1, 2. (α) Σόσκε δεν πρέπει τι κερέλ αμένγκε εντύπωση άμα ο κυβερνήσεις κα βακερέν τι τσσιναβάς τι ντας λατρεία ι Ιεχωβάς; (β) Σο κα ντικχάς ανταλέ μαθημάστε;

ΚΟ 2018, πιο μπουτ από 223.000 πφραλά τζουβντιόνας τθεμέντε σο ο κυβερνήσεις να μουκχένα-λεν τι κερέν καέκ πράγμας για τι ντεν λατρεία ι Ιεχωβάς ή να μουκχένα-λεν τι κερέν μερικά ανταλέ πραγματένταρ. Ανταβά να κερέλα αμένγκε εντύπωση. Σαρ σικλιλάμ κο γιαβέρ μάθημας, ο αληθινοί Χριστιανοί μπεκλεντίνενα ότι ο τζενέ κα τζαν λέντζαρ κόντρα. (2 Τιμ. 3:​12) Κάι-ντα τι τζουβντιάσα, ο κυβερνήσεις, οτθέ σο να μπεκλεντίνασα, μπορεί τι βακερέν τι τσσιναβάς τι ντας λατρεία αμαρέ λατσσέ Ντεβλές, ι Ιεχωβάς.

² Άμα η κυβέρνηση τουμαρέ τθεμέστε κα βακερέλ τι τσσιναβέν τι ντεν λατρεία ι Ιεχωβάς, μπορεί τι νακχέν τουμαρέ γκοντιάταρ ακαλά ερωτήσεις: “Μήπως ανταβά μανγκέλα τι βακερέλ ότι ο Ντεβέλ νανέ ευχαριστιμέ αμέντζαρ; Κα μπορίνεν ο κυβερνήσεις τι τσσιναβέν-αμέν τι ντας λατρεία ι Ιεχωβάς; Τι τζαβ εκχέ γιαβερέ τθεμέστε για τι νταβ ελεύθερα λατρεία ι Ντεβλές;” Ανταλέ μαθημάστε, κα ντικχάς ο απαντήσεις ανταλέ ερωτησιέντε. Επίσης, κα ντικχάς σαρ κα συνεχίνας τι ντας λατρεία ι Ιεχωβάς άμα ο κυβερνήσεις κα βακερέν τι τσσιναβάς τι κεράς ο έργος ντα καλά πράγματα δεν πρέπει τι κεράς.

3. Σαρ γκιλέ κόντρα κο απόστολος Παύλος ο τζενέ σαρ βακερένα ο εδάφια 2 Κορινθίους 11:​23-27, ντα σο σικλιάσα λέσταρ;

³ Άμα εκ κυβέρνηση κα βακερέλ τι τσσιναβάς τι ντας λατρεία ι Ιεχωβάς, μπορεί τι σκεφτίνας ότι να τθεράσα ι ευλογία ι Ντεβλέσκι. Αλλά ανταβά νανέ μπαγιά. Σκεφτίνεν για παράδειγμας  ι Παυλός. Ο Ντεβέλ σίγουρα ισινέ ευχαριστιμέ λέσαρ. Ο απόστολος Παύλος τθερέλας ο προνόμιος τι γραφίνελ 14 επιστολές κο Χριστιανικές Ελληνικές Γραφές, ντα ισινέ απόστολος ι τθεμένγκο. Όμως, γκιλέ λέσαρ μπουτ μπαρί κόντρα. (Διαβάνεν 2 Κορινθίους 11:​23-27) Οντουλένταρ σο νακχλάς ο απόστολος Παύλος σικλιάσα ότι ο Ιεχωβά μουκχέλα ι τζενέν τι τζαν κόντρα λέσκε πιστέ υπηρετόντε.

