1. Σο αγαντάς ο απόστολος Παύλος;

Ο ΑΠΟΣΤΟΛΟΣ ΠΑΥΛΟΣ αγαντάς ότι μπάζιμα νιωθίνελας μπίζουρανο. Βακερντάς ότι λέσκο σώμας “χαλάντιβελας”, ότι ισινέ λέσκε δύσκολος τι κερέλ ο σωστός ντα ότι ο Ιεχωβά να ντέλας-λες πάντα ι απάντηση σο μανγκέλας βοβ πι προσευχιέντε. (2 Κορ. 4:​16· 12:​7-9· Ρωμ. 7:​21-23) Επίσης, αγαντάς ότι λέσκε ντουσμάνια αμντίνενας-λες μπίζουρανο. * Αλλά να μουκχέλας ούτε ο λάθη σο κερέλας ούτε ο μπέτι πράγματα σο βακερένας ο γιαβερά λέσκε τι κερέν-λες τι νιωθίνελ άχρηστος.​—2 Κορ. 10:​10-12, 17, 18.

2. Καβά σημαντικός πράγμας σικλιλό ο Παύλος σαρ βακερένα ο εδάφια 2 Κορινθίους 12:9, 10;

² Ο Παύλος σικλιλό κάτι μπουτ σημαντικός: Εκ τζενό μπορίνελα τι αβέλ ζουρανό ατζέ-ντα κάνα νιωθίνελα μπίζουρανο. (Διαβάνεν 2 Κορινθίους 12:9, 10) Ο Ιεχωβά βακερντάς λέσκε ότι Λέσκι ζορ “σικάντιβελα σαστί λέσκε κάνα ισί μπίζουρανο”. Ανταβά λάφι μανγκέλα τι βακερέλ ότι ο Ιεχωβά κα ντέλας ι Παυλός ι ζορ σο να τθερέλας. Πρώτα όμως για τι ντικχάς σόσκε δεν πρέπει τι τσσουβάς αμαρέ γκίστε κάνα προσβαλίνενα-αμέν οντουλά σο τζάνα αμέντζαρ κόντρα.

3. Σόσκε μπορίνασα “τι αρακχάς χαρά κάνα προσβαλίνενα-αμέν”;

³ Καέκ τζενό να μπεϊντίνελα τι προσβαλίνεν-λες. Όμως, άμα αμαρέ ντουσμάνια προσβαλίνενα-αμέν ντα αμέν τσσουβάσα  αμαρέ γκίστε, μπορεί τι χασαράς αμαρί ζορ. (Παρ. 24:​10) Σαρ πρέπει τι ντικχάς οντουλά σο βακερένα αμένγκε; Σαρ ο Παύλος, αντικάς αμέν-ντα μπορίνασα “τι αρακχάς χαρά κάνα προσβαλίνενα-αμέν”. (2 Κορ. 12:​10) Σόσκε; Επειδή κάνα ο τζενέ προσβαλίνενα-αμέν ντα τζάνα αμέντζαρ κόντρα, ανταβά σικαβέλα ότι ισινάμ αληθινοί μαθητές ι Ιησούσκε. (1 Πέτρ. 4:​14) Ο Ιησούς βακερντάς ότι ο τζενέ κα τζάνας κόντρα λέσκε μαθητέντζαρ. (Ιωάν. 15:​18-20) Ανταβά αβιλό-πες κο πρώτοι Χριστιανοί. Αζομάν, οντουλά σο επηρεάντιβενας κατά ελληνική κουλτούρα ντικχένας ι Χριστιανόν σαρ τζενέ σο να τζανένας τίποτα ντα να τθερένας ζορ. Ντα ο Ιουδαίοι ντικχένας ι Χριστιανόν σαρ «αγράμματοι ντα συνηθισμέ τζενέ», σαρ ντικχένας ι Πετρός ντα ι Ιωαννής. (Πράξ. 4:​13) Ο Χριστιανοί ντικχίντιβενας μπίζουρανε. Να ανακατούντιβενας κο πολιτικά ούτε τζάνας κο στρατός, ντα ο τζενέ να σεβάνενας-λεν ιτς.

