1. Σο συμβουλή ντινάς ο απόστολος Παύλος κο χρισμέ Χριστιανοί;

«ΜΑ ΜΟΥΚΧΕΝ τουμαρό νεαυτός τι επηρεάντιβελ ανταλέ ντουνιάσταρ», βακερντάς ο απόστολος Παύλος. (Ρωμ. 12:2) Γραφιντάς ανταλά λάφια κο Χριστιανοί σο τζουβντιόνας κο πρώτος αιώνας. Σόσκε ντινάς αζόμ ζουρανί συμβουλή μουρσέντε ντα τζουβλίντε σο μουκχλέας πουμαρί ζωή κο Ντεβέλ ντα ισινέ χρισμέ με άγιος πνεύμας;​—Ρωμ. 1:7.

2, 3. Σαρ προσπαθίνελα ο Μπενγκ τι κερέλ-αμέν τι τζας κόντρα κο Ιεχωβά, αλλά σαρ κα περαβάς ο πράγματα σο ισί «ζουρανέ σαρ πύργοι» αμαρέ γκοντιάτε;

² Ο Παύλος ανησυχίνελας σόσκε ο μπέτι τρόπος σκέψης ι Μπενγκέσκε ντουνιάσκο επηρεάνελας μερικέ Χριστιανόν. (Εφεσ. 4:​17-19) Ανταβά μπορεί τι αβέλ-πες ι κάθε εκχέσκε αμένταρ-ντα. Ο Μπενγκ, ο ντεβέλ ανταλέ ντουνιάσκο, κερέλα διάφορα πράγματα για τι λελ-αμέν ντουρ κατά Ιεχωβά. Για παράδειγμας, άμα ντικχέλα ότι μανγκάσα τι τθεράς μπαρό ναβ ή τι ταρτίνας ι γιαβερένγκι προσοχή, αστάρντιβελα οτθάρ για τι λελ-αμέν κατά Ιεχωβά. Ντα μπορεί τι χρησιμοποιήνελ ο πράγματα σο σικλιλάμ αμαρέ φαμιλιάταρ, κατά σχολείος ή κατά γιαβερά τζενέ για τι κερέλ-αμέν τι σκεφτίνας σαρ μανγκέλα βοβ.

³ Αβέλα-πες τι περαβάς ο πράγματα σο ισί «ζουρανέ σαρ πύργοι» αμαρέ γκοντιάτε; (2 Κορ. 10:4) Ντικχέν σο βακερντάς ο Παύλος: «Περαβάσα ο σκέψεις ντα κάθε μπαρό πράγμας  σο εμποδίνελα ι τζενέν τι σικλιόν ι Ντεβλές, ντα ατσσικιαράσα πφαντί κάθε σκέψη για τι κεράς-λα τι ντελ καν κο Χριστός». (2 Κορ. 10:5) Βα, με τη βοήθεια ι Ιεχωβάσκι μπορίνασα μπαγιά τι νασκιαράς ο λάθος σκέψεις. Σαρ εκ φάρμακος νασκιαρέλα εκ δηλητήριος σο ισί αντρ’ αμέντε, αντικάς ο Λάφι ι Ντεβλέσκο-ντα βοηθίνελα-αμέν τι νασκιαράς ο μπέτι πράγματα σο τσσουβέλα αμαρέ γκοντιάτε ι Μπενγκέσκο ντουνιάς.

4. Σο αλλαγές έπρεπε τι κεράς μπουτ αμένταρ κάνα σικλιλάμ ι αλήθεια;

⁴ Ντεν-τουμέν γκοντί ο αλλαγές σο έπρεπε τι κερέν κάνα σικλιλέν σο σικλιαρέλα μπαγιά ο Λάφι ι Ντεβλέσκο ντα αποφασιντέν τι υπηρετίνεν ι Ιεχωβάς. Μπουτ αμένταρ έπρεπε τι τσσιναβάς τι κεράς μπέτι πράγματα. (1 Κορ. 6:​9-11) Καζόμ μπουτ εκτιμίνασα ι βοήθεια σο ντινάς-αμέν ο Ιεχωβά για τι νασκιαράς ασακέ μπέτι συνήθειες!

