«Ισινόμ λατζανί», βακερέλα η Σάρα, * «ντα να τθεράβα μπουτ σιγουριά μι νεαυτόσκε. Οτθάρ, να νιωθίναβα άνετα κάνα ισινόμ τζενέντζαρ σο τθερένα μπουτ σιγουριά πουμαρέ νεαυτόσκε ντα ισί άγριοι. Αλλά νιωθίναβα άνετα κάνα ισινόμ εκχέ τζενέσαρ σο ισί πράος ντα ταπεινός. Εκχέ ασακέ τζενέσκε, μπορίναβα τι πουτράβ μο γκι, τι βακεράβ λέσκε σαρ νιωθίναβα ντα τι κεράβ λέσαρ λάφι μι προβληματένγκε. Ασακέ τζενέ ισί μο πιο λατσσέ αμαλινά».

Ο λάφια ι Σαράκε σικαβένα ότι άμα τθεράσα πραότητα, ή γιαβέρτουλους κοβλό γκι, ο γιαβερά κα μανγκέν-αμέν. Επίσης, άμα ισινάμ κοβλέ γκίσκε, κεράσα ι Ιεχωβάσκο γκι. Λέσκο Λάφι βακερέλα αμένγκε: «Ιρίν . . . ο κοβλό γκι». (Κολ. 3:​12) Σο μανγκέλα τι βακερέλ τι τθεράς κοβλό γκι; Σαρ σικαβέλας ο Ιησούς ότι ισινέ κοβλέ γκίσκο; Ντα σαρ κερέλα ανταγιά ιδιότητα πιο ευτυχισμέ αμαρί ζωή;

Κοβλέ γκίσκο ισί ο τζενό σο τθερέλα αντρέ πέστε ειρήνη. Ο τζενό σο τθερέλα κοβλό γκι ισί λατσσό ι γιαβερέντζαρ ντα ατσσόλα ήρεμος κάνα αβένα-πες πράγματα σο χολιασκιαρένα-λες.

Εκ τζενό κοβλέ γκίσκο τθερέλα ζορ αντρέ πέστε. Ο πουρανό μπαλαμανό λάφι σο μεταφράντιβελα «κοβλό γκι» βακερένας-λες κάνα κερένας λάφι εκχέ άγριε γκραστέσκε σο ηρεμισάλο. Ο γκρας συνεχίνελα τι αβέλ ζουρανό, αλλά σικλιλό τι κερέλ κουμάντος πι ζορ. Αντικάς αμέν-ντα, κάνα ισινάμ κοβλέ γκίσκε, κεράσα κουμάντος ο λάθος πράγματα σο μανγκάσα ντα τθεράσα ειρήνη ι γιαβερέντζαρ.

“Να ισινόμ κοβλέ γκίσκο τζενό”, μπορεί τι σκεφτίνας. Τζουβντιάσα εκχέ ντουνιάστε σο ο τζενέ ισί άγριοι ντα να τθερένα ιτς υπομονή. Οτθάρ, μπορεί τι αβέλ αμένγκε μπουτ δύσκολος τι αβάς κοβλέ γκίσκε. (Ρωμ. 7:​19) Σίγουρα, πρέπει τι μαράς-αμέν τι τθεράς κοβλό γκι, αλλά ο άγιος πνεύμας ι Ιεχωβάσκο κα κερέλ-αμέν τι μανγκάς τι αβάς κοβλέ γκίσκε. (Γαλ. 5:​22, 23) Σόσκε πρέπει τι προσπαθίνας τι τθεράς κοβλό γκι;

Ο κοβλό γκι ταρτίνελα πασ’ αμέντε ι γιαβερέν. Σαρ βακερντάς η Σάρα, νιωθίνασα άνετα πασέ εκχέ τζενέστε σο τθερέλα κοβλό γκι. Ο Ιησούς ισί ο πιο λατσσό παράδειγμας τζενέσκο σο τθερέλας κοβλό γκι ντα ισινέ λατσσό ι γιαβερέντζαρ. (2 Κορ. 10:1) Ατζέ-ντα ο χουρντέ, παρόλο σο να τζανένας-λες, μανγκένας τι αβέν πασέ λέστε.​—Μάρκ. 10:​13-16.