4. Σόσκε μισίνελα-αμέν ο ντουνιάς;

⁴ Ο Ιησούς εξηγιντάς σόσκε πρέπει τι μπεκλεντίνας ότι ο τζενέ κα τζαν αμέντζαρ κόντρα. Βακερντάς ότι ο ντουνιάς κα μισίνελας-αμέν επειδή να τθεράσα καέκ σχέση λέσαρ. (Ιωάν. 15:​18, 19) Άμα ο τζενέ τζάνα αμέντζαρ κόντρα να μανγκέλα τι βακερέλ ότι χασαρντάμ ι ευλογία ι Ιεχωβάσκι. Οκιά μπάνταρ, σικαβέλα ότι κεράσα ο σωστός!

5. Μπορίνενα ο τζενέ τι κερέν-αμέν τι τσσιναβάς τι ντας λατρεία ι Ιεχωβάς; Εξηγίνεν.

⁵ Ο τζενέ σο τζάνα αμέντζαρ κόντρα ναστί κερένα-αμέν τι τσσιναβάς τι ντας λατρεία ι Ιεχωβά Ντεβλές, σο ισί ο πιο ζουρανό. Μπουτ τζενέ προσπαθιντέ τι κερέν-λες ανταβά αλλά να μπορισάλε. Σκεφτίνεν για παράδειγμας σο αβιλό-πες κο Δεύτερος Παγκόσμιος Πόλεμος. Αζομάν, ο κυβερνήσεις μπουτέ τθεμέντε τζάνας μπαρί κόντρα κο λαός κι Ντεβλέσκο. Ο Ναζί κι Γερμανία, αλλά ο κυβερνήσεις-ντα κι Αυστραλία, κο Καναδάς ντα γιαβερέ τθεμέντε βακερντέ ι πφραλένγκε τι τσσιναβέν ο έργος σο κερένας. Ντικχέν όμως σο αβιλό-πες. Κάνα αρχισάλο ο τζένγκι κο 1939, ισινέ 72.475 πφραλά σαρό κο ντουνιάς. Κάνα τελειωσάλο ο τζένγκι κο 1945, ο πφραλά αβιλέ 156.299 επειδή ο Ιεχωβά ευλογιντάας πι λαός!

6. Καλά λατσσέ πράγματα μπορεί τι αβέν-πες κάνα τζάνα αμέντζαρ κόντρα ο τζενέ; Βακερέν εκ παράδειγμας.

⁶ Αντίς τι νταράς σο τζάνα αμέντζαρ κόντρα ο τζενέ, ανταβά μπορίνελα τι κερέλ-αμέν τι υπηρετίνας ι Ιεχωβάς ατζέ πιο λατσσές. Για παράδειγμας, εκ αντρόγυνος σο τθερέλας εκχέ χουρντέ τσσαβές τζουβντιόλας εκχέ τθεμέστε σο η κυβέρνηση βακερντάς τι τσσιναβέν τι ντεν λατρεία ι Ιεχωβάς. Αντίς τι νταρέν, ο ντούι-ντα λιντέ ο τακτικός σκαπανικός. Η ρομνί για τι κερέλ-λες ανταβά μουκχλάς ι λατσσί μπουτί σο τθερέλας. Ο ρομ βακερντάς ότι επειδή η κυβέρνηση τζάλας κόντρα ι Ιεχωβάσκε Μαρτυρέντζαρ, μπουτ τζενέ μανγκένας τι σικλιόν  λένγκε. Οτθάρ, αρχίνελας πιο εύκολα μελέτες. Ντα αβιλό εκ γιαβέρ-ντα λατσσιπέ. Εκ πρεσβύτερος οντουλέ τθεμέστε βακερντάς ότι μπουτ τζενέ σο τσσιναντέας τι υπηρετίνεν ι Ιεχωβάς αρχισάλε πάλι τι τζαν κο συναθροίσεις ντα κο έργος.

