1. Σο παράδειγμας μουκχλάς ο Ιησούς πι μαθητένγκε, ντα σο κερντέ βον; (Ντικχέν ι φωτογραφία κι ανγκλαϊνί σελίδα)

ΚΑΝΑ ο Ιησούς ισινέ κι πφουβ, συνεχίνελας τι κερέλ πο έργος χαράσαρ ντα μανγκέλα πι μαθητένταρ-ντα τι κερέν ο ίδιος. (Ιωάν. 4:​35, 36) Καζόμ ο Ιησούς ισινέ πι μαθητέντζαρ, βον κερένας έργος αντράλ πουμαρέ γκίσταρ. (Λουκ. 10:1, 5-11, 17) Κάνα όμως ι Ιησούς ασταρντέ-λες ντα μουνταρντέ-λες, ο μαθητές για χάνικα να μανγκένας τι τζαν τι κερέν έργος. (Ιωάν. 16:​32) Κάνα αναστισάλο ο Ιησούς, βακερντάς λένγκε τι τσσουβέν ο έργος κι πρώτη θέση. Σοράν, αφού γκιλό κο ουρανός, ο μαθητές κερένας αζόμ μπουτ έργος σο λένγκε ντουσμάνια βακερντέ χολιάσαρ: «Πφερντέν ι Ιερουσαλήμ τουμαρέ σικλιαριμάσαρ».​—Πράξ. 5:28.

2. Σαρ ευλογιντάς ο Ιεχωβά ο έργος;

² Ο Ιησούς οδηγίνελας ι πρώτε Χριστιανόν καζόμ κερένας έργος, ντα ο Ιεχωβά βοηθιντάς-λεν. Οτθάρ, μπουτ τζενέ ασουντέ ο λατσσέ αμπέρια. Για παράδειγμας, κι Πεντηκοστή κο 33 Κ.Χ. μπολντιλέ περίπου 3.000 τζενέ. (Πράξ. 2:​41) Ντα καζόμ τζάλας, αβένας πιο μπουτ μαθητές. (Πράξ. 6:7) Όμως, ο Ιησούς βακερντάς ότι ο λατσσέ αμπέρια κα ασουνένας-λεν ατζέ πιο μπουτ τζενέ κο τελευταία ντιβεσά.​—Ιωάν. 14:​12· Πράξ. 1:8.

3, 4. Σόσκε μερικέ τθεμέντε ο έργος ισί δύσκολος, ντα σο κα ντικχάς ανταλέ μαθημάστε;

³ Σαρέ προσπαθίνασα τι κεράς αμαρό έργος χαράσαρ. Ανταβά ισί εύκολος μερικέ τθεμέντε. Σόσκε; Επειδή οντουλέ τθεμέντε υπαρχίντιβενα μπουτ τζενέ σο μανγκένα τι κερέν μελέτη αλλά μερικοί λένταρ πρέπει τι μπεκλεντίνεν μέχρι τι μπορίνελ εκ Μάρτυρας! Αλλά γιαβερέ τθεμέντε, ι πφραλένγκε ο έργος ισί πιο δύσκολος επειδή ο τζενέ ο πιο μπουτ φαρ νανέ  πουμαρέ κχερέντε, ντα οντουλά σο ισί κχερέ μπέκιμ να μανγκένα τι ασουνέν ι Γραφιάκε.

⁴ Άμα τζουβντιόνα εκχέ τθεμέστε σο ο έργος νανέ αζόμ εύκολος, ο συμβουλές σο ισί ανταλέ μαθημάστε μάλλον κα βοηθίνεν-τουμέν. Κα ντικχάς σο κερντέ μερικοί για τι αρακχέν πιο μπουτ τζενέν κο έργος. Κα ντικχάς επίσης σόσκε μπορίνασα τι συνεχίνας τι κεράς ο έργος χαράσαρ είτε ασουνένα-αμέν ο τζενέ είτε να ασουνένα-αμέν.

