1, 2. Σο βακερντάς εκ συγγραφέας, ντα σο κα ντικχάς ανταλέ μαθημάστε;

ΑΝΤΙΒΕΣ εκατομμύρια τζενέ βακερένα ότι πακιάνα κο Ιησούς, αλλά να κερένα ο πράγματα σο σικλιαρντάς. (2 Τιμ. 4:3, 4) Εκ συγγραφέας βακερντάς: «Άμα ισινέ εκ γιαβέρ “Ιησούς” αμέντζαρ αντιβές σο κα βακερέλας οντουλά σο βακερντάς ο πρώτος Ιησούς . . . , κα τζάας λέσαρ κόντρα αντιβές σαρ κερντάμας πριν από ντούι χιλιάδες μπρεσά; . . . Η απάντηση ισί: Βα, ανταβά κα κεράας».

² Κάνα ο Ιησούς ισινέ κι πφουβ, μπουτ τζενέ ασουντέ οντουλά σο σικλιαρέλας ντα ντικχλέ τι κερέλ θαύματα, αλλά να μανγκλέ τι πακιάν λέστε. Σόσκε; Κο γιαβέρ μάθημας, ντικχλάμ σταρ λόγους σο ο τζενέ να πακιαντέ κο Ιησούς. Ακανά κα ντικχάς ατζέ σταρ λόγους. Καζόμ κα κεράς-λες ανταβά, κα ντικχάς σόσκε ο τζενέ αντιβές να μανγκένα τι ασουνέν ι Ιησούσκε μαθητέν ντα σο μπορίνασα τι κεράς για μα τι τσσιναβάς τι υπηρετίνας ι Ιεχωβάς.

3. Σόσκε μπουτ τζενέ να πακιαντέ κο Ιησούς;

³ Κάνα ο Ιησούς ισινέ κι πφουβ, κερέλας παρέα σαβέ τι μανγκές τζενέντζαρ. Χάλας τζενέντζαρ σο ισινέ χουλανέ ντα τζενέντζαρ σο τθερένας εξουσία, αλλά επίσης ντέλας πι σαατίσταρ κο τσορορέ ντα οντουλέντε σο τσσίντενας ταλαιπωρία. Ντα πφαμπόλας οντουλένγκε σο ο γιαβερά βακερένας ότι ισινέ «αμαρτωλοί». Επειδή ο Ιησούς κερέλας-λες ανταβά, μερικά μπαρικανέ τζενέ να πακιαντέ λέστε. Πουτσλέ λέσκε μαθητέν: «Σόσκε χάνα ντα πίνα τζενέντζαρ σο γκίντενα ο φόροι ντα οντουλέντζαρ σο ισί αμαρτωλοί;» Ο Ιησούς βακερντάς: «Να χρειαζίντιβενα γιατρός οντουλά σο ισί ζουρανέ, αλλά οντουλά σο ισί νασφαλέ. Με να αβιλόμ τι καλίναβ δίκαιε τζενέν,  αλλά αμαρτωλόν για τι μετανιώνεν».​—Λουκ. 5:​29-32.

4. Σο έπρεπε τι μπεκλεντίνεν ο Ιουδαίοι ι Μεσσιάσκε σαρ βακερντάς ο προφήτης Ησαΐας;

⁴ Σο βακερέλα η Γραφή; Μπουτ μπρεσά πριν τι αβέλ ο Μεσσίας, ο προφήτης Ησαΐας βακερντάς ότι ο τζενέ να κα πακιάνας λέστε. Η προφητεία βακερέλας: «Ο τζενέ να σεβαντέ-λες ντα νασένας πασέ λέσταρ, . . . Ισινέ σαρ τι γκεράντιβελας αμένταρ λέσκο μούι. Ο τζενέ να σεβαντέ-λες, ντα αμντισάλαμ ότι να τθερέλας καέκ αξία». (Ησ. 53:3) Η προφητεία βακερέλας ότι «ο τζενέ» κα νασένας πασάλ κατά Μεσσίας, οντουλέσκε ο Ιουδαίοι κο μπρεσά κι Ιησούσκε έπρεπε τι μπεκλεντίνεν ότι μπουτ τζενέ να κα πακιάνας κο Ιησούς.