7. (α) Σο σικλιάσα κατά εδάφια Λευιτικό 26:​36, 37; (β) Σο κα κεράς άμα ο κυβερνήσεις κα βακερέν τι τσσιναβάς τι ντας λατρεία ι Ιεχωβάς;

⁷ Κάνα αμαρέ ντουσμάνια νικαβένα νόμος για μα τι ντας λατρεία ι Ιεχωβάς, μανγκένα τι νταράς ντα τι τσσιναβάς τι υπηρετίνας-λες. Μπορεί επίσης τι βακερένα ψέματα, τι μπουτσσαβένα ι ασκερίν τι ρόντεν αμαρέ κχερά, τι γκερένα-αμέν κο δικαστήρια ή ατζέ-ντα τι τσσουβένα-αμέν φυλακή. Μανγκένα τι ιζράς κατά νταρ επειδή τσσουντέ χάνικ πφραλέν κι φυλακή. Άμα κα μουκχάς-λεν τι νταραβέν-αμέν, μπορεί τι αρχίνας τι κεράς πιο χάνικ πράγματα ι Ιεχωβάσκε ή ατζέ-ντα τι τσσιναβάς τι υπηρετίνας-λες. Να μανγκάσα τι αβάς σαρ οντουλά τζενέ σο βακερένα ο εδάφια Λευιτικό 26:​36, 37. (Διαβάνεν) Να κα κεράς πιο χάνικ πράγματα ι Ιεχωβάσκε ντα να κα τσσιναβάς τι υπηρετίνας-λες επειδή νταράσα. Τθεράσα μπαρί εμπιστοσύνη λέστε ντα να κα μουκχάς ι νταρ τι τσσιναβέλ-αμέν. (Ησ. 28:​16) Προσευχίντιβασα κο Ιεχωβά για τι οδηγίνελ-αμέν. Τζανάσα ότι, άμα βοβ ισί αμέντζαρ, ατζέ-ντα η πιο ζουρανί κυβέρνηση ναστί κερέλα-αμέν τι τσσιναβάς τι ντας λατρεία αμαρέ Ντεβλές.​—Εβρ. 13:6.

8, 9. (α) Καγιά απόφαση κα χρειαζίντιβελ τι λελ ο κάθε εκ πέσκε ή πι φαμιλιάκε; (β) Σο κα βοηθίνελ εκχέ τζενές τι λελ εκ σωστή απόφαση;

⁸ Άμα η κυβέρνηση τουμαρέ τθεμέστε κα βακερέλ τι τσσιναβέν τι ντεν λατρεία ι Ιεχωβάς, μπορεί τι σκεφτίνεν τι τζαν εκχέ γιαβερέ τθεμέστε για τι ντεν ελεύθερα λατρεία. Ανταγιά ισί τουμαρί απόφαση σο καέκ γιαβέρ ναστί λέλα-λα τουμένγκε. Για τι αποφασίνελ εκ τζενό, μπορεί τι ντικχέλ σο κερντέ ο Χριστιανοί κο πρώτος αιώνας κάνα γκιλέ λέντζαρ κόντρα. Κάνα ο ντουσμάνια μουνταρντέ ι Στεφανός μπαρέντζαρ, ο μαθητές κι Ιερουσαλήμ γκιλέ σαρί κι Ιουδαία ντα κι Σαμάρεια, ντα γιαβερά ερεσλέ κι Φοινίκη, κι Κύπρος ντα κι Αντιόχεια. (Ματθ. 10:​23· Πράξ. 8:1· 11:​19) Όμως, εκ γιαβέρ τζενό μπορεί τι ντικχέλ ότι, εκ γιαβέρ φαρ σο γκιλέ κόντρα κο Χριστιανοί μερικέ τθεμέντε κο πρώτος αιώνας, ο απόστολος Παύλος αποφασιντάς μα τι νασέλ. Αλλά τσσουντάς σε κίνδυνος πι ζωή για τι βακερέλ ο λατσσέ αμπέρια ντα τι ντελ ζορ κο πφραλά οντουλέ τθεμέντε.​—Πράξ. 14:​19-23.