5. Καλά δυσκολίες τθερένα μπουτ Μάρτυρες;

⁵ Καζόμ τζάλα, αβέλα ατζέ πιο δύσκολος μπουτέ Μαρτυρένγκε τι αρακχέν ι τζενέν κο κχερά. Μερικά πφραλά ισί τθεμέντε σο ο τζενέ μπεσένα πολυκατοικιέντε σο ισί μπουτ δύσκολος τι τζας αντρέ ή κχερέντε σο ισί σαρέ εκχέ τθανέστε ντα τθερένα εκ κεντρική πόρτα. Μπορεί οντουλά πολυκατοικίες ή οντουλά κχερά τι αρακχαβέλα-λεν εκ τζενό σο να μουκχέλα καεκχές τι τζαλ αντρέ άμα νανέ καλεσμέ εκχέ τζενέσταρ σο μπεσέλα οτθέ. Γιαβερέ τθεμέντε ο πφραλά μπορίνενα τι τζαν κχερ κχερέστε πιο εύκολα, αλλά αρακχένα χάνικ τζενέν κο κχερά. Ντα γιαβερά πφραλά κερένα έργος τθεμέντε σο τζουβντιόνα χάνικ τζενέ. Μπορεί τι κερένα μπουτ ντρομ για τι αρακχέν σάντε εκχέ τζενές​—σο μπορεί ατζέ-ντα μα τι αβέλ κχερέ! Άμα τθεράσα ασακέ δυσκολίες δεν πρέπει τι τσσιναβάς τι κεράς έργος. Σο μπορίνασα τι κεράς για τι νακχαβάς ασακέ δυσκολίες ντα τι κεράς λάφι πιο μπουτ τζενέντζαρ;

6. Σαρ μοιάζενα ο τζενέ σο κερένα έργος ι τζενέντζαρ σο ασταρένα ματσσέν;

⁶ Ο Ιησούς μοιασκιαρντάς ο έργος με το ψάρεμας. (Μάρκ. 1:​17) Μερικοί ψαράδες μπορεί μα τι ασταρένα ματσσέν για μπουτ ντιβεσά. Όμως, ανταβά να κερέλα-λεν τι τσσιναβέν ο ψάρεμας. Οκιά μπάνταρ, αλλάνενα ο τθαν, ο σαάτι ντα ο τρόπος σο ασταρένα ματσσέν. Αμέν-ντα μπορίνασα τι κεράς ασακέ αλλαγές αμαρέ εργόστε. Ακανά κα ντικχάς μερικά πράγματα σο μπορίνασα τι κεράς.

7. Σο μπορεί τι αβέλ-πες κάνα κεράσα έργος εκ γιαβέρ σαάτι;

⁷ Δοκιμάνεν γιαβέρ σαάτι. Κα αρακχάς πιο μπουτ τζενέν άμα κα κεράς έργος κάνα ο τζενέ κα αβέν πουμαρέ κχερέντε. Κάποια στιγμή σαρέ βουρτίνενα πουμαρέ κχερέντε! Μπουτ πφραλά ντα πφενιά κερένα έργος απόγευμας ή νωρίς ιράτ επειδή αρακχένα πιο μπουτ τζενέν. Επίσης, οντουβά σαάτι ο τζενέ μπορεί τι αβέν πιο ήρεμοι ντα τι μανγκέν τι κερέν λάφι. Ή μπέκιμ τι βοηθίνελ-τουμέν η συμβουλή σο ντινάς εκ πρεσβύτερος, ο Ντέιβιντ. Βακερέλα ότι, αφού κερέλα έργος εκχέ πφραλέσαρ εκ ή ντούι σαάτια, σοράν τζάνα πάλι οντουλέντε σο να αρακχλέ. Βακερέλα: «Κερέλα μάνγκε εντύπωση σο αρακχάσα αζόμ μπουτέ τζενέν ι δεύτερη φαρ». *

