1. Σο βακερντάς ο Ιησούς για το θησαυροί κο ουρανός;

Ο ΠΡΑΓΜΑΤΑ σο τθερένα ι πιο μπαρί αξία ναστί ντικχίντιβενα. Κι Επί του Όρους Ομιλία, ο Ιησούς βακερντάς ότι ο θησαυροί κο ουρανός ισί μπουτ πιο σημαντικοί κατά χουλανιπέ. Σοράν, βακερντάς ακαγιά αλήθεια: «Οτθέ σο ισί το θησαυρός, οτθέ κα αβέλ το γκι-ντα». (Ματθ. 6:​19-21) Αμαρό γκι κα κερέλ-αμέν τι μανγκάς πράγματα σο αμαρέ γιακχίντε τθερένα μπαρί αξία. Γκίντασα «θησαυρούς κο ουρανός» κάνα κεράσα λατσσό ναβ ανγκλάλ κο Ντεβέλ, ή γιαβέρσοϊ ισινάμ λατσσέ αμαλά λέσαρ. Σαρ βακερντάς ο Ιησούς, ασακέ θησαυροί να κα αβέν ποτές καταστροφή ούτε ναστί τσορέλα-λεν καέκ.

2. (α) Καλέ πραγματέντε βακερέλα ο Παύλος τι ντικχάς σαρ βακερένα ο εδάφια 2 Κορινθίους 4:​17, 18; (β) Σο κα ντικχάς ανταλέ μαθημάστε;

² Ο απόστολος Παύλος βακερέλα αμένγκε τι “τθεράς αμαρέ γιακχά . . . οντουλέντε σο να ντικχίντιβενα”. (Διαβάνεν 2 Κορινθίους 4:​17, 18) Ισί δώρα σο τθερένα τι κερέν σαρέ ι λατσσέ πραγματέντζαρ σο κα τθεράς κο νεβό ντουνιάς κι Ντεβλέσκο. Ανταλέ μαθημάστε, κα ντικχάς σταρ δώρα «σο να ντικχίντιβενα» αλλά μπορίνενα τι κερέν αμένγκε λατσσιπέ από ακανά​—ι φιλία ι Ντεβλέσαρ, ο δώρος ι προσευχιάκο, ι βοήθεια ι άγιε πνευμάσκι ντα ι βοήθεια σο τθεράσα κο έργος κατά Ιεχωβά, κατά Ιησούς ντα κατά άγγελοι. Κα ντικχάς επίσης, σαρ κα σικαβάς εκτίμηση ι Ιεχωβάσκε ανταλέ δωρένγκε σο να ντικχίντιβενα.

3. Καβά ισί ο πιο μπαρό δώρος σο να ντικχίντιβελα, ντα σαρ μπορίνασα τι τθεράς-λες;

³ Ο πιο μπαρό δώρος σο να ντικχίντιβελα ισί αμαρί φιλία ι Ιεχωβά Ντεβλέσαρ. (Ψαλμ. 25:​14) Σαρ αβέλα-πες τι αβέλ ο Ντεβέλ αμάλ αμαρτωλέ τζενέντζαρ ντα τι ατσσόλ ντιπ άγιος; Μπορίνελα τι κερέλ-λες ανταβά σόσκε η θυσία ι Ιησούσκι «νασκιαρέλα ι αμαρτία ι ντουνιάσκι». (Ιωάν. 1:​29) Ο Ιεχωβά τζανέλας  ότι ο Ιησούς κα ατσσόλας πιστός μέχρι κο μεριπέ, πριν ατζέκ τι αβέλ-πες ανταβά, ντα ότι αντικάς κα σώνελας σαρέ ι τζενέν. Άκ’ σόσκε μπορίνελας τι αβέλ αμαλά τζενέντζαρ πριν τι μερέλ ο Χριστός.​—Ρωμ. 3:25.

4. Βακερέν μερικά παραδείγματα μουρσένγκε σο τζουβντιλέ πριν κατά Ιησούς ντα σο αβιλέ αμαλά ι Ντεβλέσαρ.