Άμα ισινάμ κοβλέ γκίσκε, κεράσα λατσσιπέ εμ αμένγκε εμ ι γιαβερένγκε. Άμα ισινάμ κοβλέ γκίσκε, να σιγκιαράσα τι χασαράς αμαρί ψυχραιμία ή τι  χολιάνας. (Παρ. 16:​32) Αντικάς να κα τθεράς ο τύψεις σο αβένα κάνα ανάσα ντουκχ κο γκι εκχέ τζενέσκο, ειδικά εκχέ τζενέσκο σο μανγκάσα. Ο κοβλό γκι κα αρακχαβέλ ι γιαβερέν-ντα σόσκε κα κεράς κουμάντος αμαρέ λάφια ντα να κα ανάς ντουκχ λένγκε γκίστε.

Παρόλο σο τθερέλας μπαρέ ευθύνες ντα πφερντό πρόγραμμας, ο Ιησούς τθερέλας πάντα κοβλό γκι. Μπουτ τζενέ λέσκε ντιβεσέντε μαρένας-πες ντα τθερένας πφαρέ φορτία οπρά-πουμέντε. Έπρεπε τι νασέλ ο πφαριπέ οπρά-λένταρ. Καζόμ μπουτ λοκχιλό λένγκο γκι κάνα ασουντέ ι Ιησούς τι βακερέλ λένγκε: «Ελάν μάντε, . . . επειδή τθεράβα κοβλό ντα ταπεινός γκι»!​—Ματθ. 11:​28, 29.

Σαρ κα σικλιάς τι τθεράς κοβλό γκι σαρ ο Ιησούς; Σικλιαράσα-αμέν κατά Λάφι ι Ντεβλέσκο για τι σικλιάς σαρ ισινέ ο Ιησούς ι γιαβερέντζαρ ντα σο κερέλας κάνα τθερέλας δυσκολίες. Σοράν, κάνα νακχάσα κάτι σο δυσκολίνελα-αμέν τι αβάς κοβλέ γκίσκε, μαράσα-αμέν τι κεράς οντουβά σο κερέλας ο Ιησούς. (1 Πέτρ. 2:​21) Ντικχέν τριν πράγματα σο βοηθίνενας ι Ιησούς τι αβέλ κοβλέ γκίσκο.

Ο Ιησούς τθερέλας ταπεινός γκι. Ο Ιησούς βακερντάς ότι ισινέ εμ “κοβλέ εμ ταπεινέ γκίσκο”. (Ματθ. 11:​29) Κι Γραφή αρακχάσα γιεκ ανταλά ντούι ιδιότητες επειδή για τι αβέλ εκ τζενό κοβλέ γκίσκο πρέπει τι αβέλ ταπεινός-ντα. (Εφεσ. 4:​1-3) Σόσκε;

Η ταπεινότητα βοηθίνελα-αμέν μα τι πακιάς ότι ισινάμ μπουτ σημαντικοί ντα μα τι σιγκιαράς τι χολιάνας. Σο απαντίνελας ο Ιησούς οντουλένγκε σο βακερένας ότι “χάλας μπουτ” ντα “πίλας μολιά”; Οντουλέντζαρ σο κερέλας σικαντάς ότι ανταβά να ισινέ μπαγιά. Επειδή ισινέ ταπεινός, σικαντάς ότι «η σοφία αγαντίντιβελα δίκαια οντουλένταρ σο κερέλα».​—Ματθ. 11:19.

Άμα εκ τζενό κα κερέλ μπέτι λάφι τουμαρέ τθεμέσκε, τουμένγκε ή για το τρόπος σο μπαριλέν, προσπαθίνεν τι τθερέν κοβλό γκι. Ο Πίτερ, εκ πρεσβύτερος κι Νότια Αφρική, βακερέλα: «Κάνα νευριάνενα-μαν ο λάφια εκχέ πφραλέσκε, πουτσάβα μο νεαυτός: “Σο κα κερέλας ο Ιησούς;”» Επίσης, βακερέλα: «Σικλιλόμ μα τι πακιάβ ότι ισινόμ μπουτ σημαντικός».

