Τζανένας-λες;
Χρησιμοποιήνενας ο τζενέ κο πουρανέ μπρεσά ο πάπυρος για τι κερέν βάρκες;
Πάπυρος
ΜΠΟΥΤ τζενέ τζανένα ότι κο πουρανέ μπρεσά ο τζενέ κι Αίγυπτος χρησιμοποιήνενας ο πάπυρος για τι γραφίνεν οπρά-λέστε. Επίσης, εμ ο Έλληνες εμ ο Ρωμαίοι γραφίνενας κο πάπυρος. * Αλλά χάνικ τζενέ τζανένα ότι χρησιμοποιήνενας ο πάπυρος για τι κερέν βάρκες.
Ντούι χουρντέ βάρκες από πάπυρος σο αρακχλέ αντρέ εκχέ μεζαρίστε κι Αίγυπτος
Πριν από 2.500 ντα πιο μπουτ μπρεσά, ο προφήτης Ησαΐας γραφιντάς ότι ο τζενέ σο τζουβντιόνας πασέ κο «λενιά κι Αιθιοπία» μπουτσσαβένας “τζενέν σο νακχένας ι ντεριάβ βαρκέντζαρ κερντέ από πάπυρος”. Σοράν, ο προφήτης Ιερεμίας βακερντάς ότι, κάνα ο Μήδοι ντα ο Πέρσες κα τσσουβένας-πες κι Βαβυλώνα, κα πφαμπαρένας «ο καράβια [ι Βαβυλωνιόνγκε] σο ισινέ κερντέ από πάπυρος» για μα τι μπορίνεν τι νασέν.—Ησ. 18:1, 2· Ιερ. 51:32.
Η Αγία Γραφή ισί κατά Ντεβέλ, οντουλέσκε ο τζενέ σο διαβάνενα ι Γραφή να σαστίνενα σο ο αρχαιολόγοι αρακχένα πράγματα σο σικαβένα ότι κο πουρανέ μπρεσά ο τζενέ μπαγιά κερένας βάρκες από πάπυρος. (2 Τιμ. 3:16) Σο αρακχλέ; Ο αρχαιολόγοι αρακχλέ σημαντικά πράγματα σο σικαβένα ότι κι Αίγυπτος ο τζενέ κερένας βάρκες από πάπυρος.
ΣΑΡ ΚΕΡΝΤΙΟΝΑΣ Ο ΒΑΡΚΕΣ ΑΠΟ ΠΑΠΥΡΟΣ;
Μερικές ζωγραφιές κο μεζάρια κι Αιγυπτιόνγκε σικαβένα σαρ γκίντενας ο πάπυρος ντα σοράν σαρ κερένας ο βάρκες. Τσσινένας ο πάπυροι, ντανιάνενας-λεν ντα πφάντενας-λεν σαρέ γιεκ. Ο κάθε πάπυρος ισί τριγωνικός. Οτθάρ, κάνα πφάντενας-λεν σικίς, αβένας εκ μπαρό ντα ζουρανό δεμάτι. Σαρ βακερέλα ο βιβλίος Εγχειρίδιο για την Αρχαία Αίγυπτο (A Companion to Ancient Egypt), ο βάρκες σο ισινέ κερντέ από πάπυρος μπορίνενας τι ερεσέν μέχρι 17 μέτρα, κάτι σο μανγκέλα τι βακερέλ ότι ερεσένας 10 ή 12 κουπιά κι κάθε πλευρά.
Ντούι χουρντέ βάρκες από πάπυρος σο αρακχλέ αντρέ εκχέ μεζαρίστε κι Αίγυπτος
ΣΟΣΚΕ ΧΡΗΣΙΜΟΠΟΙΗΝΕΝΑΣ Ο ΠΑΠΥΡΟΣ ΟΝΤΟΥΛΑ ΣΟ ΚΕΡΕΝΑΣ Ο ΒΑΡΚΕΣ;
Ο πάπυρος ισινέ κάτι σο αρακχένας-λες μπουτ εύκολα ο τζενέ κι λεν Νείλος. Επίσης, ο βάρκες από πάπυρος ισινέ μπουτ εύκολος τι κερντιόν. Ατζέ-ντα κάνα ο πιο μπουτ τζενέ χρησιμοποιήνενας καστά για τι κερέν μπαρέ βάρκες, ντικχίντιβελα ότι ο ψαράδες ντα ο κυνηγοί συνεχίνενας τι χρησιμοποιήνεν χουρντέ βάρκες από πάπυρος.
Για μπουτ μπρεσά, ο τζενέ συνεχίνενας τι χρησιμοποιήνεν ο πάπυρος για τι κερέν βάρκες. Σαρ βακερέλα ο πουρανό συγγραφέας Πλούταρχος, σο τζουβντιλό κο μπρεσά σο τζουβντιόνας ο απόστολοι, ο βάρκες από πάπυρος συνεχίνενας τι χρησιμοποιήντιβεν λέσκε μπρεσέντε.
^ παρ. 3 Ο πάπυρος μπαριόλα κο λίμνες ντα λενιέντε σο να τσσίντελα μπουτ ο πανί. Ερεσέλα μέχρι 5 μέτρα ντα ισί μπουγλό περίπου 15 εκατοστά.