⁹ Σο σικλιάσα ανταλέ ιστοριένταρ; Ο σορό κι κάθε φαμιλί πρέπει τι αποφασίνελ άμα κα τζαλ εκχέ γιαβερέ τθεμέστε. Αλλά πρώτα πρέπει τι προσευχίντιβελ ντα τι σκεφτίνελ λατσσές πι φαμιλί ντα ο λατσσέ ή ο μπέτι αποτελέσματα σο κα τθερέν άμα κα νασέν. Κι απόφαση ανταγιά, ο κάθε Χριστιανός «κα βάντελ πο φορτίος». (Γαλ. 6:5) Δεν πρέπει τι κρίνας ι γιαβερέν οντουλέσκε σο κα αποφασίνεν.

10. Σο κα κερέν ο πφραλά σο ισί κο γραφείος τμήματος ντα ο πρεσβύτεροι άμα ο κυβερνήσεις κα βακερέν τι τσσιναβέν τι ντεν λατρεία ι Ιεχωβάς;

¹⁰ Σαρ κα συνεχίνεν τι ντεν λατρεία ι Ιεχωβάς άμα ο κυβερνήσεις κα βακερέν τι τσσιναβέν ο έργος; Ο πφραλά σο ισί κο γραφείος τμήματος κα βακερέν κο πρεσβύτεροι τουμαρέ κχανγκιριάκε σο τι κερέν για τι λεν πνευματικός χαμπέ ντα για τι κερέν ο συναθροίσεις ντα ο έργος. Άμα ο πφραλά κο γραφείος τμήματος ναστί κερένα λάφι ι πρεσβυτερόντζαρ, αζομάν ο πρεσβύτεροι κα βοηθίνεν τουμέν ντα σαρέ ι πφραλέν κι κχανγκιρί τι συνεχίνεν τι ντεν λατρεία ι Ιεχωβάς. Κα οδηγίνεν-τουμέν αντικάς σαρ βακερέλα η Γραφή  ντα αμαρέ έντυπα.​—Ματθ. 28:​19, 20· Πράξ. 5:​29· Εβρ. 10:​24, 25.

11. Σόσκε μπορίνενα τι αβέν σίγουροι ότι κα τθερέν σαρέ οντουλά σο χρειαζίντιβενα για τι ατσσικιαρέν ζουρανί τουμαρί πίστη, ντα σαρ κα αρακχαβέν τουμαρί Γραφή ντα ο γιαβερά έντυπα;

¹¹ Ο Ιεχωβά ντινάς πο λάφι ότι λέσκε υπηρέτες κα τθερέν σαρέ οντουλά σο χρειαζίντιβενα για τι ατσσικιαρέν ζουρανί πουμαρί πίστη. (Ησ. 65:​13, 14· Λουκ. 12:​42-44) Οτθάρ, μπορίνενα τι αβέν σίγουροι ότι λέσκι οργάνωση κα κερέλ ο πιο λατσσό για τι βοηθίνελ-τουμέν τι ατσσόν πιστοί. Τουμέν σο μπορίνενα τι κερέν; Άμα ο κυβερνήσεις κα βακερέν τι τσσιναβάς τι ντας λατρεία ι Ιεχωβάς, αρακχέν εκ λατσσό τθαν για τι γκεραβέν τουμαρί Γραφή ντα γιαβερά έντυπα. Προσοχίνεν μα τι μουκχέν ποτές ασακέ σημαντικά πράγματα​—είτε ισί τυπωμέ είτε σε ηλεκτρονική συσκευή—​τθανέστε σο μπορεί κάποιος τι αρακχέλ-λεν εύκολα. Ο κάθε εκ αμένταρ πρέπει τι κερέλ σο νακχέλα λέσκε βαστέσταρ για τι ατσσικιαρέλ πι πίστη ζουρανί.