⁴ Σκεφτίνεν μερικέ τζενέν σο τζουβντιλέ πριν κατά Χριστός ντα σο αβιλέ αμαλά ι Ντεβλέσαρ. Ο Αβραάμ σικαντάς μπαρί πίστη. Πιο μπουτ από 1.000 μπρεσά σοράν λέσκε μεριμάσταρ, ο Ιεχωβά βακερντάς ότι ισινέ λέσκο “αμάλ”. (Ησ. 41:8) Άρα, ατζέ-ντα κάνα μερένα ο τζενέ, κο γιακχά κι Ιεχωβάσκε συνεχίνενα τι αβέν λέσκε λατσσέ αμαλά. Ο Αβραάμ ισί τζουβντό κι Ιεχωβάσκι γκοντί. (Λουκ. 20:​37, 38) Εκ γιαβέρ παράδειγμας ισί ο Ιώβ. Εκ φαρ σο γκιντισάλε ο άγγελοι κο ουρανός, ο Ιεχωβά κερντάς λάφι με σιγουριά για τον Ιώβ. Βακερντάς ότι ισινέ εκ “δίκαιος τζενό σο υπηρετίνελας [ι Ντεβλές] σαστέ γκίσαρ, σο νταρέλας κατά Ντεβέλ ντα σο νασέλας ντουρ κάθε μπέτι πραγμάσταρ”. (Ιώβ 1:​6-8) Ντα σαρ ντικχέλας ο Ιεχωβά ι Δανιηλίς, σο υπηρετίνελας πιστά ι Ντεβλές περίπου 80 μπρεσά εκχέ τθεμέστε σο πακιάνας ψεύτικε ντεβλέντε; Τριν φαρ άγγελοι βακερντέ οντουλέ πφουρέ μουρσέσκε ότι ισινέ «μπουτ αγαπητός» ι Ντεβλέσκε. (Δαν. 9:​23· 10:​11, 19) Ισινάμ σίγουροι ότι ο Ιεχωβά μπεσέλα σαρ σαρ τι αβέλ ο ντιβές σο κα τζουβντιαρέλ πι λατσσέ αμαλέν σο μουλέ.​—Ιώβ 14:15.

5. Σο πρέπει τι κερέλ εκ τζενό άμα μανγκέλα τι αβέλ λατσσό αμάλ ι Ιεχωβάσαρ;

⁵ Καζόμ ατελείς τζενέ αντιβές ισί λατσσέ αμαλά ι Ιεχωβάσαρ; Εκατομμύρια. Τζανάσα-λες ανταβά σόσκε μπουτ μουρσά, τζουβλιά ντα χουρντέ σαρί κι πφουβ σικαβένα οντουλέντζαρ σο κερένα ότι μανγκένα τι αβέν αμαλά ι Ντεβλέσαρ. Ο Ιεχωβά «ισί λατσσό αμάλ οντουλέντζαρ σο ισί δίκαιοι». (Παρ. 3:​32) Ανταβά αβέλα-πες σόσκε πακιάνα κι θυσία κι Ιησούσκι. Οτθάρ, ο Ιεχωβά μουκχέλα-αμέν λατσσιμάσαρ τι ντας-λες αμαρό λάφι ότι κα τζουβντιάς λέσκε ντα τι μπολντιάς. Κάνα κεράσα ανταλά σημαντικά πράγματα, αβάσα γιεκ εκατομμύριε αφιερωμέ ντα μπολντέ Χριστιανόντζαρ σο ισί “λατσσέ αμαλά” Οντουλέσαρ σο ισί ο πιο μπαρό σαρό κο σύμπαν!