Ο Ιησούς αγαβέλας ότι ο τζενέ ισί ατελείς. Ο μαθητές ι Ιησούσκε μανγκένας τι κερέν ο λατσσιπέ, αλλά μπάζιμα η ατέλεια να μουκχέλας-λεν. Για παράδειγμας, ι ιράτ πριν τι μερέλ ο Ιησούς, ο Πέτρος, ο Ιάκωβος ντα ο Ιωάννης ναστί ατσσιλέ τζανγκαντέ ι Ιησούσαρ σαρ μανγκλάς λένταρ τι κερέν. Ο Ιησούς αγαντάς ότι «ο τζενό μανγκέλα τι κερέλ ο λατσσιπέ, αλλά ο σώμας ισί μπίζουρανο». (Ματθ. 26:​40, 41) Επειδή αγαβέλας ότι λέσκε μαθητές ισινέ ατελείς, να νευριασάλο λέντζαρ.

Η Μάντι, εκ πφεν σο ντικχέλας μπουτ ο λάθη ι γιαβερένγκε, ακανά κερέλα μπαρί προσπάθεια τι αβέλ κοβλέ γκίσκι σαρ ο Ιησούς. Βόι βακερέλα: «Προσπαθίναβα τι νταβ-μαν γκοντί ότι σαρέ ο τζενέ ισί ατελείς ντα τι ντικχάβ ο λατσσέ ιδιότητες ι γιαβερένγκε, σαρ κερέλα ο Ιεχωβά». Ο Ιησούς πφαμπόλας ι τζενένγκε σόσκε ντικχέλας ότι ισί μπίζουρανε. Άμα κα ντικχέν τουμέν-ντα αντικάς ι τζενέν, κα βοηθίνελας-τουμέν ανταβά τι αβέν κοβλέ γκίσκε ι γιαβερέντζαρ;

Ο Ιησούς μουκχέλας ο πράγματα κι Ντεβλέσκε βαστά. Καζόμ ισινέ ο Ιησούς κι πφουβ, ο τζενέ συμπεριφερίντιβενας λέσκε άδικα. Παρεξηγιντέ-λες, μισιντέ-λες ντα βασανιντέ-λες. Βοβ όμως ατσσιλό κοβλέ γκίσκο σόσκε «μουκχλάς-πες Οντουλέστε σο κρίνελα δίκαια». (1 Πέτρ. 2:​23) Τζανέλας ότι λέσκο Ντατ, ο Ιεχωβά, κα βοηθίνελας-λες τι νταϊντίνελ ντα ότι κα τιμωρίνελας οντουλέν σο συμπεριφερίντιβενας λέσκε μπέτι κάνα κα αβέλας ο βακίτι.

Κάνα χολιάνασα ντα προσπαθίνασα τι αρακχάς αμαρό δίκιος, μπορεί τι κεράς χειρότερα ο πράγματα. Οτθάρ, η Γραφή ανέλα αμαρέ γκοντιάτε ακαλά λάφια: «Η χολί ι τζενέσκι να ανέλα ι δικαιοσύνη ι Ντεβλέσκι». (Ιακ. 1:​20) Ατζέ-ντα άμα τθεράσα λόγους τι αβάς χολιαμέ, η ατέλεια μπορεί τι κερέλ-αμέν τι συμπεριφερίντιβας λάθος τροπόσαρ.

Η Κάθι, εκ πφεν κι Γερμανία, βακερέλας: “Άμα να κα λες το δίκια τούι, να κα κερέλ-λες καέκ γιαβέρ”. Αλλά κάνα σικλιλί τι ντελ μπέσα κο Ιεχωβά, αλλαντάς άποψη. «Ακανά να χρειαζίντιβελα τι αβάβ πάντα έτοιμη τι λαβ μο δίκια», βακερέλα. «Συμπεριφερίντιβαβα κοβλέ γκίσαρ σόσκε τζανάβα ότι ο Ιεχωβά ισί οντουβά σο κα διορθώνελ σαρέ ο λάθος πράγματα σο αβένα-πες κο ντουνιάς». Άμα κα αδικίνεν-τουμέν, κα μπορίνεν τι αβέν κοβλέ γκίσκε άμα κα ντεν μπέσα κο Ντεβέλ σαρ ο Ιησούς.

Ο Ιησούς βακερντάς ότι άμα μανγκάσα τι αβάς ευτυχισμέ, πρέπει τι αβάς κοβλέ γκίσκε. «Ευτυχισμέ ισί ο τζενέ σο τθερένα κοβλό γκι», βακερντάς. (Ματθ. 5:5) Ντικχέν σαρ βοηθίνελα ο κοβλό γκι κο πράγματα σο βακέρντιβενα πιο τελέ.