8. Σαρ μπορίνασα τι κεράς κο έργος οντουβά σο βακερέλα ο εδάφιος Εκκλησιαστής 11:6;

⁸ Κατά εδάφιος ανταλέ μαθημάσκο σικλιάσα ότι πρέπει τι συνεχίνας ο προσπάθειες σο κεράσα για τι αρακχάς ι τζενέν κάνα ισί πουμαρέ κχερέντε. (Διαβάνεν Εκκλησιαστής 11:6) Ο Ντέιβιντ κερντάς-λες ανταβά. Εκχέ κχερέστε, σοράν από μπουτ προσπάθειες, αρακχλάς τελικά ι τζενές. Οντουβά τζενό μανγκέλας τι σικλιόλ ι Γραφιάκε ντα βακερντάς: «Μπεσάβα ατθέ περίπου οχτώ μπρεσά ντα πρώτη φαρ ντικχάβα μι πορτάτε εκχέ Μαρτυράς ι Ιεχωβάσκο». Ο Ντέιβιντ βακερέλα: «Οντουβά σο αγαντόμ με ισί ότι, κάνα τελικά αρακχέσα ι τζενές κο κχερ, ο πιο μπουτ φαρ ασουνέλα οντουβά σο μανγκέσα τι βακερές λέσκε».

9. Σαρ μερικοί Μάρτυρες κερντέ λάφι τζενέντζαρ σο ισί δύσκολος τι αρακχέν-λεν;

⁹ Δοκιμάνεν γιαβέρ τθαν. Για τι κερέν λάφι τζενέντζαρ σο ισί δύσκολος τι αρακχέν-λεν  κο κχερά, μερικά πφραλά κερένα έργος γιαβερέ τθανέντε. Για παράδειγμας, κάνα κερένα έργος κο ντρομ ντα κο σταντ, μπορίνενα τι αρακχέν τζενέν σο μπεσένα μπαρέ πολυκατοικιέντε σο ναστί αρακχένα-λεν κάνα κερένα ο έργος κχερ κχερέστε. Ανταλά τρόποι βοηθίνενα-λεν τι κερέν λάφι ι τζενέντζαρ σο ναστί κα αρακχένας-λεν. Επίσης, μπουτ πφραλά αγαντέ ότι ισί πιο εύκολος ο τζενέ τι κερέν λάφι ή τι λεν έντυπα κάνα ισί κο πάρκα, κο αγορές ή τθανέντε σο ισί μαγαζιά. Ο Φλοϊράν, εκ επίσκοπος περιοχής κι Βολιβία, βακερέλα: «Τζάσα κο αγορές ντα κο μαγαζιά από τις μία μέχρι τις τρεις κο μεσημέρι, κάνα ο τζενέ να τθερένα αζόμ μπουτί. Ο πιο μπουτ φαρ κεράσα σουκάρ συζητήσεις ντα αρχίνασα μελέτες».

10. Σο μπορίνενα τι κερέν για τι αρακχέν πιο μπουτ τζενέν;

¹⁰ Δοκιμάνεν γιαβέρ τρόπος. Βακερέν χάι ότι προσπαθιντέν μπουτ φαρ τι αρακχέν εκχέ τζενές. Γκιλέν λέσκε γιαβέρ σαάτια αλλά να αρακχλέν-λες κο κχερ. Ισί γιαβερά τρόποι για τι αρακχέν εκχέ ασακέ τζενές; Η Καταρίνα βακερέλα: «Γραφίναβα επιστολές οντουλένγκε σο να αρακχάβα ποτές κο κχερ, ντα βακεράβα λένγκε οντουβά σο κα βακεράβας λένγκε άμα κα αρακχάβας-λεν». Σο σικλιάσα; Καζόμ κερένα τουμαρό έργος, τι κερέν σο νακχέλα τουμαρέ βαστέσταρ για τι κερέν λάφι σαρέ ι τζενέντζαρ σο ισί τουμαρέ τομεάστε.