6. Σαρ κα σικαβάς ότι εκτιμίνασα ι φιλία σο τθεράσα ι Ντεβλέσαρ;

⁶ Σαρ κα σικαβάς ότι εκτιμίνασα ι φιλία σο τθεράσα ι Ντεβλέσαρ; Σαρ ο Αβραάμ ντα ο Ιώβ, σο ατσσιλέ πιστοί πιο μπουτ από σελ μπρεσά, αντικάς αμέν-ντα πρέπει τι ατσσάς πιστοί​—καζόμ-ντα μπρεσά τι υπηρετίνασα ι Ιεχωβάς ανταλέ πουρανέ ντουνιάστε. Σαρ ο Δανιήλ, αντικάς αμέν-ντα πρέπει τι ντικχάς αμαρί φιλία ι Ντεβλέσαρ πιο σημαντική αμαρέ ζωγιάταρ. (Δαν. 6:7, 10, 16, 22) Με τη βοήθεια ι Ιεχωβάσκι, κα νταϊντίνας σαβέ τι μανγκές δοκιμασίες για μα τι τσσιναβάς τι αβάς λέσκε αμαλά.​—Φιλιπ. 4:13.

7. (α) Σαρ ντικχέλα ο Ιεχωβά αμαρέ προσευχές σαρ βακερέλα ο εδάφιος Παροιμίες 15:​8; (β) Σαρ απαντίνελα ο Ιεχωβά αμαρέ προσευχιέντε;

⁷ Εκ γιαβέρ δώρος σο να ντικχίντιβελα ισί η προσευχή. Ο λατσσέ αμαλά μπεϊντίνενα μπουτ τι κερέν λάφι ο εκ κο γιαβέρ οντουλένγκε σο τθερένα πουμαρέ γκοντιάτε ντα πουμαρέ γκίστε. Αβέλα-πες ανταβά κι φιλία-ντα σο τθεράσα ι Ιεχωβάσαρ; Βα! Ο Ιεχωβά κερέλα αμέντζαρ λάφι αντράλ πι Λαφίσταρ ντα μουτθαβέλα αμένγκε οντουλά σο τθερέλα πι γκοντιάτε ντα πι γκίστε. Αμέν κεράσα λέσαρ λάφι αντράλ κατά προσευχή ντα βακεράσα λέσκε οντουλά σο τθεράσα ντιπ αντρέ αμαρέ γκοντιάτε ντα αμαρέ γκίστε. Ο Ιεχωβά χαιρίνελα τι ασουνέλ αμαρέ προσευχές. (Διαβάνεν Παροιμίες 15:8) Σαρ λατσσό Αμάλ, ο Ιεχωβά να ασουνέλα σάντε αμαρέ προσευχές αλλά απαντίνελα-ντα αμένγκε. Μπάζιμα, η απάντηση αβέλα σουγκό.  Γιαβερά φαρ, μπορεί τι χρειαζίντιβελα τι προσευχίντιβας πιο μπουτ εκχέ πραγμάσκε. Σαρ-ντα τι αβέν ο πράγματα, ισινάμ σίγουροι ότι η απάντηση κα αβέλ κο σωστός σαάτι ντα με το πιο λατσσό τρόπος. Αλλά η απάντηση ι Ντεβλέσκι μπορεί μα τι αβέλ οντιά σο μπεκλεντίναας. Για παράδειγμας, αντίς τι νασκιαρέλ εκ δοκιμασία μπορεί τι ντελ-αμέν ι σοφία ντα ι ζορ τι “νταϊντίνας-λα”.​—1 Κορ. 10:13.

8. Σαρ κα σικαβάς ότι εκτιμίνασα ο δώρος ι προσευχιάκο;

⁸ Σαρ κα σικαβάς ότι εκτιμίνασα ο δώρος ι προσευχιάκο; Κάνα ντάσα καν ι Ιεχωβάς σο βακερέλα αμένγκε “τι προσευχίντιβας συνέχεια”. (1 Θεσ. 5:​17) Ο Ιεχωβά να μανγκέλα τι προσευχίντιβας ζορίσαρ. Αλλά σεβάνελα ι ελευθερία σο τθεράσα τι τραμπίνας σο κα κεράς ντα βακερέλα αμένγκε “μα τι τσσιναβάς τι κεράς προσευχή”. (Ρωμ. 12:​12) Οντουλέσκε, ισί λατσσό τι κεράς μπουτ προσευχές αντρέ κο ντιβές για τι σικαβάς αμαρί εκτίμηση. Όμως, αμαρέ προσευχιέντε πρέπει τι βακεράς ευχαριστώ-ντα ι Ιεχωβάσκε ντα τι δοξάνας-λες.​—Ψαλμ. 145:2, 3.

