1. (α) Καγιά ελπίδα ντινάς-αμέν ο Ιεχωβά; (β) Σο μανγκέλα τι βακερέλ τι “τθεράς αμαρί ελπίδα κο Ιεχωβά”; (Ντικχέν «Σο Μανγκέλα τι Βακερέλ»)

 Ο ΙΕΧΩΒΑ ντινάς εκ σουκάρ ελπίδα σαρέ οντουλέντε σο μανγκένα-λες. Ατζεχάνικ, κα νασκιαρέλ ο νασφαλίματα, ι στεναχώρια ντα ο μεριπέ. (Αποκ. 21:3, 4) Κα βοηθίνελ ι «κοβλέ γκίσκε» τζενέν σο τθερένα πουμαρί ελπίδα λέστε τι κερέν ι πφουβ παράδεισος. (Ψαλμ. 37:​9-11) Ντα ο κάθε εκ αμένταρ κα τθερέλ εκ λατσσί φιλία λέσαρ σο κα αβέλ ατζέ πο σουκάρ ανταλάταρ σο τθεράσα ακανά. Σο σουκάρ ελπίδα ισί ανταγιά! Αλλά σόσκε μπορίνασα τι πακιάς ότι ο λάφια ι Ιεχωβάσκε κα νικιόν μπαγιά; Ο Ιεχωβά πάντα ατσσικιαρέλα πο λάφι. Οτθάρ, ισί μπουτ σημαντικοί λόγοι για τι “τθεράς αμαρί ελπίδα κο Ιεχωβά”. * (Ψαλμ. 27:​14) Σικαβάσα ότι τθεράσα ανταγιά ελπίδα κάνα μπεκλεντίνασα με υπομονή ντα χαρά τι κερέλ ο Ντεβέλ σαρέ οντουλά σο τθερέλα πι γκοντιάτε.​—Ησ. 55:​10, 11.

2. Σο τθερέλα κερντό ο Ιεχωβά;

² Ο Ιεχωβά τθερέλα σικαντό ότι ατσσικιαρέλα πο λάφι. Ντικχέν εκ παράδειγμας. Κο βιβλίος Αποκάλυψη, ο Ιεχωβά ντινάς πο λάφι ότι αμαρέ ντιβεσέντε κα γκίντελας τζενέν σαρέ κατά τθεμά ντα κατά φυλές ντα κατά τσσιμπά ντα ότι κα κερέλας-λεν τι ντεν-λες πάκι λατρεία σαρέ γιεκ. Αντιβές, τζανάσα ότι ανταλά τζενέ βακέρντιβενα «μπαρό πλήθος». (Αποκ. 7:9, 10) Παρόλο σο κο μπαρό πλήθος ισί μουρσά, τζουβλιά ντα τσσαβέ σαρέ κατά φυλές, κατά τσσιμπά ντα κατά λαοί, ανταλά τζενέ  τθερένα ειρήνη ντα ισί σαρέ γιεκ σαρ πφραλά. (Ψαλμ. 133:1· Ιωάν. 10:​16) Οντουλά σο ισί κο μπαρό πλήθος κερένα ο έργος σαρέ πουμαρέ γκίσαρ. Ισί πάντα έτοιμοι τι βακερέν σαρέ οντουλένγκε σο μανγκένα τι ασουνέν ότι ισί πασέ εκ πο λατσσό ντουνιάς. (Ματθ. 28:​19, 20· Αποκ. 14:6, 7· 22:​17) Άμα ισινέν κατά μπαρό πλήθος, σίγουρα ισί μπουτ σημαντική τουμένγκε η ελπίδα ότι κα αβέν πο λατσσέ ντιβεσά.

3. Σο μανγκέλα τι κερέλ ο Μπενγκ;

³ Ο Μπενγκ μανγκέλα τι λελ τουμένταρ ι ελπίδα. Οντουβά σο μανγκέλα ισί τι κερέλ-τουμέν τι πακιάν ότι ο Ιεχωβά να πφαμπόλα τουμένγκε ντα ότι να κα ατσσικιαρέλ πο λάφι. Άμα ο Μπενγκ κα λελ αμένταρ ι ελπίδα, κα χασαράς αμαρό κουράγιος ντα μπέκιμ ατζέ-ντα τι τσσιναβάς τι υπηρετίνας ι Ιεχωβάς. Σαρ κα ντικχάς, ο Μπενγκ μανγκλάς τι λελ κατά Ιώβ ι ελπίδα ντα τι κερέλ-λες τι τσσιναβέλ τι υπηρετίνελ ι Ιεχωβάς.