4. Σο κερένας ο πρώτοι Χριστιανοί κάνα ο τζενέ σο τζάνας λέντζαρ κόντρα βακερένας μπέτι πράγματα λένγκε;

⁴ Μήπως οντουλά πρώτοι Χριστιανοί μουκχλέ ο μπέτι πράγματα σο βακερένας οντουλά σο τζάνας λέντζαρ κόντρα τι τσσιναβέν-λεν; Νάα. Ο Πέτρος ντα ο Ιωάννης, για παράδειγμας, ισινέ χαρούμενοι σο τζάνας λέντζαρ κόντρα επειδή ισινέ μαθητές ι Ιησούσκε ντα σικλιαρένας ι γιαβερέν λέσκε. (Πράξ. 4:​18-21· 5:​27-29, 40-42) Ο μαθητές να λατζάνας ιτς ανταλέσκε. Καζόμ νακχένας ο μπρεσά σικάντιλο ότι οντουλά ταπεινοί Χριστιανοί κερντέ πιο μπαρό λατσσιπέ ι ντουνιάσκε οντουλέσταρ σο κερντέ λένγκε ντουσμάνια. Για παράδειγμας, ο βιβλία ι Γραφιάκε σο γραφιντέ μερικοί οντουλέ Χριστιανόνταρ ατζέκ ατζέκ ντένα βοήθεια ντα ελπίδα εκατομμύρια τζενέντε. Ντα η Βασιλεία σο βακερένας λάκε, ακανά κερέλα κουμάντος κο ουρανός ντα ατζεχάνικ κα κερέλ κουμάντος σαρί ι πφουβ. (Ματθ. 24:​14) Οκιά μπάνταρ, η ζουρανί πουρανί Ρωμαϊκή κυβέρνηση σο τζάλας κόντρα κο Χριστιανοί, μπουτ μπρεσά ακανά να υπαρχίντιβελα. Επίσης, οντουλά αφοσιωμέ μαθητές ακανά ισί βασιλιάδες κο ουρανός. Όμως, οντουλά σο τζάνας λέντζαρ κόντρα ισί μουλέ. Ντα άμα εκ ντιβές κα τζουβντιόν πάλι, κα αβέν τελάλ οντουλέ Βασιλειάταρ σο τζάνας λάσαρ κόντρα.​—Αποκ. 5:10.

5. Σόσκε ο τζενέ κο ντουνιάς να σεβάνενα ι Ιεχωβάσκε λαός σαρ βακερέλα ο εδάφιος Ιωάννης 15:19;

⁵ Αντιβές, μερικά τζενέ να σεβάνενα ι Ιεχωβάσκε λαός ντα πρασάνα-αμέν επειδή αμντίνενα ότι να τζανάσα τίποτα ντα να τθεράσα ζορ. Σόσκε; Επειδή να σκεφτίνασα σαρ ο τζενέ. Προσπαθίνασα τι αβάς ταπεινοί, κοβλέ γκίσκε ντα τι ντας καν. Ο ντουνιάς, οκιά μπάνταρ, ισαρέλα ι μπαρικανέν ντα οντουλέν σο τζάνα κόντρα ι γιαβερέντζαρ. Επίσης, να ανακατούντιβασα κο πολιτικά ντα να τζάσα κο στρατός. Ισινάμ διαφορετικοί κατά τζενέ κο ντουνιάς αντιβές, οτθάρ αμντίνενα ότι να ισινάμ μπουτ σημαντικοί.​—Διαβάνεν Ιωάννης 15:​19· Ρωμ. 12:2.

6. Καλά μπαρέ πράγματα κερέλα ο Ιεχωβά πι λαόσαρ;

⁶ Παρόλο σο ο τζενέ αμντίνενα ότι ισινάμ μπίζουρανε, ο Ιεχωβά χρησιμοποιήνελα-αμέν για τι κερέλ μπαρέ πράγματα. Κερέλα ο πιο μπαρό έργος σο αβιλό-πες ποτές οπράλ κι πφουβ. Λέσκε υπηρέτες αντιβές νικαβένα ο πιο γνωστά περιοδικά κο ντουνιάς σο μεταφράντιβενα πιο μπουτ τσσιμπέντε σαρέ κατά γιαβερά περιοδικά. Επίσης, αντράλ κατά Αγία Γραφή βοηθίνενα εκατομμύρια τζενέν τι κερέν πιο λατσσί πουμαρί ζωή. Σαρί η δόξα ανταλέ μπαρέ πραγματένγκε τζάλα κο Ιεχωβά, σο χρησιμοποιήνελα τζενέν σο ντικχίντιβενα μπίζουρανε για τι κερέλ ανταλά μπαρέ πράγματα. Σο κα βακεράς όμως ι κάθε εκχέσκε αμένταρ; Μπορίνελα ο Ιεχωβά τι βοηθίνελ-αμέν τι αβάς ζουρανέ; Ντα άμα βα, σο πρέπει τι κεράς για τι  λας λέσκι βοήθεια; Κα ντικχάς καλά τριν πράγματα σικλιάσα κατά απόστολος Παύλος.