12. Σαρ κα κανονίνεν ο πρεσβύτεροι τι αβέν ο συναθροίσεις με τρόπος σο να κα ταρτίνελ ι τζενένγκι προσοχή;

¹² Σο κα αβέλ-πες αμαρέ συναθροισιέντζαρ; Ο πρεσβύτεροι κα κανονίνεν τι αβέν ο συναθροίσεις με τρόπος σο να κα ταρτίνελ ι προσοχή αμαρέ ντουσμανίνγκι. Μπορεί τι κερέν ο συναθροίσεις σε χουρντέ όμιλοι ντα τι αλλάνεν ο σαάτι ντα ο τθαν. Κα αρακχαβέν τουμαρέ πφραλέν ντα πφενίν, άμα να κα κερέν ζουρανές λάφι κάνα τζάνα ντα κάνα νασένα. Επίσης, μπορεί τι χρειαζίντιβελ τι ιρίν σέα σο να ταρτίνενα ι προσοχή.

13. Σο σικλιάσα αμαρέ πφραλένταρ κι πρώην Σοβιετική Ένωση;

¹³ Ο πράγματα κα αβέν διαφορετικά κο κάθε τθεμ. Μερικέ τθεμέντε ο έργος μπορεί τι αβέλ-πες ελεύθερα αλλά γιαβερέντε όχι. Αλλά επειδή μανγκάσα ι Ιεχωβάς ντα μπεϊντίνασα τι κεράς λάφι λέσκε Βασιλειάκε, κα αρακχάς τρόπος τι κεράς έργος. (Λουκ. 8:1· Πράξ. 4:​29) Η ιστορικός Έμιλι Μπάραν βακερντάς για το τρόπος σο κερένας έργος ο Μάρτυρες ι Ιεχωβάσκε κι πρώην Σοβιετική Ένωση: «Κάνα η κυβέρνηση βακερντάς λένγκε μα τι κερέν λάφι ι γιαβερέντζαρ οντουλένγκε σο πακιάνα, αρχισάλε τι πουτρέν συζητήσεις πουμαρέ γειτονέντζαρ, ι τζενέντζαρ σο κερένας λέντζαρ μπουτί ντα πουμαρέ αμαλέντζαρ. Κάνα τσσουντέ-λεν φυλακή ανταλέ πραγματένγκε, ο Μάρτυρες κερένας λάφι ι Ντεβλέσκε οντουλέντε σο ισινέ κι φυλακή». Παρόλο σο η κυβέρνηση βακερντάς λένγκε τι τσσιναβέν ο έργος σο κερένας, αμαρέ πφραλά κι πρώην Σοβιετική Ένωση να τσσιναντέ. Άμα η κυβέρνηση κα βακερέλ τι τσσιναβέν τι κερέν έργος οτθέ σο μπεσένα, μακάρι τουμέν-ντα μα τι τσσιναβέν!

14. Ο εδάφιος Ψαλμός 39:1, καβά πράγμας βοηθίνελα-αμέν μα τι κεράς;

¹⁴ Τι προσοχίνεν σο βακερένα κο γιαβερά. Κάνα ο κυβερνήσεις κα βακερέν τι τσσιναβάς τι ντας λατρεία ι Ιεχωβάς, πρέπει  τι αγαβάς κάνα “ισί βακίτι μα τι κεράς λάφι”. (Εκκλ. 3:7) Δεν πρέπει τι μουτθαβάς πράγματα, σαρ για παράδειγμας ο ναβά αμαρέ πφραλένγκε, ο τθανά σο κεράσα συναθροίσεις, σαρ κεράσα έργος ντα σαρ λάσα πνευματικός χαμπέ. Δεν πρέπει τι μουτθαβάς-λεν ανταλά κο τζενέ σο κερένα μπουτί για το κράτος ή αμαρέ αμαλέντε ντα αμαρέ τζενέντε σο τζουβντιόνα είτε αμαρέ τθεμέστε είτε γιαβερέ τθεμέντε. Άμα κα κεράας-λες ανταβά, κα τσσουβάας σε κίνδυνος αμαρέ πφραλέν.​—Διαβάνεν Ψαλμός 39:1.