4. Σο κα σικλιάς ανταλέ μαθημάστε; (Ιώβ 1:​9-12)

⁴ Ανταλέ μαθημάστε, κα ντικχάς σαρ μαρντάς-πες ο Μπενγκ τι κερέλ ι Ιωβίς μα τι ατσσικιαρέλ σαστό πο γκι κο Ιεχωβά. (Διαβάνεν Ιώβ 1:​9-12) Ντα κα βακεράς σο σικλιάσα κατά Ιώβ ντα σόσκε χρειαζίντιβελα τι ντας-αμέν γκοντί ότι ο Ντεβέλ μανγκέλα-αμέν ντα κα ατσσικιαρέλ πο λάφι.

5, 6. Σο αβιλό-πες κο Ιώβ αντρέ χάνικ βακιτίστε;

⁵ Ο Ιώβ τζουβντιόλας μπουτ σουκάρ. Ισινέ μπουτ λατσσό αμάλ ι Ιεχωβάσκο. Τθερέλας εκ μπαρί ντα αγαπημέ φαμιλί ντα ισινέ μπουτ χουλανό. (Ιώβ 1:​1-5) Αλλά αντρέ εκχέ ντιβεσέστε, χασαρντάς-λεν σχεδόν σαρέ. Πρώτα, χασαρντάς πο χουλανιπέ. (Ιώβ 1:​13-17) Σοράν, σαρέ λέσκε τσσαβέ, σο μανγκέλας-λεν αζόμ μπουτ, μουλέ. Ανέν χάνικ τουμαρέ γκοντιάτε καζόμ ντουκχ τσσιντιντάς. Ατζέ-ντα εκ τσσαβό τι μερέλ, πφαμπόλα ο γκι ι νταντέσκο ντα ι νταγιάκο. Καζόμ πο μπουτ πφαμπιλό ο γκι ι Ιωβίσκο ντα λέσκε ρομνιάκο σο λιντέ αμπέρι ότι μουλέ ο ντες-ντα τσσαβέ λένγκε κάνα πελό ο κχερ οπρά-λέντε. Να κερέλα αμένγκε εντύπωση σο ο Ιώβ, αντρέ κι μπαρί ντουκχ σο τθερέλας, πφαραντάς πο σέα ντα πελό τελέ κι πφουβ!​—Ιώβ 1:​18-20.

⁶ Σοράν, ο Μπενγκ αντάς κο Ιώβ εκ πφαρό νασφαλιπέ σο κερέλας-λες τι λατζάλ. (Ιώβ 2:​6-8· 7:5) Ανγκλέ, σαρέ σικαβένας μπαρό σεβασμός κο Ιώβ. Ο τζενέ τζάνας λέστε για τι βακερέλ λένγκε σο τι κερέν. (Ιώβ 31:​18) Αλλά ακανά νασένας πασέ λέσταρ σόσκε τζουνγκάνας λέσταρ. Κερντέ-λες πέρα λέσκε πφραλά, λέσκε λατσσέ αμαλά, ατζέ-ντα ο υπηρέτες λέσκε κχερέσκε!​—Ιώβ 19:​13, 14, 16.

7. (α) Κάσταρ αμντίνελας ο Ιώβ ότι αβένας λέσκε προβλήματα, αλλά σο να μανγκλάς τι κερέλ; (β) Σαρ κα μπορίνελας εκ Χριστιανός τι νακχέλ εκ ασακί δοκιμασία σαρ ανταγιά σο σικάντιβελα κι φωτογραφία;