5. Καλά ντούι πράγματα πρέπει τι κεράς σαρ βακερέλα ο εδάφιος Ρωμαίους 12:2;

⁵ Αλλά ποτές μα τι αμντίνας ότι σαρέ κεράσα-λεν λατσσές. Παρόλο σο τσσιναντάμ ο μπαρέ αμαρτίες σο κεράας πριν τι μπολντιάς, ακανά-ντα πρέπει τι κεράς σο νακχέλα αμαρέ βαστέσταρ για τι νασάς σαρέ κατά πράγματα σο κα κερένας-αμέν τι βουρτίνας κο πουρανέ. Σαρ κα κεράς-λες ανταβά; Ο Παύλος βακερέλα: «Μα μουκχέν τουμαρό νεαυτός τι επηρεάντιβελ ανταλέ ντουνιάσταρ, αλλά τι αλλάνεν ντα τι τσσουβέν νεβέ πράγματα τουμαρέ γκοντιάτε». (Ρωμ. 12:2) Πρέπει τι κεράς ντούι πράγματα. Πρώτον, “μα τι επηρεάντιβας ανταλέ ντουνιάσταρ”. Δεύτερον, “τι αλλάνας” ντα τι τσσουβάς νεβέ πράγματα αμαρέ γκοντιάτε.

6. Σο σικλιάσα κατά λάφια ι Ιησούσκε σο ισί κο εδάφια Ματθαίος 12:​43-45;

⁶ Η αλλαγή σο τθερέλας πι γκοντιάτε ο Παύλος νανέ σάντε εκ αλλαγή σο κεράσα αβριάλ. (Ντικχ ο πλαίσιος « Αλλαξάλαμ Ντιπ Αντράλ ή Σάντε Αβριάλ;») Πρέπει τι  αλλάνας ντιπ αμαρί γκοντί, δηλαδή οντουλά σο πακιάσα, νιωθίνασα ντα μανγκάσα αντρ’ αμέντε. Οντουλέσκε, σαρέ πρέπει τι πουτσάς-αμέν: “Ο αλλαγές σο κεράβα για τι αβάβ σαρ ο Χριστός ισί σάντε κο πράγματα σο ντικχίντιβενα ή αλλάναβα μπαγιά μο γκι ντα μι γκοντί;” Η διαφορά ισί μπαρί. Ο Ιησούς, κο εδάφια Ματθαίος 12:​43-45, σικαντάς σο πρέπει τι κεράς. (Διαβάνεν) Ανταλέ λαφίνταρ σικλιάσα ακαβά σημαντικός πράγμας: Να ερεσέλα τι νασκιαράς ο λάθος σκέψεις. Πρέπει λένγκε θεσιάτε τι τσσουβάς ο σκέψεις ι Ντεβλέσκε.

7. Σαρ μπορίνασα τι αλλάνας αμαρό γκι ντα αμαρί γκοντί;

⁷ Αβέλα-πες τι αλλάνας αμαρό γκι ντα αμαρί γκοντί; Ο Λάφι ι Ντεβλέσκο βακερέλα: «Πρέπει τι συνεχίνεν τι αλλάνεν ντα τι τθερέν εκ νεβό τρόπος σκέψης, ντα πρέπει τι ιρίν ο νεβό χαρακτήρας σο κερντιλό αντικάς σαρ μανγκέλα ο Ντεβέλ με αληθινή δικαιοσύνη ντα αφοσίωση». (Εφεσ. 4:​23, 24) Βα, αβέλα-πες τι αλλάνας οντουβά σο ισινάμ αντρ’ αμέντε, αλλά νανέ εύκολος. Να ερεσέλα σάντε τι τασαβάς ο μπέτι πράγματα σο μανγκάσα ντα τι τσσιναβάς τι κεράς λάθος πράγματα. Πρέπει “τι τθεράς εκ νεβό τρόπος σκέψης”, δηλαδή τι αλλάνας οντουλά σο μανγκάσα, αμαρί συμπεριφορά ντα ο λόγοι σο κεράσα μερικά πράγματα. Για τι αβέλ-πες ανταβά δεν πρέπει τι τσσιναβάς τι προσπαθίνας.