15. Σο κα προσπαθίνελ τι κερέλ ο Μπενγκ, ντα σο πρέπει τι κεράς;

¹⁵ Μα μουκχέν χουρντέ προβλήματα τι ανέν διχόνοια κι κχανγκιρί. Ο Μπενγκ τζανέλα ότι εκ κχερ σο νανέ ενωμέ ναστί ατσσόλα. (Μάρκ. 3:​24, 25) Να κα τσσιναβέλ τι προσπαθίνελ τι ανέλ αμένγκε διχόνοια. Αμντίνελα ότι αντικάς κα αρχίνας τι τζας κόντρα ο εκ ι γιαβερέσαρ αντίς τι τζας κόντρα λέσαρ.

16. Καβά λατσσό παράδειγμας μουκχλάς η πφεν Γκέρτρουτ Πέτσιγκερ;

¹⁶ Ατζέ-ντα ο Χριστιανοί σο ισί μπουτ μπρεσά κι αλήθεια πρέπει τι προσοχίνεν. Ντικχέν σο αβιλό-πες ντουέ χρισμέ πφενίντζαρ, με την Γκέρτρουτ Πέτσιγκερ ντα με την Ελφρίντε Λορ. Ο ντούι-ντα ισινέ φυλακή γιαβερέ πφενίντζαρ σε εκ στρατόπεδος συγκέντρωσης. Η Γκέρτρουτ αρχισάλι τι ζηλίνελ επειδή η Ελφρίντε κερέλας ομιλίες σο ενθαρρύνενας ι γιαβερέ πφενίν κο στρατόπεδος. Πιο σοράν, η Γκέρτρουτ λατζασάλι ντα μολιντάς ι Ιεχωβάς τι βοηθίνελ-λα. Βόι γραφιντάς: «Πρέπει τι σικλιάς τι δεχτίνας ότι γιαβερά τθερένα πιο μπαρέ ικανότητες ή πιο μπουτ ευθύνες αμένταρ». Σαρ νασκιαρντάς οπρά-πέσταρ ι ζήλια; Ντικχλάς ο λατσσέ ιδιότητες ντα ο σουκάρ χαρακτήρας σο τθερέλας η Ελφρίντε. Αντικάς, αβιλί πάλι αμαλίν λάσαρ. Ατσσιλέ ο ντούι-ντα τζουβντέ κο στρατόπεδος συγκέντρωσης ντα υπηρετιντέ πιστά ι Ιεχωβάς μέχρι κο τέλος πουμαρέ ζωγιάκο κι πφουβ. Άμα κεράσα ο πιο λατσσό για τι νακχαβάς ο προβλήματα σο τθεράσα αμαρέ πφραλέντζαρ, να κα μουκχάς τίποτα τι ανέλ αμένγκε διχόνοια.​—Κολ. 3:​13, 14.

17. Σόσκε πρέπει πάντα τι ντας καν κο οδηγίες;

¹⁷ Πάντα τι ντεν καν κο οδηγίες. Άμα ντάσα καν κο οδηγίες σο ντένα-αμέν ο μπεσαλήδες ντα υπεύθυνα πφραλά, κα νασάς κατά προβλήματα. (1 Πέτρ. 5:5) Για παράδειγμας, εκχέ τθεμέστε σο η κυβέρνηση βακερντάς ι πφραλένγκε τι τσσιναβέν τι κερέν έργος, ο υπεύθυνα πφραλά ντινέας ι οδηγία μα τι ντιντιόν έντυπα κο έργος. Όμως, εκ σκαπανέας οτθέ αμντίνελας ότι βοβ τζανέλας πιο λατσσές ντα ντέλας έντυπα. Καβά ισινέ ο αποτέλεσμας; Εκ ντιβές σο βοβ ντα γιαβερά πφραλά κερένας έργος, ο ασκέρια ασταρντέ-λεν. Μάλλον πελέας παλά-λέντε ντα γκιντιντέ ο έντυπα σο ντινέας. Σο σικλιάσα  ανταλέσταρ; Χρειαζίντιβελα τι ντας καν κο οδηγίες ατζέ-ντα άμα αμντίνασα ότι αμέν τζανάσα πιο λατσσές. Ο Ιεχωβά πάντα ευλογίνελα-αμέν κάνα ντάσα καν ι πφραλέν σο τσσουντάς τι τθερέν ι ευθύνη αμένγκε.​—Εβρ. 13:7, 17.