⁷ Ο Μπενγκ μανγκέλας τι κερέλ ι Ιωβίς τι πακιάλ ότι τσσίντελας-λεν σαρέ ανταλά σόσκε ο Ιεχωβά ισινέ χολιαμέ λέσκε. Για παράδειγμας, αντάς εκ ζουρανί μπαρμπάλ για τι περαβέλ ο κχερ σο οτθέ χάνας λέσκε ντες τσσαβέ. (Ιώβ 1:​18, 19) Ντα κερντάς τι περέλ γιακ κατά ουρανός για τι καταστραφίνελ εμ λέσκε ζώα εμ λέσκε υπηρετόν-ντα σο αρακχαβένας-λεν. (Ιώβ 1:​16) Η μπαρμπάλ ντα η γιακ αβιλέ κατά ουρανός, οτθάρ ο Ιώβ μπέκιμ αμντισάλο ότι ο Ιεχωβά Ντεβέλ αντάς-λεν επειδή κερντάας κάτι σο χολιασκιαρντάας-λες. Αλλά ατζέ-ντα αζομάν, να μανγκλάς τι ντελ αρμανιά πι Νταντές, ι Ιεχωβάς. Τζανέλας ότι σαρέ οντουλά μπρεσά ο Ιεχωβά ντινάας-λες μπερεκέτι λατσσέ πράγματα. Οτθάρ, σκεφτισάλο ότι, αφού δεχτίνελας χαράσαρ ο λατσσέ πράγματα, έπρεπε τι δεχτίνελ ο μπέτι-ντα. Βακερντάς: «Τι συνεχίνελ  τι αβέλ ευλογημέ ο ναβ ι Ιεχωβάσκο». (Ιώβ 1:​20, 21· 2:​10) Αν-ντα ο Ιώβ χασαρντάς πο χουλανιπέ, τθερέλας πφανγκό γκι ντα ισινέ νασφαλό, να τσσιντιντάς-πες ντουρ κατά Ιεχωβά. Ο Μπενγκ όμως να ατσσιλό οτθέ.

8. Σο κερντάς σοράν ο Μπενγκ κο Ιώβ;

⁸ Ο Μπενγκ κερντάς κάτι ατζέ κο Ιώβ. Τσσουντάς τρινέ τζενέν σο κερένας-πες ότι ισινέ λέσκε αμαλά τι κερέν-λες τι πακιάλ ότι ισινέ άχρηστος. Οντουλά τζενέ βακερντέ ότι ο Ιώβ τσσίντελας-λεν σαρέ ανταλά σόσκε κερντάας μπέτι πράγματα. (Ιώβ 22:​5-9) Μανγκλέ επίσης τι κερέν-λες τι πακιάλ ότι, ατζέ-ντα άμα να κερντάας καέκ γκεραλιπέ, σινανέ μαρέλας-πες τι κερέλ ι Ντεβλέσκο γκι. (Ιώβ 4:​18· 22:2, 3· 25:4) Χάνικ λαφίντζαρ, μανγκένας τι κερέν-λες μα τι αβέλ σίγουρος ότι ο Ντεβέλ μανγκέλας-λες, ότι κα αρακχαβέλας-λες ή ότι αξίνελας τι υπηρετίνελ-λες. Λένγκε λάφια κα μπορίνενας τι κερέν ι Ιωβίς τι πακιάλ ότι να ατσσιλίας καέκ ελπίδα λέσκε.

9. Σαρ αρακχλάς ο Ιώβ κουράγιος ντα ζορ;

⁹ Ανέν τουμαρέ γκοντιάτε ι Ιωβίς τι μπεσέλ αντρέ κο πράχος ντα τι ντουκχάλ μπουτ. (Ιώβ 2:8) Λέσκε αμαλά, σο να τζιτζίνενα λέσκε ιτς, βακερένα ότι ισί γκεραλό τζενό ντα πουμαρέ λαφίντζαρ χαλαβένα λέσκο ναβ. Λέσκε προβλήματα ισί σαρ μπαρέ μπαρά σο πελέ οπρά-λέστε ντα η ντουκχ σο τθερέλα επειδή χασαρντάς πι τσσαβέν πφαμπαρέλα λέσκο γκι. Κι αρχή, ο Ιώβ να βακερέλα τίποτα. (Ιώβ 2:​13–3:1) Άμα λέσκε αμαλά αμντίνενα ότι κα μουκχέλ ι Ιεχωβάς, κερένα μπαρό λάθος. Ο Ιώβ μπέκιμ βάντελα πο σορό ντα ντικχέλα-λεν κο γιακχά κάνα βακερέλα λένγκε: «Μέχρι τι μεράβ, κα ατσσικιαράβ σαστό μο γκι κο Ντεβέλ!» (Ιώβ 27:5) Σαρέ ανταλέ προβληματέντζαρ σο νακχέλας, σαρ αρακχλάς ο Ιώβ ασακό κουράγιος ντα ασακί ζορ; Ατζέ-ντα αζομάν σο ατσσιλίας-λες μπουτ χάνικ ζορ, να χασαρντάας πι ελπίδα ότι λέσκο λατσσό Ντεβέλ κα λοκχιαρέλας-λες. Τζανέλας ότι, ατζέ-ντα  άμα κα μερέλας, ο Ιεχωβά κα τζουβντιαρέλας-λες.​—Ιώβ 14:​13-15.