5. Σαρ ντικχένα μπουτ τζενέ αντιβές ι Ιησούσκε μαθητέν;

⁵ Τθεράσα ανταβά πρόβλημας αντιβές; Βα. Μπουτ παπάζια χαιρίνενα κάνα τζάνα λένγκε κχανγκιρίντε τζενέ σο ισί σημαντικοί, χουλανέ ντα γκοντιαβέρ κο γιακχά κι ντουνιάσκε. Μουκχένα ασακέ τζενέν τι τζαν λένγκε κχανγκιρίντε παρόλο σο κερένα πράγματα σο να μανγκέλα ο Ντεβέλ. Ο παπάζια να μανγκένα ι Ιεχωβάσκε υπηρετόν, σο ντένα-λες λατρεία αντράλ πουμαρέ γκίσταρ ντα ισί πάκι λέσκε γιακχίντε, σόσκε ο πιο μπουτ τζενέ κο ντουνιάς πακιάνα ότι νανέ σημαντικοί. Σαρ βακερντάς ο Παύλος, ο Ντεβέλ τραμπιντάς οντουλέν σο «να τθερένα αξία». (1 Κορ. 1:​26-29) Όμως, ι Ιεχωβάσκε, σαρέ λέσκε πιστοί υπηρέτες ισί μπουτ σημαντικοί.

6. Σο βακερντάς ο Ιησούς κο εδάφια Ματθαίος 11:​25, 26, ντα σαρ μπορίνασα αμέν τι μοιάζας λέστε;

⁶ Σο κα βοηθίνελ-αμέν μα τι χασαράς αμαρί πίστη; (Διαβάνεν Ματθαίος 11:​25, 26) Μα μουκχέν οντουλά σο σκεφτίνελα ο ντουνιάς ι Ντεβλέσκε λαόσκε τι επηρεάνεν-τουμέν. Μα μπιστρέν ότι ο Ιεχωβά τραμπίνελα σάντε ταπεινέ τζενέν για τι κερέλ οντουβά σο μανγκέλα. (Ψαλμ. 138:6) Ντα σκεφτίνεν καζόμ μπουτ πράγματα κερντάς επειδή χρησιμοποιηντάς οντουλέν σο νανέ γκοντιαβέρ κο γιακχά κι ντουνιάσκε.

7. Σόσκε βακερντάς ο Ιησούς ότι ο Φαρισαίοι ισινέ υποκριτές, ντα σο κερντέ βον;

⁷ Ο Ιησούς μπίνταρανες σικαντάς ότι ο αρχηγοί ι θρησκειάκε αζομάν να σικλιαρένας ι τζενέν τι υπηρετίνεν ι Ιεχωβάς σωστά. Για παράδειγμας, σικαντάς ότι ο Φαρισαίοι ισινέ υποκριτές σόσκε χάλας-λεν ανάγκη πιο μπουτ σαρ τι τθοβέν πουμαρέ βαστά παρά σαρ τι φροντίνεν πουμαρέ νταντές ντα πουμαρέ νταγιά. (Ματθ. 15:​1-11) Ο μαθητές ι Ιησούσκε μπορεί τι σαστισάλε οντουλέντζαρ σο βακερντάς. Οτθάρ, πουτσλέ-λες: «Τζανέσα ότι ο Φαρισαίοι χολιασάλε κάνα ασουντέ οντουβά σο βακερντάν;» Ο Ιησούς βακερντάς λένγκε: «Κάθε φυτός σο να φυτιντάς μο Ντατ σο ισί κο ουρανός κα νικαβέλ-λες ριζάσαρ. Μουκχέν-λεν. Παρόλο σο ισί κορορέ σικαβένα ι γιαβερένγκε κάι τι τζαν. Άμα εκ κορορό σικαβέλα εκχέ γιαβερέ κορορέσκε κάι τι τζαλ, ο ντούι-ντα κα περέν κι γούρνα». (Ματθ. 15:​12-14) Παρόλο σο ο αρχηγοί ι θρησκειάκε χολιασάλε ι Ιησούσκε οντουλένγκε σο βακερντάς, βοβ να τσσιναντάς τι βακερέλ ι αλήθεια.