7. Καβά πράγμας σικλιάσα κατά Παύλος;

⁷ Εκ πράγμας σο σικλιάσα κατά Παύλος ισί ακαβά: Μα στηρίντιβεν τουμαρέ ζοριάτε ή κο πράγματα σο τζανένα τι κερέν κάνα υπηρετίνενα ι Ιεχωβάς. Μπουτέ τζενένγκε, ο Παύλος τθερέλας λόγους τι αβέλ μπαρικανό ντα τι στηρίντιβελ πι νεαυτόστε. Μπαριλόας κι Ταρσός, σο ισινέ η πρωτεύουσα εκχέ ρωμαϊκέ τθεμέσκι. Κι Ταρσός μπεσένας χουλανέ τζενέ ντα οτθέ ισινέ εκ μπουτ λατσσό πανεπιστήμιος-ντα. Ο Παύλος ισινέ μπουτ μορφωμέ τζενό​—λέσκο δάσκαλος ισινέ ο Γαμαλιήλ, εκ αρχηγός ι Ιουδαιόνγκο σο σεβάνενας-λες σαρέ αζομάν. (Πράξ. 5:​34· 22:3) Ντα ο Παύλος ισινέ μπουτ σημαντικός τζενό ι Ιουδαιόνγκε. Σαρ βακερντάς βοβ: «Τζάβας-λεν πιο λατσσές κο Ιουδαϊσμός μπουτέ γιαβερένταρ μι τθεμέστε σο ισινέ τερνέ σαρ ισινόμας με». (Γαλ. 1:​13, 14· Πράξ. 26:4) Όμως, ο Παύλος να στηρίντιβελας πι νεαυτόστε.

8. Σο πακιάλας ο Παύλος ι πραγματένγκε σο μουκχλάς σαρ βακερέλα ο εδάφιος Φιλιππησίους 3:8, ντα σόσκε “αρακχέλας χαρά κάνα ισινέ μπίζουρανο”;

⁸ Ο Παύλος μουκχλάς χαράσαρ ο πράγματα σο κερένας-λες τι ντικχίντιβελ ζουρανό. Ερεσλό κο σημείος τι πακιάλ ότι οντουλά πράγματα ισινέ «σκουπίδια». (Διαβάνεν Φιλιππησίους 3:8) Ο Παύλος νακχλάς μπουτ δυσκολίες επειδή αβιλό μαθητής ι Χριστόσκο. Λέσκο τθεμ μισίνελας-λες. (Πράξ. 23:​12-14) Ο Ρωμαίοι νταπλέ-λες ντα τσσουντέ-λες κι φυλακή, παρόλο σο ισινέ βοβ-ντα Ρωμαίος. (Πράξ. 16:​19-24, 37) Επίσης, αγαντάς ότι ισινέ ατελής ντα ισινέ λέσκε μπουτ δύσκολος τι κερέλ ο σωστός. (Ρωμ. 7:​21-25) Αντίς όμως τι τσσιναβέλ τι αβέλ μαθητής ι Χριστόσκο επειδή τθερέλας προβλήματα ντα νιωθίνελας μπέτι, “αρακχέλας χαρά κάνα ισινέ μπίζουρανο”. Σόσκε; Επειδή κάνα ισινέ μπίζουρανο, αζομάν ισινέ σο ντικχέλας ι ζορ ι Ντεβλέσκι πι ζωγιάτε.​—2 Κορ. 4:7· 12:10.

9. Σαρ πρέπει τι νιωθίνας ι πραγματένγκε σο κερένα-αμέν τι ντικχίντιβας μπίζουρανε;