10. Σο σικλιαρέλα-αμέν η ιστορία ι Ιωβίσκι;

¹⁰ Η ιστορία ι Ιωβίσκι σικλιαρέλα-αμέν ότι ο Μπενγκ ναστί ζορισκιαρέλα-αμέν τι μουκχάς ι Ιεχωβάς ντα ότι ο Ιεχωβά τζανέλα μπουτ λατσσές οντουλά σο νακχάσα. Ντα οντουλά σο νακχλάς ο Ιώβ βοηθίνενα-αμέν τι αγαβάς πο λατσσές ο πράγματα. Ντικχέν μερικά πράγματα σο σικλιάσα κατά Ιώβ.

11. Καλέ πραγμάσκε μπορίνασα τι αβάς σίγουροι άμα να τσσιναβάσα τι ντας μπέσα κο Ιεχωβά; (Ιακώβου 4:7)

¹¹ Ο Ιώβ σικαντάς ότι, άμα να τσσιναβάσα τι ντας μπέσα κο Ιεχωβά, μπορίνασα τι νταϊντίνας σαβέ τι μανγκές δοκιμασίες ντα τι τζας κόντρα κο Μπενγκ. Σο κα αβέλ-πες άμα κερντάμ-λες ανταβά; Η Γραφή βακερέλα ότι σίγουρα ο Μπενγκ κα νασέλ αμένταρ.​—Διαβάνεν Ιακώβου 4:7.

12. Σαρ λέλας ζορ ο Ιώβ κατά ελπίδα ότι κα τζουβντιόν ο μουλέ;

¹² Χρειαζίντιβελα τι ασταράς σικίς ι ελπίδα ότι κα τζουβντιόν ο μουλέ. Σαρ ντικχλάμ κο γιαβέρ μάθημας, ο Μπενγκ μπουτ φαρ χρησιμοποιήνελα ι νταρ κατά μεριπέ για τι κερέλ-αμέν μα ατσσικιαράς σαστό αμαρό γκι κο Ντεβέλ. Ο Μπενγκ βακερντάς ότι ο Ιώβ κα κερέλας σο νακχέλας λέσκε βαστένταρ για τι ατσσόλ τζουβντό, ατζέ-ντα άμα ανταβά μανγκέλας τι βακερέλ ότι να κα ατσσικιαρέλας σαστό πο γκι κο Ντεβέλ. Ο Μπενγκ να τθερέλας δίκιος. Ο Ιώβ ατσσιλό πιστός ατζέ-ντα κο πο μπαρέ προβλήματα, κάνα ντικχίντιβελας ότι ο μεριπέ ισινέ ανγκλά-λέστε. Λέλας ζορ κατά σιγουριά σο τθερέλας ότι ο Ιεχωβά ισί λατσσό ντα κατά ζουρανί ελπίδα ότι ο Ιεχωβά κα λατσσαρέλας ο πράγματα. Ο Ιώβ πακιάλας ότι, άμα ο Ιεχωβά να κα λατσσαρέλας ο πράγματα καζόμ ισινέ τζουβντό, κα αβέλας ο βακίτι σο κα τζουβντιαρέλας-λες. Ο Ιώβ πακιάλας μπαγιά ότι κα τζουβντιόν ο μουλέ. Άμα αμέν-ντα πακιάσα-λες μπαγιά ανταβά, ούτε ο μεριπέ να κα κερέλ-αμέν τι τσσιναβάς τι τθεράς σαστό γκι κο Ντεβέλ.

13. Σόσκε πρέπει τι ντας σημασία οντουλέντε σο κερντάς ο Μπενγκ κο Ιώβ;

¹³ Πρέπει τι ντας μπουτ σημασία οντουλέντε σο κερντάς ο Μπενγκ κο Ιώβ σόσκε ασακέ πράγματα κερέλα αμένγκε-ντα αντιβές. Ντικχέν σο βακερντάς: «Ο τζενό [όχι σάντε ο Ιώβ] κα ντελ τσίπα αντίς τσιπάκε. Σαρέ οντουλά σο τθερέλα κα ντελ-λεν πι ζωγιάκε». (Ιώβ 2:4, 5) Ανταλέ λαφίντζαρ, ο Μπενγκ βακερέλα ότι να μανγκάσα μπαγιά ι Ιεχωβά Ντεβλές ντα ότι κα τζας κόντρα λέσαρ για τι ατσσάς τζουβντέ. Ντα μανγκέλα τι πακιάς ότι ο Ντεβέλ να μανγκέλα-αμέν ντα ότι να ντικχέλα οντουλά σο κεράσα για τι αβέλ λέσκο γκι. Αφού τζανάσα σο μανγκέλα τι κερέλ ο Μπενγκ, αμέν σο τθεράσα αμαρί ελπίδα κο Ιεχωβά να χουχάντιβασα κατά Μπενγκ.