8, 9. Σαρ σικαβέλα οντουβά σο αβιλό-πες εκχέ πφραλέσκε ότι πρέπει τι αλλάνας οντουβά σο ισινάμ αντρ’ αμέντε;

⁸ Ντικχέν ο παράδειγμας εκχέ πφραλέσκο σο ανγκλέ χάλας-πες ι γιαβερέντζαρ ντα πίλας. Αφού τσσιναντάς-λεν ανταλά ερεσλό κο μπολντιπέ, ντα αντικάς ντινάς μπουτ λατσσί μαρτυρία οτθέ σο μπεσέλας. Αλλά σοράν πι μπολντιμάσταρ, αβιλό-πες κάτι σο να μπεκλεντίνελας. Εκ ιράτ, γκιλό λέσκε εκ ματό κο κχερ ντα μανγκέλας τι χαλ-πες λέσαρ. Κι αρχή ο πφραλ ατσσικιαρντάς-πες. Κάνα όμως ο τζενό κουσλάς ο ναβ ι Ιεχωβάσκο, ο πφραλ να νταϊντισάλο γιαβέρ. Νικίστιλο αβρί ντα νταπλάς-λες. Σόσκε αβιλό-πες ανταβά; Παρόλο σο η Γραφή βοηθιντάας ι πφραλές μα τι χαλ-πες ι γιαβερέντζαρ, να αλλαντάας ατζέ πο τρόπος σκέψης. Γιαβερέ λαφίντζαρ, να αλλαντάας ατζέκ οντουβά σο ισινέ μπαγιά αντρέ πέστε.

⁹ Ο πφραλ όμως να παρατιντάς-λεν. (Παρ. 24:​16) Με τη βοήθεια ι πρεσβυτερόνγκι, κερντάς πιο ζουρανί πι φιλία ι Ιεχωβάσαρ. Τελικά, αβιλό πρεσβύτερος. Αζομάν, εκ ιράτ αβριάλ κατά Αίθουσα Βασιλείας, αβιλό-πες πάλι κάτι σαρ οντουβά σο αβιλόας-πες πριν μπρεσά. Εκ ματό γκιλό τι νταπέλ εκχέ γιαβερέ πρεσβυτερός. Σο κερντάς αμαρό πφραλ; Με ήρεμος, ταπεινός τρόπος κερντάς λάφι ι ματέ τζενέσαρ, βοηθιντάς οντουλέ τζενές σο ιζράλας τι ηρεμίνελ ντα τι τζαλ κχερέ. Σο αβιλό-πες ανταγιά φαρ; Ο πφραλ αλλαντάας πο τρόπος σκέψης. Ντιπ αντρέ πέστε αλλαξάλο ντα αβιλό ειρηνικός ντα ταπεινός τζενό. Σο μπαρί δόξα αντάς κο Ιεχωβά!

10. Σο χρειαζίντιβελα για τι κεράς ανταλά αλλαγές;

¹⁰ Ανταλά αλλαγές να αβένα-πες αντρέ εκχέ ντιβεσέστε ή χωρίς τι προσπαθίνας. Μπορεί τι χρειαζίντιβελ τι “κεράς ο πιο λατσσό σο μπορίνασα” μπερεκέτι μπρεσά. (2 Πέτρ. 1:5) Να ερεσέλα σάντε τι αβάς «κι αλήθεια» μπουτ καιρός. Πρέπει τι κεράς ο πιο λατσσό για τι αλλάνας οντουβά σο ισινάμ αντρ’ αμέντε. Σο κα βοηθίνελ-αμέν τι κεράς ανταγιά αλλαγή; Για τι ντικχάς μερικά πράγματα.

11. Σαρ βοηθίνελα-αμέν η προσευχή τι αλλάνας αμαρό τρόπος σκέψης;

¹¹ Η προσευχή ισί ο πρώτος σημαντικός πράγμας. Πρέπει τι προσευχίντιβας σαρ ο  ψαλμωδός: «Κερ εκ πάκι γκι αντρέ μάντε, Ντέβλα, ντα τσσουβ εκ νεβί γκοντί αντρέ μάντε για μα τι περάβ». (Ψαλμ. 51:​10) Πρέπει τι αγαβάς ότι τθεράσα ανάγκη τι αλλάνας αμαρό τρόπος σκέψης ντα τι μανγκάς βοήθεια κατά Ιεχωβά. Σαρ κα αβάς σίγουροι ότι ο Ιεχωβά κα βοηθίνελ-αμέν τι αλλάνας; Ενθαρρύνελα-αμέν οντουβά σο βακερντάς ο Ιεχωβά ότι κα κερέλας ι Ισραηλιτένγκε σο τθερένας σορό ντα τζουβντιόνας αζομάν σο τζουβντιόλας ο Ιεζεκιήλ: «Κα κεράβ λένγκο γκι τι αβέλ γιεκ ντα κα τσσουβάβ αντρέ λέντε εκ νεβί γκοντί . . . ντα κα νταβ-λεν εκ κοβλό γκι [δηλαδή εκ γκι σο μουκχέλα ι Ντεβλές τι οδηγίνελ-λες]». (Ιεζ. 11:​19· υποσ.) Ο Ιεχωβά μανγκέλας τι βοηθίνελ οντουλέ Ισραηλιτέν τι αλλάνεν ντα μανγκέλα τι βοηθίνελ αμέν-ντα.