⁹ Άμα μανγκάσα τι λας ζορ κατά Ιεχωβά, δεν πρέπει τι αμντίνας ότι ο ζουρανιπέ, η μόρφωση, ο τθεμ σο μπαριλάμ ή ο μπουτ  λοβέ κερένα-αμέν τι αβάς χρήσιμοι ι Ιεχωβάσκε. Αντρέ κο λαός κι Ντεβλέσκο να υπαρχίντιβενα μπουτ σο ισί «γκοντιαβέρ κο γιακχά κι τζενένγκε ούτε μπουτ σο ισί ζουρανέ ούτε μπουτ σο ισί βασιλιαδένγκε φαράταρ». Αλλά ο Ιεχωβά τραμπιντάς τι χρησιμοποιήνελ «ι μπίζουρανεν ι ντουνιάσκε». (1 Κορ. 1:​26, 27) Οτθάρ, ατζέ-ντα άμα να τθερένα ο πράγματα σο βακέρντιλε κι αρχή κι παράγραφος, μπορίνενα τι συνεχίνεν τι υπηρετίνεν ι Ιεχωβάς. Κάνα να τθερένα ασακέ πράγματα ισί ευκαιρία τι ντικχέν σαρ κα ντελ-τουμέν ο Ιεχωβά ζορ. Άμα, για παράδειγμας, νταρένα οντουλένταρ σο προσπαθίνενα τι κερέν-τουμέν μα τι αβέν σίγουροι οντουλένγκε σο πακιάνα, προσευχίντιβεν τι κερέλ-τουμέν ο Ιεχωβά μα τι νταρέν τι κερέν λάφι οντουλέ πραγματένγκε. (Εφεσ. 6:​19, 20) Άμα ισινέν μπουτ νασφαλέ, τι μανγκέν κατά Ιεχωβά ι ζορ σο χρειαζίντιβενα για τι κερέν καζόμ πιο μπουτ πράγματα αβέλα-πες λέσκε. Κάθε φαρ σο ντικχένα ι Ιεχωβάς τι βοηθίνελ-τουμέν, τουμαρί πίστη μπαριόλα ντα τουμέν αβένα πιο ζουρανέ.

10. Σόσκε πρέπει τι διαβάνας ο παράδειγμας πιστέ τζενένγκο σο ισί αντρέ κι Γραφή σαρ οντουλένγκο σο βακέρντιβενα κο εδάφια Εβραίους 11:​32-34;

¹⁰ Ο Παύλος διαβάνελας μπουτ φαρ ο Λάφι ι Ντεβλέσκο ντα σικλιόλας μπουτ πράγματα κατά παράδειγμας πιστέ τζενένγκο σο διαβάνελας λένγκε. Κι επιστολή σο γραφιντάς κο Εβραίοι Χριστιανοί, ο Παύλος μανγκλάς λένταρ τι σκεφτίνεν ο παράδειγμας μπουτέ τζενένγκο σο υπηρετίνενας ι Ιεχωβάς πιστά. (Διαβάνεν Εβραίους 11:​32-34) Ντικχέν σάντε εκ παράδειγμας ανταλένταρ, ι Δαβιδίσκο. Γκιλέ λέσαρ κόντρα, όχι σάντε ο ντουσμάνια λέσκε, αλλά μερικοί λέσκε αμαλένταρ-ντα. Καζόμ ντικχάσα ο παράδειγμας ι Δαβιδίσκο, κα αγαβάς σαρ μπορεί τι βοηθίντιλο λέσταρ ο Παύλος ντα σαρ μπορίνασα αμέν τι μοιάζας κο Παύλος.

11. Σόσκε ντικχίντιβελας μπίζουρανο ο Δαβίδ; (Ντικχ ι φωτογραφία κι ανγκλαϊνί σελίδα)

¹¹ Ο Δαβίδ ντικχίντιβελας μπίζουρανο ανγκλάλ κο ζουρανό πολεμιστής Γολιάθ. Κάνα ντικχλάς-λες ο Γολιάθ, «ασάντιλο λέσαρ». Ο Γολιάθ ισινέ πιο μπαρό, τθερέλας πιο λατσσέ όπλα ντα τζανέλας τι κερέλ τζένγκι. Οκιά μπάνταρ, ο Δαβίδ ισινέ εκ τερνό σο να τζανέλας τι κερέλ τζένγκι ντα να τθερέλας λατσσέ όπλα. Όμως, κι πραγματικότητα βοβ ισινέ ζουρανό. Στηριντάς-πες κο Ιεχωβά, ντα ο Ιεχωβά ντινάς-λες ι ζορ ντα νικιντάς πι ντουσμανίς.​—1 Σαμ. 17:​41-45, 50.