14. Σο μπορίνενα τι σικλιαρέν-αμέν ο δοκιμασίες σο νακχάσα; Βακερέν εκ παράδειγμας.

¹⁴ Πρέπει τι ντικχάς ο δοκιμασίες σαρ ευκαιρία τι σικλιάς πο λατσσές αμαρό νεαυτός. Οντουλά σο νακχλάς ο Ιώβ βοηθιντέ-λες τι αγαβέλ κατέ ισί μπίζουρανο ντα τι κερέλ μπουτί για τι αβέλ πο λατσσό. Για παράδειγμας, σικλιλό ότι χρειαζίντιβελας τι αβέλ πο ταπεινός. (Ιώβ 42:3) Αμέν-ντα τθεράσα τι σικλιάς μπουτ πράγματα αμαρέ νεαυτόσκε κάνα νακχάσα εκ δοκιμασία. Ο Νικολάι, * εκ πφραλ σο τσσουντέ-λες φυλακή παρόλο σο ισινέ μπουτ νασφαλό, βακερέλα: «Η φυλακή ισί σαρ ακτινογραφία. Σικαβέλα σο ιδιότητες τθερέλα αντρέ πέστε εκ Χριστιανός». Κάνα κα αγαβάς κατέ ισινάμ μπίζουρανε, μπορίνασα τι κεράς μπουτί για τι αβάς πο λατσσέ.

15. Κας πρέπει τι ασουνάς, ντα σόσκε;

 ¹⁵ Πρέπει τι ασουνάς ι Ιεχωβάς, όχι αμαρέ ντουσμανίν. Ο Ιώβ ασουνέλας μπουτ λατσσές κάνα κερντάς λέσαρ λάφι ο Ιεχωβά. Ο Ντεβέλ κερντάς κο Ιώβ μερικές ερωτήσεις για τι ντελ-λες τι αγαβέλ ότι πφαμπόλας λέσκε. Ισινέ σαρ τι βακερέλας λέσκε: “Ντικχέσα σαρέ ανταλά σο κερντόμ μι ζοριάσαρ; Τζανάβα μπουτ λατσσές σαρέ οντουλά σο τσσίντεσα. Αμντίνεσα ότι ναστί βοηθίναβα-τουτ;” Ο Ιώβ σικαντάς ότι ισινέ ταπεινός ντα ότι εκτιμίνελας μπουτ ο λατσσιπέ ι Ιεχωβάσκο ακαλέ λαφίντζαρ: «Μο κανά ασουντέας τούκε, αλλά ακανά ντικχάβα-τουτ μι γιακχίντζαρ». (Ιώβ 42:5) Ντικχίντιβελα ότι, κάνα ο Ιώβ βακερντάς ανταλά λάφια, μπεσέλας ατζέκ αντρέ κο πράχος, ισινέ πφερντό πληγές ντα τθερέλας πραχουντό πι τσσαβέν. Όμως, αζομάν ο Ιεχωβά σικαντάς λέσκε καζόμ μανγκέλας-λες ντα ότι αβέλας λέσκο γκι λέσαρ.​—Ιώβ 42:7, 8.

16. Σο πρέπει τι ντας-αμέν γκοντί κάνα νακχάσα δοκιμασίες σαρ βακερένα ο εδάφια Ησαΐας 49:​15, 16;