11. Σόσκε μερικά τζενέ να μανγκένα τι ασουνέν οντουλά σο βακεράσα λένγκε;

¹¹ Μερικά τζενέ να μανγκένα τι ασουνέν οντουλά σο βακεράσα λένγκε. Να χάλα-λεν ανάγκη τι σικλιόν ι Ντεβλέσκε ή ι Γραφιάκε.  Να πακιάνα κο Ντεβέλ επειδή ντικχένα αζόμ μπουτ βάσανα κο ντουνιάς. Να μανγκένα τι σικλιόν ι Γραφιάκε επειδή ντικχένα ι παπαζίν, σο βακερένα ότι ντένα καν κι Γραφή, τι κερέν μπουτ πράγματα σο νανέ λατσσέ. Γιαβερά μαρένα-πες πουμαρέ μπουτιέντζαρ, πουμαρέ φαμιλιάσαρ ή πουμαρέ προβληματέντζαρ, ντα να ντικχένα σαρ μπορίνελα τι βοηθίνελ-λεν η Γραφή. Σαρ μπορίνασα τι ατσσικιαράς αμαρί χαρά κάνα οντουλά τζενέ σο κεράσα λένγκε έργος να πακιάνα ότι οντουλά σο βακεράσα λένγκε ισί σημαντικά;

12. Σαρ βοηθίνενα-αμέν κο έργος ο λάφια ι εδαφιόσκε Φιλιππησίους 2:4;

¹² Τι σικαβέν ότι πφαμπόνα ι γιαβερένγκε. Μπουτ τζενέ σο κι αρχή να μανγκένας τι ασουνέν ο λατσσέ αμπέρια σοράν ασουντέ επειδή ο πφραλά σικαντέ ότι πφαμπόνας λένγκε. (Διαβάνεν Φιλιππησίους 2:4) Για παράδειγμας, ο Ντέιβιντ βακερέλα: «Άμα κάποιος βακερέλα αμένγκε ότι να μανγκέλα τι ασουνέλ, τσσουβάσα κι νάκρη αμαρί Γραφή ή ο έντυπα ντα βακεράσα: “Μπορίναβα τι πουτσάβ-τουτ σόσκε βακερέσα-λες ανταβά;”» Ο τζενέ αγαβένα άμα ο γιαβερά πφαμπόνα λένγκε. Μπορεί τι μπιστρέν σο βακερντάμ λένγκε αλλά μάλλον κα ντεν-πες γκοντί σαρ κερντάμ-λεν τι νιωθίνεν. Ατζέ-ντα άμα εκ τζενό να κα μουκχέλ-αμέν τι βακεράς λέσκε ο λατσσέ αμπέρια, μπορίνασα τι σικαβάς ότι πφαμπάσα λέσκε οντουλέντζαρ σο κα βακεράς ντα με το εκφράσεις σο κα κεράς αμαρέ μόσαρ.

13. Σαρ κα μπορίναας τι αλλάνας αμαρό θέμας ανάλογα με το ανάγκες σο τθερέλα εκ τζενό;