12. Καγιά γιαβέρ δυσκολία νακχλάς ο Δαβίδ;

¹² Ο Δαβίδ νακχλάας εκ γιαβέρ-ντα δυσκολία σο κα μπορίνελας τι κερέλ-λες τι νιωθίνελ μπίζουρανο. Ισινέ αφοσιωμέ κο Σαούλ, σο τσσουντάς-λες ο Ιεχωβά βασιλιάς κο Ισραήλ. Κι αρχή, ο βασιλιάς Σαούλ σεβάνελας ι Δαβιδίς. Πιο σοράν όμως, ο μπαρικανιπέ αντάς λέσκε ζήλια. Αρχισάλο τι συμπεριφερίντιβελ λέσκε μπουτ μπέτι, ατζέ-ντα μανγκέλας τι μουνταρέλ-λες.​—1 Σαμ. 18:​6-9, 29· 19:​9-11.

13. Σο κερντάς ο Δαβίδ κάνα ο βασιλιάς Σαούλ συμπεριφερισάλο λέσκε μπουτ μπέτι;

¹³ Παρόλο σο ο βασιλιάς Σαούλ συμπεριφερισάλο λέσκε μπουτ μπέτι, ο Δαβίδ να τσσιναντάς τι σικαβέλ σεβασμός ι βασιλιάσκε σο τραμπιντάας ο Ιεχωβά. (1 Σαμ. 24:6) Να βακερντάς ότι ο Ιεχωβά φταίνελας ι γκεραλέ πραγματένγκε σο κερέλας ο Σαούλ. Αλλά στηριντάς-πες κο Ιεχωβά για τι νταϊντίνελ οντιά δύσκολη δοκιμασία.​—Ψαλμ. 18:1, οπραϊνέ λάφια.

14. Σαρ οντουλά σο νακχλάς ο απόστολος Παύλος μοιάζενας οντουλέντζαρ σο νακχλάς ο Δαβίδ;

¹⁴ Ο απόστολος Παύλος νακχλάς κάτι ασακό. Τθερέλας ντουσμανίν σο ισινέ μπουτ πιο ζουρανέ λέσταρ. Μπουτ αρχηγοί σο ισινέ σημαντικοί οντουλέ ντιβεσέντε μισίνενας-λες. Μπερεκέτι φαρ ντινέας εντολή τι  νταπέν-λες ντα τι τσσουβέν-λες κι φυλακή. Σαρ ι Δαβιδίσκε, αντικάς ι Παυλόσκε-ντα, τζενέ σο κανονικά έπρεπε τι αβέν λέσκε αμαλά, συμπεριφερισάλε λέσκε μπέτι. Τζάνας λέσαρ κόντρα ατζέ-ντα μερικοί αντράλ κατά Χριστιανική κχανγκιρί. (2 Κορ. 12:​11· Φιλιπ. 3:​18) Αλλά βοβ νικιντάς-λεν σαριλέν. Σαρ; Συνεχιντάς τι κερέλ έργος παρόλο σο τζάνας λέσαρ κόντρα. Ατσσιλό αφοσιωμέ πι πφραλέντε ντα πι πφενίντε ατζέ-ντα κάνα βον πφανγκένας λέσκο γκι. Ντα ο πιο σημαντικός, ισινέ πιστός κο Ντεβέλ μέχρι κο τέλος πι ζωγιάκο. (2 Τιμ. 4:8) Κερντάς-λεν σαρέ ανταλά, όχι επειδή ισινέ ζουρανό, αλλά επειδή στηρίντιβελας κο Ιεχωβά.

15. Σο μανγκάσα τι κεράς, ντα σαρ κα κεράς-λες;

¹⁵ Μήπως τζάνα τουμέντζαρ-ντα κόντρα ή πρασάνα-τουμέν τουμαρέ συμμαθητές, ο τζενέ σο κερένα λέντζαρ μπουτί ή τουμαρέ τζενέ σο νανέ κι αλήθεια; Συμπεριφερισάλο τουμένγκε ποτές μπέτι εκ τζενό κατά κχανγκιρί; Άμα βα, τι ντεν-τουμέν γκοντί ι Δαβιδίς ντα ι Παυλός. Μπορίνενα τι “νικίνεν ο κακός με το λατσσό”. (Ρωμ. 12:​21) Κάνα ο τζενέ τζάνα τουμέντζαρ κόντρα, οντουβά σο μανγκένα τι κερέν τουμέν νανέ τι τσσουβέν εκ μπαρ κο τσικάτ εκχέ τζενέσκο, σαρ κερντάς ο Δαβίδ, αλλά τι τσσουβέν ο Λάφι ι Ντεβλέσκο κι γκοντί ντα κο γκι οντουλένγκο σο μανγκένα ι Ντεβλές. Κα κερέν-λες ανταβά άμα στηρίντιβενα κι Γραφή για τι απαντίνεν κο ερωτήσεις κι τζενένγκε, άμα σικαβένα σεβασμός ντα λατσσιπέ οντουλένγκε σο συμπεριφερίντιβενα τουμένγκε μπέτι ντα άμα κερένα ο λατσσό σαριλένγκε, ατζέ-ντα τουμαρέ ντουσμανίνγκε.​—Ματθ. 5:​44· 1 Πέτρ. 3:​15-17.