9. Σαρ νιωθίνελα εκ πφραλ ι προσευχιάκε, ντα σαρ νιωθίνενα τουμέν;

⁹ Καζόμ πιο μπουτ καιρός υπηρετίνασα ι Ιεχωβάς ντα ντικχάσα σαρ απαντίνελα αμαρέ προσευχιέντε, αζόμ πιο μπουτ πρέπει τι μπαριόλ αμαρί εκτίμηση ι προσευχιάκε. Ντικχέν για παράδειγμας σαρ νιωθίνελα ο Κρις, εκ πφραλ σο ισί κι ολοχρόνια υπηρεσία 47 μπρεσά. Βοβ βακερέλα: «Μπεϊντίναβα μπουτ τι ιστιάβ πρωί για τι προσευχίντιβαβ κο Ιεχωβά. Λάβα μπουτ ζορ κάνα κεράβα λάφι ι Ιεχωβάσαρ αζομάν σο νικιόλα ο κχαμ ντα κερέλα ο πράγματα τι ντικχίντιβεν μπουτ σουκάρ! Ανταβά κερέλα-μαν τι βακεράβ λέσκε ευχαριστώ σαρέ λέσκε δωρένγκε, σο αντρέ ανταλέντε ισί ο δώρος ι προσευχιάκο-ντα. Ντα σοράν σο κεράβα προσευχή κο τέλος κι ντιβεσέσκο, σο σουκάρ ισί σο τθεράβα πάκι συνείδηση κάνα τζάβα τι σοβάβ».

10. Σόσκε πρέπει τι τθερέλ μπαρί αξία αμένγκε ο άγιος πνεύμας ι Ντεβλέσκο;

¹⁰ Η ζορ ι Ντεβλέσκι ισί εκ γιαβέρ δώρος σο να ντικχίντιβελα ντα σο πρέπει τι τθερέλ  μπαρί αξία αμένγκε. Ο Ιησούς βακερντάς αμένγκε τι συνεχίνας τι προσευχίντιβας για τι τθεράς άγιος πνεύμας. (Λουκ. 11:9, 13) Αντράλ πι πνευμάσταρ, ο Ιεχωβά ντέλα-αμέν «ζορ σο ισί πιο μπαρί αμαρέ ζοριάταρ». (2 Κορ. 4:7· Πράξ. 1:8) Ι Ντεβλέσκε πνευμάσαρ, νταϊντίνασα σαβέ τι μανγκές δοκιμασίες.

11. Σαρ βοηθίνελα-αμέν ο άγιος πνεύμας;

¹¹ Ο άγιος πνεύμας βοηθίνελα-αμέν τι κεράς αμαρέ διορισμοί κι υπηρεσία κι Ντεβλέσκι. Ο πνεύμας ι Ντεβλέσκο μπορεί τι μπαριαρέλ αμαρέ ταλέντα ντα αμαρέ ικανότητες για τι ντας πέρα ο ευθύνες σο τθεράσα σαρ Χριστιανοί. Τζανάσα ότι ο λατσσέ αποτελέσματα σο τθεράσα κι Ντεβλέσκι υπηρεσία να αβένα επειδή αμέν ισινάμ λατσσέ, αλλά επειδή βοηθίνελα-αμέν λέσκο πνεύμας.

12. Καλέ πραγμάσκε μπορίνασα τι μανγκάς άγιος πνεύμας σαρ βακερένα ο εδάφια Ψαλμός 139:​23, 24;