¹³ Σικαβάσα ότι πφαμπάσα ι γιαβερένγκε κάνα αλλάνασα αμαρό θέμας ανάλογα με το ανάγκες σο τθερέλα ο κάθε τζενό. Για παράδειγμας, μήπως ντικχάσα κάτι σο σικαβέλα ότι κο κχερ τζουβντιόνα χουρντέ-ντα; Οντουλά σο τθερένα τσσαβέν μπορεί τι μανγκένα τι ασουνέν ο συμβουλές ι Γραφιάκε σο βακερένα σαρ τι μπαριαρέν πουμαρέ τσσαβέν ή ο συμβουλές σο βακερένα σαρ τι τθερέν εκ πιο ευτυχισμέ φαμιλί. Μήπως ντικχάσα μπερεκέτι κλειδαριές λένγκε πορτάτε; Μπορεί τι βακεράς λένγκε ότι κο ντουνιάς αβένα-πες αζόμ μπουτ εγκλήματα σο ανταβά κερέλα μπουτέ τζενέν τι νταρέν. Σοράν, ο τζενό κα χαιρίνελ τι σικλιόλ ότι ατζεχάνικ να κα αβέν εγκλήματα. Κάθε φαρ σο αρακχένα τζενέν σο μανγκένα τι ασουνέν, προσπαθίνεν τι κερέν-λεν τι αγαβέν σο λατσσιπέ μπορίνενα τι κερέν λένγκε ο συμβουλές ι Γραφιάκε. Η Καταρίνα βακερέλα: «Σκεφτίναβα σαρ η αλήθεια κερντάς πιο λατσσί μι ζωή». Οντουλέσκε, η Καταρίνα κερέλα λάφι με σιγουριά, ντα ο τζενέ σο ασουνένα-λα σίγουρα αγαβένα-λες ανταβά.

14. Σαρ μπορίνενα ο πφραλά σο νικιόνα γιεκ κο έργος τι βοηθίνεν ο εκ ι γιαβερές σαρ βακερέλα ο εδάφιος Παροιμίες 27:17;

¹⁴ Τι μανγκέν βοήθεια κατά γιαβερά. Κο  πρώτος αιώνας, ο Παύλος σικλιαρέλας ι Τιμοθεός μπουτ τρόπους για τι βακερέλ ντα τι σικλιαρέλ ο λατσσέ αμπέρια ντα βακερντάς λέσκε τι χρησιμοποιήνελ ανταλά τρόπους για τι βοηθίνελ βοβ-ντα γιαβερέν. (1 Κορ. 4:​17) Σαρ ο Τιμόθεος, αντικάς αμέν-ντα μπορίνασα τι σικλιάς κατά πφραλά κι κχανγκιρί σο κερένα έργος μπουτ μπρεσά. (Διαβάνεν Παροιμίες 27:​17) Ανέν τουμαρέ γκοντιάτε ο παράδειγμας εκχέ πφραλέσκο σο βακερένα λέσκε Σον. Για χάνικ καιρός, κερέλας σκαπανικός εκχέ τθεμέστε σο ο πιο μπουτ τζενέ να μανγκένας τι ασουνέν γιαβερέ θρησκειένγκε. Σαρ ατσσικιαρέλας πι χαρά; «Κάνα μπορίναβας, νικιάβας κο έργος γιαβερέ πφραλέντζαρ», βακερέλα. «Καζόμ τζάας κατά εκ κχερ κο γιαβέρ, με ντα ο πφραλ σο ισινέ μάντζαρ χρησιμοποιήναας γκοντιάσαρ αμαρό σαάτι για τι ντικχάς σαρ κα μπορίναας τι σικλιαράς πιο λατσσές. Για παράδειγμας, κεράας λάφι σαρ γκιλάμας-λεν κο γιαβέρ κχερ ντα σο κα μπορίναας τι κεράς πιο λατσσές άμα κα αβέλας αμένγκε πάλι κάτι ασακό».

15. Σόσκε ισί σημαντικός τι κεράς προσευχή αμαρέ εργόσκε;

¹⁵ Τι κερέν προσευχή κο Ιεχωβά τι βοηθίνελ-τουμέν. Μανγκέν κατά Ιεχωβά τι βοηθίνελ-τουμέν κάθε φαρ σο νικιόνα κο έργος. Άμα να κα τθεράας λέσκο άγιος πνεύμας, καέκ αμένταρ ναστί κα κερέλας τίποτα. (Ψαλμ. 127:1· Λουκ. 11:​13) Κάνα κερένα προσευχή κο Ιεχωβά για τι βοηθίνελ-τουμέν, μανγκέν λέσταρ συγκεκριμέ πράγματα. Για παράδειγμας, μανγκέν λέσταρ τι γκερέλ-τουμέν εκχέ τζενέστε σο μανγκέλα τι σικλιόλ λέσκε ντα ισί έτοιμος τι ασουνέλ. Σοράν, κερέν σο νακχέλα τουμαρέ βαστέσταρ για τι βακερέν ο λατσσέ αμπέρια σαρέ οντουλένγκε σο αρακχένα.

