβ ισί ο αληθινός Ντεβέλ. Ισί αζόμ μπαρό προνόμιος αμένγκε τι αβάς λέσκε Μάρτυρες σο να χασαράσα καέκ ευκαιρία τι βακεράς λέσκο ναβ ντα τι σικαβάς ότι σαρέ ο ψέματα σο βακέρντιλε λέσκε νανέ μπαγιά. Ανταλέ τροπόσαρ, κεράσα ανταβά σο αμαρό ναβ βακερέλα ότι πρέπει τι κεράς: Ισινάμ Μάρτυρες ι Ιεχωβάσκε!​—Ψαλμ. 83:18· Ρωμ. 10:13-15.

ΚΑ ΣΥΝΕΧΙΝΑΣ ΤΙ ΚΕΡΑΣ ΕΡΓΟΣ ΜΕΧΡΙ ΚΟ ΤΕΛΟΣ

14. Καλά μπουτ σουκάρ πράγματα μπορεί τι αβέν ατζεχάνικ;

¹⁴ Μπεσάσα σαρ σαρ τι ντικχάς σο μπορεί τι αβέλ ατζεχάνικ! Με την ευλογία ι Ιεχωβάσκι, μπεκλεντίνασα τι ντικχάς ατζέ πο μπουτ τζενέν τι γνωρίνεν ι αλήθεια πριν τι αρχίνελ η μπαρί στεναχώρια. Επίσης, ισινάμ μπουτ χαρούμενοι σόσκε ατζέ-ντα κι μπαρί στεναχώρια, κο πο δύσκολος βακίτι σο κα υπαρχίντιβελ ποτές, μπορεί τι ντικχάς γιαβερέ-ντα τζενέν τι νικιόν ι Μπενγκέσκε ντουνιάσταρ ντα τι αρχίνεν τι δοξάνεν ι Ιεχωβάς αμέντζαρ!​—Πράξ. 13:48.

15, 16. Σο κα συνεχίνας τι κεράς, ντα μέχρι κάνα;

¹⁵ Μέχρι αζομάν, τθεράσα έργος τι κεράς. Τθεράσα ο προνόμιος τι κεράς εκ έργος σο να κα αβέλ-πες ποτές ξανά​—τι βακεράς ο λατσσέ αμπέρια ι Ντεβλέσκε Βασιλειάκε σαρί κι πφουβ. Καζόμ κεράσα-λες ανταβά, πρέπει επίσης τι συνεχίνας τι προειδοποιήνας ι τζενέν οντουλένγκε σο κα αβέν-πες ατζεχάνικ. Ο τζενέ πρέπει τι σικλιόν ότι ο τέλος ανταλέ πφιρνέ ντουνιάσκο αβέλα σουγκό. Σοράν, κάνα κα αβέλ ο βακίτι για τι κρίντιβεν ο τζενέ, κα τζανέν ότι ο λάφια σο βακεράας ισινέ κατά Ιεχωβά Ντεβέλ.​—Ιεζ. 38:23.

¹⁶ Οτθάρ, σο ισινάμ αποφασισμέ τι κεράς; Η αγάπη για το λατσσέ αμπέρια, ι τζενένγκε ντα, ατζέ πο μπουτ, ι Ιεχωβά Ντεβλέσκε ντα λέσκε ναβέσκε κα τσσίντελ-αμέν τι συνεχίνας τι κεράς έργος αντράλ αμαρέ γκίσταρ μέχρι τι βακερέλ ο Ιεχωβά: «Ερεσέλα!»