¹⁶ Αμέν-ντα αντιβές ο τζενέ μπέκιμ τι προσβαλίνενα-αμέν ή τι βακερένα ότι να τθεράσα καέκ αξία. Μπέκιμ «βακερένα σαβέ τι μανγκές ψέματα» για τι χαλαβέν ο λατσσό ναβ αμαρό ή ι οργανωσιάκο. (Ματθ. 5:​11) Κι ιστορία κι Ιωβίσκι, ντικχάσα ι σιγουριά σο τθερέλα ο Ιεχωβά ότι κα ατσσάς αφοσιωμέ λέστε κάνα κα τθεράς δοκιμασίες. Ο Ιεχωβά μανγκέλα-αμέν ντα να κα μουκχέλ ποτές οντουλέν σο τθερένα πουμαρί ελπίδα λέστε. (Διαβάνεν Ησαΐας 49:​15, 16) Μα ασουνέν ο λάφια σο νικαβένα πουμαρέ μόσταρ ι Ντεβλέσκε ντουσμάνια για τι χαλαβέν αμαρό ναβ! Ο Τζέιμς, εκ πφραλ κατά Τουρκία σο λέσκι φαμιλί νακχλάς μπαρέ  δοκιμασίες, βακερέλα: «Αγαντάμ ότι κα χασαράας αμαρί ζορ άμα κα τσσουβάας σημασία κο λάφια σο ασούντιβενας ι Ντεβλέσκε λαόσκε. Οτθάρ, τθεράας αμαρί γκοντί κι ελπίδα κι Βασιλειάκι ντα κεράας μπουτ πράγματα κι Ιεχωβάσκι υπηρεσία. Αντικάς, ατσσικιαρντάμ αμαρί χαρά». Σαρ ο Ιώβ, αντικάς αμέν-ντα ασουνάσα ι Ιεχωβάς! Ο λάφια αμαρέ ντουσμανίνγκε να τασαβένα αμαρί ελπίδα.

17. Σο σικλιάσα κατά παράδειγμας ι πιστέ μουρσένγκο ντα τζουβλίνγκο σο βακέρντιβενα κο Εβραίους κεφάλαιος 11;

¹⁷ Ο Ιώβ ισί σάντε εκ κατά υπηρέτες ι Ιεχωβάσκε σο ατσσιλέ μπίνταρανε ντα ζουρανέ κάνα τθερένας μπαρέ δοκιμασίες. Κι επιστολή σο μπουτσσαντάς ο απόστολος Παύλος κο Εβραίοι, κερέλα λάφι μπουτέ γιαβερένγκε-ντα, ντα βακερέλα ότι ισί «μπαρό σύννεφος μαρτυρένγκο». (Εβρ. 12:1) Σαρέ νακχλέ μπαρέ δοκιμασίες πουμαρέ ζωγιάτε, αλλά ατσσιλέ πιστοί κο Ιεχωβά. (Εβρ. 11:​36-40) Γκιλί χαμέ λένγκι υπομονή ντα σαρέ οντουλά σο κερντέ; Σίγουρα νάα! Παρόλο σο να ντικχλέ τι νικιόν μπαγιά σαρέ ο λάφια ι Ιεχωβάσκε καζόμ τζουβντιόνας, να τσσιναντέ τι τθερέν πουμαρί ελπίδα λέστε. Ντα επειδή ισινέ σίγουροι ότι κερένας ι Ιεχωβάσκο γκι, πακιάνας σαρέ πουμαρέ γκίσαρ ότι κα ντικχένας τι νικιόν μπαγιά λέσκε λάφια. (Εβρ. 11:4, 5) Λένγκο παράδειγμας κερέλα-αμέν τι μανγκάς ατζέ πο μπουτ μα τι τσσιναβάς τι τθεράς αμαρί ελπίδα κο Ιεχωβά.

18. Σο μανγκάσα σαρέ αμαρέ γκίσαρ τι κεράς; (Εβραίους 11:6)

¹⁸ Αντιβές, τζουβντιάσα εκχέ ντουνιάστε σο, καζόμ τζάλα, αβέλα πο γκεραλό. (2 Τιμ. 3:​13) Ο Μπενγκ ατζέκ ατζέκ ανέλα δοκιμασίες κι Ντεβλέσκο λαός. Σο-ντα προβλήματα τι αβέν ανγκλ’ αμέντε, τι μανγκάς σαρέ αμαρέ γκίσαρ τι κεράς μπουτ πράγματα ι Ιεχωβάσκε, σόσκε «τθεράσα αμαρί ελπίδα εκχέ τζουβντέ Ντεβλέστε». (1 Τιμ. 4:​10) Ντεν-τουμέν γκοντί ότι οντουλένταρ σο κερντάς ο Ντεβέλ κο Ιώβ σικλιάσα ότι «ο Ιεχωβά σικαβέλα μπουτ μανγκιπέ ντα συγχωρίνελα». (Ιακ. 5:​11) Τι ατσσάς αμέν-ντα αφοσιωμέ κο Ιεχωβά ντα τι αβάς σίγουροι ότι βοβ κα ανέλ «ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες».​—Διαβάνεν Εβραίους 11:6.