12, 13. (α) Σο πρέπει τι σκεφτίνας λατσσές σαρ βακερέλα ο εδάφιος Ψαλμός 119:​59; (β) Σο ερωτήσεις πρέπει τι κερέν τουμαρέ νεαυτόσκε;

¹² Ο δεύτερος σημαντικός πράγμας ισί τι σκεφτίνας λατσσές. Καζόμ διαβάνασα κάθε ντιβές ο Λάφι ι Ντεβλέσκο, πρέπει τι αρακχάς χρόνος για τι σκεφτίνας λατσσές καλά σκέψεις ντα αισθήματα πρέπει τι αλλάνας. (Διαβάνεν Ψαλμός 119:​59· Εβρ. 4:​12· Ιακ. 1:​25) Πρέπει τι αρακχάς καλά πράγματα μπορεί τι ταρτίνενα-αμέν κι σοφία κι ντουνιάσκι. Πρέπει τι αγαβάς καλέ πραγματέντε ισινάμ μπίζουρανε ντα σοράν τι κεράς σο νακχέλα αμαρέ βαστέσταρ για τι ζουράνιβας.

¹³ Για παράδειγμας, πουτσέν-τουμέν: “Μήπως τθεράβα ατζέ-ντα χάνικ ζήλια αντρέ μάντε;” (1 Πέτρ. 2:1) “Μήπως πακιάβα ότι ισινόμ πιο λατσσό κατά γιαβερά επειδή ισινόμ εκχέ συγκεκριμέ τθεμέσταρ, τζανάβα μπουτ πράγματα ή τθεράβα λοβέ;” (Παρ. 16:5) “Μήπως τσσουβάβα πιο τελέ μάνταρ οντουλέν σο να τθερένα ο ίδια πράγματα μάντζαρ ή οντουλά σο ισί γιαβερτθάρ;” (Ιακ. 2:​2-4) “Μήπως αγαβάβα ότι ταρτίνενα-μαν ο πράγματα σο ντέλα ι Μπενγκέσκο ντουνιάς;” (1 Ιωάν. 2:​15-17) “Μήπως μπεϊντίναβα τι διασκεδάναβ λουμνικανέ ντα βίαιε πραγματέντζαρ;” (Ψαλμ. 97:​10· 101:3· Αμώς 5:​15) Ο απαντήσεις ανταλέ ερωτησιέντε μπορεί τι σικαβέν κατέ χρειαζίντιβελα τι αβέν πιο λατσσέ. Κάνα νασκιαράσα σκέψεις σο ισί αμαρέ γκίστε «ζουρανέ σαρ πύργοι», κα κεράς ο γκι αμαρέ Νταντέσκο σο ισί κο ουρανός.​—Ψαλμ. 19:14.

14. Σόσκε ισί αζόμ σημαντικός τι τραμπίνας λατσσέ αμαλέν;

¹⁴ Ο τρίτος σημαντικός πράγμας ισί τι τραμπίνας λατσσέ αμαλέν. Είτε αγαβάσα-λες είτε όχι, αμαρέ αμαλά επηρεάνενα-αμέν μπουτ. (Παρ. 13:​20) Κι μπουτί ή κο σχολείος, ο πιο μπουτ αμένταρ ισινάμ τζενέντζαρ σο να βοηθίνενα-αμέν τι σκεφτίνας σαρ μανγκέλα ο Ντεβέλ. Μπορίνασα όμως τι αρακχάς ι πιο λατσσέ αμαλέν κο συναθροίσεις. Οτθέ κα βοηθίντιβας «τι σικαβάς αγάπη ντα τι κεράς λατσσέ πράγματα».​—Εβρ. 10:​24, 25.

15, 16. Σαρ προσπαθίνελα ο Μπενγκ τι αλλάνελ αμαρό τρόπος σκέψης;

¹⁵ Τι ντεν-τουμέν γκοντί όμως ότι ο Μπενγκ ισί αποφασισμέ τι αλλάνελ αμαρό τρόπος σκέψης. Τζανέλα ότι η αλήθεια σο ισί κο Λάφι κι Ντεβλέσκο κερέλα λατσσιπέ κο τρόπος σο σκεφτίνασα. Οτθάρ, χρησιμοποιήνελα σαβέ τι μανγκές σκέψεις για τι αλλάνελ αμαρί γκοντί.