8. Σαρ σικαντάς ο Ιησούς ότι ο Ντεβέλ να μανγκέλας σαρέ ο πράγματα σο πακιάνας ο αρχηγοί ι θρησκειάκε;

⁸ Ο Ιησούς σικαντάς επίσης ότι μερικά πράγματα σο σικλιαρένας ο αρχηγοί ι θρησκειάκε ισινέ λάθος. Να βακερντάς ότι ο Ντεβέλ μανγκέλας σαρέ ο πράγματα σο πακιάνας. Οκιά μπάνταρ, βακερντάς ότι μπουτ τζενέ κα αβένας κο μπουγλό ντρομ σο οδηγίνελα κι καταστροφή, αλλά σάντε χάνικ κα αβένας κο δύσκολος ντρομ σο οδηγίνελα κι ζωή. (Ματθ. 7:​13, 14) Ντινάς-λεν τι αγαβέν ότι μερικά τζενέ κα βακερένας ότι υπηρετίνενα ι Ντεβλές, αλλά κι πραγματικότητα να κα υπηρετίνενας-λες. Βακερντάς: «Τι προσοχίνεν κατά ψεύτικοι προφήτες σο  αβένα τουμένγκε ιριαντέ σαρ μπρακέ, αλλά αντρά-πουμένταρ ισί λύκοι σο μανγκένα τι χαν-τουμέν. Οντουλένταρ σο κερένα κα αγαβέν-λεν».​—Ματθ. 7:​15-20.

9. Καλά πράγματα σο σικλιαρένας ο αρχηγοί ι θρησκειάκε σικαντάς ο Ιησούς ότι ισινέ λάθος;

⁹ Σο βακερέλα η Γραφή; Εκ προφητεία ι Γραφιάκι βακερέλας ότι ο Μεσσίας κα πφαμπόλας μπουτ ι Ντεβλέσκε κχερέσκε. (Ψαλμ. 69:9· Ιωάν. 2:​14-17) Ανταβά κερντάς ι Ιησούς τι σικαβέλ ότι μερικά πράγματα σο πακιάνας ντα κερένας ο αρχηγοί ι θρησκειάκε ισινέ λάθος. Για παράδειγμας, ο Φαρισαίοι πακιάνας ότι η ψυχή ι τζενένγκι να μερέλα. Αλλά ο Ιησούς σικλιαρντάς ότι ο μουλέ σοβένα. (Ιωάν. 11:​11) Ο Σαδδουκαίοι να πακιάνας ότι ο μουλέ κα τζουβντιόνας. Αλλά ο Ιησούς τζουβντιαρντάς πι αμαλές, ι Λαζαρός. (Ιωάν. 11:​43, 44· Πράξ. 23:8) Ο Φαρισαίοι πακιάνας ότι σο-ντα αβέλας-πες ισινέ γραμμέ κατά Ντεβέλ. Αλλά ο Ιησούς σικλιαρντάς ότι ο τζενέ μπορίνενα τι τραμπίνεν άμα κα υπηρετίνεν ι Ντεβλές ή όχι.​—Ματθ. 11:28.