16. Σο λατσσιπέ ντικχάσα κο έργος σο κεράσα κάνα σικλιαράσα-αμέν αντράλ κατά Γραφή;

¹⁶ Τι ντεν τουμαρέ σαατίσταρ για τι σικλιαρέν-τουμέν κατά Γραφή. Ο Λάφι ι Ντεβλέσκο βακερέλα: «Τι σικαβέν τουμαρέ νεαυτόσκε ότι οντουβά σο μανγκέλα ο Ντεβέλ ισί λατσσό ντα σωστός ντα τέλειος». (Ρωμ. 12:2) Καζόμ πιο σίγουροι ισινάμ ότι τζανάσα ι αλήθεια ι Ντεβλέσκε, αζόμ πιο μπαρί κα αβέλ αμαρί σιγουριά κάνα κεράσα λάφι ι γιαβερέντζαρ κο έργος. Η Καταρίνα βακερέλα: «Πριν χάνικ καιρός αγαντόμ ότι έπρεπε τι κεράβ πιο ζουρανί μι πίστη κο βασικά πράγματα σο σικλιαρέλα η Γραφή. Οτθάρ, ροντιντόμ πράγματα σο σικαβένα ότι ο Ντεβέλ ισί οντουβά σο κερντάς-λεν σαρέ, ότι η Γραφή ισί μπαγιά ο Λάφι ι Ντεβλέσκο ντα ότι ο Ντεβέλ αντιβές τθερέλα εκ οργάνωση ατθέ κι πφουβ». Η Καταρίνα βακερέλα ότι επειδή σικλιαρέλας-πες αντράλ κατά Γραφή ανταβά κερντάς πιο ζουρανί λάκι πίστη ντα μπαριαρντάς ατζέ πιο μπουτ λάκι χαρά κο έργος.

17. Σόσκε ο Ιησούς συνεχίνελας πο έργος χαράσαρ;

¹⁷ Ο Ιησούς συνεχίνελας πο έργος χαράσαρ παρόλο σο μερικοί να μανγκένας τι ασουνέν οντουλά σο βακερέλας λένγκε. Σόσκε; Τζανέλας καζόμ μπουτ χρειαζίντιβενας ο τζενέ τι σικλιόν ι αλήθεια ντα μανγκέλας τι ντελ ι ευκαιρία καζόμ αβέλας-πες πιο μπουτ τζενέντε τι ασουνέν ο λατσσέ αμπέρια ι Βασιλειάκε. Επίσης, τζανέλας ότι μερικοί κι αρχή να κα μανγκένας τι ασουνέν αλλά σοράν κα ασουνένας. Ντεν-τουμέν γκοντί σο αβιλό-πες λέσκε φαμιλιάσαρ. Κερέλας έργος τρισήμισι μπρεσά ντα καέκ λέσκε πφραλένταρ να αβιλό μαθητής. (Ιωάν. 7:5) Όμως, αφού αναστισάλο, αβιλέ Χριστιανοί.​—Πράξ. 1:14.

18. Σόσκε συνεχίνασα τι βακεράς ο λατσσέ αμπέρια;

¹⁸ Να τζανάσα τελικά κον κα αβέλ Μάρτυρας ι Ιεχωβάσκο. Μερικοί χρειαζίντιβενα πιο μπουτ χρόνος τι σικλιόν ι αλήθεια. Ατζέ-ντα οντουλά σο να μανγκένα τι ασουνέν-αμέν ντικχένα αμαρί λατσσί συμπεριφορά  ντα ότι συνεχίνασα αμαρό έργος χαράσαρ ντα μπέκιμ τι αρχίνεν τελικά «τι ντεν δόξα ι Ντεβλές».​—1 Πέτρ. 2:12.