¹² Εκχέ γιαβερέ τροπόσαρ σο σικαβάσα ότι ο άγιος πνεύμας ι Ντεβλέσκο τθερέλα μπαρί αξία αμένγκε ισί κάνα προσευχίντιβασα τι βοηθίνελ-αμέν τι αρακχάς σο-ντα μπέτι πράγματα μπορεί τι τθεράσα αμαρέ γκοντιάτε ή αμαρέ γκίστε. (Διαβάνεν Ψαλμός 139:​23, 24) Άμα προσευχίντιβασα ανταλέσκε, ο Ιεχωβά, αντράλ πι πνευμάσταρ, μπορίνελα τι σικαβέλ αμένγκε ο μπέτι πράγματα σο μπορεί τι σκεφτίνασα ή τι μανγκάσα. Ντα κάνα κα αγαβάς ότι τθεράσα κάτι ασακό αντρ’ αμέντε, πρέπει τι κεράς προσευχή για τι βοηθίνελ-αμέν ο άγιος πνεύμας ι Ντεβλέσκο τι νασκιαράς-λες. Άμα κα κεράς-λες ανταβά, σικαβάσα ότι μανγκάσα σαρέ αμαρέ γκίσαρ μα τι κεράς καέκ πράγμας σο κα κερέλας ι Ιεχωβάς τι τσσιναβέλ τι ντελ-αμέν πο άγιος πνεύμας.​—Εφεσ. 4:30.

13. Σαρ κα μπαριαράς αμαρί εκτίμηση ι άγιε πνευμάσκε;

¹³ Κα μπαριαράς αμαρί εκτίμηση ι άγιε πνευμάσκε άμα ανάσα αμαρέ γκοντιάτε οντουλά σο κερντάς αμαρέ ντιβεσέντε. Πριν τι τζαλ ο Ιησούς κο ουρανός, βακερντάς πι μαθητένγκε: «Κα λεν ζορ κάνα ο άγιος πνεύμας κα αβέλ οπρά-τουμέντε ντα κα αβέν μο μάρτυρες . . . ατζέ-ντα κο τθαν σο ισί πιο ντουρ οπράλ κι πφουβ». (Πράξ. 1:8) Ανταλά λάφια νικιόνα μπαγιά αμαρέ ντιβεσέντε. Με  τη βοήθεια ι άγιε πνευμάσκι, περίπου οχτώμιση εκατομμύρια τζενέ σαρό κατά ντουνιάς υπηρετίνενα ι Ιεχωβάς. Επίσης, σαρ λαός ι Ντεβλέσκο, σαρέ ι πφραλέντζαρ ντα ι πφενίντζαρ ισινάμ ενωμέ ντα τθεράσα ειρήνη σόσκε ο άγιος πνεύμας ι Ντεβλέσκο βοηθίνελα-αμέν τι τθεράς σουκάρ ιδιότητες σαρ ισί τι μανγκάς, τι τθεράς χαρά, τι τθεράς ειρήνη, τι σικαβάς λατσσιπέ, τι τθεράς πίστη, τι αβάς κοβλέ γκίσκε ντα τι ατσσικιαράς-αμέν. Ανταλά ιδιότητες ισί αντρέ κο “καρπός κι πνευμάσκο”. (Γαλ. 5:​22, 23) Σο μπαρό δώρος ισί ο άγιος πνεύμας!

14. Καγιά βοήθεια σο να ντικχίντιβελα τθεράσα κάνα τζάσα κο έργος;

¹⁴ Τθεράσα ο μπαρό δώρος τι “κεράς μπουτί γιεκ” ι Ιεχωβάσαρ, ι Ιησούσαρ ντα ι αγγελόντζαρ. (2 Κορ. 6:1) Κεράσα-λες ανταβά κάθε φαρ σο νικιάσα κο έργος για τι σικλιαράς. Ο Παύλος βακερντάς κάνα κερέλας λάφι πέσκε ντα οντουλένγκε σο κερένα ανταβά έργος: «Ισινάμ συνεργάτες ι Ντεβλέσκε». (1 Κορ. 3:9) Κάνα τζάσα κο έργος, ισινάμ συνεργάτες ι Ιησούσκε-ντα. Ντεν-τουμέν γκοντί, ότι αφού ντινάς πι μαθητέντε ι εντολή τι «κερέν μαθητέν σαρέ κατά τθεμά», ο Ιησούς βακερντάς: «Με ισινόμ τουμέντζαρ». (Ματθ. 28:​19, 20) Ντα σο κα βακεράς ι αγγελόνγκε; Σο μπαρί ευλογία ισί τι βοηθίνεν-αμέν ο άγγελοι τι βακεράς «λατσσέ αμπέρια . . . οντουλένγκε σο μπεσένα κι πφουβ»!​—Αποκ. 14:6.