16, 17. Σο να μπισταρντάς ποτές ο Παύλος;

¹⁶ Πριν τι αβέλ ο απόστολος Παύλος μαθητής ι Χριστόσκο, ισινέ εκ τερνό σο να σικαβέλας σεβασμός ντα τζάλας κόντρα κο μαθητές κι Ιησούσκε. (Πράξ. 7:​58· 1 Τιμ. 1:​13) Ο ίδιος ο Ιησούς τσσιναντάς ι Παυλός, σο αζομάν τζανένας-λες σαρ Σαύλος, τι νταραβέλ ι Χριστιανική κχανγκιρί. Ο Ιησούς κερντάς λέσκε λάφι κατά ουρανός ντα κοριαρντάς-λες. Για τι ντικχέλας πάλι, ο Παύλος έπρεπε τι μανγκέλ βοήθεια οντουλέ τζενένταρ σο τζάλας λέντζαρ κόντρα. Λιντάς ταπεινά βοήθεια κατά μαθητής  Ανανίας, σο κερντάς-λες τι ντικχέλ πάλι.​—Πράξ. 9:​3-9, 17, 18.

¹⁷ Ο Παύλος πιο σοράν αβιλό γνωστός αντρέ κι Χριστιανική κχανγκιρί, αλλά ατσσιλό για πάντα λέσκε γκοντιάτε οντουβά σο σικλιλό κατά Ιησούς σαρ τζάλας κι Δαμασκός. Ατσσιλό ταπεινός ντα μουκχέλας ι πφραλέν ντα ι πφενίν τι βοηθίνεν-λες. Αγαντάς ότι βον ισινέ «μπαρί βοήθεια» λέσκε.​—Κολ. 4:​10, 11, υποσ.

18. Σόσκε μπορεί τι σακιντίνας τι μουκχάς ι γιαβερέν τι βοηθίνεν-αμέν;

¹⁸ Σο σικλιάσα κατά Παύλος; Κάνα αρχισάλαμ τι σικλιάς ι αλήθεια, μπορεί τι μουκχάας ι γιαβερέν τι βοηθίνεν-αμέν επειδή τζανάας ότι τθεράας μπουτ τι σικλιάς. (1 Κορ. 3:1, 2) Αλλά σο κεράσα ακανά; Άμα υπηρετίνασα ι Ιεχωβάς μπουτ μπρεσά ντα τζανάσα μπερεκέτι πράγματα, μπορεί μα τι μανγκάς αζόμ μπουτ τι βοηθίνεν-αμέν ο γιαβερά, ειδικά άμα ισί πιο χάνικ μπρεσά κι αλήθεια. Ο Ιεχωβά όμως μπουτ φαρ ντέλα-αμέν ζορ αντράλ αμαρέ πφραλένταρ ντα πφενίνταρ. (Ρωμ. 1:​11, 12) Πρέπει τι τσσουβάς-λες αμαρέ γκοντιάτε ανταβά άμα μανγκάσα τι ντελ-αμέν ζορ ο Ιεχωβά.

19. Σαρ κερντάς ο Παύλος αζόμ μπουτ σουκάρ πράγματα;

¹⁹ Ο Παύλος κερντάς μπουτ σουκάρ πράγματα αφού αβιλό Χριστιανός. Σόσκε; Επειδή σικλιλό ότι να τθερέλα σημασία κατάρ αβέλα εκ τζενό ή καζόμ ζουρανιπέ, μόρφωση ή λοβέ τθερέλα. Άμα ισί ταπεινός ντα στηρίντιβελα κο Ιεχωβά, μπορίνελα τι κερέλ μπουτ λατσσέ πράγματα. Κα μοιάζας σαρέ κο Παύλος άμα (1) κα στηρίντιβας κο Ιεχωβά, (2) κα σικλιάς κατά παραδείγματα ι Γραφιάκε ντα (3) κα μουκχάς αμαρέ πφραλέν τι βοηθίνεν-αμέν. Αζομάν, καζόμ μπίζουρανε-ντα τι νιωθίνας, ο Ιεχωβά κα κερέλ-αμέν ζουρανέ!