¹⁶ Ο Μπενγκ πουτσέλα ο ίδιος πράγμας σο πουτσλάας ι Ευά-ντα κο κήπος της Εδέμ: «Μπαγιά βακερντάς ο Ντεβέλ ότι . . . ;» (Γέν. 3:1) Ανταλέ ντουνιάστε, σο ισί κι Μπενγκέσκο βας, ασουνάσα μπουτ φαρ ερωτήσεις σο κερένα-αμέν μα τι αβάς σίγουροι οντουλένγκε σο πακιάσα, σαρ για παράδειγμας: “Μπαγιά να μανγκέλα ο Ντεβέλ τι παντρίνεν μουρσά μουρσέντζαρ ή τζουβλιά τζουβλίντζαρ; Μπαγιά να μανγκέλα ο Ντεβέλ τι κερέν Χριστούγεννα ντα γενέθλια; Μπαγιά να μανγκέλα τουμαρό Ντεβέλ τι τσσουβέν  ρατ; Μπαγιά μπεκλεντίνελα εκ λατσσό Ντεβέλ μα τι κερέν παρέα τουμαρέ αγαπημέ τζενέντζαρ σο χαλέ αποκοπή;”

17. Σο πρέπει τι κεράς κάνα πουτσένα-αμέν πράγματα σο κερένα-αμέν μα τι αβάς σίγουροι οντουλένγκε σο πακιάσα, ντα καβά μπορεί τι αβέλ ο αποτέλεσμας σαρ βακερένα ο εδάφια Κολοσσαείς 2:6, 7;

¹⁷ Πρέπει τι αβάς σίγουροι οντουλένγκε σο πακιάσα. Άμα κα μουκχάς ασακέ ερωτήσεις χωρίς απάντηση αμαρέ γκοντιάτε, μπορεί μα τι αβάς σίγουροι ότι οντουλά σο πακιάσα ισί μπαγιά. Ανταβά κα μπορίνελας τι χαλαβέλ αμαρό τρόπος σκέψης ντα τι καταστραφίνελ αμαρί πίστη. Σο πρέπει τι κεράς; Ο Λάφι ι Ντεβλέσκο βακερέλα αμένγκε τι αλλάνας αμαρί γκοντί, ντα αντικάς τι σικαβάς αμαρέ νεαυτόσκε ότι «οντουβά σο μανγκέλα ο Ντεβέλ ισί λατσσό ντα σωστός ντα τέλειος». (Ρωμ. 12:2) Κάνα να τσσιναβάσα τι σικλιαράς-αμέν, σικαβάσα αμαρέ νεαυτόσκε ότι οντουλά σο σικλιλάμ κατά Γραφή ισί μπαγιά. Μπορίνασα τι αβάς ντιπ σίγουροι ότι ο κανόνες ι Ιεχωβάσκε ισί σωστοί. Αζομάν, σαρ δέντρος σο τθερέλα μπαρέ ρίζες, κα αβάς λατσσές ριζωμέ, «σταθεροί κι πίστη».​—Διαβάνεν Κολοσσαείς 2:6, 7.

18. Σαρ κα νασκιαράς ο δηλητήριος ανταλέ μπενγκαλέ ντουνιάσκο;

¹⁸ Σάντε τουμέν μπορίνενα τι κερέν τουμαρί πίστη ζουρανί, οτθάρ μα τσσιναβέν τι αλλάνεν ντα τι τθερέν εκ νεβό τρόπος σκέψης. Μα τσσιναβέν τι προσευχίντιβεν ντα τι μολίνεν τι βοηθίνελ-τουμέν ο πνεύμας ι Ιεχωβάσκο. Τι σκεφτίνεν λατσσές ντα μα τσσιναβέν τι ρόντεν για τι αγαβέν σαρ σκεφτίνενα ντα σο τσσίντελα-τουμέν τι κερέν μερικά πράγματα. Τι ρόντεν λατσσέ αμαλένγκε ντα τι αβέν τζενέντζαρ σο κα βοηθίνεν-τουμέν τι αλλάνεν τουμαρό τρόπος σκέψης. Άμα κα κερέν-λεν ανταλά, κα νασκιαρέν ο δηλητήριος ανταλέ μπενγκαλέ ντουνιάσκο ντα κα περαβέν «ο σκέψεις ντα κάθε μπαρό πράγμας σο εμποδίνελα ι τζενέν τι σικλιόν ι Ντεβλές».​—2 Κορ. 10:5.