Ο κοβλό γκι ανέλα ηρεμία κο μπιαβ. «Βακερντόμ μπουτ πφαρέ λάφια μι ρομνιάκε, πράγματα σο να πακιάβας», βακερέλα ο Ρόμπερτ, εκ πφραλ κατά Αυστραλία. «Αλλά ναστί λέσα παλάλ ο μπέτι λάφια σο βακερέσα οπράλ κι χολί. Νιωθίναβας μπουτ μπέτι κάνα αγαβάβας καζόμ ντουκχ αντόμας λάκε γκίστε».

«Σαρέ κεράσα λάθη μπουτ φαρ» αμαρέ λαφίντζαρ, ντα ο λάφια σο βακεράσα χωρίς τι σκεφτίνας-λεν μπορίνενα τι χαλαβέν ι ειρήνη αμαρέ μπιαβέσκι. (Ιακ. 3:2) Κάνα αβέλα-πες κάτι ασακό, ο κοβλό γκι βοηθίνελα-αμέν τι ατσσάς ήρεμοι ντα τι κεράς κουμάντος αμαρί τσσιπ.​—Παρ. 17:27.

Ο Ρόμπερ προσπαθιντάς μπουτ τι σικλιόλ τι αβέλ ήρεμος ντα τι ατσσικιαρέλ-πες. Καβά ισινέ ο αποτέλεσμας; «Ακανά, κάνα να συμφωνίνασα, προσπαθίναβα τι ασουνάβ-λα προσεκτικά, τι κεράβ λάφι κοβλές ντα μα τι μουκχάβ μο νεαυτός τι νευριάνελ», βακερέλα. «Τζάβα-λεν μπουτ πιο λατσσές μι ρομνιάσαρ».

Ο κοβλό γκι βοηθίνελα-αμέν τι τζας-λεν πιο λατσσές ι γιαβερέντζαρ. Κον χολιάνελα εύκολα να τθερέλα μπουτέ αμαλέν. Ο κοβλό γκι όμως βοηθίνελα-αμέν “τι ατσσικιαράς . . . ι ειρήνη σο κερέλα-αμέν τι αβάς γιεκ”. (Εφεσ. 4:2, 3) Η Κάθι βακερέλα: «Ο κοβλό γκι ντινάς-μαν ι ζορ τι τζαβ-λεν χάνικ πιο λατσσές ι γιαβερέντζαρ, ατζέ-ντα οντουλέ τζενέντζαρ σο τθερένα δύσκολος χαρακτήρας».

Κάνα ισινάμ κοβλέ γκίσκε, τθεράσα ειρήνη αντρ’ αμέντε. Κι Γραφή «η σοφία σο γουλίλα οπράλ» τθερέλα σχέση ι κοβλέ γκίσαρ ντα με την ειρήνη. (Ιακ. 3:​13, 17) Ο τζενό σο ισί κοβλέ γκίσκο τθερέλα «ήρεμος γκι». (Παρ. 14:​30) Ο Μάρτιν, σο προσπαθιντάς μπουτ τι τθερέλ κοβλό γκι, βακερέλα: «Ακανά να μανγκάβα τι νακχέλ σάντε μιρό, οντουλέσκε τθεράβα ειρήνη αντρέ μάντε ντα ευτυχία».

Ισί μπαγιά ότι μπορεί τι χρειαζίντιβελ τι μαράς-αμέν για τι αβάς κοβλέ γκίσκε τζενέ. «Για τι βακεράβ μι αλήθεια», βακερέλα εκ πφραλ, «ατζέ-ντα αντιβές, μπάζιμα χολιάναβα μπουτ». Αλλά ο Ιεχωβά, σο βακερέλα αμένγκε τι τθεράς κοβλό γκι, κα βοηθίνελ-αμέν. (Ησ. 41:​10· 1 Τιμ. 6:​11) Βοβ μπορίνελα τι “τελειώνελ αμαρό σικλιαριπέ”. Μπορίνελα τι “κερέλ-αμέν ζουρανέ”. (1 Πέτρ. 5:​10) Καζόμ νακχέλα ο καιρός, κα μπορίνας αμέν-ντα σαρ ο Παύλος, τι τθεράς «ο κοβλό γκι ντα ο λατσσιπέ ι Χριστόσκο».​—2 Κορ. 10:1.