19. Καβά πράγμας πρέπει τι τθεράς αμαρέ γκοντιάτε σαρ βακερένα ο εδάφια 1 Κορινθίους 3:6, 7;

¹⁹ Πρέπει τι τθεράς αμαρέ γκοντιάτε ότι αμέν μπορεί τι σπειρίνασα ντα τι ποτίνασα, αλλά ο Ντεβέλ κερέλα-λες τι μπαριόλ. (Διαβάνεν 1 Κορινθίους 3:6, 7) Ο Γκετάχουν, εκ πφραλ σο υπηρετίνελα κι Αιθιοπία, βακερέλα: «Πιο μπουτ από 20 μπρεσά, ισινόμας ο μόνος Μάρτυρας οτθέ σο μπεσάβας. Αλλά ακανά ισί ατθέ 14 πφραλά. Δεκατρία ανταλένταρ μπολντιλέ, αντρέ ανταλέντε μι ρομνί ντα μο τριν τσσαβέ. Κάθε φαρ αβένα κο συναθροίσεις περίπου 32 τζενέ». Ο Γκετάχουν χαιρίνελα σο συνεχιντάς τι κερέλ έργος καζόμ μπεκλεντίνελας με υπομονή τι ταρτίνελ ο Ιεχωβά πασέ πέστε τζενέν σο μανγκένας μπαγιά τι σικλιόν λέσκε!​—Ιωάν. 6:44.

20. Σαρ μοιάζασα οντουλέντζαρ σο ρόντενα τζενένγκε για τι σώνεν-λεν;

²⁰ Ι Ιεχωβάσκε, σαρέ ο τζενέ ισί πολύτιμοι. Ντέλα-αμέν ο προνόμιος τι κεράς έργος γιεκ λέσκε Τσσαβέσαρ για τι γκιντίντιβεν τζενέ σαρέ κατά τθεμά πριν τι αβέλ ο τέλος ανταλέ ντουνιάσκο. (Αγγ. 2:7) Μπορίνασα τι μοιασκιαράς αμαρό έργος ι μπουτιάσαρ σο κερένα οντουλά σο ρόντενα τζενένγκε για τι σώνεν-λεν. Αμέν ισινάμ σαρ ανταλά τζενέ σο μπουτσσάντιβενα τι νικαβέν εκχέ σπηλιάταρ ι τζενέν σο πφαντιλέ αντρέ. Παρόλο σο μπορεί τι αρακχέν χάνικ τζενέν τζουβντέ, η μπουτί σο κερένα σαρέ οντουλά για τι σώνεν ι τζενέν ισί μπουτ πολύτιμη. Ανταβά κα μπορίναας τι βακεράς αμαρέ εργόσκε-ντα. Να τζανάσα καζόμ τζενέ κα σώντιβεν ατζέκ ανταλέ ντουνιάσταρ σο ισί ι Μπενγκέσκο. Αλλά ο Ιεχωβά μπορίνελα τι χρησιμοποιήνελ ι κάθε εκχές αμένταρ για τι βοηθίνελ-λεν. Ο Αντρέας, σο τζουβντιόλα κι Βολιβία, βακερέλα: «Τζανάβα ότι, κάνα εκ τζενό σικλιόλα ι αλήθεια ντα μπολντιόλα, ανταβά αβέλα-πες επειδή μπουτ τζενέ κερντέ μπουτί γιεκ για τι βοηθίνεν-λες». Αντικάς αμέν-ντα, τι συνεχίνας τι κεράς αμαρό έργος χαράσαρ. Άμα κα κεράς-λες ανταβά, ο Ιεχωβά κα ευλογίνελ-αμέν, ντα αμαρό έργος κα ντελ-αμέν μπουτ χαρά.