10. Σόσκε μπουτ τζενέ να μανγκένα τι ασουνέν οντουλά σο σικλιαράσα;

¹⁰ Τθεράσα ανταβά πρόβλημας αντιβές; Βα. Μερικά τζενέ να μανγκένα τι ασουνέν-αμέν σόσκε χρησιμοποιήνασα ι Γραφή για τι σικαβάς κο τζενέ ότι μερικά πράγματα σο σικλιαρέλα η θρησκεία ισί λάθος. Ο παπάζια σικλιαρένα ότι ο Ντεβέλ τιμωρίνελα ι γκεραλέ τζενέν κι κόλαση. Βακερένα ανταβά ψέμας για τι νταραβέν ι τζενέν ντα αντικάς τι κερέν-λεν σο μανγκένα. Σαρ υπηρέτες ι Ιεχωβάσκε, εκχέ Ντεβλέσκε σο ισί αγάπη, βοηθίνασα ι τζενέν τι αγαβέν ότι ανταβά σικλιαριπέ ισί εκ ψέμας. Ο παπάζια σικλιαρένα επίσης ότι η ψυχή εκχέ τζενέσκι να μερέλα. Αμέν σικαβάσα ότι ανταβά να βακερέλα-λες η Γραφή σόσκε, άμα ισινέ μπαγιά, να κα τθεράας ανάγκη ι ανάσταση. Ντα παρόλο σο μπουτ θρησκείες σικλιαρένα ότι σο-ντα αβέλα-πες ισί γραμμέ κατά Ντεβέλ, αμέν σικλιαράσα ότι ο τζενό τθερέλα ι ελευθερία τι τραμπίνελ σο κα κερέλ ντα μπορίνελα τι τραμπίνελ τι υπηρετίνελ ι Ντεβλές. Σο κερένα ο παπάζια κάνα βακεράσα κο τζενέ ότι οντουλά σο σικλιαρένα ισί ψέματα; Μπουτ φαρ, χολιάνενα!

11. Σο μανγκέλα ο Ντεβέλ πι λαόσταρ σαρ βακερένα ο λάφια ι Ιησούσκε κο εδάφια Ιωάννης 8:​45-47;

¹¹ Σο κα βοηθίνελ-αμέν μα τι χασαράς αμαρί πίστη; Άμα μανγκάσα ι αλήθεια, πρέπει τι  πακιάς ντα τι ντας καν οντουλέντε σο βακερέλα ο Ντεβέλ. (Διαβάνεν Ιωάννης 8:​45-47) Αμέν να ισινάμ σαρ ο Σατανάς ο Διάβολος σο να ατσσιλό σταθερός κι αλήθεια. Ποτές να κα κεράς κάτι σο τζάλα κόντρα οντουλέντζαρ σο πακιάσα. (Ιωάν. 8:​44) Ο Ντεβέλ μανγκέλα πι λαόσταρ “τι τζουνγκάλ κατά πφιρνιπέ” ντα “τι ατσσόλ κο λατσσιπέ”, σαρ κερντάς ο Ιησούς.​—Ρωμ. 12:9· Εβρ. 1:9.

12. Σόσκε ο τρόπος σο μουλό ο Ιησούς κερντάς μπουτέ Ιουδαιόν μα τι πακιάν λέστε;

¹² Καβά ισί εκ γιαβέρ λόγος σο μπουτ Ιουδαίοι να πακιαντέ κο Ιησούς; Ο Παύλος βακερντάς: «Αμέν . . . βακεράσα ότι ι Χριστός καρφωντέ-λες κο κας, σο ανταβά ο Ιουδαίοι να μπεϊντιντέ-λες ιτς». (1 Κορ. 1:​23) Σόσκε ο τρόπος σο μουλό ο Ιησούς κερντάς μπουτέ Ιουδαιόν μα τι πακιάν λέστε; Λένγκε, ο μεριπέ ι Ιησούσκο οπράλ κο κας σικαβέλας ότι ισινέ εκ εγκληματίας ντα αμαρτωλός​—όχι ο Μεσσίας.​—Δευτ. 21:​22, 23.