15. Βακερέν εκ παράδειγμας κατά Γραφή σο σικαβέλα ο σημαντικός ρόλος σο κχελέλα ο Ιεχωβά κο έργος.

¹⁵ Καζόμ τσσουβάσα ο σπόρους ι Βασιλειάκε, μερικά ανταλένταρ περένα λατσσέ γκιέντε ντα μπαριόνα. (Ματθ. 13:​18, 23) Κον κερέλα ανταλά σπόροι ι αληθειάκε τι μπαριόν ντα τι νικαβέν καρπός; Ο Ιησούς βακερέλα ότι καέκ ναστί αβέλα μαθητής λέσκο άμα “να κα ταρτίνελ-λες πασέ λέστε” ο Ντατ. (Ιωάν. 6:​44) Η Γραφή βακερέλα εκ παράδειγμας οπράλ ανταλέστε. Ανέν τουμαρέ γκοντιάτε κάνα ο Παύλος ντινάς μαρτυρία μερικέ τζουβλίντε σο ισινέ γκιντιμέ αβρί κατά Φίλιπποι. Ντικχέν σο βακερέλα η Γραφή εκχιάκε, ι Λυδιάκε: «Ο Ιεχωβά πουταρντάς ντιπ λάκο γκι για τι ντελ προσοχή οντουλέντε σο βακερέλας ο Παύλος». (Πράξ. 16:​13-15) Σαρ η Λυδία, αντικάς εκατομμύρια γιαβερά-ντα τζενέ ταρτίντιβενα πασέ κο Ιεχωβά.

16. Κάστε πρέπει τι ντας δόξα άμα τθεράσα λατσσέ αποτελέσματα κο έργος;

¹⁶ Κάστε πρέπει τι ντας δόξα άμα τθεράσα λατσσέ αποτελέσματα κο έργος; Ο Παύλος ντινάς ι απάντηση κάνα γραφιντάς ακαλά λάφια ι κχανγκιριάκε κι Κόρινθος: «Με τσσουντόμ ο σπόρος, ο Απολλώς ποτιντάς, αλλά ο Ντεβέλ κερντάς-λες τι μπαριόλ, ντα αντικάς ούτε οντουβά σο τσσουβέλα ο σπόρος ισί τίποτα ούτε οντουβά σο ποτίνελα, αλλά ο Ντεβέλ σο κερέλα τι μπαριόλ». (1 Κορ. 3:6, 7) Σαρ ο Παύλος, αντικάς αμέν-ντα πρέπει πάντα τι ντας δόξα κο Ιεχωβά άμα τθεράσα λατσσέ αποτελέσματα κο έργος.

17. Σαρ κα σικαβάς ότι εκτιμίνασα σο «κεράσα μπουτί γιεκ» ι Ιεχωβάσαρ, ι Χριστόσαρ ντα ι αγγελόντζαρ;

¹⁷ Σαρ κα σικαβάς ότι εκτιμίνασα ο προνόμιος σο τθεράσα τι “κεράς μπουτί γιεκ” ι Ιεχωβάσαρ, ι Χριστόσαρ ντα ι αγγελόντζαρ; Κάνα κεράσα σο νακχέλα αμαρέ βαστέσταρ για τι βακεράς ο λατσσέ αμπέρια γιαβερένγκε. Ισί μπουτ τρόποι για τι κεράς-λες ανταβά, σαρ ισί τι ντας μαρτυρία «ανγκλάλ μπουτέ τζενέντε ντα κχερ κχερέστε». (Πράξ. 20:​20) Μπουτ τζενέ μπεϊντίνενα τι κερέν λάφι ι Ντεβλέσκε κο τζενέ ατζέ-ντα κάνα νανέ κο έργος. Κάνα αρακχένα εκχέ τζενές σο να τζανένα, χαιρετίνενα-λες ντα προσπαθίνενα τι αρχίνεν συζήτηση. Άμα ο τζενό μανγκέλα τι κερέλ λάφι, βακερένα λέσκε ο λατσσέ αμπέρια ι Βασιλειάκε χωρίς τι ανέν-λες σε δύσκολη θέση.