18. Σόσκε δεν πρέπει τι τσσουβάς σινανέ κανόνες;

¹⁸ Μα τσσουβέν σινανέ κανόνες. Άμα ο πρεσβύτεροι κα τσσουβέν σινανέ κανόνες, κα δυσκολίνεν ι γιαβερέν. Ο πφραλ Γιούραϊ Καμίνσκι βακερντάς σο αβιλό-πες κάνα η κυβέρνηση κι πρώην Τσεχοσλοβακία να μουκχέλας ι πφραλέν τι ντεν λατρεία ι Ιεχωβάς: «Αφού ασταρντέ ι υπεύθυνε πφραλέν ντα μπουτέ πρεσβυτερόν, μερικοί οντουλένταρ σο λιντέ ι ευθύνη κο κχανγκιριά ντα κο περιοχές αρχισάλε τι τσσουβέν πουμαρέ κανόνες ι πφραλένγκε ντα τι γραφίνεν σο τι κερέν ντα σο μα τι κερέν». Ο Ιεχωβά να ντινάς-αμέν ο δικαίωμας τι αποφασίνας ι γιαβερένγκε. Κάνα εκ τζενό τσσουβέλα σινανέ κανόνες να αρακχαβέλα πι πφραλές, αλλά προσπαθίνελα τι κερέλ κουμάντος λέσκι πίστη.​—2 Κορ. 1:24.

19. Σο-ντα τι κερέλ ο Μπενγκ, καγιά σιγουριά ντένα-αμέν ο εδάφια 2 Χρονικών 32:7, 8;

¹⁹ Ο πιο μπαρό ντουσμάνι αμαρό, ο Σατανάς ο Διάβολος, να κα τσσιναβέλ τι τζαλ κόντρα κο πιστοί υπηρέτες κι Ιεχωβάσκε. (1 Πέτρ. 5:8· Αποκ. 2:​10) Ο Μπενγκ ντα οντουλά σο τθερέλα-λεν πι βαστέστε κα προσπαθίνεν τι τσσιναβέν ι λατρεία σο ντάσα κο Ιεχωβά. Όμως, να υπαρχίντιβελα καέκ λόγος τι νταράς! (Δευτ. 7:​21) Ο Ιεχωβά ισί αμέντζαρ, ντα κα ατσσόλ αμέντζαρ ατζέ-ντα άμα ο κυβερνήσεις κα βακερέν τι τσσιναβάς τι κεράς έργος.​—Διαβάνεν 2 Χρονικών 32:7, 8.

20. Τουμέν σο κα κερέν;

²⁰ Μανγκάσα τι αβάς σαρ ο πφραλά κο πρώτος αιώνας, σο βακερντέ κο άρχοντες οντουλέ ντιβεσένγκε: «Άμα ισί δίκαιος κο γιακχά κι Ντεβλέσκε τι ασουνάς τουμέν ντα όχι ι Ντεβλές, αγαβέν-λες κορκορέ. Αμέν, όμως, ναστί τσσιναβάσα τι κεράς λάφι οντουλένγκε σο ντικχλάμ ντα ασουντάμ».​—Πράξ. 4:​19, 20.