13. Σο να μανγκένας τι αγαβέν οντουλά σο να πακιαντέ κο Ιησούς;

¹³ Ο Ιουδαίοι σο να πακιαντέ κο Ιησούς να μανγκλέ τι αγαβέν ότι ισινέ αθώος, ότι τσσουντέ λέσκε ο βάρετα εκχέ πραγμάσκε σο να κερντάας ντα ότι αδικιντέ-λες. Οντουλά σο δικαντέ ι Ιησούς κερντέ μπουτ πράγματα σο να ισινέ σωστά. Ο δικαστές ι πιο μπαρέ ιουδαϊκέ δικαστηριόσκε γκιντισάλε μπουτ σουγκό, ντα κερντέ ι δίκη χωρίς τι ντεν καν κο νόμοι σο υπαρχίντιβενας. (Λουκ. 22:​54· Ιωάν. 18:​24) Αντίς τι ασουνέν ο πράγματα αντικάς σαρ ισινέ, βον ρόντενας τι αρακχέν εκ ψέμας ι Ιησούσκε για τι μουνταρέν-λες. Αλλά να μπορισάλε τι κερέν-λες ανταβά, οτθάρ ο αρχιερέας προσπαθιντάς τι κερέλ ι Ιησούς τι βακερέλ κάτι σο κα σικαβέλας ότι να ισινέ αθώος. Ανταβά τζάλας κόντρα κο νόμοι. (Ματθ. 26:​59· Μάρκ. 14:​55-64) Ντα κάνα ο Ιησούς αναστισάλο, οντουλά δικαστές ντινέ κο Ρωμαίοι στρατιώτες σο αρακχαβένας λέσκο μεζάρι «μπερεκέτι ασημένια νομίσματα» για τι βακερέν εκ ψεύτικη ιστορία σο κα εξηγίνελας σόσκε ο μεζάρι ισινέ τσουτσό.​—Ματθ. 28:​11-15.

14. Σο βακερέλας η Γραφή ι μεριμάσκε σο κα τθερέλας ο Μεσσίας;

¹⁴ Σο βακερέλα η Γραφή; Παρόλο σο μπουτ  Ιουδαίοι κο ντιβεσά κι Ιησούσκε να μπεκλεντίνενας ότι ο Μεσσίας κα χρειαζίντιβελας τι μερέλ, ντικχέν σο βακερέλας η Γραφή: «Τσσορντάς πι ζωή μέχρι τι μερέλ ντα μοιασκιαρντέ-λες τζενέντζαρ σο ισινέ αμαρτωλοί· λιντάς οπρά-πέστε ι αμαρτία μπουτένγκι ντα ντινάς πι ζωή οντουλένγκε σο ισινέ αμαρτωλοί». (Ησ. 53:​12) Οτθάρ, κάνα ο Ιησούς μουλό σαρ αμαρτωλός, ο Ιουδαίοι να τθερένας καέκ λόγος τι βακερέν ότι να ισινέ ο Μεσσίας.

15. Καλά πράγματα σο βακερένα ι Ιεχωβάσκε Μαρτυρένγκε κερντέ μερικέ τζενέν μα τι μανγκέν τι ασουνέν-λεν;

¹⁵ Τθεράσα ανταβά πρόβλημας αντιβές; Βα! Ι Ιησούσκε τσσουντέ λέσκε ο βάρετα εκχέ πραγμάσκε σο να κερντάς ντα αδικιντέ-λες. Ο ίδια πράγματα κερένα αντιβές-ντα ι Ιεχωβάσκε Μαρτυρένγκε. Ντικχέν χάνικ παραδείγματα. Κο Ηνωμένες Πολιτείες, κο μπρεσά 1930 με 1950, κερντάμ μπουτ δικαστήρια για τι μπορίνας τι ντας λατρεία ι Ντεβλές ελεύθερα. Μερικοί δικαστές πακιάνας λάθος πράγματα αμένγκε. Κο Κεμπέκ, σο ισί κο Καναδάς, η Καθολική Κχανγκιρί ντα ο Κράτος προσπαθιντέ γιεκ τι τσσιναβέν αμαρό έργος. Μπουτέ πφραλέν τσσουντέ-λεν κι φυλακή σόσκε βακερένας πουμαρέ γειτονένγκε ι Ντεβλέσκε Βασιλειάκε. Κι Γερμανία, ο Ναζί μουνταρντέ μπουτέ πιστέ τερνέ πφραλέν. Ντα ακανά τελευταία, οντουλά σο κερένα κουμάντος κι Ρωσία πακιάνα ότι αμαρέ πφραλά τζάνα κόντρα κο κράτος επειδή κερένα λάφι ι Γραφιάκε, οτθάρ τσσουντέ μπουτέν κι φυλακή. Ατζέ-ντα η Μετάφραση Νέου Κόσμου σο ισί κι ρωσική τσσιπ ισί απαγορευμέ ντα βακερένα ότι ισί εκ βιβλίος σο τζάλα κόντρα κο κράτος σόσκε τθερέλα αντρέ ο ναβ Ιεχωβά.