18, 19. (α) Σαρ ποτίνασα ο σπόροι ι αληθειάκε; (β) Βακερέν εκ εμπειρία σο σικαβέλα σαρ βοηθιντάς ο Ιεχωβά εκχέ τζενές σο κερέλας μελέτη.

 ¹⁸ Σαρ «συνεργάτες ι Ντεβλέσκε», να ερεσέλα σάντε τι τσσουβάς ο σπόροι ι αληθειάκε αλλά πρέπει τι ποτίνας-λεν ντα. Κάνα εκ τζενό μανγκέλα τι σικλιόλ πιο μπουτ, πρέπει τι κεράς σο νακχέλα αμαρέ βαστέσταρ για τι κεράς λέσαρ λάφι πάλι ή για τι κανονίνας τι κερέλ λέσαρ λάφι εκ γιαβέρ για τι αρχίνελ μελέτη. Χαιρίνασα μπουτ τι ντικχάς σαρ ο Ιεχωβά βοηθίνελα εκχέ τζενές τι αλλάνελ οντουλά σο τθερέλα πι γκοντιάτε ντα πι γκίστε.

¹⁹ Ντικχέν σο αβιλό-πες κο Ραπαλαλανί, σο ισινέ μάγος-γιατρός κι Νότια Αφρική. Μπεϊντίνελας μπουτ οντουλά σο σικλιόλας κάνα κερέλας μελέτη. Αλλά ισινέ μπουτ δύσκολος λέσκε τι ντελ καν κο Λάφι κι Ντεβλέσκο σο βακερέλα ότι δεν πρέπει τι κεράς λάφι ι μουλέντζαρ. (Δευτ. 18:​10-12) Σιγά σιγά, μουκχλάς ι Ντεβλές τι λατσσαρέλ λέσκο τρόπος σκέψης. Ντα καζόμ νακχέλας ο καιρός, τσσιναντάς τι κερέλ μπουτί σαρ μάγος-γιατρός, παρόλο σο σάντε ανταγιά μπουτί τθερέλας. Ακανά σο ισί 60 μπρεσένγκο βακερέλα: «Ισινόμ πφερντό εκτίμηση ι Ιεχωβάσκε Μαρτυρένγκε σο βοηθιντέ-μαν αζόμ μπουτ τροπόντζαρ, σαρ ισί τι αρακχάβ μπουτί-ντα. Όμως, πιο μπουτ εκτίμηση τθεράβα ι Ιεχωβάσκε σο βοηθιντάς-μαν τι κεράβ αλλαγές μι ζωγιάτε ντα αντικάς τι μπορίναβ ακανά τι τζαβ κο έργος σαρ μπολντό Μάρτυρας λέσκο».

20. Σο μανγκένα σαρέ τουμαρέ γκίσαρ τι κερέν;

²⁰ Ανταλέ μαθημάστε, ντικχλάμ σταρ δώρα «σο να ντικχίντιβενα». Ο πιο μπαρό δώρος ισί ο προνόμιος σο τθεράσα τι αβέλ ο Ιεχωβά ο πιο λατσσό Αμάλ σο τθεράσα. Κάνα αβάσα λατσσέ αμαλά ι Ιεχωβάσαρ, μπορίνασα τι τθεράς ο γιαβερά-ντα δώρα σο να ντικχίντιβενα​—τι τζας πασέ λέστε αντράλ κατά προσευχή, τι λας βοήθεια κατά άγιος πνεύμας ντα τι τθεράς ι βοήθεια ι Ιεχωβάσκι, ι Ιησούσκι ντα ι αγγελόνγκι κο έργος. Οντουλέσκε, μανγκάσα σαρέ αμαρέ γκίσαρ τι μπαριαράς αμαρί εκτίμηση ανταλέ δωρένγκε σο να ντικχίντιβενα. Ντα μα τι τσσιναβάς ποτές τι βακεράς ευχαριστώ κο Ιεχωβά σο ισί αζόμ λατσσό Αμάλ.