16. Σόσκε δεν πρέπει τι ασουνάς ο ψεύτικες ιστορίες σο βακερένα ι Ιεχωβάσκε λαόσκε σαρ σικαβέλα ο εδάφιος 1 Ιωάννη 4:1;

¹⁶ Σο κα βοηθίνελ-αμέν μα τι χασαράς αμαρί πίστη; Σικλιόν σαρ ισί μπαγιά ο πράγματα. Κι Επί του Όρους Ομιλία, ο Ιησούς βακερντάς οντουλένγκε σο ασουνένας-λες ότι μερικοί “κα βακερένας σαβέ τι μανγκές ψέματα για τι κερέν λένγκε ζιάνι”. (Ματθ. 5:​11) Ανταλά ψέματα αβένα κατά Μπενγκ. Βοβ τσσουβέλα τζενέν σο τζάνα κόντρα οντουλέντζαρ σο μανγκένα ι αλήθεια τι βακερέν μπαρέ ψέματα λένγκε. (Αποκ. 12:9, 10) Δεν πρέπει τι ασουνάς ο ψέματα σο βακερένα οντουλά σο τζάνα αμέντζαρ κόντρα. Δεν πρέπει ποτές τι μουκχάς ασακέ ψέματα τι νταραβέν-αμέν ή τι κερέν-αμέν τι χασαράς αμαρί πίστη.​—Διαβάνεν 1 Ιωάννη 4:1.

17. Σαρ κα μπορίνενας ο πράγματα σο αβιλέ-πες πριν τι μερέλ ο Ιησούς τι κερέν μερικέ τζενέν μα τι μανγκέν τι αβέν λέσκε μαθητές;

¹⁷ Χάνικ πριν τι μερέλ ο Ιησούς, εκ κατά 12 απόστολοι λέσκε προδοντάς-λες. Εκ γιαβέρ απόστολος βακερντάς τριν φαρ ότι να τζανέλας-λες, ντα σαρέ λέσκε απόστολοι μουκχλέ-λες κορκορό ι ιράτ πριν τι μερέλ. (Ματθ. 26:​14-16, 47, 56, 75) Ανταβά να κερντάς εντύπωση ι Ιησούσκε. Βακερντάας ότι ανταβά κα αβέλας-πες. (Ιωάν. 6:​64· 13:​21, 26, 38· 16:​32) Κάνα αβιλέ-πες ανταλά πράγματα, μερικοί μπορεί τι αποφασιντέ ότι να μανγκένας τι αβέν λέσκε μαθητές. Μπορεί τι σκεφτίνενας: “Άμα ισί αντικάς ο απόστολοι ι Ιησούσκε, να μανγκάβα τι αβάβ σαρ λέντε!”

18. Καλά προφητείες νικίστιλε μπαγιά χάνικ πριν τι μερέλ ο Ιησούς;

¹⁸ Σο βακερέλα η Γραφή; Μπουτ μπρεσά πριν τι αβέλ ο Ιησούς κι πφουβ, ο Ιεχωβά βακερντάας ότι ο Μεσσίας κα προδόντιβελας για 30 ασημένια νομίσματα. (Ζαχ. 11:​12, 13) Οντουβά σο κα προδόνελας-λες κα αβέλας εκ κατά πιο λατσσέ αμαλά σο κα τθερέλας. (Ψαλμ. 41:9) «Μούνταρ ι τσομπανής, ντα μουκχ τι τρουγίντιβεν ο μπρακέ». (Ζαχ. 13:7) Αντίς τι τσσιναβέν ο πιστά τζενέ τι πακιάν  κο Ιησούς ιτιρί οντουλένταρ σο αβιλέ-πες, λένγκι πίστη αβιλί πιο ζουρανί κάνα ντικχλέ τι νικιόν μπαγιά ανταλά προφητείες.

19. Σο τζανένα ο πιστά τζενέ;

¹⁹ Τθεράσα ανταβά πρόβλημας αντιβές; Βα. Αμαρέ ντιβεσέντε, μερικοί Μάρτυρες σο τζανένας-λεν μπουτ τζενέ τσσιναντέ τι υπηρετίνεν ι Ιεχωβάς, αβιλέ αποστάτες ντα σοράν προσπαθιντέ τι λεν γιαβερέν-ντα παλά-πουμέντε. Ασακέ τζενέ βακερένα μπαρέ ψέματα ι Ιεχωβάσκε Μαρτυρένγκε κο εφημερίδες, κο ράδιος, κι τηλεόραση ντα κο Ίντερνετ. Αλλά ο πιστά τζενέ να χασαρένα πουμαρί πίστη. Οκιά μπάνταρ, τζανένα ότι η Γραφή βακερντάς ότι κα αβένας-πες ασακέ πράγματα.​—Ματθ. 24:​24· 2 Πέτρ. 2:​18-22.

20. Σο μπορίνασα τι κεράς για μα τι χασαράς αμαρί πίστη οντουλένταρ σο τσσιναντέ τι υπηρετίνεν ι Ιεχωβάς; (2 Τιμόθεο 4:4, 5)

²⁰ Σο κα βοηθίνελ-αμέν μα τι χασαράς αμαρί πίστη; Πρέπει τι ατσσικιαράς αμαρί πίστη ζουρανί. Για τι κεράς-λες ανταβά, χρειαζίντιβελα τι διαβάνας ι Γραφή κάθε ντιβές, τι κεράς προσευχή συνέχεια ντα τι κεράς μπουτ πράγματα κο έργος σο ντινάς-αμέν ο Ιεχωβά. (Διαβάνεν 2 Τιμόθεο 4:4, 5) Άμα τθεράσα πίστη, να κα νταράς κάνα ασουνάσα μπέτι πράγματα ι Ιεχωβάσκε Μαρτυρένγκε. (Ησ. 28:​16) Αμαρί αγάπη ι Ιεχωβάσκε, λέσκε Λαφίσκε ντα αμαρέ πφραλένγκε κα βοηθίνελ-αμέν μα τι χασαράς αμαρί πίστη οντουλένταρ σο τσσιναντέ τι υπηρετίνεν ι Ιεχωβάς.

21. Παρόλο σο ο πιο μπουτ τζενέ αντιβές να μανγκένα τι ασουνέν οντουλά σο βακεράσα λένγκε, καλέ πραγμάσκε μπορίνασα τι αβάς σίγουροι;

²¹ Κο μπρεσά κι Ιησούσκε, μπουτ τζενέ να πακιαντέ λέστε. Αλλά μπουτ γιαβερά πακιαντέ λέστε. Αντρέ οντουλέντε ισινέ εκ τζενό-ντα κατά Σάνχεδριν αλλά εμ «μπουτ ιερείς». (Πράξ. 6:7· Ματθ. 27:​57-60· Μάρκ. 15:​43) Αντικάς αντιβές-ντα, μπουτ τζενέ αποφασιντέ τι αβέν μαθητές ι Ιησούσκε. Σόσκε; Επειδή τζανένα ντα μανγκένα ο αλήθειες σο ισί αντρέ κι Γραφή. Ο Λάφι ι Ντεβλέσκο βακερέλα: «Μπαρί ειρήνη τθερένα οντουλά σο μανγκένα το νόμος· τίποτα ναστί κερέλα-λεν τι χασαρέν πουμαρί πίστη».​—Ψαλμ. 119:​165.